Duahia Taudia Edia Henanadai
Daniela 9:24 ese ia perovetalaia hegeregerena, edena negai Dirava ese “Helaga Herea Gabuna” ia hahelagaia?
Daniela 9:24-27 be peroveta herevana ta, “Mesia”—Keriso unai—ena hedinarai negana ia gwauraia. Unai dainai, idia perovetalaia “Helaga Herea Gabuna” hahelagaia karana be Ierusalema dekenai dubu ena Helaga Herea daiutuna hahelagaia karana ia herevalaia lasi. To, unai hereva “Helaga Herea Gabuna” be Dirava ena gabu helagana guba dekenai—guba ena Helaga Herea Gabuna—Iehova ena lauma dubuna badana lalonai, ia gwauraia.a—Heberu 8:1-5; 9:2-10, 23.
Dirava ena lauma dubuna be edena negai ia gaukara hamatamaia? Lagani 29 C.E. ai, Iesu be bapatiso ia abia neganai, ia vara gauna mani oi laloa. Unai nega amo Iesu ese Salamo 40:6-8 ia hagugurua. Gabeai, aposetolo Paulo ese ia hahedinaraia Iesu be Dirava ia guriguri henia neganai, ia gwau: “Boubou karadia bona harihari gaudia be oi ura lasi, to oi ese lau totona tauanina ta oi abia hegaegae.” (Heberu 10:5) Iesu ia diba Dirava ia “ura lasi” Ierusalema ena dubu dekenai animal idia bouboulaidia noho. To, Iehova ese tauanina goevadaena ia hegaegaelaia, Iesu ese do ia bouboulaia totona. Iesu be ena ura momokanina ia hahedinaraia, ma ia gwau: “Dirava e, lau inai, oiemu ura gauna do lau karaia, Taravatu Buka lalonai egu sivarai ia torea hegeregerena.” (Heberu 10:7) Bona Iehova ena haere be dahaka? Evanelia bukana Mataio ia gwau: “Iesu ia bapatisoa, vadaeni maoromaoro, ranu dekena amo ia daekau neganai, guba be ia kehoa vadaeni, bona Iesu ese Dirava ena Lauma ia itaia, pune manu bamona ia diho, ia dekenai ia helai. Bona gado ta guba dekena amo ia boiboi, ia gwau, ‘Inai be lauegu Natuna, egu lalokau, lau moale bada ia dekenai.’ ”—Mataio 3:16, 17.
Iehova Dirava ese Iesu ena tauanina, do ia bouboulaia gauna, ia abia dae ena anina be inai, Ierusalema ena dubu ena boubou patana korikorina ia hereaia boubou patana be lauma dalanai ia vara. Unai boubou patana be Dirava ena “ura,” eiava Iesu ena tauanina be boubou gauna bamona ia abia dae dalana. (Heberu 10:10) Dirava ese Iesu be lauma helaga amo ia horoa, anina be hari iena lauma dubuna ibounai ia havaraia.b Unai dainai, Iesu be bapatiso ia abia neganai, Dirava ese ena noho gabuna guba ai ia hahelagaia; anina be ia abia hidi bena lauma dubuna badana ena “Hahelaga Herea Gabuna” ai ia halaoa.
[Footnotes]
a Dirava ena lauma dubuna ena kahana idauidau dibaia totona, Gima Kohorona, July 1, 1996, rau 14-19 itaia.
b Pay Attention to Daniel’s Prophecy! bukana ena rau 195 ai unai ia gwauraia.
[Picture on page 27]
Iesu be bapatiso ia abia neganai, Dirava ese “Helaga Herea Gabuna” ia hahelagaia unai