Hari Inai Negai Dirava Ena Lauma be Edena Dala Dekenai Ia Gaukara?

IA VARA dinana amo aena idia dika. Dina iboudiai dubu ena geiti, ladana Namo Herea, dekenai ia helai, bona dubu ai idia vareai taudia ia noidia hebogahisi dainai gau ta idia henia totona. To nega ta unai aena dika noinoi tauna ese harihari gauna ta ia abia, unai gauna ena davana ese moni ena davana ia hanaia momokani. Iena aena be ta ese ia hanamoa!​​—⁠Kara 3:​2-8.

Ena be aposetolo Petero bona Ioane ese idia “veria daekau” bena “iena aena bona iena komukomu be idia goada,” to idia gwau lasi gorere hanamoa be idia edia siahu dainai. Badina be dahaka? Petero ese ia gwauraia hedinarai: “Israela taudia e, badina dahaka inai gau dekenai umui hoa bada? Badina dahaka ai umui itaia noho? Umui laloa aiemai siahu bona aiemai namo dekenai inai tauna ai hanamoa, ma ia raka, a?” Momokani, Petero bona Ioane idia diba, idia edia goada dainai lasi to Dirava ena lauma helaga dainai unai kara idia karaia diba.​​—⁠Kara 3:​7-​16; 4:​29-​31.

Unai nega ai, unai bamona “siahu karadia” idia karaia diba badina unai amo idia hahedinaraia Dirava ese Keristani kongregesen matamatana ia durua. (Heberu 2:⁠4) To unai siahu karadia be anina idia havaraia murinai, aposetolo Paulo ia gwau “do idia doko.” a (1 Korinto 13:⁠8) Unai dainai, hari Keristani kongregesen korikorina lalonai Dirava ese ia havaraia gorere hanamoa karadia, peroveta sivaraidia, eiava demoni lulua karadia ita itaia lasi.

To anina be Dirava ena lauma helaga be ia gaukara noho lasi, a? Lasi momokani! Namona be aposetolo edia negai bona iseda negai Dirava ena lauma ia gaukara daladia haida ita laloa.

“Hereva Momokani Laumana”

Dirava ena lauma helaga ena gaukara ta be hadibaia, hadiaria, hereva momokanidia hahedinaraia. Kahirakahira ia mase neganai, Iesu ese iena hahediba taudia ia hamaorodia: “Lauegu hereva momo idia noho, lau ura hereva henia umui dekenai, to harihari umui be inai hereva do umui abia dae diba lasi. To Hereva Momokani Laumana do ia mai, vadaeni ia ese hereva momokani ibounai dekenai umui do ia hakaua, badina be ia sibona ena laloa do ia gwauraia lasi, to do ia kamonai herevadia ibounai do ia gwauraia, gabeai do idia vara gaudia danu umui dekenai do ia hamaoroa guna.”​​—⁠Ioane 16:​12, 13.

Pentekoste 33 C.E. ai, hahediba taudia 120 be Ierusalema rumana ta ena atai daiutuna ai idia hebou bona lauma helaga amo bapatiso idia abia neganai, Dirava ese “Hereva Momokani Laumana” ia bubua. (Kara 2:​1-4) Lagani iboudiai unai aria idia karaia bona unai neganai aposetolo Petero ia noho. Lauma helaga amo ia honu dainai, Petero ‘ia toreisi’ bona Iesu dekenai idia vara momokani gaudia haida ia gwauraia badabada eiava ia hahedinaraia goevagoeva. Hegeregere, ia gwau “Iesu, Nasareta tauna,” be “Dirava ese ia abia daekau vadaeni, iena imana idibana kahana dekenai.” (Kara 2:​14, 22, 33) Danu, Dirava ena lauma ese Petero ia veria ia idia kamonai henia Iuda taudia be gari lasi amo ia hamaorodia: “Israela bese taudia ibounai idia diba momokani be namo, inai Iesu, satauro dekenai umui hamasea tauna, be Dirava ese Lohiabada bona Keriso ia halaoa vadaeni.” (Kara 2:36) Petero ese lauma helaga ena siahu amo ia henia herevana dainai, taunimanima tausen toi bamona be “iena hereva idia abia dae” bona bapatiso idia abia. Unai dala ai, Dirava ena lauma helaga ese ia hakaudia lao hereva momokani dekenai.​​—⁠Kara 2:​37-​41.

Danu, Dirava ena lauma helaga be hadibaia tauna ena gaukara ia karaia bona heduru ia henia guna gaudia laloa totona. Iesu ia gwau: “Durua Tauna, Lauma Helaga be unai, Tamana ese lauegu gabuna abia totona do ia siaia. Ia ese gau ibounai do ia hadibaia umui dekenai. Hereva ibounai lau henia vadaeni umui dekenai, be ia ese umui emui lalona dekenai do ia hedinaraia lou.”​​—⁠Ioane 14:⁠26.

Lauma helaga be edena dala ai hadibaia tauna ena gaukara ia karaia? Dirava ena lauma ese hahediba taudia edia darana ia durua Iesu dekena amo guna idia kamonai to idia lalo-pararalaia lasi gaudia idia laloa totona. Hegeregere, aposetolo taudia idia diba Iesu ena kota neganai, ia ese Iudea ena Roma gavana, Pontio Pilato, ia hamaoroa: “Lauegu Basileia be inai tanobada gauna lasi.” To, dina 40 murinai Iesu be guba dekenai ia daekau neganai, aposetolo taudia idia laloa kerere noho dainai idia laloa Basileia be tanobada dekenai do ia haginia. (Ioane 18:36; Kara 1:⁠6) Toana be aposetolo taudia be Iesu ena hereva idia lalo-pararalaia momokani lasi ela bona Pentekoste 33 C.E. ai, Dirava ese iena lauma helaga ia bubua murinai.

Danu, Dirava ena lauma ese ia durudia, Iesu ena hahediba hereva idauidau, idia laloa lou totona. Hegeregere, lauma helaga ena heduru dainai Keriso ena mase bona toreisi lou perovetalaia herevadia edia anina idia abia. (Mataio 16:21; Ioane 12:16) Iesu ena hahediba herevadia idia laloa dainai aposetolo taudia be king taudia, kota taudia, bona dubu gunalaia taudia vairanai edia gaukara idia hamomokania totona idia gari lasi.​​—⁠Mareko 13:​9-​11; Kara 4:​5-​20.

Ma danu, haroro neganai Dirava ena lauma helaga ese Keristani taudia ginigunadia ia hakaudia lao anina bada havaraia teritori dekenai. (Kara 16:​6-10) Danu, Dirava ena lauma ese Keristani taudia ginigunadia ia veridia Dirava ena Hereva, Baibel, idia torea taunimanima iboudiai durudia totona. (2 Timoteo 3:16) Ia hedinarai goevagoeva, aposetolo edia negai lauma helaga be dala idauidau ai ia gaukara. Dirava ese ia henia lasi hoa karadia sibona idia karaia totona.

Lauma Helaga Iseda Nega Ai

Unai hegeregerena, Dirava ena lauma helaga be iseda nega ai Keristani korikoridia durua totona ia gaukara. Lagani 1850 ia lao 1900 lalonai, Baibel stiuden taudia edia orea maragina ta Allegheny, Pennsylvania, U.S.A., dekenai unai ia hedinarai. Unai stiuden taudia be Baibel idia tahua mai goada bada ida bona idia ura dikadika “hereva momokani” idia diba.​​—⁠Ioane 8:​32; 16:⁠13.

Unai orea tauna ta, Charles Taze Russell, ese Baibel ena hereva momokani ia tahua karana be inai bamona ia herevalaia: “Lau guriguri . . . egu kudouna bona egu darana amo lau idia koua diba lalohadai kerere ibounai do lau kokia diba totona bona lau ura iena lauma ese lau ia hakaua lalo-parara maoromaorona lau abia totona.” Dirava ese unai manau gurigurina ia hanamoa.

Russell bona iena turadia be Baibel idia tahua goadagoada neganai, gau haida idia hedinarai. Russell ia gwau: “Ai davaria lagani handred momo lalodiai tomadiho orea idauidau bona taunimanima idauidau edia huanai Baibel ena hahediba herevadia idia hapararaia, bena taunimanima edia lalohadai kava bona lalohadai kereredia ida idia haboudia tamona.” Unai ese “hereva momokani haginia kerere karana” ia havaraia. Momokani, Baibel ena hereva momokanidia be dirava koikoi tomadiho henia taudia edia hahediba henunai idia koudia, unai hahediba be lagani handred momo lalodiai Kerisendom ai idia abia vareai. To Russell ia ura dikadika hereva momokani ia diba bona ia harorolaia.

Zion’s Watch Tower and Herald of Christ’s Presence ena rau amo, Russell bona ena turadia be mai goada ida tomadiho koikoi hahediba herevadia, Dirava idia hahedinaraia maoromaoro lasi herevadia unai, idia gwauraia dika. Ena be taunimanima momo ese dubu edia lalohadai idia abia dae to Russell bona ena turadia idia lalo-parara souli ia mase diba, ita mase neganai ita lao guri gabuna, bona Iehova sibona be Dirava momokani tamona, unai dainai ia be Toi Tamona ena kahana lasi.

To hahediba koikoi be unai bamona idia hahedinaraia dainai Kerisendom ena dubu gunalaia oreadia idia badu. Edia siahu bada dagi idia ura idia dogoatao dainai, Katolik bona Protestan dubu gunalaia oreadia momo be dala haida idia hegaegaelaia Russell ena ladana idia hadikaia totona. To Russell bona ena turadia be edia gaukara idia rakatania lasi. Mai lalo-goada ida Dirava ena lauma idia tahua ia ese ia hakaudia totona. Russell ia gwau: “Iseda Lohiabada ia gwauhamata, . . . Tamana ena lauma helaga do ia siaia ita do ia hadibaia totona. Iesu, iseda Kara Dika Davana Karaia Tauna, iseda Maino Havaraia Tauna, bona iseda Kwarana dainai bona Iesu ena ura dainai unai lauma helaga ia siaia.” Bona ia hadibadia momokani! Unai Bible Student taudia momokanidia be Baibel amo hereva momokani ena ranu goevana idia inua noho bona tanobada ibounai dekenai idia harorolaia.​​—⁠Apokalupo 22:⁠17.

Hari inai negai Iehova ena Witnes taudia edia orea be lagani handred bona ma haida lalodiai Dirava ena lauma helaga ese ia hakaudia hegeregerena idia badinaia haraga. Iehova ena lauma ese lauma dalana ai edia itaia dalana ia hadiaria noho neganai, Witnes taudia be edia lalo-parara ia bada noho hegeregerena edia gaukara idia haidaua.​​—⁠Aonega Herevadia 4:​18.

“Lauegu Ladana Do Umui Gwauraia Hedinarai”

Dirava ena lauma helaga ia hedinarai dalana ma ta be Iesu ese ia gwauraia iena hahediba taudia be inai ia hadibadia neganai: “To, umui be dohore siahu umui abia, Lauma Helaga umui dekenai ia diho neganai, bona lauegu ladana do umui gwauraia hedinarai Ierusalema dekenai . . . do ia lao bona tanobada ena kahana ibounai.” (Kara 1:⁠8) Iesu ia gwauhamata iena hahediba taudia be “siahu” bona “Lauma Helaga” do ia henidia Dirava ena amo idia abia gaukarana idia karaia totona, bona hari inai negai danu do ia henia.

Taunimanima momo idia diba Iehova ena Witnes taudia edia orea be haroro gaukara idia karaia momo. (Maua itaia.) Momokani, Iehova ena Witnes taudia be tano bona motumotu 230 bona ma haida ai hereva momokani ena sivarai idia gwauraia. Noho daladia idauidau momo ai, edia mauri idia haboioa diba tuari gabudia ai danu, gari lasi dekenai edia gadona idia habadaia Dirava ena Basileia ena gaukara idia durua totona. Keristani haroro gaukara idia karaia goadagoada dainai dala badana ai unai ese ia hamomokania hari inai negai lauma helaga ia gaukara noho. Bona ita itaia diba Iehova Dirava ese edia hekwarahi ia hanamoa.

Hegeregere, lagani gunana ai, Dirava ena Basileia ena sivarai namona idia harorolaia ena nega be hora bilioni ta ia hanaia momokani. Dahaka ia vara? Taunimanima 323,439 be ranu bapatiso idia abia neganai edia gwauhamata Dirava dekenai idia hahedinaraia. Ma danu, kamonai matamata taudia ida Baibel stadi 4,433,884 be pura iboudiai idia karaia. Buka iboudiai 24,607,741, magasin 631,162,309, bona buklet 63,495,728 idia henia. Unai ese ia hamomokania dala badana dekenai Dirava ena lauma ia gaukara noho!

Dirava Ena Lauma Bona Oi

Bema tau ta ese sivarai namona ia badinaia, Dirava ena taravatu hegeregerena iena mauri dalana ia haidaua, bona mauri davana bouboulaia dalana dekenai iena abidadama ia gwauraia, dala ia kehoa Dirava vairanai ia gini goeva totona. Unai bamona taudia dekenai aposetolo Paulo ia gwau: “[Dirava] ese Lauma Helaga umui dekenai ia henia.”​​—⁠1 Tesalonika 4:​7, 8; 1 Korinto 6:​9-11.

Dirava ena lauma ia abia tauna ese hahenamo namodia momo do ia abia. Edena bamona hahenamodia? Dirava ena lauma amo ia havaraia Hereva ia gwau: “Lauma Helaga ese inai bamona karadia ia havaraia: Lalokau, moale, maino, haheauka, bogahisihisi, kara maoromaoro, abidadama momokani kara, manau, tauanina ena ura koua karana.” (Galatia 5:​22, 23) Unai dainai, Dirava ena lauma helaga be mai siahu bada namo ia havaraia totona, taunimanima ia durudia diba Dirava ena kara idia hahedinaraia totona.

Ma danu, bema Baibel oi duahia bona oi diba gaudia oi badinaia, Dirava ena lauma ese oi ia durua diba aonega, diba, lalo-parara, laloa maoromaoro, bona laloa karaia dibana dekenai oi tubu noho totona. King Solomona ia ura taunimanima lasi to Dirava ia hamoalea dainai ‘aonega bona diba bada herea, bona laloa dobu ena diba momo danu’ ia abia. (1 King Taudia 4:29) Iehova ese lauma helaga Solomona ia henia dainai, hari inai negai danu ia idia ura hamoalea taudia dekenai iena lauma helaga do ia henia.

Danu, Dirava ena lauma helaga ese Keristani taudia ia durudia Satani bona demoni, hari tanobada dikana, bona edia kara dika tauanina ena ura dikadia idia tuari henia totona. Unai be edena bamona? Aposetolo Paulo ia haere, ia gwau: “Lau dekenai siahu ia henia Diravana dainai, lau be mai egu goada gau iboudiai karaia totona.” (Filipi 4:​13, NW ) Reana lauma helaga ese hetoho eiava dibagani do ia kokia lasi; to lauma helaga ese oi do ia durua diba oi haheaukalaia totona. Dirava ena lauma dekenai ita tabekau neganai, ita be “siahu badana” do ita abia, dika eiava hekwarahi iboudiai ita hanaia totona.​​—⁠2  Korinto 4:7; 1 Korinto 10:⁠13.

Hamomokania gaudia iboudiai oi laloa neganai, ita daradara lasi momokani hari inai negai Dirava ena lauma helaga ia gaukara noho. Iehova ena lauma ese iena hesiai taudia ia hasiahudia iena ura hereadia idia harorolaia totona. Lauma dalanai diari ia halasia noho, bona iseda abidadama ia hagoadaia, unai amo ita ia durua iseda Havaraia Tauna ita badinaia noho totona. Ita moale bada badina Dirava be iena gwauhamata ia hamomokania, hari inai negai iena abidadama hesiai taudia dekenai lauma helaga ia henia!

[Footnote]

[Box on page 10]

Haida Edia Hereva Iehova Ena Witnes Taudia Dekenai

“Ena be ma dubu haida be diba bada taudia amo sisiba idia tahua taunimanima edia lalona idia ania idia mai guriguri totona, eiava hari inai negai idia vara hepapahuahu, hegeregere tatau be tatau ida idia mahuta hebou ia maoro eiava lasi, bona bogana lalonai natuna hamasea karana, idia hekwarahilaia, to Witnes taudia be ia idau noho tanobadana ena lalohadai idia abia dae lasi. Tanobada ibounai dekenai edia haroro idia karaia noho.”​​—⁠The Orange County Register of Orange County, California, U.S.A.

“Abidadama habadaia gaukarana dekenai, dubu momo be Iehova ena Witnes taudia hegeregeredia idia karaia goadagoada lasi.”​​—⁠The Republic of Columbus, Indiana, U.S.A.

“Idia sibodia be ruma ta amo ruma ta idia lao ‘sivarai namona’ idia harorolaia, bona Baibel ena hahegani idia badinaia.”​​—⁠Życie Literackie, Poland.

“Haroro gaukara badana dekenai, Iehova ena Witnes taudia be Iehova ena sivarai idia abia lao tanobada ena kahana ibounai dekenai.”​​—⁠News-Observer, Tamaqua, Pennsylvania, U.S.A.

[Pictures on page 9]

Dirava ena lauma helaga be lauma dalana ai iseda lalona ia hadiaria,

. . . Keristani kara namodia ia habadaia,

. . . bona tanobada ibounai dekenai haroro gaukarana ai ita ia durua