Baibel—Idia Ura Henia Bona Idia Taravatua
Lagani 1500 murinai, Dutch taudia edia diba bada tauna mai ena ladana bada, Desiderius Erasmus, ia gwau: “Lau ura buka helagadia be gado iboudiai dekenai idia hahanaia.”
ERASMUS ena ura gauna badana be taunimanima iboudiai ese Baibel do idia duahia bona lalo-pararalaia diba. To, Baibel idia ura henia lasi taudia ese mai edia dagedage danu unai lalohadai idia dadaraia. Momokani, unai nega lalonai, Europe be gabu dikana Baibel ena anina ia tahua sisina tauna dekenai danu. England dekenai palamen ese taravatu ta idia atoa, ia gwau: “English gado ai Baibel idia duahia taudia ese edia tano, taga, kohu, bona mauri do idia haboioa . . . bona, bema edia kara idia gwauatao murinai idia karaia noho, eiava idia karaia lou, king gwau-edeede henia karana dainai do idia taua dae, bena do idia gabudia badina Dirava idia dadaraia unai.”
Europe ena tano badana dekenai, Katolik Inkwisisen taudia ese mai hebogahisi lasi ida “dubu ena hadibaia hereva idia dadaraia” oreadia idia tahua, hegeregere France dekenai idia noho Walden taudia, bona idia hahisidia totona idia abidia hidi badina “evanelia bukadia bona revarevadia bona toretore helagadia ma haida [amo idia haroro], . . . badina dubu ena dagi idia abia lasi taudia ese Baibel idia harorolaia bona hadibaia [be] taravatu.” Tatau bona hahine momo herea be Baibel idia ura henia bada dainai hisihisi bada herea bona mase idia davaria. Lohiabada ena Guriguri eiava Taravatu Ten idia gwauraia bona edia natudia dekenai idia hadibaia karana dainai panisi dikana idia abia diba.
Unai bamona Dirava ena Hereva laloa karana be North America dekenai idia lao England taudia momo edia kudouna dekenai ia do noho. A History of Private Life—Passions of the Renaissance bukana ia gwau guna America dekenai “duahiduahi karana bona tomadiho be idia gaukara hebou, edia mauri dalana ena badina be Baibel idia diba momo.” Momokani, lagani 1767 ai Boston dekenai tomadiho herevana ta idia halasia neganai inai bamona idia gwau: “Revareva helagadia oi duahia karana oi goadalaia. Namona be daba bona hanuaboi iboudiai emu Baibel ena karoa ta oi duahia.”
Barna Research Oreana, Ventura, California ai, idia gwau, America taudia amo 90 pesen be Baibel toi bamona idia abia. To, vanegai sibona idia karaia stadi ta ese ia hahedinaraia, unuseniai Baibel idia do laloa bada, “to nega idia atoa idia duahia, stadilaia bona badinaia karana dekenai be . . . kara gunana.” Momo ese ena anina sisina sibona idia diba. Niuspepa torea tauna ta ia gwau: “[Baibel] be do mai ena heduru hari ita davaria hekwakwanai bona lalo-metau gaudia dekenai be nega momo ia vara lasi lalohadaina.”
Momo Edia Lalohadai
Momo idia abia dae, mauri lalonai ita kwalimu diba dalana tamona be aonega bona ma haida ida gaukara hebou karana. Idia laloa Baibel be tomadiho lalohadai idauidau bona taunimanima edia sivarai idia herevalaia bukadia haida hegeregerena, to gau korikoridia bona hereva momokani ia gwauraia bukana bamona lasi.
Vadaeni, taunimanima momo ese mauri lalonai idia auka idia lao bona daradara idia havaraia hekwakwanai dainai, edena bamona idia kara? Idia dekenai lauma dalanai heduru be lasi, kara maoromaoro taravatudia bona tomadiho ena hakaua herevadia be lasi. Idia be mai edia tari lasi bouti bamona ai idia lao, “taunimanima edia hahediba herevadia ese idia doridia lao bona doridia mai, . . . taunimanima edia hereva koikoi bona lalona veria herevadia amo.”—Efeso 4:14, The Twentieth Century New Testament.
Vadaeni, namona be do ita henanadai, Baibel be tomadiho bukana ma ta sibona, a? Eiava momokani ia be Dirava ena Hereva, bona ia lalonai heduru bona hahediba herevadia namodia idia noho, a? (2 Timoteo 3:16, 17) Baibel be ita ese ita lalohadailaia be namo bukana ta, a? Hereva gabena ese unai henanadai edia haere do ia henia.
[Picture on page 3]
Desiderius Erasmus
[Credit Line]
From the book Deutsche Kulturgeschichte
[Picture on page 4]
Walden taudia be idia hahisidia totona taunimanima edia huana amo idia abia hidi badina Baibel idia harorolaia
[Credit Line]
Stichting Atlas van Stolk, Rotterdam