Lalona Ena Hairai be Ia Noho Daudau

ABIDADAMA KERISTANI BURUKA TAUNA TA IA GWAU: “TAU MATAMATA ESE TOANA HAIRAINA BE KARA NAMONA BAMONA IA LALOA.”

Oibe, taunimanima ese tauanina murimurina ena hairai idia laloa bada, unai dainai nega momo edia lalona dekenai mai anina bada gaudia idia laloa lasi. To, ita ia Havaraia Tauna, be iseda lalona korikorina ia itaia, herevana iseda toana be edena bamona. Unai dala amo laloa maoromaoro karana dekenai haheitalai hereadaena ia hahedinaraia. Baibel ena hereva hegeregerena, Dirava sibona ia gwau: “Lohiabada ese gau ia itaia lasi, taunimanima ese idia itaia bamona. Taunimanima ese tau ena toana idia itaia, to Lohiabada ese tau ena kudouna ia itaia.”​​—⁠1 Samuela 16:⁠7.

Dirava be taunimanima edia hairai momokanina ena badina, bona iena Hereva ese ia hahedinaraia taunimanima ta ena toana korikori oi laloa neganai, lauma gaudia be mai anina bada. Baibel ia gwau: “Hahine momo edia hereva namodia be koikoi bamona, bona edia hairaina be do ia ore haraga. To Lohiabada dekenai ia gari hahinena, be do idia matauraia.” (Aonega Herevadia 31:30) Momokani, tauanina ena hairai ese lalona dikana do ia koua diba. (Eseta 1:​10-​12; Aonega Herevadia 11:22) Ena be tauanina ena hairai be gabeai do ia ore ia lao, to lalona ena hairai​​—⁠kudouna ena kara namodia​—⁠be do idia tubu daekau bona do idia noho daudau.

Unai dainai, aonega karana be lalokau, moale, maino, haheauka, hebogahisi, kara maoromaoro, abidadama, kara manada, bona tauanina ena ura koua karana ita goadalaidia be namo! (Galatia 5:​22, 23) Ita ese lalona ena hairai namona do ita abia diba, ena namo ia noho daudau momokani gauna.​—⁠1 Petero 3:​3, 4.