Basileia Haroro Ripoti

Namibia Dekenai Tiokratik Gaukara Ia Bada Ia Lao

LAGANI 1925 murinai, Namibia dekenai Basileia ena sivarai namona idia harorolaia matamaia. Unai nega amo kudou-maoro taudia handred momo ese Dirava ena hahemauri sivaraina idia abia dae. Inai ekspiriens rua ese idia hahedinaraia edena bamona Iehova ese ena orea dekenai taunimanima namodia ia haboua.​—⁠Hagai 2:⁠7.

◻ Paulus, Namibia ena notist kahanai ia noho biru tauna ta, be siti badana Windhoek dekenai ia lao neganai, nega ginigunana Iehova ena Witness taudia ia hedavari henia. Paulus ia abia dae haraga, hereva momokani ia davaria vadaeni. Ruma dekenai ia giroa neganai, Mauri Hanaihanai Paradaiso Lalonai bukana ia abia lao danu. Bena, ia lao Rundu dekenai, unai taoni dekenai Kingdom Hall ta ia noho, bona Paulus ese Witness taudia ia davaria bona ia noidia ia idia vadivadi henia totona.

To, Paulus ia noho gabuna be daudau dainai, Witness taudia idia hegeregere lasi ia danu pura ta ta ai do idia stadi. Vadaeni, Paulus ese sibona ena Baibel stadi ia hamatamaia. Bona danu, ia dibaia gaudia be ma haida dekenai ia harorolaia mai goada ida. Daudau lasi murinai, Baibel stadi grup ta idia hamatamaia. Inai grup maragina taudia be reidio dekenai idia kamonai, Rundu dekenai Iehova ena Witness taudia be edia hebouhebou do idia abia, bena idia ese edia moni ibounai idia haboua unai hebou dekenai idia lao totona.

Nega ginigunana Iehova ena Witness taudia danu idia noho ena mamina idia moalelaia! Nega sisina murinai, dala idia hegaegaelaia lo tadikaka ese unai grup do idia vadivadi henia hanaihanai totona. Hari, Paulus ia noho hanuana dekenai, pablisa taudia be 6.

◻ Johanna ia kamonai ta ese Iehova ena Witness taudia ia gwauraia dika neganai, Dirava ena ladana ese ena lalona ia veria. Ia gwau: ”Nega ginigunana unai ladana Iehova lau kamonai neganai, lau egu lalona dekenai ia noho hanaihanai, bona lau laloa momo Iehova be daika. Unai neganai lau bona egu adavana be Walvis Bay kahirakahira dekenai, Namibia ena kone kahana dekenai ai noho. Nega ta taoni dekenai ai lao, bona Witness taudia haida lau itaia dala dekenai Gima Kohorona magasin idia hariharilaia noho. Magasin ta lau abia bona lau noia lau idia stadi henia totona, badina lau be mai egu henanadai momo. Lau idia hadibaia idia mai diba lasi badina edia motuka ia dika dainai bona lau tai. Daudau lasi murinai lauegu adavana ia mase, bona lau lao Keetmanshoop dekenai lau noho. Spesel painia tauna (ful-taim haroro tauna) ta idia siaia unuseniai ia gaukara totona, bona ia amo Mauri Ia Lao Henia Hereva Momokanina bukana lau abia. Matamana amo lau diba, inai be hereva momokani.

“Gabeai, lau idia boiria haroro gaukara lalonai lau vareai totona, to taunimanima dekenai lau gari. Ruma ta ruma ta dekenai ai raka noho neganai, Iehova lau guriguri henia bema dala ia kehoa lau mase totona be namo, to dala ia kehoa lau haroro totona be dika. Nega ginigunana dala dekenai haroro gaukara lau karaia neganai, dala maragina dekenai lau hunia, bona egu ura be ta ese lau do ia itaia lasi. Gabeai, goada sisina lau abia bona ia raka lao tauna ta dekenai magasin lau hahedinaraia, bona unai neganai lau hereva diba danu. Iehova ena heduru amo, unai dina lalonai, Baibel ena helaro namona be taunimanima momo dekenai lau gwauraia.

“Hari, lagani 12 murinai, ena be tauanina dalanai lau ogogami, to painia gaukara ena hahenamo lau do dogoatao noho, bona Basileia ena hereva momokani be ma haida dekenai lau harorolaia dainai lau moale bada.”