“Ranu Dobuna” Oi Veria Daekau

BAIBEL ena aonega hereva ta ia gwau: “Taunimanima edia laloa gaudia be hunia, ranu dobuna bamona, to mai ena diba bada tauna ese, unai laloa gaudia ia davaria diba.” (Aonega Herevadia 20:5) Baibel negadiai ranu abia be auka, hari inai nega ena tano momo bamona lasi. Iesu be Samaria hahinena ia hereva henia neganai, ia be Iakobo ena ranu guri amo ranu ia veria daekau, unai ranu guri ena dobu be mita 23 bamona!​—Ioane 4:​5-​15.

Aonega Herevadia 20:5 ia hahedinaraia bamona, ta ena lalona ai ia noho lalohadai bona hemami ita veria daekau mai eda lalo-parara ida be ranu guri amo ranu ita veria daekau ena hekwarahi hegeregerena. Unai be momokani mauri ena kahana idauidau lalonai. Hegeregere, reana taunimanima haida oi diba lagani momo lalonai diba bona aonega idia habadaia. Bema unai bamona taudia edia kara be ma haida dekenai heduru herevadia idia henia lasi, reana edia lalona oi veria be namo. Oi hahedinaraia oi laloa bada, henanadai oi henia, bona mai hemataurai ida diba oi tahua neganai, unai be hegeregere oi be emu baketi oi atoa diho aonega ena guri dobuna dekenai.

Aonega Herevadia 20:5 ena sisiba be mai anina bada ruma bese lalonai danu. Nega momo, hahine idia gwau: “Egu adavana ese ena hemami ia gwauraia lasi lau dekenai!” Reana tau ia gwau: “Egu hahine ese lau ia hereva henia lasi!” Unai negadiai, lalo-parara ita gaukaralaia adavana ena kudouna dekenai idia noho lalohadai ita veria totona. Mai hemataurai henanadaidia (Hari dina oi hekwarahi bada, a? Dahaka ia vara? Edena bamona oi lau durua diba?) ese edia lalohadai idia hahedinaraia herevahereva dalana ia kehoa. Unai bamona lalo-parara hahedinaraia karana ese headava ia hagoadaia, tau bona hahine ese namo idia abia totona.