Oi Sibona Oi Henia Gwauhamatana Oi Hamomokania, A?

“Emui hesiai gaukara ibounai lalonai, mai emui kudouna ibounai do umui karaia. Do umui karaia, ia be tau ta ena gaukara lasi, to Lohiabada ena gaukara umui karaia bamona.”​—⁠KOLOSE 3:⁠23.

1. Spot gadara lalonai “sibona henia karana” be edena bamona?

SPOT taudia be edena bamona idia kwalimu? Tenis, soka, basketbol, beisbol, heau helulu, golf, eiava idia abia hidi spot gadara ma ta dekenai idia kwalimu dalana tamona be idia sibona idia henia edia tauanina bona edia lalona idia hagoadaia totona. Tauanina bona lalona hagoadaia be gau ginigunana. Baibel dekenai “sibona henia karana” ia herevalaia neganai, unai bamona spot gadara dekenai sibona henia karana ia herevalaia, a?

2. Baibel lalonai “sibona henia karana” ena anina be dahaka? Haheitalai oi gwauraia.

² Baibel lalonai “sibona henia karana” ena anina be dahaka? Heberu herevana “sibona henia” ena anina be “atoa siri; gini siri; raka siri.”a Idaunegai Israela dekenai, Hahelaga Tauna Badana Arona ena kwarana gauna dekenai “sibona henia ena toana helagana” ia noho, ia be golo namo herea amo idia karaia bona ena Heberu toretorena ia gwau “Helaga, Lohiabada ena.” Unai ese hahelaga tauna badana ia hadibaia loulou dubu hadikaia gauna ta do ia karaia lasi, “badina be Dirava ena dehoro helagana be iena latanai idia bubua vadaeni, ia be helaga.”​—⁠Esodo 29:​6, NW; 39:30; Levitiko 21:⁠12.

3. Sibona henia karana ena anina iseda kara dekenai be edena bamona?

³ Unai amo ita itaia unai bamona sibona henia karana be mai anina bada gauna. Anina be ta sibona ia ura Dirava ena hesiai tauna do idia gwauraia, bona unai totona ia kara goeva be gau badana. Unai dainai, ita lalo-parara dahaka dainai aposetolo Petero ese Iehova ena hereva ia torea hanai, ia gwau: “Do umui helaga, badina lau be lau helaga noho.” (1 Petero 1:​15, 16) Ita be gwauhamata Keristani taudia dainai, iseda maduna badana be sibona ita henia gwauhamatana do ita hamomokania, do ita badinaia ela bona dokona. To Keristani gwauhamata ena anina be dahaka?​—⁠Levitiko 19:2; Mataio 24:⁠13.

4. Dahaka ia vara guna bena gwauhamata ita karaia, bona gwauhamata be dahaka bamona?

⁴ Iehova Dirava bona ena ura bona Iesu Keriso bona ena gaukara Iehova ena ura lalonai ita diba maoromaoro murinai, sibona eda lalona ita hadaia Dirava do ita hesiai henia mai eda kudouna, lalona, mauri, bona goada ibounai ida. (Mareko 8:34; 12:30; Ioane 17:⁠3) Unai be sibona ita karaia gwauhamata badana, eda mauri ibounai be Dirava dekenai ita gwauhamatalaia. Iseda gwauhamata be ia vara haraga hemami goadana dainai ita karaia lasi. Mai guriguri ida ita laloa namonamo guna, bona iseda lalona ita gaukaralaia. Unai dainai, iseda gwauhamata be nega kwadogina totona lasi. Namo lasi ita be tano makohia tauna ta bamona, ia be nega sisina ia gaukara to gaukara ia auka dainai, eiava toana be anina utua negana be daudau eiava reana do ia vara lasi dainai, ena gaukara ia hadokoa. Nega aukadia lalonai, tiokratik maduna ena ‘tano makohia gauna be edia imana dekenai idia dogoatao noho’ taudia haida edia haheitalai mani oi laloa.​—⁠Luka 9:62; Roma 12:​1, 2.

Edia Gwauhamata Idia Rakatania Lasi

5. Edena dala ai Ieremia ese Dirava ena gwauhamata hesiai tauna ena kara ia hahedinaraia namonamo?

⁵ Ieremia ena peroveta gaukara Ierusalema dekenai be lagani 40 (647-607 B.C.E.) lalonai ia karaia, bona ia be gaukara aukana. Iena goada ena hetoana ia diba namonamo. (Ieremia 1:​2-6) Ia gari lasi bona ia haheauka be mai anina bada, dina ta ta Iuda ena kwara auka taudia huanai ia gaukara diba totona. (Ieremia 18:18; 38:​4-6) To, Ieremia ese Iehova Dirava ia abidadama henia, bona Ia ese ia hagoadaia dainai Ieremia be Dirava ena gwauhamata hesiai tauna momokanina ta.​—⁠Ieremia 1:​18, 19.

6. Aposetolo Ioane ese ita dekenai ia henia haheitalai be edena bamona?

⁶ Kamonai aposetolo Ioane, ‘Dirava ena hereva bona ena abidadama Iesu dekenai ia gwauraia hedinarai’ dainai, ia buruka neganai Patamo ena motumotu dikana dekenai idia siaia tauna, be edena bamona? (Apokalupo 1:⁠9) Ia haheauka bona lagani 60 bamona lalonai ia hahedinaraia ia be gwauhamata Keristani tauna ta. Roma taudia ese Ierusalema idia hadikaia ore murinai ia do noho. Ia ese lauma helaga ena hakaua henunai Evanelia Bukana ta, revareva toi, bona Apokalupo bukana ia torea, bona unai matahanai lalodiai Aramagedono tuarina ia itaia. Iena gaukara ia hadokoa badina ia diba Aramagedono be iena mauri negana lalonai do ia vara lasi, a? Ia manoka bona ena gaukara ia rakatania, a? Lasi, Ioane ia abidadama noho ela bona ia mase, bona ia diba ena be “nega be ia kahirakahira vadaeni,” to ia itaia gaudia idia guguru negana be gabeai.​—⁠Apokalupo 1:3; Daniela 12:⁠4.

Gwauhamata Taudia Hari Inai Negai

7. Edena dala ai tadikaka ta ese iena Keristani gwauhamata badinaia karana ia hahedinaraia namonamo?

⁷ Hari inai negai, kamonai Keristani taudia tausen momo be mai edia goada ida edia gwauhamata idia hamomokania ena be Aramagedono idia itaia lasi. England tauna Ernest E. Beavor be unai bamona tauna ta. Lagani 1939 ai, Tanobada Ibounai Tuarina Iharuana ena matamanai, Witnes tauna ai ia lao bona iena bisinesi namona, niuspepa totona laulau ia karaia bisinesi, ia rakatania ful-taim hesiai gaukara ia hamatamaia totona. Iena Keristani gini siri karana dainai, lagani rua dibura dekenai ia noho. Iena ruma bese ese ia idia durua, bona lagani 1950 ai ena natudia toi be New York dekenai, Watchtower Bible School of Gilead dekenai idia lao, misinari gaukara idia hadibaia totona. Tadikaka Beavor ese haroro gaukara ia goadalaia dainai ena turadia ese idia gwauraia Aramagedono Ernie. Mai ena kamonai ida iena gwauhamata ia hamomokania, bona Dirava ena tuari Aramagedono be kahirakahira do ia mai ia harorolaia noho ela bona lagani 1986 ai ia mase. Ia laloa lasi iena gwauhamata be nega kwadogi totona Dirava ida ia karaia kontraka ta!b​—⁠1 Korinto 15:⁠58.

8, 9. (a) Franco ena lohia negana lalonai, Spain dekenai idia noho matamata taudia momo edia haheitalai be edena bamona? (b) Edena henanadai ita laloa be namo?

⁸ Ena ura bona lalo-goada ia boio lasi tauna ma ta be Spain amo ia mai. Franco ena lohia negana (lagani 1939-​75) lalonai, gwauhamata Witnes matamata taudia handred momo be Keristani gini siri karana idia badinaia. Idia momo be lagani 10 eiava ma haida lalodiai tuari dibura dekenai idia noho. Witnes tauna ta, Jesús Martín, be dibura dekenai lagani ibounai 22 ia noho. North Africa dekenai tuari dibura lalonai idia dogoatao neganai idia dadabaia dikadika. Unai be auka momokani, to ia gini goada.

⁹ Nega momo unai matamata tadikaka idia diba lasi edena negai do idia ruhadia, bema do idia ruhadia, badina hahemaoro herevadia idia henia loulou. To, edia kamonai karana idia badinaia bona dibura lalonai mai goada ida idia haroro. Lagani 1973 ai edia noho ia namo ia lao matamaia neganai, unai Witnes taudia momo, unai neganai edia mauri laganidia be 30 idia hanaia, be dibura amo idia ruhadia bona maoromaoro ful-taim hesiai gaukara idia hamatamaia, idia haida be spesel painia gaukara bona sekit naria gaukara idia karaia. Dibura lalonai edia gwauhamata idia hamomokania, bona idia momo herea be dibura amo idia ruhadia murinai danu idia hamomokania noho.c Ita be edena bamona? Ita ese iseda gwauhamata ita hamomokania unai bamona kamonai taudia hegeregerena, a?​—⁠Heberu 10:​32-34; 13:⁠3.

Iseda Gwauhamata Laloa Dalana Maorona

10. (a) Sibona eda gwauhamata be edena bamona ita laloa be namo? (b) Iehova ese iseda hesiai gaukara ia dekenai be edena bamona ia laloa?

¹⁰ Dirava ena ura karaia totona ia dekenai ita sibona ita henia gwauhamatana be edena bamona ita laloa? Iseda mauri lalonai ia be gau ginigunana, a? Herevana ita be matamata eiava buruka taudia, headava eiava headava lasi taudia, goada eiava gorere taudia, to namona be iseda noho dalana hegeregerena ita gaukara goada, iseda gwauhamata ita hamomokania totona. Reana ta ena noho dalana dainai ful-taim hesiai gaukara ia karaia diba, reana ia be painia ta, Watch Tower Society ena brens opesi ena volantia tauna ta, eiava misinari o loaloa naria tauna ta. To, mai edia natudia tama sina haida be reana idia bisi bada, badina tauanina bona lauma dalanai edia ruma bese idia naria. Hua ta ta lalonai hesiai gaukara dekenai idia atoa diba hora haida be Iehova ese ia laloa maragi, to ful-taim hesiai gaukara lalonai ta ese ia atoa hora momo ia laloa bada, a? Lasi. Dirava ese ita dekenai ia noho lasi gauna ita amo ia noia lasi. Aposetolo Paulo ese inai hakaua herevana ia hahedinaraia, ia gwau: “Bema tau ta ia ura dikadika harihari gauna do ia henia, Dirava ese inai kara do ia ura henia. Dirava ia diba unai tau ena kohu be hida, bona ia laloa karaia, unai tau ena harihari gauna be iena kohu hegeregerena o lasi.”​—⁠2 Korinto 8:⁠12.

11. Dahaka amo hahemauri ita abia diba?

¹¹ Danu, ita karaia gaudia dainai hahemauri do ita abia lasi, to Iehova ese Keriso Iesu, iseda Lohiabada, amo ia hahedinaraia hebogahisi dainai mauri do ita abia. Paulo ese ia hahedinaraia goevagoeva: “Ita ibounai ita kara dika vadaeni, bona Dirava ena hairaina guba dekenai ita abia be hegeregere lasi. To Dirava ese iena harihari gauna davana lasi ia henia ita dekenai. Iena bogahisihisi dekena amo ia ese ita ia gwauraia maoromaoro. Inai bamona ia karaia, badina be Iesu Keriso ese ita ia hoia lou dainai.” To, iseda kara amo do ita hamomokania iseda abidadama Dirava ena gwauhamata dekenai be ia goada noho.​—⁠Roma 3:​23, 24; Iamesi 2:​17, 18, 24.

12. Dahaka dainai hahegeregerea karana ita karaia lasi be namo?

¹² Ita karaia gaudia, hegeregere Dirava ena hesiai gaukara lalonai ita atoa nega, ita hariharilaia Baibel buka bona magasin edia namba, eiava ita hakaua Baibel stadi edia namba, be ma haida idia karaia gaudia ida ita hahegeregerea be anina lasi. (Galatia 6:​3, 4) Herevana Keristani hesiai gaukara lalonai reana anina bada ita havaraia, to ita hekokoroku lasi totona Iesu ese ia henia sisiba ita laloatao be namo, ia gwau: “Unai dainai, umui danu, umui dekenai Dirava ia hereva karadia ibounai do umui karaia, vadaeni do umui gwau, ‘Ai be hesiai taudia namodia lasi, badina be ai ese aiemai gaukara sibona ai karaia vadaeni.’ ” (Luka 17:10) Nega momo ita gwau diba, ita abia “karadia ibounai” ita karaia vadaeni, a? Vadaeni namona be ita henanadai, Iseda hesiai gaukara Dirava vairanai be edena bamona be namo?​—⁠2 Korinto 10:​17, 18.

Dina ta ta be mai Anina Bada

13. Iseda gwauhamata ita hamomokania lalonai, dahaka lalohadai ita abia dae be namo?

¹³ Paulo ese headava hahine, headava tatau, natudia, tama sina, bona hesiai taudia ia sisiba henia murinai, ia gwau: “Emui hesiai gaukara ibounai lalonai, mai emui kudouna ibounai do umui karaia. Do umui karaia, ia be tau ta ena gaukara lasi, to Lohiabada ena gaukara umui karaia bamona. Badina be umui diba, umui ta ta emui kara dainai, Lohiabada ese davana namona umui dekenai do ia henia. . . . Badina umui be Lohiabada Keriso ena hesiai taudia.” (Kolose 3:​23, 24) Iehova ena hesiai gaukara lalonai ita karaia gaudia be taunimanima ese idia itaia totona ita karaia lasi. Ita ese Iesu Keriso ena haheitalai hegeregerena Dirava ita hesiai henia toho. Ia ese nega kwadogi ai ia karaia hesiai gaukarana lalonai karaharaga lalohadaina ia hahedinaraia.​—⁠1 Petero 2:⁠21.

14. Petero ese dina gabedia ia herevalaia neganai dahaka sisiba ia henia?

¹⁴ Aposetolo Petero ese karaharaga lalohadaina ia hahedinaraia danu. Iena revareva iharuana lalonai ia gwau nega dokona dekenai kirikiri taudia​—⁠hereva momokani negea taudia bona daradara taudia​—⁠be do idia noho, bona sibona edia ura dainai Keriso ena noho negana idia henanadailaia. To, Petero ia gwau: “[Lohiabada] ese iena gwauhamata badinaia totona ia hesiku lasi, haida idia laloa bamona. Lasi, to umui totona ia haheauka noho. Badina be ia ura lasi tau ta ia mase. Ia ura taunimanima ibounai ese dika dekena amo edia lalona do idia giroa. To Lohiabada ena Dina be do ia ginidae, henaoa tauna ia ginidae bamona.” Oibe, Iehova ena dina be do ia ginidae momokani. Unai dainai, namona be dina ta ta do ita tahua iseda abidadama Dirava ena gwauhamata dekenai be ia do goada noho, eiava.​—⁠2 Petero 3:​3, 4, 9, 10.

15. Iseda mauri dinadia ta ta be edena bamona ita laloa be namo?

¹⁵ Iseda gwauhamata ita hamomokania namonamo totona, namona be dina ta ta ita gaukaralaia Iehova hanamoa totona. Dina ta ta idia ore neganai, unai dina ita laloa bena ita itaia diba dala ta ai Dirava ena ladana hahelagaia karana bona Basileia ena sivarai namona harorolaia gaukarana ita durua, a? Reana unai be iseda kara goeva, ta ia hagoadaia herevahereva, eiava mai lalokau ida ruma bese eiava turadia edia namo ita tahua karana amo ita karaia. Idia kehoa daladia ita gaukaralaia, iseda Keristani helaro be ma haida dekenai ita gwauraia totona, a? Ta ita durua Dirava ena gwauhamata ia lalodia namonamo totona, a? Namona be dina ta ta lalonai lauma dalanai gau namona ta ita karaia, unai amo ita ese lauma kohu namona ita haboua noho.​—⁠Mataio 6:20; 1 Petero 2:12; 3:15; Iamesi 3:⁠13.

Oiemu Matana Idia Diari Noho be Namo

16. Edena dala idauidau ai Satani ese iseda gwauhamata Dirava dekenai ia hamanokaia toho?

¹⁶ Hari ita noho negana be ia auka momokani Keristani taudia dekenai. Satani bona ena gaukara taudia ese namo bona dika, goeva bona miro, kara maoro bona kara gageva, mauri taravatudia badinaia bona badinaia lasi karana, edia idau idia hunia toho. (Roma 1:​24-28; 16:​17-19) Dala ia kehoa televisen bona Internet amo iseda kudouna bona lalona ita hamiroa haraga totona. Reana lauma dalanai iseda matana idia dika idia lao, bena Satani ena koikoi karadia ita itaia lasi. Bema lauma gaudia ita laloa maragi matamaia, iseda gwauhamata hamomokania totona iseda lalona do ia goada lasi bona “tano makohia gauna” do ita dogoatao auka lasi.​—⁠Luka 9:62; Filipi 4:⁠8.

17. Edena dala ai Paulo ena sisiba ese ita ia durua diba iseda hetura karana Dirava ida ia namo noho totona?

¹⁷ Unai dainai Paulo ena hereva Tesalonika kongregesen dekenai be mai anina bada hari, ia gwau: “Dirava ena ura be inai: Do umui helaga, heudahanai bona sihari kava karadia do umui rakatania momokani.” Ma ia gwau: “Umui ta ta ibounai be helaga bona hemataurai dalana ai sibona emui tauanina umui biagua dalana do umui diba be namo, mai matabodaga danu do umui karaia lasi, Dirava idia diba lasi besedia edia kara bamona.” (1 Tesalonika 4:​3-5, NW ) Matabodaga karadia dainai haida be Keristani kongregesen amo idia atoa siri​—⁠unai be edia gwauhamata Dirava dekenai idia laloaboio taudia. Edia hetura karana Dirava ida ia manoka ia lao, bena edia mauri lalonai Ia be anina lasi bamona. To, Paulo ia gwau: “Dirava ia boiboi ita dekenai, do ita heudahanai totona lasi, to do ita helaga totona. Unai dainai, inai hadibaia hereva ia negea tauna, ese taunimanima ia negea lasi, to ia ese Lauma Helaga umui dekenai ia henia Tauna, Dirava, ia negea inai.”​—⁠1 Tesalonika 4:​7, 8.

Dahaka Dekenai Emu Lalona Oi Hadaia?

18. Dahaka karaia totona iseda lalona ita hadaia be namo?

¹⁸ Bema ita lalo-parara iseda gwauhamata Iehova Dirava dekenai be mai anina bada gauna, namona be iseda lalona ita hadaia dahaka do ita karaia totona? Namona be iseda lalona ita hadaia goada, iseda kara eiava iseda hesiai gaukara lalonai iseda lalona ena mamina be gau ta ese do ia hadikaia lasi. Petero ese ita ia hagoadaia: “Mai emui laloa maoromaoro do umui noho. Vadaeni umui dekenai idia hereva dika henia, Keriso umui badinaia dainai, unai taudia ese do idia hemarai. Edia hemarai ena badina be, emui kara namodia idia itaia dainai.” (1 Petero 3:16) Reana iseda Keristani kara dainai haida ese ita idia dagedage henia, to Keriso be Dirava ia abidadama henia bona ia badinaia dainai dagedage ia davaria danu. Petero ia gwau: “Keriso ese iena tauanina dekenai hisihisi ia abia dainai, umui ese iena laloa hegeregerena do umui laloa be namo. . . . Badina be iena tauanina ia hisihisi noho tauna ese kara dika ia rakatania vadaeni.”​—⁠1 Petero 4:⁠1.

19. Ita ura taunimanima ese edena bamona ita idia gwauraia?

¹⁹ Momokani, bema iseda lalona ita hadaia goada iseda gwauhamata do ita hamomokania, unai ese ita do ia gimaia bena Satani ena tanobada, lauma dalanai, kara maoromaoro dalanai, bona tauanina dalanai ia gorere tanobadana, ena tarapu dekenai ita moru lasi. To unai sibona lasi, do ita diba momokani Dirava ena lalo-namo ita abia, bona unai ese Satani bona ena gaukara taudia ese idia henia diba gaudia ibounai ia hereaia. Unai dainai, namo lasi haida idia gwau hereva momokani ita dibaia neganai ita abia lalokauna be hari ita rakatania vadaeni. To, namona be idia gwau ita be aposetolo edia negai ia noho Tuatira kongregesen taudia bamona, Iesu ese ia herevalaidia ia gwau: “Oiemu kara, oiemu lalokau, oiemu abidadama, oiemu hesiai gaukara, bona oiemu haheauka, ibounai lau diba. Lau diba danu oiemu kara be namo, guna bamona lasi.” (Apokalupo 2:​4, 18, 19) Oibe, namo lasi iseda gwauhamata ita laloa goada lasi, to namona be ‘lauma amo ita hururu,’ ita gini goada ela bona dokona​—⁠bona dokona be kahirakahira.​—⁠Roma 12:​11, NW; Apokalupo 3:​15, 16.

[Footnotes]

Oi Laloatao, A?

• Sibona henia karana ena anina be dahaka?

• Idaunegai bona hari inai negai Dirava ena gwauhamata hesiai taudia namodia haida, edia haheitalai ita tohotohoa diba taudia, be daidia?

• Iseda hesiai gaukara Dirava dekenai be edena bamona ita laloa be namo?

• Iseda gwauhamata Dirava dekenai ita laloa neganai dahaka karaia totona iseda lalona ita hadaia be namo?

[Picture on page 15]

Ena be Ieremia idia kara dika henia to ia gini goada

[Picture on page 16]

Ernest Beavor ese ena natudia dekenai Keristani tauna goadana ena kara ia hahedinaraia

[Picture on page 17]

Spain ena dibura idauidau dekenai Witnes taudia handred momo idia kara maoromaoro noho

[Pictures on page 18]

Namona be dina ta ta lalonai lauma dalanai gau namona ta ita karaia