Vaira Negana Oi Dibaia Diba!

Taunimanima momo be vaira negana idia laloa bada. Idia ura palani idia karaia, mai aonega ida moni idia gaukaralaia, bona idia noho namonamo. To, gabeai do ia vara gauna dibaia dalana ta ia noho, a?

VAIRA negana dibaia totona, taunimanima be gau idauidau idia tohoa. Saiens taudia haida, edia ladana idia gwauraia futurologist, be hari inai negai idia vara gaudia idia tahua bena unai gaudia amo edia lalohadai vaira negana totona idia gwauraia. Tano ena kohu bona moni gaukaralaia dalana idia stadilaia taudia be unai bamona danu. Hisiu edia toana tahua taudia bona babalau taudia be hisiu idauidau, kristal bolo bona meamea gaudia dekenai diba idia tahua, bona edia lalohadai idia badinaia taudia be momo herea. Hegeregere, taunimanima momo be hisiu edia toana ia tahua French tauna, Nostradamus, idia laloatao noho, ena be lagani handred haida gunanai ia mase vadaeni.

Unai peroveta hereva idia gwauraia toho taudia ibounai edia hereva idia momokani lasi bona lalohisihisi idia havaraia. Dahaka dainai? Badina be Iehova bona iena Hereva, Baibel, idia dadaraia. Unai badina dainai, idia ese henanadai badadia idia haerelaia diba lasi, hegeregere: ‘Dahaka dainai lau abia dae diba Baibel ese ia perovetalaia gaudia be do idia vara momokani? Dirava ena ura taunimanima totona ita laloa neganai ena anina idia dekenai be dahaka? Lau bona egu ruma bese be dahaka namo do ai abia unai peroveta herevadia amo?’ Baibel be unai henanadai ia haerelaidia.

Dala momo ai Baibel ena peroveta hereva be hereadae. Ia be hisiu edia toana amo vaira negana idia perovetalaia bamona lasi, to ia hahedinaraia ta sibona ese dala ia abia hidi diba. Unai dainai, ta ena dokona be siahu ta ese ia biagua lasi. (Deuteronomi 30:19) Nostradamus ena toretore be anina lasi, unai dainai lalo-parara idia havaraia lasi herevadia bona lalohadai sibona amo idia hahonua. To, Baibel ena peroveta herevadia be idau momokani. Ia hahedinaraia dahaka dainai Dirava ese ena ura be do ia karaia. (2 Sivarai 36:15) Bona Iehova ena peroveta herevadia ta ia moru lasi, badina ‘Dirava ia koikoi diba lasi.’ (Tito 1:⁠2) Unai dainai, Dirava ena Hereva ese ia gimaia taudia be mai lalo-parara ida idia noho, edia mauri be mai ena badina, bona idia moalelaia lalonai edia nega bona kohu be anina lasi karadia dekenai idia haorea kava lasi.​—⁠Salamo 25:​12, 13.

Unai hereva bona hereva badadia momo be tanobada hegegemadai Iehova ena Witnes taudia edia lagani 1999/2000 “Dirava Ena Peroveta Herevana” Distrik Hebouheboudia dekenai idia kikilaia. Idia henia herevadia, henanadai, haheitalai, bona Baibel drama ese helai taudia edia lalona ia hamarerea, Dirava ena peroveta herevana idia stadilaia bona badinaia taudia ese idia moalelaia ahuna namodia idia laloa totona. Hereva gabena ese hebouhebou dekenai idia vara moale sivaraidia haida do ia kikilaia.