Ia Laloa Momo Gauna New York City Dekenai

LAGANI 1960 do lasi negana amo ema bona hari, unai ataiai herevana be Brooklyn, New York dekenai Watchtower Society ena faktori rumana ta ena haba dekenai ia hedinarai goevagoeva. Gaukara taudia, loaloa taudia, bona ma haida be idia hanaia neganai ia hadibadia, dina iboudiai Baibel idia duahia totona. Inai revareva, Witnes kekeni matamata ta amo, ese ia hahedinaraia unai hadibaia hereva ese anina namona ia havaraia.

“Egu klas kekenina ta danu sikuli do lau rakatania neganai do lau ura karaia gauna ai kikilaia. Lau ese Betele, Iehova ena Witnes taudia edia hedikwota, lau herevalaia matamaia bona ia moale bada herea. Lau ia hamaoroa ena mauri ibounai lalonai New York City dekenai ia noho. Iena ruma bese be tomadiho idia goadalaia lasi taudia, to daba ibounai iena uindo amo saini ta ia itaia ia gwau ‘Dina Ta Ta Iboudiai, Dirava Ena Hereva, Buka Helaga, Oi Duahia.’ Unai dainai dina iboudiai sikuli ia do lao lasi neganai iena Baibel ia duahia.

“Ia gwau siti idia rakatania murinai, ia laloa momo gauna New York City dekenai be daba ai ia toreisi neganai, unai hadibaia herevana Baibel ia duahia totona ia itaia lasi. To unai Watchtower rumana ena haba dekenai ia noho herevana dainai, Baibel duahiduahi ia manadalaia, bena dina iboudiai Baibel ia duahia noho!”

Dirava ena Hereva ena kahana ta duahia karana be ta ena dina hamatamaia karana namona ta! Unai bamona oi karaia neganai, aposetolo Paulo ena hereva do oi laloa bada, ia gwau: “Buka Helagadia ese oi dekenai aonega idia henia noho diba, ela bona hamauria do oi davaria, Keriso Iesu oi abidadama henia dainai.”​—⁠2 Timoteo 3:​15-17.