Iehova Ena Ura Idia Karaia

Sibona Ena Ura Dadaraia Bona Badinaia Karana Ena Haheitalai Ta

BIRU tauna matamata ta ena ladana be Elisaia, dina ta, tano ia makohia dinana ta unai, be dina badana ai ia lao ena mauri lalonai. Uma gabu dekenai ia gaukara noho lalonai, Elia, Israela ena peroveta tauna badana, ese Elisaia ia vadivadi henia. Reana Elisaia ia laloa, ‘Dahaka dainai lau ia vadivadi henia?’ Ia naria daudau lasi haere abia totona. Elia ese ena dabua badana be Elisaia latanai ia atoa, ia hahedinaraia nega ta Elisaia ese ena dagi do ia abia. Elisaia ia laloa lasi unai be gau maragina. Maoromaoro, ena uma ia rakatania Elia ena durua tauna ai do ia lao totona.​—1 King Taudia 19:19-​21.

Lagani 6 bamona murinai, nega ia ginidae Elia do ia lao totona. Ia lao ena sivarai be idia gwauraia Heberu Revarevadia edia “sivarai mai siahuna ta.”

Elia Ia Hegaegae Lao Totona

Elia ia ura ena vadivadi ginigabena do ia karaia Betele, Ieriko, bona Ioridane dekenai. Unai ena anina be kilomita momo do ia raka, ororo dikadia ataiai danu. Unai laolao ena kahana ta ta dekenai, Elia ese Elisaia ia hagoadaia do ia noho totona. To Elisaia ia ura ena biaguna ia bamoa ela bona dokona.​—2 King Taudia 2:​1, 2, 4, 6.

Betele bona Ieriko dekenai idia noho neganai, “peroveta taudia” be Elisaia dekenai idia lao.a Idia nanadaia, idia gwau, “Oi diba hari dina Lohiabada ese oiemu biaguna oi dekena amo do ia abia lao?” Ia haere, ia gwau, “Io, lau diba, to lau ura lasi ita herevalaia.”​—2 King Taudia 2:​3, 5.

Unai murinai Elia bona Elisaia be idia lao Ioridane Sinavai dekenai. Ioridane dekenai idia ginidae neganai, Elia ese hoa karana ta ia karaia bona peroveta taudia 50 be daudau sisina amo idia raraia noho. “Elia ese iena dabua badana ia abia, ia lokua, bona dabua dekenai sinavai ranu ia botaia. Vadaeni sinavai ranu be ia parara, ranu be kahana ia lao, bona kahana ia lao, bona tano kaukau ia noho. Unai tano kaukau dekenai Elia bona Elisaia ese sinavai idia raka hanaia.”​—2 King Taudia 2:8.

Idia raka hanaia murinai, Elia ese Elisaia ia hamaoroa, ia gwau, “Oi dekena amo Lohiabada ese lau ia do abia daekau lasi neganai, lau do oi noia, bona oiemu ura gauna oi dekenai do lau henia.” Elisaia ese Elia ena siahu ena “kahana rua” (NW) ia noia—unai be, vara guna merona ia abia ahuna rua hegeregerena. Momokani, Elisaia ese Elia ia matauraia bada vara guna merona be ena tamana ia matauraia bamona. Ma danu, Elia murinai, Iehova ena peroveta tauna ai Israela dekenai idia horoa vadaeni. Unai dainai ena noinoi ese ia hahedinaraia ia be sibona ia laloa bada lasi bona unai noinoi ia maoro. To, Elia ia diba Iehova sibona ese unai noinoi gauna do ia henia diba dainai, mai hemataurai ida ia gwau: “Inai be gau aukana ta oi noia vadaeni.” Ma ia gwau: “To Lohiabada ese lau ia abia daekau neganai, bena lau oi itaia, oiemu noia gauna do oi abia, to bema lau oi itaia lasi neganai, oiemu noia gauna do oi abia lasi.” ​—2 King Taudia 2:​9, 10; Deuteronomi 21:17.

Unai ese Elisaia ena ura, ena biaguna ia rakatania lasi urana, ia habadaia. Vadaeni, “lahi kariota ta, bona lahi hosidia” idia hedinarai. Elisaia ena vairana ai, koehiriri ese Elia ia abia daekau—hoa dalanai gabu ma ta dekenai Elia ia abia lao.b Elisaia ese Elia ena dabua badana ia abia bona Ioridane Sinavai ena isena dekenai ia raka lao. Sinavai ena ranu ia botaia, ia gwau: “Lohiabada, Elia ena Dirava be edeseni?” Ranu be ia parara, unai ese ia hahedinaraia goevagoeva Dirava ese Elia ia abia hidi Elia ena dagi abia totona.​—2 King Taudia 2:​11-​14.

Ita Dibaia Gauna

Elisaia idia boiria Elia danu gaukara bada do ia karaia neganai, maoromaoro ena uma gabu ia rakatania Israela ena peroveta tauna badana ia hesiai henia totona. Toana be, ena gaukara haida be maragi, badina taunimanima idia diba, ia be ‘Elia ena imana dekenai ranu ia bubua tauna.’c (2 King Taudia 3:​11, NW) To, Elisaia ia laloa ena gaukara be hahenamo ta, bona Elia ia badinaia momokani.

Hari, Dirava ena hesiai taudia momo be unai bamona, sibona edia ura dadaraia karana idia hahedinaraia. Haida be edia “uma,” edia gaukara, idia rakatania, idau gabu dekenai sivarai namona idia harorolaia totona eiava Betele ai idia gaukara totona. Haida be idau tanodia dekenai idia lao Society ena ruma haginia gaukarana durua totona. Momo ese ita gwauraia gaukara maragidia idia abia dae. To, Iehova ena hesiai gaukara ia karaia tauna ta lasi ena gaukara be anina lasi. Iehova ese mai edia ura ida ia idia hesiai henia taudia ia laloa bada, bona sibona edia ura idia dadaraia karana do ia hanamoa.​—Mareko 10:29, 30.

Elisaia ese Elia ia badinaia ela bona dokona. Ia ura lasi peroveta tauna burukana ia rakatania ena be dala ia kehoa unai ia karaia totona. Momokani, ia be Elia ena turana namona ai ia lao dainai ia hahedinaraia lalokauna be hamoalea gauna ta. Hari, Dirava ena hesiai taudia idia gaukara goada edia hetura karana Dirava dekenai idia hagoadaia totona bona edia tadikaka kahirakahira dekenai idia lao. Lalo-tamona karana dainai hahenamo do idia abia, badina Baibel be Iehova ia herevalaia, ia gwau: “Oi dekenai idia abidadama henia taudia, be oi ese unai taudia oi durua noho.”​—2 Samuela 22:⁠26.

[Footnotes]