Ogogami to Taga—Edena Bamona Ia Vara Diba?

Lagani handred momo gunanai, aonega tauna ta ia guriguri do ia ogogami lasi. Dahaka dainai? Badina ia gari ogogami dainai reana lalohadai eiava kara kereredia do idia vara bena ena turana karana Dirava ida do idia hadikaia garina. Unai be ena hereva ai ia hedinarai, ia gwau: “To egu hitolo hegeregerena sibona, aniani lau dekenai do oi henia. . . . Sedira bema lau ogogami neganai do lau henaoa, bona egu Dirava ena ladana do lau hahemaraia garina.”—AONEGA HEREVADIA 30:​8, 9.

UNAI ena anina be ogogami taudia ese mai kamonai ida Dirava idia hesiai henia diba lasi, a? Lasi! Histori ibounai lalonai Iehova Dirava ena hesiai taudia momo herea ese ia idia badinaia noho ena be ogogami ese ia havaraia mauri aukana idia haheaukalaia. Bona Iehova ese ia idia abidadama henia taudia ia lalokau henidia bona ia naridia.

Idaunegai Kamonai Taudia

Aposetolo Paulo danu be nega haida gau haida dekenai ia dabu. (2 Korinto 6:​3, 4) Ia ese danu Keriso ia do vara lasi neganai idia noho kamonai witness taudia “momo herea” ia herevalaia, idia haida be “mamoe kopina bona nanigosi kopina, dabua bamona idia karaia, idia loaloa. Idia be ogogami, . . . taunimanima idia noho lasi gabudia bona ororo dekenai idia loaloa. Kohua bona guri lalonai idia noho.”​—Heberu 11:37, 38; 12:1.

Unai kamonai taudia ta be peroveta tauna Elia. Lagani toi mai kahana medu ia diho lasi negana lalonai, Iehova ese ia ubua. Guna, Dirava ese galo ia siaidia peroveta tauna dekenai paraoa bona vamu idia mailaia. (1 King Taudia 17:​2-6) Gabeai, Iehova ese vabu ta ena paraoa bona dehoro, Elia ia ubua gaudia, be hoa dalanai ia naria bona idia ore lasi. (1 King Taudia 17:​8-​16) Ia be aniani bada lasi, to ia dainai unai peroveta tauna, hahine, bona ena mero idia mauri noho.

Unai hegeregerena mauri gaudia abia be auka neganai, Iehova ese peroveta tauna Ieremia ia naria. Babulonia taudia ese Ierusalema idia hagegea negana amo ia roho mauri, unai negai taunimanima ese aniani ‘be sikele dekenai idia tohoa guna, vadaeni mai gari danu idia ania.’ (Esekiela 4:​16) Gabeai, siti lalonai hitolo ia bada herea dainai, hahine haida ese edia natudia edia hidio idia ania. (Lalohisihisi Ena Ane 2:​20) Ena be Ieremia be dibura dekenai idia atoa badina mai gari lasi ida haroro gaukara ia karaia, to Iehova ese ia naria, dina ta ta “beredi tamona” idia henia “ela bona hanua ena beredi ibounai ia ore.”​—Ieremia 37:⁠21.

Unai dalanai, Elia hegeregerena, Ieremia ese aniani sisina ia abia. Baibel ese ita ia hadibaia lasi Ierusalema ai beredi ia ore murinai, Ieremia be dahaka eiava nega hida ia aniani. To, ita diba Iehova ese ia naria bona unai hitolo badana amo ia roho mauri.

Hari inai negai, tanobada ena kahana ibounai taunimanima idia ogogami. United Nations idia gwau, ogogami taudia hutuma bada herea be Africa dekenai. Lagani 1996 ai UN ese nius taudia idia hadibaia, idia gwau: “Africa taudia edia kahana rua amo ta be idia ogogami momokani.” Ena be mauri gaudia abia dalana be auka momokani, to edia mauri lalonai Baibel ena hakaua herevadia idia badinaia Africa taudia momo be mai edia kamonai ida Dirava idia hesiai henia, idia diba ia ese do ia naridia. Iseda tanobada dikana ena kahana ta amo haheitalai haida mani oi laloa.

Kara Maoromaoro Idia Badinaia

Michaela be Nigeria dekenai ia noho, ia be biru tauna mai ena natudia 6. Ia gwau: “Bema oiemu moni be hegeregere lasi emu ruma bese naria totona, oi kara maoromaoro be auka. To, lau koikoi totona egu lalona ese lau ia veria neganai, Efeso 4:​28 lau laloa lou, ia gwau: ‘Henaoa tauna be do ia henaoa lou lasi. To gaukara namona iena imana dekena amo do ia karaia.’ Unai dainai bema hedibagani lau davaria, sibona lau nanadaia, ‘Inai moni totona lau gaukara, a?’ ”

Michael be ma ia gwau: “Hegeregere, dina ta dala dekenai lau raka noho neganai, lau itaia motobaik ena murina kahana amo baege ta ia moru. Taria tauna lau hastopua diba lasi dainai, baege lau abia isi bona lau davaria ia be moni amo ia honu! Baege lalonai ia noho ladana amo, ena biaguna lau davaria bona baege lau henia lou.”

Daradoko Idia Dadaraia

North Africa dekenai tau ta ia gwau: “Ogogami be guri dobuna lalonai oi noho [bamona], ataiai diari oi itaia diba bona taunimanima idia raka loaloa, to oi hegeregere lasi heduru totona oi boiboi o daekau totona vadavada oi noia.” Unai dainai ita hoa lasi nega momo ogogami ese lalohisihisi bona badu ia havaraia! Dirava ena hesiai taudia danu ese ma haida edia kohu idia itaia bona reana idia laloa kara maoromaoro mauri idia badinaia ese namo do ia havaraia lasi. (Salamo 73:​2-​13 itaia.) Edena bamona unai lalohadai ita koua diba?

Peter, West Africa tauna ta, be lagani 19 lalonai gavamani ena gaukara ia karaia murinai ena gaukara amo idia hadokoa. Hari ena ritaea monina sisina amo ena mauri gaudia ia hoia diba. Peter ia gwau: “Lau lalohisihisi neganai, Baibel bona Watch Tower Society ena buka amo lau duahia gaudia lau laloa lou. Inai tanobada gunana be kahirakahira do ia ore, bona tanobada namona ita naria noho.

“Danu, 1 Petero 5:​9 lau laloa, ia gwau: ‘Emui abidadama dekenai do umui gini goada, vadaeni umui ese Satani do umui koua. Namo umui diba, emui Keristani varavara taudia tanobada kahana ibounai dekenai, be hisihisi inai bamona idia abia noho.’ Unai dainai lau sibona ese hekwakwanai lau haheaukalaia lasi. Unai hereva ese lau idia durua lalohisihisi bona daradoko idia havaraia lalohadai lau dadaraia totona.”

Peter be ma ia gwau: “Danu, tanobada dekenai ia noho neganai, Iesu ese hoa karadia momo ia karaia, to taunimanima ta ena kohu ia habadaia lasi. Dahaka dainai lau laloa ia ese egu kohu do ia habadaia?”

Guriguri Ena Siahu

Guriguri amo Iehova Dirava kahirakahira lao karana be lalohadai kereredia koua dalana ma ta. Lagani 1960 ai, Mary be Iehova ena Witness hahinena ai ia lao neganai, ena ruma bese ese ia idia dadaraia. Ia headava lasi bona hari ena mauri lagani be 50 ia hanaia neganai, ia manoka bona tauanina dalanai ia be kohu momo lasi. To, mai ena lalo-goada ida Keristani hesiai gaukara ia karaia noho.

Mary ia gwau: “Lau lalohisihisi neganai, Iehova lau guriguri henia. Lau diba ia ese lau do ia durua bada, ma ta ena heduru be unai bamona lasi. Lau dibaia Iehova oi abidadama henia neganai, ia ese oi do ia durua. Nega ibounai King Davida ena hereva, Salamo 37:25 ai lau laloa, ia gwau: ‘Gunaguna lau be mero, harihari lau be buruka, to nega ta kara maoromaoro tauna ta be Dirava ese ia rakatania, a? Lasi momokani, nega ta lau itaia lasi. Bona tau namona ena natuna be nega ta idia hitolo, a? O iena natuna ese aniani totona taunimanima idia noia, a? Lasi, nega ta lau itaia lasi. Lasi momokani.’

“Gima Kohorona lalonai edia sivarai idia hedinarai tadikaka bona taihu burukadia edia haheitalai ese lau idia hagoadaia danu. Iehova Dirava ese idia ia durua, unai dainai lau diba lau danu do ia durua noho. Ia ese egu gaukara, fufu [nadua maniota] lau hoihoilaia gaukara maragina ia hanamoa, bona dina ta ta mauri durua gaudia lau abia diba. Nega haida egu moni ia ore gwauraia bona lau laloa dahaka do lau karaia neganai, Iehova ese ta ia siaia, harihari gauna ia henia bona ia gwau, ‘Taihu e, mani inai oi abia.’ Iehova ese nega ta lau ia rakatania lasi.”

Baibel Stadi Karana Ena Anina

Iehova ena Witness taudia ese Dirava ena Hereva, Baibel, stadilaia karana idia laloa bada, edia huanai idia noho ogogami taudia danu. John, ena mauri lagani be 60 bona ia be painia tauna (ful-taim Basileia ia harorolaia tauna) bona kongregesen ena hesiai tauna ta. Ia be ruma bese 13 ida mai ena floa rua ruma dikana ai ia noho. Ena daiutu be floa ginigunana ena raka gabuna idia hapararaia ena kahana ta. Unuseniai sea gunadia rua idia noho bona teibolo ta, ia latanai Baibel stadi durua buka momo herea idia noho. Ia be geda latanai ia mahuta.

Guna, John ese dina ta ta beredi hoihoilaia amo K1.00 bamona ia abia, to tano dekenai uiti mailaia idia taravatua neganai, ena mauri durua gaukarana ia haboioa. Ia gwau: “Nega haida mauri ia auka momokani, to painia gaukara lau karaia noho. Iehova ese lau ia naria. Lau davaria diba gaukara lau karaia bona tau ta dekenai lau tabekau lasi lau idia naria eiava idia ubua totona, ena be kongregesen lalonai tadikaka be lau idia durua bada. Lau idia durua gaukara lau tahua totona bona nega haida moni idia henia harihari gauna bamona.

“Nega lau atoa Baibel bona Watch Tower Society ena buka lau duahidia totona. Dabai momokani, ruma dekenai regerege be lasi neganai lau stadi bona hanuaboi ai paoa ia noho neganai lau duahiduahi. Lau diba sibona egu stadi lau karaia noho be gau badana.”

Mauri Totona Natudia Hadibaia

Daniel be dogae bona ena natudia be 6. Lagani 25 lalonai ia karaia gaukarana be lagani 1985 ai ia haboioa, to sitoa naria gaukarana ia davaria. Ia gwau: “Ruma bese dekenai mauri ia auka momokani. Hari dina ta ta nega tamona sibona ai aniani diba. Nega ta, dina toi lalonai ai aniani lasi. Ranu sibona ai inua ai mauri noho totona.”

Daniel be elda tauna kongregesen lalonai. Ia gwau: “Nega ta Keristani hebou lau reaia lasi, bona tiokratik gaukara lalonai lau bisi bada. Kingdom Hall dekenai gaukara ta idia karaia neganai, lau danu lau noho. Bona mauri ia auka momokani neganai, Petero ena hereva Iesu dekenai, Ioane 6:​68 ai lau laloa lou, ia gwau: ‘Lohiabada e, ai be daika dekenai do ai lao?’ Bema Iehova lau hesiai henia lasi, edeseni do lau lao? Paulo ena hereva Roma 8:​35-​39 ai ese lau idia hagoadaia danu badina idia hahedinaraia gau ta ese Dirava bona Keriso edia lalokau amo ai idia kokia diba lasi. Unai lalohadai be egu natudia dekenai lau hadibaia. Hanaihanai idia lau hadibaia, Iehova do ita rakatania lasi.” Daniel ena lalo-goada bona hanaihanai ruma bese stadi ia karaia ese ena natudia ia durua bada.

Hariharibada Karana

Reana ta ia laloa ogogami momokani taudia be Basileia gaukara ena kontribusen monina idia henia diba lasi. To unai be momokani lasi. (Luka 21:​1-4 itaia.) Ghana dekenai Witness taudia haida, biru taudia unai, ese edia tano ena kahana ta idia atoa siri Dirava ena Basileia gaukarana durua totona. Unai kahana amo idia abia huahua idia hoihoilaia neganai, unai moni be Basileia gaukarana totona idia atoa, ena kahana ta be unai gabu ena Iehova ena Witness taudia edia Kingdom Hall dekenai kontribusen totona idia henia.

Joan, Central Africa dekenai ia noho hahinena, be painia ta. Ia ese beredi ia hoihoilaia, ena adavana, ena tauanina ena kahana be ia mase tauna, bona taunimanima ma hani ia naria totona. Ena kongregesen be Kingdom Hall totona helai gaudia idia ura abia neganai, Joan ena ruma bese ese edia lalona idia hadaia ruma dekenai ia noho moni ibounai do idia henia. Unai dainai idia dekenai moni ia noho lasi. To, kerukeru ta ese ena nega daudau ia abia abitorehai ia henia lou, bona guna idia laloa unai moni ia boio momokani vadaeni idia abia lou!

Joan ia moale bona moni dainai ia lalo-hekwarahi bada lasi. “Guriguri amo Iehova dekenai lauegu mauri ena hekwarahi lau herevalaia, bena haroro gaukara dekenai lau lao. Ai diba reana inai tanobada lalonai noho namona do ai davaria lasi. To, ai diba danu, Iehova ese ai do ia naria.”

Idia Gaukara Goadagoada

Taunimanima idia diba Iehova ena Witness taudia ese ta ta idia lalokau henia. (Ioane 13:35) Mai edia moni taudia ese edia Keristani tadikaka, ogogami taudia unai, idia durudia. Nega momo unai be harihari gauna bona nega haida gaukara idia henidia.

Mark, Congo dekenai ia noho, be lepera gorere tauna. Unai gorere ese ena aena bona ima kwakikwaki ia hadikadia. Raka totona raka audia ia gaukaralaia. Mark ese Iehova ia hesiai henia matamaia neganai, ena mauri ia haidaua. Guna bamona ena aniani be taunimanima amo ia noia lasi, to sibona ena uma gabu ia karaia. Danu ia ese biriki ia karaia bona ia hoihoilaia.

Ena be ia gorere, to Mark be ia gaukara goadagoada. Gabeai tano sisina ia hoia bona ruma maragina ia haginia. Hari inai negai, Mark be kongregesen elda tauna ta bona ia noho taoni dekenai taunimanima ese idia matauraia. Hari ia ese ogogami taudia ma haida ia durudia.

Momokani, gabu momo dekenai gaukara davaria be auka herea. Keristani elda ta, Watch Tower Society ena brens opesi ta Central Africa ai ia gaukara tauna, be inai ia torea: “Iniseniai tadikaka momo be gaukara lasi. Haida be sibodia edia gaukara idia havaraia toho, to unai be auka. Momo idia laloa herevana dahaka do idia karaia to hekwakwanai do idia davaria, unai dainai moni idia laloa bada lasi to painia gaukara idia karaia. Unai idia karaia dainai, momo idia davaria hahenamo momo idia abia, bema gaukara ta mai ena moni sisina eiava moni lasi idia karaia, unai bamona hahenamo do idia abia lasi.”

Iehova ese Ena Taunimanima Ia Naria

Iesu Keriso ese sibona ia gwauraia, ia gwau: “Uda sisia be mai edia nadi matuna, bona ataiai manu be mai edia ruma, to Taunimanima ena Natuna be iena kwarana atoa gabuna lasi.” (Luka 9:58) Unai hegeregerena, aposetolo Paulo ia torea: “Dina ibounai ia mai bona harihari ai be hitolo, ai be ranu mase, ai be dabua lasi, ai idia botaia, bona ai be noho ruma ta lasi.”—1 Korinto 4:11.

Iesu bona Paulo ruaosi ese ogogami maurina idia abia hidi, unai amo edia haroro gaukarana do idia karaia goadagoada diba. Hari inai negai Keristani taudia momo be idia ogogami badina dala ma ta be lasi. To, idia ese Baibel ena hakaua herevadia idia badinaia bona mai lalo-goada ida Dirava idia hesiai henia. Edia mauri lalonai Iesu ena hagoadaia herevana ia guguru neganai, idia diba Iehova ese ia lalokau henidia bada, Iesu ia gwau: “To umui ese Dirava ena Basileia bona iena kara maoromaoro do umui tahua guna, vadaeni unai gau ibounai danu umui dekenai dohore ia henia.” (Mataio 6:25-33) Ma danu, Dirava ena hesiai taudia, idia ogogami taudia unai, idia diba momokani “Lohiabada ena hanamoa sibona ese, kohu momo oi dekenai ia henia noho.”​—Aonega Herevadia 10:22.

[Footnote]

[Box on page 6]

Daidia be ‘Dirava Ena Hereva Idia Badinaia’ Taudia?

LAGANI 1994 Gallup ripotina ia hahedinaraia America taudia 96 pesen ese “Dirava eiava lauma badana ta idia abidadama henia.” Danu U.S.News & World Report ia gwau “United States dekenai taunimanima ta ta totona idia haginia dubu edia averes ese Tanobada bese ibounai edia averes ia hanaia.” Ena be unai bamona helaga toana idia hahedinaraia, to nega daudau ripoti idauidau ia karaia tauna George Gallup, Jr., ia gwau: “Hereva momokani be inai, America taudia momo herea be idia diba lasi dahaka idia abia dae eiava dahaka dainai idia abia dae.”

Ripoti idia hahedinaraia danu taunimanima momo edia lalohadai tomadiho dekenai bona edia kara be idau momokani. Hegeregere, toretore tauna Jeffery Sheler ia gwau “taunimanima edia noho dalana idia stadilaia taudia idia itaia raskol karadia idia vara momo gabudia dekenai taunimanima ese danu tomadiho idia laloa bada, bona idia badinaia auka.”

Unai ita hoalaia lasi. Badina be dahaka? Badina nega daudau vadaeni, aposetolo edia negai, Paulo ese ena Keristani tadikaka ia hadibaia namona be “idia gwau Dirava idia diba, to edia kara dekena amo idia ese Dirava idia negea” taudia dainai do idia naria. (Tito 1:16) Ma danu, Paulo ese tau matamata Timoteo dekenai ia gwau “nega ena dokona” neganai taunimanima ese “Dirava badinaia kara be toana sibona do idia hedinaraia, to iena anina momokani do idia negea.”​—2 Timoteo 3:​1, 5.

To, Keristani taudia korikoridia idia gaukara goada Iesu Keriso ena hahegani idia badinaia totona. Ia gwau: “Umui lao, bese ibounai be diba tahua taudia do umui halaoa.” (Mataio 28:19) Unai amo idia be ‘Dirava ena hereva idia kamonai kava lasi, to idia badinaia’ taudia ai idia lao.​—Iamesi 1:22.

[Picture on page 7]

Tanobada hegegemadai taunimanima ese Baibel stadi idia laloa bada