Senegal Dekenai Keristani Helarona Idia Harorolaia

Ita be Abidadama Taudia

Senegal Dekenai Keristani Helarona Idia Harorolaia

IDAU nega amo ema bona hari gwarume be taunimanima edia aniani badana. Lagani tausen momo lalonai, taunimanima be tanobada ena davara, gohu, bona sinavai dekenai idia haoda. Iesu Keriso ena aposetolo taudia haida be Galilea Gohuna ai idia haoda taudia. To, Iesu ese idia dekenai haoda gaukara idauna ia hadibaia. Unai lauma dalanai idia karaia haoda gaukarana amo, haoda tauna sibona lasi to gwarume danu ese namo do idia davaria!

Iesu ese haoda tauna Petero dekenai unai gaukara ia herevalaia, ia gwau: “Inai murinai be do oi haoda, taunimanima do oi abia.” (Luka 5:10) Unai bamona haoda gaukara be hari tano 230 mai kahana dekenai idia karaia, Senegal ai danu. (Mataio 24:14) Unuseniai hari inai negai “taunimanima haoda henia” taudia be mai gari lasi ida edia Keristani helarona be ma haida dekenai idia harorolaia.—⁠Mataio 4:⁠19.

Senegal be Africa ena west kahana ena dorina ai. Ena not kahana ai, Sahara kahirakahira, be tano kaukauna ena miri gabuna, bona ena saut kahana ai be Casamance ena uda bona medu gabuna. Senegal be tano kaukauna amo ia mai lai siahuna ese ia abia bona danu Atlantic amo ia mai lai keruma ese ia hakerua. Unuseniai taunimanima milioni 9 bamona idia noho. Senegal taudia be heabidae taudia. Idia momo idia gwau lasi idia be Keristani taudia. Idia momo be mamoe naria taudia, bona ma haida ese boromakau, kamelo, bona nanigosi idia naria. Biru taudia idia noho danu, idia ese pinati, kotini, bona raisi idia hadoa. Bona haoda taudia idia noho, Atlantic Davarana bona unai tano ena sinavai badadia ai idia haoda neganai, edia reke be gwarume amo idia honu. Senegal ena moni bada be haoda gaukarana amo idia abia. Idia ania momo anianina be ceebu jën, unai aniani namona be raisi, gwarume, bona uma aniani amo idia karaia.

“Taunimanima Haoda Henia” Taudia

Senegal dekenai mai goada ida Dirava ena Basileia idia harorolaia taudia be 863. Lauma dalanai idia karaia haoda gaukarana be lagani 1950 murinai idia hamatamaia. Lagani 1965 lalonai, Dakar, edia siti badana, dekenai Watch Tower Society ena brens opesi idia kehoa. “Haoda” gaukara do idia karaia misinari taudia be tano daudau momo amo idia mai. “Haoda” gaukara idia matamaia, bona Keristani helarona harorolaia gaukarana Senegal dekenai be ia heau namonamo. Bena gabeai, Dakar kahirakahira ai, Almadies dekenai, brens matamatana idia haginia, bona June 1999 ai Iehova dekenai idia hahelagaia. Unai be moale bada negana!

Hereva Momokani Abia Dae Ena Hekwarahi

Hanaihanai mauri dalana idauidau momo taudia idia davaria, bona idia haida ese Dirava ena Hereva lalonai ia noho helarona idia abia dae. Ena be momo be Baibel idia diba lasi, to Iehova Dirava ese ena abidadama peroveta taudia gunadia dekenai ia gwauraia peroveta herevadia be kahirakahira do idia guguru idia dibaia neganai idia moale.

Nega momo ta ese Keristani hakaua herevadia ia badinaia goadagoada totona ia gari lasi be namo, unai be mai anina bada bema sene karadia bona kastom karadia danu idia vara diba neganai. Hegeregere, Senegal dekenai momo ese adavana momo idia abia. Mani inai tau oi laloa, Baibel ia stadilaia neganai iena adavana be rua. Keristani hereva momokani ia abia dae bona Baibel ena hahegani tau be adavana tamona do ia abia be namo ia badinaia totona ia gari lasi, a? (1 Timoteo 3:⁠2) Bona iena matamata negana ai ia adavaia hahinena ginigunana do ia dogoatao, a? Ia be unai bamona ia karaia, bona hari mai goada ida Dakar ena kongregesen badana ta lalonai elda gaukara ia karaia. Iena adavana ginigunana bona ena natuna ibounai 12 ese hereva momokani idia abia dae danu, idia 10 be ena adavana ginigunana amo bona rua be iena adavana iharuana amo.

Keristani helarona abia dae karana ia koua diba gauna ma ta be duahiduahi bona toretore diba lasi karana. Anina be ia duahiduahi bona toretore diba lasi tauna ese hereva momokani ia abia dae bona badinaia diba lasi, a? Lasi momokani. Mani Marie, gaukara goada hahinena mai ena natuna maragidia 8, ena haheitalai oi laloa. Karaharaga ia diba dina ta ta ai, ena natudia be sikuli dekenai bona ia be gaukara dekenai ia do lao lasi neganai, idia ida Baibel siri ta ia herevalaia be mai anina bada. To unai be edena bamona do ia karaia, badina duahiduahi ia diba lasi? Dina iboudiai daba momokani ai, ia ese Dina Iboudiai Buka Helaga Tahua buklet ia abia bona ena ruma vairanai ia noho dala dekenai ia gini bona ia naria. Taunimanima idia raka hanaia neganai, ia henanadai bema idia duahiduahi diba. Ia duahiduahi diba tauna ta ia davaria neganai, ia ese unai buklet ia henia bona mai momokani ida ia gwau: “Lau duahiduahi diba lasi dainai, ia hegeregere inai kahana lau dekenai oi duahia, a?” Ia duahia neganai ia kamonai namonamo. Bena ia tanikiu henia bona ena ruma dekenai ia vareai haraga bona unai siri be ena natudia danu ia kikilaia sikuli idia do lao lasi neganai!

Taunimanima Idauidau Idia Kamonai

Senegal dekenai, taunimanima oi davaria diba dala dekenai gwarume o uma aniani eiava maketi dekenai au huahua idia hoihoilaia, eiava baobab au badana henunai idia helai bona ataya, grin ti mai ena idita, idia inua. Idia ura idia davaria taudia ibounai idia haroro henia dainai, tadikaka rua ese dala dekenai ia noinoi tauanina dika tauna ta idia hereva henia. Idia hanamoa murinai, idia gwau: “Momo be oi dekenai moni idia henia to idia hereva henia lasi. Oi dekenai vaira neganai do ia vara gauna badana ai herevalaia totona ai mai.” Unai noinoi tauna ia hoa. Bena tadikaka be ma idia gwau: “Ai ura oi ai nanadaia. Dahaka oi laloa, dahaka dainai tanobada dekenai hisihisi be bada?” Noinoi tauna ia haere: “Dirava ena ura dainai.”

Bena tadikaka ese ia danu Baibel amo Apokalupo 21:4 ena anina idia herevalaia. Unai helaro ena sivarai bona ia idia laloa dainai ia dekenai Baibel idia herevalaia karana ese ena kudouna ia hamarerea. Ena matana be ranu ese ia hahonua. Moni totona ia noinoi lasi to tadikaka ia hamaorodia ia noia moni ibounai do idia abia! Ia ura dikadika idia abia dainai idia raka hanaia taudia danu idia giroa bona idia itaia. Unai tadikaka idia hekwarahi unai tauna ese ena moni ia dogoatao totona. Bena dokonai unai bamona ia karaia to ia hereva goadagoada ia do idia vadivadi henia lou.

Dakar ena iunivesiti badana haida danu ese unai lauma reke idia hahonua noho. Unuseniai doketa ena kosi ia abia merona ladana Jean-Louis ese Baibel ia stadilaia matamaia. Hereva momokani ia abia dae haraga, Iehova dekenai ena mauri ia gwauhamatalaia, bona bapatiso ia abia. Iena ura be Dirava do ia hesiai henia ful-taim painia gaukara ai, to doketa kosi ia moalelaia danu. Ena tano dekenai ia karaia kontraka dainai, ena maduna be ena sikuli do ia haorea. To, heduru painia gaukara ia karaia danu. Doketa ena kwalimu pepana ia abia murinai, Africa ena Betele badana dekenai idia boiria bona unuseniai doketa gaukara ia karaia. Dakar University dekenai idia davaria tau matamatana ma ta danu be hari ena gabu ai ia noho Betele famili taudia danu ia gaukara hebou.

Lauma dalanai idia karaia haoda gaukarana Senegal dekenai ese anina ia havaraia. Iehova ena Witnes taudia edia Baibel buka bona magasin be momo ese idia laloa bada bona hari unai gabu ena Wolof gado ai idia halasia. Sivarai namona be edia gado ai idia kamonaia dainai kudou-maoro taudia momo be mai moale ida idia kamonai. Iehova ese gaukara ia hanamoa dainai, ita diba momokani Senegal dekenai “taunimanima haoda henia” taudia be mai goada ida Keristani helarona be mai abidadama bona gari lasi ida idia harorolaia neganai, gwarume bamona taudia momo do idia abia.

[Map/Picture on page 31]

(For fully formatted text, see publication)

SENEGAL

[Picture]

Senegal dekenai Keristani helarona idia harorolaia

[Credit Line]