Dirava Ena Lauma Bona Iseda Laloa Dalana Idia Gwauraia Hedinarai

1-3. Pentekoste dinana ai dahaka ia vara, bona edena dala ai Baibel ena peroveta herevana idia hagugurua? (Laulau ginigunana herevalaia.)

INAI be Sunday dabai 9 oklok bamona. Ierusalema ai idia noho taudia dekenai inai dina be mai anina bada. Ia be aria negana, bona sabati dinana danu. Dubu helaga ai boubou gaudia idia henia vadaeni. Bona hari, hahelaga tauna badana ia hegaegae hatubua lasi paraoa matamata rua be davea boubouna bamona ia henia totona. Taunimanima ibounai be idia moale. (Lev. 23:15-20) Unai boubou gauna ese ia hahedinaraia witi utua negana be ia matamaia. Unai be lagani 33 C.E., bona Pentekoste dinana.

² Dubu helaga ai unai ia vara noho lalonai, mai anina bada gauna ta be kahirakahira do ia vara, unai be dubu helaga lalonai do ia vara lasi, to ruma ta ena atai daiutuna lalonai do ia vara. Unuseniai Keristani taudia 120 idia haboua, bona “mai lalotamona ida idia guriguri noho.” (Kara 1:13-15) Idia dekenai do ia vara gauna be Pentekoste dinana ai hahelaga tauna badana ese vaia ia karaia gauna ese ia laulaulaia. Danu, lagani 800 gunanai Ioela ese ia perovetalaia herevana ia hagugurua. (Ioe. 2:28-32; Kara 2:16-21) Dahaka do ia vara?

³ Kara 2:2-4 duahia. Unai atai daiutuna ai idia hebou Keristani taudia latanai Dirava ese ena lauma helaga ia bubua. (Kara 1:8) Vadaeni idia itaia bona kamonai gaudia ibounai idia perovetalaia matamaia. Bona aposetolo Petero ese idia haboua taudia dekenai ia vara gauna ena anina ia gwauraia hedinarai. Bena idia dekenai ia gwau: “Emui kara dika idia gwauatao totona, umui helalo-kerehai bona Iesu Keriso ena ladanai bapatiso umui abia. Vadaeni davana lasi harihari gauna, lauma helaga, do umui abia.” Unai dina ai, taunimanima 3,000 ese unai hereva idia abia dae, bena idia bapatiso bona lauma helaga idia abia.—Kara 2:37, 38, 41.

4. (a) Dahaka dainai ita dekenai Pentekoste be mai anina bada? (b) Lagani momo gunanai, unai nega ai reana dahaka mai anina bada gauna ta ia vara? (Rau 21 ena futnout itaia.)

⁴ Dahaka dainai ita dekenai Pentekoste 33 C.E. be mai anina bada? Ierusalema ena dubu helaga ai ia vara gauna dainai lasi, to ia be mai anina badina Iesu Keriso, Hahelaga Tauna badana unai, ese peroveta hereva ta ia hagugurua.^[1] Dubu helaga ai, hahelaga tauna badana ese unai dina ai Iehova dekenai hatubua lasi paraoa rua ia henia. Unai paraoa rua be lauma helaga ese ia horoa hahediba taudia ia laulaulaia, idia be Dirava ese ia abia hidi, iena natudia ai idia lao totona. Oibe, Dirava ese “ia abia hidi taudia ginigunadia” haida be guba dekenai do idia daekau bona Basileia lalonai do idia lohia, unai Basileia ena lohia henunai taunimanima be hahenamo momo do ia abia. (Iam. 1:18; 1 Pet. 2:9) Unai dainai ena be ita be guba helarona ita abia o tanobada paradaisona ai do ita noho hanaihanai, to iseda mauri dekenai unai dina ai ia vara gauna be mai anina bada!

DIRAVA ESE IDIA IA HOROA DALANA

5. Aposetolo taudia edia negai, horoa taudia ibounai be Dirava ese dala tamona ai ia horodia, a?

⁵ Bema oi be atai daiutuna ai oi noho bona lahi hururu be emu kwarana latanai ia hedinarai, reana unai dina do oi laloaboio diba lasi. Do oi abia dae momokani lauma helaga ese oi ia horoa, badina gado idauidau ai oi hereva diba. (Kara 2:6-12) To, lauma helaga idia abia taudia ibounai be unai dala tamona ai Dirava ese ia horodia, a? Lasi. Unai dina ai Ierusalema ai idia noho taudia ma haida be idia bapatiso negana ai, Dirava ese ia horodia. (Kara 2:38) To, edia kwarana latanai lahi hururu ia hedinarai lasi. Danu, horoa Keristani taudia ibounai be edia bapatiso negana ai, Dirava ese ia horodia lasi. Samaria taudia be idia bapatiso bona nega sisina ia hanaia murinai, lauma helaga idia abia. (Kara 8:14-17) Ma danu, Korenelio bona ena ruma bese be bapatiso idia do abia lasi neganai, lauma helaga idia abia.—Kara 10:44-48.

6. Horoa taudia ibounai be dahaka idia abia, bona unai ese dahaka ia hamomokania?

⁶ Hari inai negai danu, horoa taudia ibounai be dala tamona ai Dirava ese ia horoa lasi. Oibe, Dirava ese idia ia horoa neganai, reana haida be do idia diba haraga, to ma haida be metairametaira do idia diba. Herevana, edena dala Dirava ese idia ia horoa, aposetolo Paulo ia gwau: “Ia umui abidadama henia murinai, Dirava ese ia gwauhamatalaia vadaeni lauma helaga amo umui ia makaia. Bona unai be iena amo ia vara. Unai lauma helaga be hamomokania gauna.” (Efe. 1:13, 14) Lauma helaga be maka ta bamona, ia hamomokania gabeai idia ese edia hahenamo do idia abia. Unai maka dainai horoa Keristani taudia idia abia dae Dirava ese idia ia horoa.—2 Korinto 1:21, 22; 5:5 duahia.

7. Horoa tauna ta be ena guba helarona ia abia totona, dahaka ia karaia be namo?

⁷ Lauma helaga ia abia Keristani tauna be guba dekenai do ia daekau, a? Lasi. Unai tauna ia diba ia be Dirava ese ia boiria. To ena guba helarona ia abia totona, namona be iena abidadama dekenai ia gini goada noho. Petero ia gwau: “Unai dainai tadikaka e, do umui gaukara goada Dirava ese umui ia boiria bona umui ia abia hidi karana umui hamomokania totona. Badina bema unai gaudia umui karaia noho, do umui moru lasi momokani. Oibe, iseda Lohiabada bona Hahemauri Tauna, Iesu Keriso, ena noho hanaihanai basileia lalonai mai hairai ida do umui vareai.” (2 Pet. 1:10, 11) Unai dainai, horoa Keristani taudia ta ta be edia abidadama dekenai idia gini goada be namo, bema lasi, edia guba helarona idia haboioa diba.—Heb. 3:1; Apok. 2:10.

EDENA BAMONA DO OI DIBA?

8, 9. (a) Dahaka dainai ita momo be Dirava ese ta ia horoa dalana ita lalopararalaia lasi? (b) Ta be edena bamona ia diba ia be Dirava ese ia boiria?

⁸ Hari, ita momo be Dirava ese ta ia horoa dalana ita lalopararalaia lasi, bona unai be momokani. Badina ita be unai ita mamia lasi. Dirava ese taunimanima ia havaraia neganai, ia ura idia be inai tanobada ai do idia noho ela bona hanaihanai. (Gen. 1:28; Sal. 37:29) Haida ia abia hidi guba dekenai do idia daekau bona king bona hahelaga taudia bamona do idia lohia be iena palani lasi. To hari unai ia karaia be dala namona. Unai dainai ia ese ta ia horoa neganai, unai tauna ena lalohadai, kara, bona helaro idia idau.—Efeso 1:18 duahia.

⁹ To ta be edena bamona do ia diba ia be guba helarona ia abia? Paulo ese Roma ai idia noho horoa tadikaka dekenai ia torea revarevana ese unai ia hahedinaraia. Dirava ese “ia boiria helaga taudia” dekenai ia gwau: “Dirava ena lauma ese igui hesiai taudia ai ita ia halaoa lasi bona ita ia hagaria lou lasi. To unai lauma amo Dirava ese ita be ena natudia ai ia halaoa, bona unai lauma ese ita ia hauraia bena ita boiboi: ‘Abba, Tamana!’ Dirava ena lauma bona iseda laloa dalana idia gwauraia hedinarai ita be Dirava ena natudia.” (Roma 1:7; 8:15, 16) Oibe, Dirava ese ena lauma helaga amo unai tauna ia hadibaia, ia be vaira nega ai Basileia lalonai do ia lohia.—1 Tes. 2:12.

10. Inai hereva 1 Ioane 2:27 ai, “tau ta ese umui ia hadibaia be anina lasi,” ena anina be dahaka?

¹⁰ Dirava ese ta ia boiria neganai, ta ese idia do ia hadibaia lasi. Idia dekenai ia vara gauna be idia sibona idia diba, badina Iehova ese edia lalona bona kudouna dekenai daradara ta ia atoa lasi. Aposetolo Ioane ese horoa Keristani taudia ia hamaoroa, ia gwau: “Helaga Tauna ese umui ia horoa, bona umui ibounai be mai emui diba.” Ma ia gwau: “Dirava ese ena lauma amo umui ia horoa, bona unai lauma be umui dekenai ia noho. Tau ta ese umui ia hadibaia be anina lasi, to unai horoa karana amo Dirava ese umui dekenai gau ibounai ia hadibaia bona unai be hereva momokani bona ia be hereva koikoina lasi. Bona umui ia hadibaia hegeregerena, ia ida umui hakapua.” (1 Ioa. 2:20, 27) Idia danu be Dirava ena orea amo Baibel ena hakaua herevadia idia abia be namo. To edia horoa karana be ta ese do ia henanadailaia lasi. Badina Dirava sibona ese ena lauma helaga amo idia ia horoa!

IDIA “VARA LOU”

11, 12. Reana horoa Keristani tauna ta be dahaka do ia laloa, to dahaka ia daradaralaia lasi?

¹¹ Lauma helaga ese Keristani tauna ta ia horoa neganai, unai tauna ena kara bona lalohadai idia idau. Iesu ia gwau unai tauna be ia “vara lou.”^[2] (Ioa. 3:3, 5) Ma ia gwau: “Oi lau hamaoroa, do umui vara lou be namo, to unai hereva dainai oi hoa lasi. Lai be ia ura toa gabuna dekenai ia toa, bona ena regena oi kamonai, to oi diba lasi edeseni amo ia mai bona edeseniai ia lao. Lauma helaga amo idia vara taudia ibounai danu be unai bamona.” (Ioa. 3:7, 8) Unai ese ia hahedinaraia, horoa taudia ese ma haida dekenai edia horoa karana idia gwauraia hedinarai be do ia auka.

¹² Dirava ese ia boiria taudia be reana do idia laloa: ‘Dahaka dainai Dirava ese lau ia abia hidi?’ Bona reana do idia laloa idia be hegeregere lasi. To Dirava ese idia ia boiria karana idia daradaralaia lasi be namo. Badina edia kudouna ai idia moale bada. Edia hemami be Petero ena bamona, ia gwau: “Namona be Dirava, iseda Lohiabada Iesu Keriso ena Tamana, ita hanamoa. Iena hebogahisi bada dainai ita vara lou, bona Iesu Keriso be mase amo ia toreisi lou karana amo, ita dekenai ia mauri noho helarona ia henia. Do ita abia maurina be ia bodaga diba lasi, ia miro lasi bona ia boio diba lasi. Unai mauri be guba ai umui totona ia noho hegaegae.” (1 Pet. 1:3, 4) Horoa taudia ese unai hereva idia duahia neganai, idia diba momokani edia guba Tamana be idia dekenai ia hereva.

13. Lauma helaga ese ta ia horoa neganai, iena lalohadai bona kara dekenai dahaka ia vara, bona dahaka dainai unai ia vara?

¹³ Dirava ena lauma helaga ese unai Keristani taudia ia do horoa lasi neganai, idia ese edia tanobada helarona idia moalelaia. Bona mai moale ida Dirava ese inai tanobada do ia hagoevaia negana idia naria. Reana idia ura bada mase amo do idia toreisi lou taudia idia itaia. Bona do idia haginia ruma ai idia noho bona idia hadoa au edia huahua do idia ania. (Isa. 65:21-23) Vadaeni dahaka dainai edia lalohadai ia idau? Idia be tanobada helaro idia moalelaia lasi, a? Eiava idia lalometau dainai unai ia vara, a? Eiava inai tanobada ai do idia noho hanaihanai karana idia hesikulaia, a? Eiava idia ura guba lalonai idia noho gaudia idia itaia dainai, a? Lasi. To, edia lalohadai ia idau, badina Dirava ena lauma helaga ese idia ia boiria sibona lasi, to edia lalohadai bona helaro ia haidaua danu.

14. Horoa taudia ese edia tanobada mauri be edena bamona idia laloa?

¹⁴ Vadaeni, ita gwau diba inai horoa taudia be idia ura mase, a? Paulo ia gwau: “Momokani, unai palai rumana ai ita noho neganai ita taitai, bona ita lalometau, badina ita ura lasi unai palai rumana ita kokia, to ita ura noho gabuna ma ta ita abia, unai amo mauri ese mase diba gauna ena gabu ia abia.” (2 Kor. 5:4) Horoa taudia be edia mauri idia laloa bada, bona idia ura lasi idia mase. Oibe, idia ura bada dina ta ta idia gaukaralaia edia turadia bona varavara ida Iehova idia hesiai henia totona. To, ena be hari dahaka idia karaia, idia ese vaira nega ai do idia abia helaro namona idia laloa bada.—1 Kor. 15:53; 2 Pet. 1:4; 1 Ioa. 3:2, 3; Apok. 20:6.

OI IA BOIRIA, A?

15. Dahaka gaudia ese idia hamomokania lasi ta be Dirava ese ia horoa?

¹⁵ Reana sibona oi nanadaia: ‘Lau be Dirava ese ia boiria, a?’ Bema oi laloa Dirava ese oi ia boiria, mani inai mai anina bada henanadai oi lalodia. Oi be haroro gaukara oi goadalaia, a? Hanaihanai Dirava ena Hereva oi duahia bona “Dirava ena dobu gaudia” oi stadilaia, a? (1 Kor. 2:10) Iehova ese emu hesiai gaukara ia hanamoa, a? Oi ura dikadika Iehova ena ura oi karaia, a? Danu, oi ura bada ma haida oi durua Dirava idia diba totona, a? Iehova ese emu mauri lalonai oi ia durua dalana oi itaia, a? Bema emu haere ibounai be oibe, unai ese ia hahedinaraia oi be Dirava ese ia boiria, a? Lasi. Dahaka dainai? Badina guba helarona idia abia taudia sibona ese unai idia mamia lasi. Tanobada ai mauri hanaihanai do idia abia taudia danu be Iehova ena lauma helaga ese ia durudia. Momokani, bema oi daradara, unai ena anina be Dirava ese oi ia boiria lasi. Badina Iehova ese ia boiria taudia be idia daradara lasi, to idia diba momokani Dirava ese idia ia boiria!

16. Edena bamona ita diba lauma helaga idia abia taudia ibounai be guba helarona do idia abia lasi?

¹⁶ Baibel lalonai, lauma helaga ese ia durua abidadama taudia momo edia sivarai idia noho, to idia be guba helarona idia abia lasi. Idia ta be Ioane Bapatiso. Iesu ese Ioane ia hanamoa, to ia gwau ia be guba Basileia lalonai do ia vareai lasi. (Mat. 11:10, 11) Davida danu be lauma helaga ese ia durua. (1 Sam. 16:13) Iena hetura karana Dirava ida be ia goada momokani bona lauma helaga ena heduru amo Baibel ena kahana haida ia torea. (Mar. 12:36) To Pentekoste dinana ai, Petero ia gwau: “Davida be guba dekenai ia daekau lasi.” (Kara 2:34) Lauma helaga ese unai taudia ia durua, to idia dekenai ia hahedinaraia lasi idia be guba maurina do idia abia. Anina be idia be idia hegeregere lasi guba helarona idia abia totona, a? Lasi, to Iehova ese idia do ia hatorea isi lou bona tanobada paradaiso ai do idia noho.—Ioa. 5:28, 29; Kara 24:15.

17, 18. (a) Dirava ena hesiai taudia momo be edena helaro idia naria? (b) Gabeai stadi ai edena henanadai do ita haerelaia?

¹⁷ Dirava ena hesiai taudia momo be Dirava ese ia boiria lasi. Edia helaro be Davida, Ioane Bapatiso, bona guna idia noho abidadama tatau bona hahine ma haida edia bamona. Aberahamo bamona, idia be mai moale ida Basileia ena lohia henunai do idia noho negana idia naria. (Heb. 11:10) Inai nega dokona ai, guba helarona do idia abia taudia haida sibona be tanobada ai idia do noho. (Apok. 12:17) Anina be horoa taudia momo be edia abidadama idia dogoatao auka ela bona idia mase vadaeni.

¹⁸ Unai dainai tanobada helarona do idia abia taudia ese edena dala ai guba helarona idia abia taudia do idia kara henia? Lohiabada Ena Anibou nega ai, bema emu kongrigeisen dekenai ta be paraoa bona wain ia abia, edena bamona ia do oi kara henia? Guba helarona idia abia taudia edia namba ia bada daekau dainai, do oi lalohekwarahi, a? Unai henanadai be gabeai stadi ai do ita haerelaia.