Mauri Sivaraina
Lau Idia Siaia Gabudia Dekenai Lau Gaukara
JAMES B. BERRY ESE IA SIVARAILAIA
Lagani be 1939. Hekwakwanai Bada Negana (Great Depression) dainai mauri ia auka momokani United States dekenai, bona tuari be Europe dekenai ia matamaia gwauraia. Lau bona egu tadina maragina Bennett be gaukara ai tahua totona emai gabu Mississippi ai rakatania bona Houston, Texas dekenai, ai lao.
DINA ta siahu negana ena dokona ai, reidio amo hadibaia hereva idauna ai kamonai: Hitler ena tuari taudia be Poland dekenai idia vareai. Egu tadina ia gwau: “Aramagedono ia matamaia vadaeni!” Maoromaoro, emai gaukara ai hadokoa. Ai kahirakahira dekenai ia noho Kingdom Hall dekenai ai lao bona emai hebou ginigunana ai abia. Dahaka dainai Kingdom Hall dekenai ai lao? Mani matamana negana amo egu sivarai lau gwauraia.
Lau be lagani 1915 ai Hebron, Mississippi dekenai, lau vara. Ai be biru gabudia momo idia noho kahanai ai noho. Bible Student taudia, guna Iehova ena Witnes taudia be unai ladana idia gaukaralaia, be unai gabu dekenai lagani ta ta ai nega tamona idia mai bona dala idia karaia ta ena ruma dekenai hereva idia henia totona. Unai dainai, egu tama sina be mai edia Baibel bukadia momo. Lau bona Bennett ese unai buka idia hadibaia gaudia ai abia dae, idia be inai: Hel be ia siahu lasi, souli ia mase, kara maoromaoro taudia be tanobada dekenai do idia noho ela bona hanaihanai. To, gau momo ai do dibaia lasi. Sikuli lau haorea bena nega sisina murinai, lau bona egu tadina be gaukara ai tahua totona Texas dekenai ai lao.
Kingdom Hall dekenai Witnes taudia ai davaria neganai, ai idia nanadaia bema ai be painia taudia. Ai diba lasi painia tauna be Iehova ena Witnes taudia edia ful-taim hesiai tauna. Bena ai idia nanadaia bema ai ura haroro. Ai haere: “Oibe!” Ai laloa ta do idia siaia ai dekenai unai gaukara karaia dalana do ia hahedinaraia. To, mapu ta sibona idia henia ai dekenai, bona ai idia hamaoroa: “Unuseniai umui gaukara!” Lau bona Bennett be haroro gaukara karaia dalana ai diba lasi momokani, bona ai ura lasi do ai hemarai. Vadaeni, unai mapu be kongregesen dekenai ai siaia bona Mississippi dekenai ai giroa lou!
Baibel Ena Hereva Momokani Ai Abia Dae Vaitani
Emai gabu dekenai ai giroa lou murinai, dina ibounai kahirakahira lagani tamona lalonai, Witnes taudia edia buka bona magasin ai duahia. Emai ruma dekenai paoa be lasi, unai dainai hanuaboi ai lahi ena diari dekenai ai duahiduahi. Unai negadiai, loaloa naria taudia ese Iehova ena Witnes taudia edia kongregesen bona gunika dekenai idia noho Witnes taudia idia vadivadi henidia, lauma dalanai idia hagoadadia totona. Unai loaloa naria tauna ta, Ted Klein, ese emai kongregesen ia vadivadi henia bona lau bona Bennett ia bamoa ruma-ta-ruma-ta haroro gaukarana dekenai, nega momo ai ruaosi ia abia bena ia ida ai gaukara hebou. Ai dekenai painia gaukara be dahaka ia gwauraia hedinarai.
Ia ai bamoa dainai ai laloa Dirava ai hesiai henia badabada be namo. Unai dainai April 18, 1940 ai, Tadikaka Klein ese Bennett, egu taihuna Velva, bona lau ia habapatisoa. Ai bapatiso neganai emai tama sina idia noho, bona emai abia hidi dainai idia moale. Lagani rua bamona murinai, idia danu be bapatiso idia abia. Dirava idia badinaia noho ela bona edia mase—lagani 1956 ai Tamagu ia mase bona Sinagu be lagani 1975 ai.
Tadikaka Klein ese lau ia nanadaia bema lau ura painia neganai, ia lau hamaoroa lau ura, to lau be moni lasi, dabua lasi, gau ta lasi. Ia gwau: “Ia namo, unai do lau hegaegaelaia.” Bona ia karaia. Gau ginigunana be egu painia aplikeisen ia siaia. Bena lau ia abia lao New Orleans dekenai, kilomita 300 bamona, bona lau dekenai Kingdom Hall ena ataiai dekenai idia noho daiutu namodia ia hahedinaraia. Idia be painia taudia totona. Daudau lasi murinai unuseniai lau lao bona painia gaukara lau hamatamaia. New Orleans dekenai idia noho Witnes taudia ese dabua, moni, bona aniani amo painia taudia idia durua. Dina lalonai, tadikaka ese aniani idia mailaia bona iduara badinai idia rakatania eiava frisa dekenai idia atoa ai totona. Aniani rumana ia biagua tadikaka ta, ai kahirakahira ia noho, ese ai ia boiria aniani rumana ia koua negana ai hanaihanai do ai lao aniani ai abia totona—hegeregere vamu, beredi, chili, bona pai—dina ena aniani oredia.
Hutuma ese Ai Idia Dagedage Henia
Nega sisina murinai, Jackson, Mississippi dekenai, lau idia siaia painia gaukara karaia totona. Unuseniai, lau bona egu bamoa matamata be hutuma ese idia dagedage henia, bona toana be unai gabu dekenai idia noho pulisi ese unai hutuma idia durua! Gabeai ai lao gabuna— Columbus, Mississippi—dekenai unai bamona ia vara danu. Bese bona tano idauidau taudia ai haroro henidia dainai, kurokuro taudia haida ese ai idia inai henia. Momo idia abia dae ai kerere badina gavamani ai gwau-edeede henia. American Legion, edia tano idia lalokau henia bada oreana ta, ena gunalaia tauna ese unai lalohadai ia dogoatao. Nega momo unai idia badu hutuma edia lalona ia veria ai idia dagedage henia totona.
Columbus dekenai, dala dekenai magasin ai hariharilaia lalonai nega ginigunana ai idia dagedage henia neganai, hutuma be ai murinai idia mai. Sitoa ta ena galasi uindo dekenai ai idia doria auka. Hutuma idia haboua ia vara gauna idia itaia totona. Daudau lasi pulisi ia ginidae bona kota rumana dekenai ai idia abia lao. Unai hutuma ese ai idia gavaia ela bona kota rumana dekenai, bena gavamani ena gaukara taudia idia hamaoroa bema idia abia hidi dinana dekenai taoni ai rakatania, do ai mauri. To bema unai deit murinai ai lao, do ai mase! Ai laloa namona be nega sisina lalonai taoni do ai rakatania. To wiki haida murinai, ai giroa bona haroro gaukara ai karaia lou.
Daudau lasi murinai, tatau 8 be ai dekenai idia mai bona ai idia doria edia motuka rua lalonai ai vareai. Motuka amo ai idia taria lao uda dekenai, emai dabua idia kokia, bona egu beleta amo ai ta ta be nega 30 idia kwadia! Idia be mai edia ipidi bona varo danu, bona lau gwau diba ai gari momokani. Lau laloa varo amo ai do idia kwatua bona sinavai lalonai do idia negea. Emai buka bona magasin idia darea bona idau gabu idau gabu dekenai idia negea bona au ta ena badina dekenai emai rekodi masini idia makohia maragimaragi.
Ai idia kwadia murinai, idia hamaoroa emai dabua do ai atoa bona uda ena dala ta dekenai do ai raka diho bona do ai giroa lasi. Ai raka diho lalonai, ai laloa bema ai giroa, ai do idia pidia mase—bona panisi do idia abia lasi! To miniti haida murinai, ai kamonai edia motuka idia taria oho.
Ma nega ta ai, badu oreana ta ese ai idia lulua, bona emai dabua be aiona dekenai ai kwatua bona sinavai ta amo ai nahu lao, idia amo ai heau mauri totona. Unai ia vara bena daudau lasi murinai, gavamani ai gwau-edeede henia ena samania hereva koikoidia dainai ai idia dogoatao. Kota idia do karaia lasi neganai, wiki toi dibura rumana dekenai ai noho. Columbus dekenai unai gauna idia herevalaia badabada. Kahirakahira koledi dekenai idia noho stiuden taudia dekenai gwaumaoro idia henia edia klas idia haorea haraga, unai amo idia lao diba danu. Unai dina ia ginidae neganai, kota rumana be taunimanima amo ia honu momokani—idia gini sibona diba! Unai tano totona idia hereva taudia be rua, taoni naria tauna bona pulisi.
Witnes taudia totona ia hereva loea tauna ladana G. C. Clarke bona ena bamona idia siaia. Idia noia bema samania herevana, gavamani ai gwau-edeede henia, idia kokia badina hamomokania gaudia be lasi. Tadikaka Clarke ida ia gaukara loea tauna, ena be ia be Iehova ena Witnes tauna ta lasi, to ai dainai hereva mai siahuna ia henia. Nega ta hahemaoro tauna ia hamaoroa, “Taunimanima idia gwau Iehova ena Witnes taudia be kavakava. Kavakava? Thomas Edison be kavakava!” Bena golobu ta dekenai ia poinia bona ia gwau: “To unai golobu mani umui itaia!” Edison ese golobu ia karaia, bona reana haida idia laloa ia kavakava, to ta lasi ese ia karaia gaudia ia hepapahuahulaia diba.
Edia hereva ia kamonai murinai, gabu idauidau dekenai ia lao kota ena hahemaoro tauna ese loea tauna ia hamaoroa: “Gavamani idia gwau-edeede henia hamomokania gauna ta be oi dekenai ia noho lasi, bona idia be mai edia maoro inai gaukara idia karaia totona. Kota rumana dekenai idia oi mailaia lou lasi bona inai tano ena nega bona moni bona lauegu nega danu oi haorea kava lasi ela bona hamomokania gauna oi davaria!” Ai kwalimu unai!
To unai murinai, hahemaoro tauna ese ena daiutu dekenai ai ia boiria vareai. Ia diba ia karaia herevana be taoni taudia ibounai idia abia dae lasi. Unai dainai ai ia sisiba henia ia gwau: “Lau gwauraia herevana be taravatu hegeregerena, to lauegu heduru hereva umui ruaosi dekenai be inai: Inai gabu umui rakatania o umui do idia alaia mase!” Ai diba ena hereva be maoro, unai dainai taoni ai rakatania.
Clarksville, Tennessee dekenai, Bennett bona Velva lau bamodia, idia be spesel painia gaukara idia karaia. Hua haida murinai, Paris, Kentucky dekenai, ai idia siaia. Lagani ta mai kahana murinai, ai hegaegae vadaeni kongregesen ta ai haginia gwauraia neganai, lau bona Bennett ese boiboi hereva badana ai abia.
Misinari Gaukara Dekenai
Watchtower Bible School of Gilead ena klas iharuana dekenai ai idia boiria pepana ai itaia neganai, ai laloa, ‘Idia kerere! Dahaka dainai idia ura Mississippi memero matamatadia rua be unai sikuli dekenai idia boiria?’ Guna ai laloa idia ura edukeisen idia abia taudia sibona idia boiria, to ai lao sibona. Klas dekenai stiuden ibounai be 100, bona sikuli be hua ima lalonai ai karaia. January 31, 1944 ai, sikuli ai haorea bona ai ura bada idau tanona dekenai do ai gaukara. To unai negadiai, nega daudau lalonai paspot bona visa totona do ai naria, unai dainai stiuden taudia be nega sisina United States dekenai idia gaukara. Nega sisina Alabama bona Georgia dekenai painia gaukara ai karaia murinai, lau bona Bennett ese misinari gaukara gabuna ai abia—Barbados, West Indies dekenai.
Tanobada Ibounai Tuarina Iharuana be ia do vara noho, bona Iehova ena Witnes taudia edia gaukara bona buka bona magasin be gabu momo dekenai idia taravatua, Barbados dekenai danu. Kastom opesi dekenai, gavamani ena gaukara taudia ese emai sutkeisi idia kehoa bona ai hunia buka bona magasin idia davaria. Ai laloa, ‘Ai do idia siaia giroa.’ To idau, gavamani ena gaukara tauna ta ese ai ia hamaoroa: “Ai sori bada emai gaukara be emui sutkeisi ai sekea; inai buka bona magasin haida be Barbados dekenai idia taravatua.” To ai ia koua lasi, emai buka bona magasin ibounai ai abia lao diba! Gabeai, gavamani ena gaukara taudia ai haroro henidia neganai, idia gwau idia diba lasi dahaka dainai unai buka bona magasin idia taravatua. Hua haida murinai, unai taravatu idia kokia.
Emai haroro gaukara Barbados dekenai ese anina namona ia havaraia. Ai ta ta be Baibel stadi 15 bamona ai karaia, bona stiuden taudia momo be lauma dalanai idia tubu. Haida be kongregesen ena hebou dekenai idia mai dainai, ai moale. To, nega sisina daudau lalonai buka bona magasin idia taravatua dainai, unuseniai idia noho tadikaka be hebou karaia dalana idia diba lasi. To daudau lasi, idia hegeregere tadikaka haida ai hadibaia. Stiuden taudia momo ai durua Keristani hesiai gaukara idia hamatamaia bona kongregesen ena tubu dalana ai itaia dainai ai moale.
Ruma Bese Ai Naria
Hua 18 bamona Barbados dekenai lau noho murinai, opereisen lau abia be namo bona United States dekenai lau giroa lou. Unuseniai, revareva amo ai torea heheni Witnes ta ladana Dorothy lau adavaia. Bena lau bona egu adavana be Tallahassee, Florida dekenai, painia gaukara ai karaia, to hua 6 murinai, ai lao Louisville, Kentucky dekenai, Witnes ta ese unuseniai gaukara ta be lau dekenai ia henia. Egu tadina Bennett be Barbados dekenai lagani momo ena hesiai gaukara ia karaia. Gabeai misinari gaukara ia karaia taihu ta ia adavaia bona motumotu idauidau dekenai loaloa gaukara idia karaia. Gabeai, gorere dainai United States dekenai idia giroa lou. Spain gado kongregesen idauidau dekenai loaloa gaukara idia karaia ela bona Bennett ia mase lagani 1990 ai, unai neganai ena mauri lagani be 73.
Lagani 1950 ai, Dorothy ia mara bona emai natuna ginigunana ia abia, beibi kekenina unai, ena ladana ai atoa Daryl. Murinai natudia ibounai ima ai abia. Emai natuna iharuana, Derrick, ena mauri lagani be rua mai kahana neganai meninjaitis gorerena dainai ia mase. Lagani 1956 ai, Leslie ia vara, bona Everett be lagani 1958 ai ia vara. Lau bona Dorothy ai ura emai natudia be Baibel ena hereva momokani ena dala dekenai do ai hakaua. Hanaihanai ai hekwarahi pura ta ta ai ruma bese Baibel stadi ai karaia totona, bona natudia ibounai edia ura habadaia dalana dekenai ai karaia. Daryl, Leslie, bona Everett be idia do matamata neganai, pura ta ta ai henanadai ai henia bona haere idia tahua, bena unai pura murinai haere idia henia. Ruma-ta-ruma-ta haroro gaukara idia haheitalaia danu. Ta be dabua atoa daiutu dekenai ia vareai bona toana be ia be ruma tauna. Ma ta be murimurinai ia gini bona iduara dekenai ia pidipidi. Edia hevaseha herevadia amo ta ta idia hagaria toho, to unai ese idia ia durua haroro gaukara idia ura henia bada totona. Hanaihanai idia danu ai haroro hebou.
Lagani 1973 ai emai natuna mero ginigabena Elton ia vara, Dorothy be kahirakahira 50 bona lau be kahirakahira 60. Kongregesen lalonai ai idia boiria Aberahamo bona Sara! (Genese 7:15-17) Nega momo memero badadia rua be haroro gaukara dekenai Elton idia abia lao. Ai laloa haroro goadana do ai henia bema taunimanima idia itaia ruma bese taudia—tadikaka bona taihu, tama sina bona natudia—idia gaukara hebou Baibel ena hereva momokani be ma haida dekenai idia herevalaia. Elton ena kakana badadia rua be edia nega edia nega ai pagana dekenai ia idia atoa bona ena imana dekenai Baibel pepapepa ta idia atoa. Taunimanima be edia iduara idia kehoa bona hairai mero maragina ena kakana ena pagana dekenai ia helai idia itaia neganai, hanaihanai idia kamonai. Memero ese Elton idia hadibaia edia herevahereva idia haorea murinai ruma tauna dekenai pepapepa do ia henia bona hereva haida do ia gwauraia. Unai dala amo haroro gaukara ia karaia hamatamaia.
Idia ore laganidia lalonai, ma haida ai durudia Iehova idia diba totona. Lagani 1975 murinai, Louisville amo ai lao Shelbyville, Kentucky dekenai, heduru idia abia be namo kongregesen ta dekenai. Unuseniai, kongregesen ia tubu sibona ai itaia lasi, to heduru ai henia danu, tano ai davaria totona bona Kingdom Hall ai haginia totona. Gabeai, ai idia noia ia daudau lasi kongregesen ma ta dekenai do ai gaukara totona.
Ruma Bese Mauri Lalonai Do Idia Vara Gaudia Ibounai Ai Diba Lasi
Lau ura lau gwau emai natudia ibounai be Iehova ena dala idia badinaia, to unai bamona ia vara lasi. Idia tubu daekau bona ruma idia rakatania murinai, idia mauri natudia hani amo toi ese hereva momokani ena dala idia rakatania. To, egu natuna mero Everett ese egu haheitalai ia tohotohoa bona ful-taim hesiai gaukara lalonai ia vareai. Gabeai, Iehova ena Witnes taudia edia tanobada ibounai hedikwota ai, New York dekenai, ia gaukara, bona lagani 1984 ai ia idia boiria Gilead ena klas namba 77 dekenai ia vareai totona. Sikuli ia haorea murinai, Sierra Leone, West Africa dekenai, ia idia siaia. Lagani 1988 ai Marianne ia adavaia, ia be painia ta Belgium amo. Unai nega amo misinari gaukara idia karaia hebou.
Tama sina iboudiai idia laloa diba hegeregerena, emai natudia toi ese mauri ena dala, hari inai negai moale ia henia bona mauri hanaihanai tanobada paradaisona ena helaro namona ia henia dalana, idia rakatania ese emai lalona ia hahisia bada. Nega haida lau laloa unai be lauegu kerere. Ena be Iehova ese lalokau bona hebogahisi dekenai sisiba ia henia bona kerere ta ia karaia lasi, to iena lauma natudia haida, eiava anerudia, ese ena hesiai gaukara idia hadokoa lau laloa neganai, unai ese lau ia hagoadaia. (Deuteronomi 32:4; Ioane 8:44; Apokalupo 12:4, 9) Unai amo lau diba ena be tama sina idia hekwarahi bada edia natudia be Iehova ena dala dekenai idia hakaua totona, reana haida be hereva momokani do idia abia dae lasi.
Lai goadana ese au ena gini toana ia haidaua hegeregerena, gau haida ita haidaua be namo idia vara metau bona hekwakwanai idauidau ita haheaukalaia totona. Idia hanaia laganidia lalonai, lau davaria hanaihanai Baibel lau stadilaia bona hebou lao henia karana ese lau dekenai goada ia henia gau haida lau haidaua bona lauma dalanai lau goada noho totona. Lau buruka lau lao noho bona guna lau karaia kereredia lau itaia neganai, lau ura idia vara gaudia namodia sibona lau laloa. Bema abidadama dekenai ita gini goada noho, unai bamona gaudia dainai lauma dalanai do ita tubu diba. Bema idia amo diba ita abia, mauri ena namo lasi kahana haida be kahana namodia ai idia lao diba.—Iamesi 1:2, 3.
Hari lau bona Dorothy be ai gorere bona ai goada lasi emai ura hegeregerena Iehova ena hesiai gaukara ai goadalaia totona. To emai lalokau Keristani tadikaka bona taihu edia heduru karana dainai idia ai tanikiu henia. Kahirakahira hebou ibounai dekenai, tadikaka ese ai idia hamaoroa, hebou dekenai ai noho dainai idia moale bada. Bona sibodia idia henia dala idauidau dekenai ai idia durua totona—ruma bona motuka idia hanamoa danu.
Nega ta ta ai, heduru painia gaukara ai karaia diba, bona kamonai taudia dekenai Baibel stadi ai karaia. Ai moalelaia bada gauna be emai natuna amo sivarai ai kamonai, ia be Africa dekenai hesiai gaukara ia karaia noho. Emai ruma bese ena stadi ai do karaia noho, ena be unai be ai ruaosi sibona totona. Ai moale lagani momo herea lalonai Iehova ena hesiai gaukara ai karaia dainai. Ita ia hagoadaia ia ese ‘iseda kara namodia do ia laloaboio lasi.’—Heberu 6:10.
[Picture on page 25]
April 18, 1940 ai, Ted Klein ese lau, Velva, bona Bennett ia habapatisoa
[Pictures on page 26]
Lau bona egu adavana Dorothy, lagani 1940 murinai bona lagani 1997 ai
[Picture on page 27]
Pablik tok ladana, “Maino Ena Lohia,” be Barbados lalonai siti ena basi ta dekenai idia halasia
[Picture on page 27]
Egu tadina Bennett, misinari rumana ena vairana dekenai