Oi Dekenai Dirava be Momokani, A?

EMU lalona idia hahisia hekwakwanaidia oi davaria neganai, guriguri amo Iehova oi hereva henia haraga, a? Bema unai bamona oi karaia, oiemu hemami be lauma tauna korikorina ta oi hereva henia, a?

Iesu Keriso be ena Tamana guba dekenai ia gwauraia, ia gwau: “Lau ia siaia Diravana be momokani.” (Ioane 7:28) Oibe, Iehova Dirava ia noho momokani, bona ia ita guriguri henia be hegeregere iseda turana korikorina ta ena heduru eiava ena sisiba namona ita tahua. To momokani, Iehova ese iseda guriguri ia kamonai henia totona, namona be iseda guriguri be Baibel ena hereva hegeregerena. Hegeregere, namona be mai eda manau ida “guriguri Kamonai Henia Tauna” ita hereva henia iena natuna, Iesu Keriso, ena amo.​—⁠Salamo 65:​2, NW; 138:6; Ioane 14:​6.

Reana haida idia laloa Dirava ita itaia diba lasi dainai, ia be lauma tauna korikorina lasi. Idia laloa Dirava be siahu ta bamona. Keristani taudia haida danu, ena be Dirava ena kara namodia idia dibaia, to nega haida Dirava be lauma tauna korikorina idia lalo-pararalaia be auka. Oiemu hemami be unai bamona danu, a? Bema oibe, dahaka ese oi ia durua diba bena do oi davaria oi dekenai Iehova Dirava be lauma tauna korikorina?

Baibel Oi Stadilaia

Buka Helaga oi stadilaia hanaihanai, a? Nega momo Baibel oi stadilaia bona oi stadilaia goadagoada neganai, do oi davaria oi dekenai Iehova Dirava be momokani. Oiemu abidadama do ia goada, unai dainai ‘ita itaia diba lasi Diravana, be oi ese matana dekenai do oi itaia bamona.’ (Heberu 11:​6, 27) To, bema Baibel oi stadilaia loulou lasi eiava nega ta ta sibona oi stadilaia, oiemu abidadama do ia hagoadaia momokani lasi.

Haheitalai ta be inai: Oiemu doketa ese oi ia hamaoroa dina ta ta lalonai nega rua muramura ta do oi atoa toto maragidia do idia ore totona. Bema hua ta lalonai nega ta eiava rua sibona muramura oi atoa oiemu toto maragidia do idia ore, a? Lasi, do ia ore lasi. Unai hegeregerena, lauma dalanai ita namo totona, salamo torea tauna be “muramura abia pepana” ta ia torea. Dirava ena Hereva duahia “dina bona hanuaboi ibounai lalonai.” (Salamo 1:​1, 2) Muramura ena namo ibounai ita moalelaia totona, namona be “muramura abia pepana” ena hereva ita badinaia​—⁠anina be dina ta ta iboudiai Keristani bukadia edia heduru amo Dirava ena Hereva ita laloa namonamo.​—⁠Iosua 1:⁠8.

Oi ura emu stadi negadia oi hanamoa, emu abidadama do idia hagoadaia totona, a? Dala ta be inai: New World Translation of the Holy Scriptures eiava Baibel ma ta, ia lalonai hahegeregerea siridia idia torea gauna, lalonai karoa ta oi duahia murinai, siri namona ta oi abia hidi bena unai siri ida idia hahegeregerea siridia oi duahia. Unai kara ese emu stadi do ia hanamoa, bona do oi itaia Baibel ena hereva ibounai be idia tamona. Unai amo, do oi davaria oi dekenai unai buka Torea Tauna, Iehova Dirava, be momokani.

Unai siri hahegeregerea karana ese oi do ia durua Baibel ena peroveta herevadia bona edia guguru dalana oi diba totona. Reana oi be Baibel ena peroveta hereva badadia, hegeregere Babulonia taudia ese Ierusalema idia hadikaia herevana, oi diba. To, Baibel lalonai peroveta herevadia bona edia guguru daladia ia hakapua herevadia idauidau idia noho. Idia haida be taunimanima momo idia do diba lasi gaudia.

Hegeregere, mani Ieriko haginia lou ena davana dikana perovetalaia herevana oi duahia bena ia guguru dalana oi laloa. Iosua 6:26 ia gwau: “Iosua ese hereva aukana ia gwauraia, ia gwau, ‘Inai hanua Ieriko do ia haginia lou tauna be Lohiabada ena vairanai do ia dika momokani. Ruma ena badina nadi ia haginia tauna ena kerere davana, be iena natuna vara guna do ia mase. Bona hanua ena magu iduara do ia haginia tauna, ena kerere davana be iena natuna, murinai ia vara tauna, do ia mase.’ ” Lagani 500 murinai unai hereva ena anina ia guguru, badina 1 King Taudia 16:34 dekenai inai sivarai ita duahia, ia gwau: “[King] Ahaba ena nega lalonai Hiele, Betele tauna ese Ieriko hanua ia haginia lou. Ieriko ena badina nadidia ia haginia neganai, Hiele ena natuna vara guna Abirama be ia mase. Ieriko ena ikoukou ia haginia neganai, Segubu, Hiele ena natuna, dokona ia vara merona ia mase. Abirama bona Segubu edia mase be Lohiabada ese ia gwauraia guna, Iosua Nunu ena uduna dekena amo.”a Ia noho momokani Diravana ta sibona ese unai bamona peroveta herevadia ia gwauraia diba bona edia anina ia hagugurua diba.

Baibel oi duahia lalonai, reana do oi ura hereva ta ena anina oi lalo-pararalaia. Hegeregere, reana do oi laloa lagani hida idia ore murinai unai peroveta herevana ena anina ia guguru. Ta oi nanadaia sibona lasi, to oi hekwarahi oi sibona ese haere oi davaria totona. Nega bona lagani edia maua idauidau bona Baibel stadilaia bukadia oi gaukaralaia, bona oi hekwarahi haere oi davaria totona, mapu ta dekenai dava bada kohudia idia noho gabuna do oi tahua hegeregerena. (Aonega Herevadia 2:​4, 5) Haere oi davaria karana ese oiemu abidadama do ia hagoadaia bona do oi davaria oi dekenai Iehova Dirava be momokani.

Oi Guriguri Hanaihanai mai Emu Goada Ida

Namona be oi laloatao guriguri bona abidadama be mai anina bada. Iesu ena hahediba taudia be inai bamona idia noinoi: “Aiemai abidadama oi habadaia.” (Luka 17:⁠5) Bema toana be oi dekenai Iehova be lauma tauna korikorina lasi, namona be oi guriguri henia, emu abidadama ia habadaia totona. Mai emu lalo-goada ida emu Tamana guba dekenai ena heduru oi noia, oi dekenai ia sibona be momokani do ia hahedinaraia totona.

Bema hekwakwanai ta dainai oi lalo-hekwarahi, nega oi atoa mai emu lalona ibounai ida emu Turana guba dekenai oi hereva henia totona. Iesu be kahirakahira do ia mase neganai, ia guriguri goadagoada. Ena be tomadiho dalanai taunimanima edia vairanai guriguri latadia idia gwauraia karana be Iesu ese ia gwauraia dika, to ia be ena aposetolo taudia 12 ia abia hidi gwauraia neganai, hanuaboi ta ibounai lalonai sibona ia guriguri. (Mareko 12:​38-​40; Luka 6:​12-​16) Peroveta tauna Samuela ena sinana, Hana, ena kara amo gau ta ita diba danu. Natuna mero ta ia ura abia dainai, ‘Iehova ia guriguri henia’ mai ena goada ida.​—⁠1 Samuela 1:​12.

Unai ibounai amo ita dibaia gauna badana be dahaka? Bema oi ura emu guriguri edia haere oi davaria, namona be mai momokani ida, mai emu lalo-goada ida, bona hanaihanai oi guriguri​—⁠bona, momokani, Iehova ena ura hegeregerena oi guriguri. (Luka 22:44; Roma 12:12; 1 Tesalonika 5:​17; 1 Ioane 5:​13-​15) Unai bamona oi karaia neganai, oi do ia durua bena do oi davaria oi dekenai Dirava be momokani.

Dirava ese Ia Havaraia Gaudia Oi Itaia

Laulau penia tauna ena kara be ia penia laulaudia ese idia hahedinaraia diba. Unai hegeregerena, Iehova, tanobada bona guba edia toana Laloa bona Havaraia Tauna, ese ia havaraia gaudia ita itaia neganai iena kara, ita itaia diba lasi gaudia, ita itaia bamona. (Roma 1:​20) Iehova ena imana gaukaradia ita itaia namonamo neganai, iena kara idauidau do ita lalo-pararalaia namonamo, bona do ita davaria ita dekenai ia be momokani.

Bema ia havaraia gaudia oi itaia namonamo iena kara korikoridia dekenai do oi hoa. Hegeregere, manu edia roho dalana idia badinaia sivaraina ese oi ia durua diba Iehova ena aonega oi laloa bada totona. Tanobada bona guba edia sivarai oi duahia neganai, do oi davaria hisiu momo herea be orea bilioni momo lalonai idia noho, bona Milky Way be unai bamona orea ta sibona bona ena daudau be kilomita tausen bilioni momo. Unai ese oi dekenai Havaraia Tauna ena aonega ena bada ia hahedinaraia, ani?

Oibe, Iehova ena aonega be momokani! To unai ena anina oi dekenai be dahaka? Momokani, bema ita ta ese guriguri amo eda hekwakwanai ita hamaoroa neganai, ia daradara lasi. Oibe, ena be Iehova ese ia havaraia gaudia haida sibona oi diba, to idia amo do oi davaria oi dekenai Iehova be momokani.

Iehova ida Oi Raka

Oi sibona oi mamia diba Iehova be momokani, a? Oibe, bema oi be abidadama tauna bona bese kwarana Noa bamona. Ia be hanaihanai Iehova ia kamonai henia dainai, Baibel ia gwau: “Noa be Dirava momokanina ida ia raka.” (Genese 6:⁠9, NW) Noa ena noho dalana be hegeregere Iehova be ia ida ia noho. Dirava be unai bamona oi laloa diba, oi dekenai ia be momokani danu.

Bema oi be Dirava ida oi raka noho, Baibel ena gwauhamata oi abidadama henia bona ena hereva hegeregerena oi karaia. Hegeregere, Iesu ena hereva oi abia dae, ia gwau: “Basileia bona [Dirava ena] kara maoromaoro do umui tahua guna, vadaeni unai gau ibounai [tauanina durua gaudia] danu umui dekenai dohore ia henia.” (Mataio 6:​25-33) Momokani, Iehova ese oiemu ura gaudia be reana hanaihanai oi laloa dalana hegeregerena do ia henia lasi. To bema oi guriguri bena iena heduru oi abia, do oi davaria oi dekenai ia be momokani, oiemu badinai ia gini tauna ta bamona.

Bema ta be Dirava ida ia raka goadagoada noho Iehova ida unai bamona do idia hetura namonamo. Mani Spain gado ia gaukaralaia Witness hahinena, Manuela, oi laloa. Ia be hetoho momo herea ia haheaukalaia. Ia gwau: “Lau lalo-hekwarahi eiava lau dabu neganai, Aonega Herevadia 18:10 ena hakaua herevana lau badinaia. Iehova dekenai lau heau lao, heduru lau abia totona. Hanaihanai lau dekenai ia be ‘kohoro goadana.’ ” Manuela be lagani 36 lalonai Iehova dekenai ia tabekau bona iena heduru ia mamia vadaeni dainai unai bamona ia hereva diba.

Oi be hari sibona Iehova dekenai oi tabekau matamaia, ia ese oi ia durua totona, a? Oi lalo-manoka lasi bema oiemu hetura karana ia ida be oiemu ura hegeregerena ia do goada lasi. Namona be dina ta ta iboudiai Dirava ida ia raka tauna bamona oi raka. Oiemu mauri lalonai abidadama dalana ta oi badinaia goadagoada neganai, Iehova do oi tura henia namonamo.​—⁠Salamo 25:​14, NW; Aonega Herevadia 3:​26, 32.

Dirava ida oi raka dalana ma ta be iena hesiai gaukara lalonai oi gaukara goadagoada. Basileia harorolaia gaukarana lalonai oi vareai neganai, oi be Iehova ida oi gaukara hebou tauna. (1 Korinto 3:⁠9) Unai oi diba dainai do oi davaria oi dekenai Iehova be momokani.

Salamo torea tauna ese ita ia hamaoroa, ia gwau: “Oiemu mauri be Lohiabada ena imana dekenai do oi atoa. Ia dekenai do oi abidadama, vadaeni ia ese oi do ia durua.” (Salamo 37:⁠5) Herevana dahaka metau eiava lalo-hekwarahi oi davaria, to hanaihanai Iehova ena imana dekenai oi atoa. Hanaihanai iena heduru bona hakaua dalana oi tahua. Bema mai guriguri ida Iehova Dirava dekenai oi tabekau bona hanaihanai ia oi abidadama henia momokani, oiemu mamina do ia namo badina oi diba ia be hanaihanai oi dainai heduru do ia henia. Sibona emu lalo-hekwarahi haida dainai Iehova oi hereva henia neganai, mai emu abidadama ida oi hereva henia, a? Unai bamona oi karaia diba​—⁠bema oi dekenai Dirava be momokani.

[Footnote]

[Picture on page 21]

Oiemu stadi negadia oi hanamoa, emu abidadama do idia hagoadaia totona

[Picture on page 22]

Nega oi atoa mai lalo-goada ida oi guriguri hanaihanai totona

[Picture on page 23]

Dirava ia havaraia gaudia amo, iena kara idia hahedinaraia dalana oi itaia

[Credit Lines]

Hummingbird: U.S. Fish and Wildlife Service, Washington, D.C./Dean Biggins; stars: Photo: Copyright IAC/RGO 1991, Dr. D. Malin et al, Isaac Newton Telescope, Roque de los Muchachos Observatory, La Palma, Canary Islands