‘Lai be Iseda Vaira Dekenai Ia Mai’ Neganai

Evanelia torea tauna Mareko ese Iesu ena hahediba taudia be bouti lalonai Galilea Gohuna idia hanaia totona idia hekwarahi ena sivarai ia gwauraia neganai, ia gwau idia “bara hekwarahi bada, badina lai be edia vaira dekenai ia mai.” Kone dekenai ia do noho neganai, Iesu ese edia hekwarahi ia itaia bona hoa dalanai davara ena kopina ai ia raka lao idia ia hedavari henia totona. Ia lao idia dekenai, vanagi dekenai ia guia, bona nega tamona lai ia doko.​—⁠Mareko 6:​48-51.

Unai Baibel torea tauna tamona ia gwau guna danu “lai bada herea ia mai.” Unai negai, Iesu ese “lai dekenai ia gwau henia, . . . vadaeni, nega tamona lai ia doko, bona hurehure be lasi.”​​—⁠Mareko 4:​37-39.

Ena be hari inai negai ita ese unai bamona hoa karadia ita itaia lasi, to idia amo gau momo ita dibaia diba. Ita be kara dika taudia bona nega dikadia ai ita noho dainai, ita ese hekwakwanai ena lai ita reaia diba lasi. (2 Timoteo 3:​1-5) Momokani, reana nega haida ita mamia iseda mauri lalonai idia vara hekwakwanai bona lalohisihisi be idia bada idia lao ela bona idia be lai badana bamona. To heduru abia dalana ia noho! Iesu ese ita ia boiria: “Tauanina manokamanoka bona gaukara metau taudia ibounai, lau dekenai umui mai, lau ese laga-ani do lau henia umui dekenai.”​​—⁠Mataio 11:⁠28.

‘Lai be iseda vairanai ia mai’ neganai, eda kudouna ai “hurehure be lasi” bamona mainona ita abia diba. Edena dala ai? Dalana be Iehova ena gwauhamata, idia moru diba lasi gwauhamatadia, ita abidadama henidia.​​—⁠Mani Isaia 55:​9-​11; Filipi 4:​5-7 itaia.