Edena Bamona Vaira Negana Oi Ura Oiemu Natudia Totona?

OIEMU natudia be davana bada harihari gauna bamona oi laloa, a? (Salamo 127:3) Eiava oi laloa idia oi naria be metau gauna sibona moni dalana ai, bona namo do oi havaraia o lasi oi daradaralaia, a? Natudia naria karana amo moni do oi haboua lasi, to moni do oi henia ela bona sibona idia naria diba. Davana bada harihari gauna oi naria dalana oi hegaegaelaia namonamo hegeregerena, natudia naria karana danu oi hegaegaelaia be namo.

Hebogahisi tama sina idia ura edia natudia edia mauri be badina aukana latanai do idia haginia. Ena be inai tanobada dekenai gau dikadia bona lalohisihisi gaudia idia vara, to tama sina ese gau momo idia karaia diba edia natudia idia gimaia totona. Werner bona Eva, hereva ginigunana lalonai ai sivarailaia taudia mani oi laloa.a

Tama Sina ese Idia Laloa Bada Neganai

Werner ia gwau ena tama sina ese laloa lasi karana idia hahedinaraia lasi, to mai momokani ida sikuli dekenai idia vara gaudia idia tahua. “Lau dekenai idia henia heduru hereva namodia lau laloa bada, bona lau idia lalokau henia bona lau idia durua noho mamina lau abia. Idia be tama sina mai edia kara auka sisina, to lau diba idia be egu turadia momokani.” Bona Eva be ena sikuli gaukarana dainai ia lalohisihisi bada ela bona ia lalo metau bona ia mahuta diba lasi neganai, ena tama sina, Francisco bona Inez, ese nega bada idia henia ia ida idia herevahereva totona, bona idia durua ena lalohadai ia hamaoromaoroa lou bona lauma dalana ai ia namo lou totona.

Edena bamona Francisco bona Inez ese edia natudia idia gimaia bona tau bona hahine edia maduna huaia totona idia hegaegaelaidia? Edia natudia be idia maragi negana amo, unai lalokau tama sina ese hanaihanai idia ida dina ta ta ena gaukara idia karaia hebou. Inez bona Francisco be idia bada vadaeni turadia idia hebamo henia sibona lasi, to herevana edeseniai idia lao, edia natudia idia abia lao danu. Lalokau tama sina bamona, edia natuna mero bona natuna kekeni dekenai hakaua sisiba namodia idia henia. Inez ia gwau: “Idia ai hadibaia edia ruma idia naria, moni idia naria namonamo, bona sibona edia dabua idia naria totona. Bona idia ruaosi ai durua moni gaukara idia abia hidi totona, bona nega tamona lauma gaudia bona maduna ma haida idia naria namonamo totona.”

Tama sina ese edia natudia idia diba namonamo, bona hakaua sisibana idia henia be gau badana! Unai oi karaia diba daladia toi mani ita tahua: (1) Emu natudia ese moni gaukara namona do idia abia hidi totona oi durudia; (2) sikuli dekenai bona gaukara gabuna dekenai do idia davaria lalo-hekwarahi idia haheaukalaia totona oi hegaegaelaidia; (3) lauma gaudia idia tahua karana oi hahedinaraia.

Moni Gaukara Namona Idia Abia Hidi Totona Oi Durudia

Tau ta ese ena moni gaukara dekenai nega bada ia henia, bona unai gaukara be mai anina ena moni dekenai, unai dainai, gau badana be tama sina ese edia natudia ta ta ena ura bona ena kara idia diba namonamo. Ena lalona ia goada tauna ta lasi be ia ura ma haida dekenai metau badana ia henia dainai, namona be tama sina idia laloa namonamo, edena dala ai edia natuna idia durua diba ia sibona bona ruma bese ia naria totona. Oiemu natuna ese mauri namona ia abia totona gaukara ta ia dibaia be namo, a? Lalokau tama o sina momokanina bamona, namona be oi hekwarahi noho oiemu natuna ese gaukara goadagoada urana, diba abia urana, bona ma haida ia tura henia namonamo karana ia dibaia totona.

Nicole mani oi laloa. Ia gwau: “Egu tama sina idia ura idia ida edia hagoevaia bisinesi dekenai lau gaukara. Idia gwau namona be lau abia monina amo, kahana lau henia ruma gaudia edia davana karaia totona, bona ia do noho monina do lau gaukaralaia eiava do lau haboua. Unai amo maduna huaia dalana lau dibaia, bona gabeai lau ia durua bada.”

Dirava ena Hereva, Baibel, ia gwau lasi ta be edena bamona moni gaukarana ia abia hidi be namo. To heduru herevadia haida ia gwauraia. Hegeregere, aposetolo Paulo ia gwau: “Bema tau ta ese gaukara ia karaia lasi neganai, aniani ta umui henia lasi.” Tesalonika Keristani taudia ia tore henia neganai, ma danu ia gwau: “Ai kamonai umui haida be umui gaukara lasi, to haida edia gau bona edia kara umui herevalaia kava momo sibona. Lohiabada Iesu Keriso ena ladana dainai, inai bamona idia karaia noho taudia dekenai ai hereva mai goada danu, bona ai sisiba henidia, ai gwau, ‘Mai manau danu do umui gaukara, umui noho namonamo, bona umui sibona emui aniani do umui davaria.’ ”​—2 Tesalonika 3:​10-12.

To, moni gaukara ia davaria bona moni habadaia karana sibona ese mauri namona do ia havaraia lasi. Gabeai, dagi idia tahua goadagoada taudia momo do idia lalohisihisi bona reana idia itaia ‘lai idia lulua kava.’ (Hadibaia Tauna 1:14) Edia natudia be ladana bada eiava idia taga totona idia hagoadaia be namo lasi, to namona be idia durudia idia be aposetolo Ioane ese Dirava ena lauma ena siahu amo ia torea herevadia edia aonega idia laloa totona, ia gwau: “Tanobada do umui ura henia lasi, bona tanobada ena gaudia danu do umui ura henia lasi. Bema tanobada umui ura henia noho neganai, Tamana Dirava umui ura henia lasi inai. Badina be tanobada gaudia ibounai, tauanina ena ura dikadia, matabodaga ena ura dikadia, bona hekokoroku, inai gaudia be Tamana Dirava dekena amo idia mai lasi. Idia be tanobada dekena amo idia mai noho. Tanobada, mai ena gau dikadia, taunimanima idia ura dikadika gaudia, be kahirakahira do idia ore. To Dirava ena ura ia karaia noho tauna be do ia noho ela bona hanaihanai.”​—1 Ioane 2:​15-17.

Edena Bamona Edia Lalona Oi Hagoadaia Diba?

Tama sina e, spot gadara ia hadibaia tauna hegeregerena umui kara be namo, ani? Ia ese spot gadara taudia ia hadibaia neganai, edia heau karana eiava edia roho karana ia hanamoa toho sibona lasi. Reana, lalohadai kerere idia hanaia totona idia ia durua, bona unai amo edia lalona ena goada ia durua danu. Oi ese edena bamona oiemu natudia do oi hagoadaia bona ha-uraia?

Rogério, ena mauri lagani be 13 mero matamatana oi laloa. Ena tauanina ia bada ia lao dainai ena lalona be ia hekwarahi sibona lasi, to ena tama sina idia lalo-tamona lasi bona ia idia laloa lasi dainai, iena lalona ia hisihisi danu. Unai bamona matamata taudia oi durua totona, dahaka oi karaia diba? Ena be lalo-hekwarahi bona gau dikadia iboudiai amo oiemu natuna oi gimaia diba lasi, to oiemu maduna oi negea lasi. Mai gari kava lasi, to mai lalo-parara ida oi matahakani henidia, bona nega ibounai oi laloatao natudia ta ta be idia idau. Bema hebogahisi bona lalokau oi hahedinaraia, matamata tauna do oi durua bada noho namo ena mamina ia abia totona. Bema unai oi karaia, ia tubu daekau neganai, reana do ia lalo-goada bona sibona do ia matauraia.

Herevana sibona emu tama sina ese oiemu lalona idia hagoadaia eiava lasi, gau toi ese oi do idia durua, heduru ia henia tamana o sinana korikorina ai oi lao totona: (1) Namo lasi oiemu hekwarahi oi laloa sibona dainai, oiemu natuna ena hekwakwanai, edia toana be idia be gau maragidia sibona, oi laloa lasi; (2) dina ta ta ibounai mai moale ida mai anina bada gaudia umui herevalaia toho; (3) hekwakwanai hanamoa bona taunimanima kara henia totona lalo-goada mamina oi havaraia.

Ena matamata negana ia laloa lou neganai, Birgit ia gwau: “Oiemu ura hegeregerena, taunimanima oi haidaua diba lasi lau dibaia. Egu sinana be lau ida ia herevahereva namonamo bona ia gwau, bema ma ta dekenai lau ura lasi gauna ta lau itaia, namona be edia kara lau tohotohoa lasi. Danu, ia gwau, sibona egu kara haidaua totona lau do matamata neganai lau karaia be namo.”

To, oiemu natudia be moni gaukara idia abia bona edia lalona ia goada sibona be ia hegeregere lasi. Sibona oi nanadaia, ‘Lau laloa, tama sina edia gaukara be maduna ta Dirava amo, a?’ Bema oibe, do oi ura lauma dalana ai oiemu natudia oi naria.

Lauma Gaudia Idia Tahua Totona, Oi Durua Daladia

Ororo dekenai ia haroro neganai, Iesu Keriso ia gwau: “Idia diba lauma gaudia idia tahua be namo taudia idia moale, badina be guba basileiana be idia edia.” (Mataio 5:⁠3, NW) Lauma gaudia idia tahua ena anina be dahaka? Tama sina ese Iehova Dirava abidadama henia karana dekenai haheitalai namona idia hahedinaraia neganai, edia natudia idia durua bada. Aposetolo Paulo ia gwau: “Tau ta bema Dirava ia abidadama henia lasi neganai, ia hegeregere lasi Dirava ena ura do ia badinaia. Badina be bema tau ta be Dirava kahirakahira ia ura lao neganai, ia ese Dirava do ia abidadama henia guna, Dirava be ia mauri noho. Bona unai tau ena abidadama be inai bamona: Dirava idia tahua taudia ibounai, be davana namona Dirava ese do ia henidia.” (Heberu 11:⁠6) Abidadama be mai ena anina korikori totona, guriguri be gau badana. (Roma 12:12) Bema oi abia dae lauma gaudia oi tahua be namo, Dirava amo hakaua sisibana do oi tahua, Israela ena ladana bada Hahemaoro Tauna Samson ai ia lao merona ena tamana ese ia karaia hegeregerena. (Gunalaia Taudia 13:⁠8) Do oi guriguri sibona lasi, to Dirava ese ena lauma amo ia havaraia Herevana, Baibel, amo heduru do oi tahua.​—2 Timoteo 3:​16, 17.b

Ena be do oi hekwarahi bada, hakaua sisiba namona, lalona hagoadaia karana, bona lauma dalana ai heduru oi henia totona, tama sina edia gaukara be mai ena davana namona. Tamana ta mai ena natudia rua Brazil dekenai, ia gwau: “Egu natudia idia noho lasi lau laloa diba lasi. Gau namodia momo idia danu ai karaia diba.” Natudia ese kara namodia idia karaia ia herevalaia neganai, edia sinana ia gwau: “Nega ibounai ai noho hebou, bona moale mamina ai havaraia toho. Bona, gau badana be, nega ibounai aiemai natudia totona ai guriguri.”

Priscilla ese hekwakwanai idia vara neganai, iena tama sina ese ia dekenai idia hahedinaraia lalokau bona haheauka karadia ia herevalaia. Ia gwau: “Idia be egu turadia korikoridia bona gau ibounai dekenai lau idia durua. Lau be kekeni neganai, lau mamia momokani ‘Dirava ena harihari gauna’ bamona lau idia kara henia.” (Salamo 127:⁠3) Ma tama sina momo hegeregerena, namona be nega oi atoa oiemu natudia ida Baibel bona Keristani bukadia ma haida oi duahia totona, ani? Mai hemami namona ida Baibel ena sivarai bona ena hakaua herevadia umui herevalaia neganai, oiemu natudia do ia durua idia lalo-goada totona bona vaira negana ena helaro korikorina idia dogoatao totona.

Natudia Ibounai Do Idia Noho Namo Negana

Ena be natudia momo edia vaira negana ena toana be ia dika, to Dirava ena Hereva ia gwauhamata kahirakahira inai tanobada be taunimanima edia noho gabuna namona ai do ia lao. Namona be tama sina ese Dirava ia gwauhamatalaia tanobada matamatana dekenai, edia natudia edia namo do idia lalo-hekwarahilaia lasi negana mani oi laloa! (2 Petero 3:13) Inai peroveta herevana ena guguru negana oi laloa toho, ia gwau: “Uda sisia bona mamoe, be do idia noho hebou mai maino danu, bona taiga be nanigosi danu do idia hekure hebou. Boromakau natuna bona laiona natuna be do idia aniani hebou, bona taunimanima ena natuna maragina ta ese do ia hakaudia.” (Isaia 11:⁠6) Hari inai negai danu, lauma dalana ai taunimanima edia noho namo idia gwauraia herevadia be Iehova idia hesiai henia taudia bogaraginai idia guguru. Edia bogaraginai Dirava ena henari mai ena lalokau do oi davaria. Bema Dirava lalokau henia karana oi hahedinaraia, oi diba momokani Iehova ese oiemu hemami, oi be tamana o sinana dainai oi abia hemami, ia lalo-pararalaia bona oi do ia durua oiemu lalo-hekwarahi bona oi davaria hahetoho oi haheaukalaia totona. Ena Hereva oi stadilaia bona Basileia helarona oi dogoatao.

Haheitalai namona oi hahedinaraia karana amo oiemu natudia oi durua mauri hanaihanai dalana ai idia raka totona. Bema Iehova Dirava dekenai oi tabekau, oiemu vaira negana bona oiemu natudia edia danu ese umui laloa gaudia iboudiai do ia hanaia. Oi lalo-goada, Salamo torea tauna ia lalo-goada hegeregerena ia gwau: “Oiemu moale be Lohiabada dekena amo do oi tahua, vadaeni ia ese, oi ura henia gaudia oi dekenai do ia henia.”​—Salamo 37:⁠4.

[Footnotes]