‘Ia Haheauka ela Bona Dokona’

LAGANI 1993 ai idia karaia bona Iehova ena Witnes taudia edia hedikwota ai idia gaukara taudia matamatadia dekenai idia hahedinaraia vidio lalonai, Lyman Alexander Swingle ese ena lalohadai Iehova ena hesiai gaukara dekenai ia hahedinaraia, ia gwau: “Namona be oi mase neganai emu tamaka be emu aena dekenai idia do noho!”a

Iena mauri lagani be 90 tauna, Tadikaka Swingle, be ma haida ia hagoadaia bamona ia karaia. ‘Ia haheauka ela bona dokona.’ (Mataio 10:22) Ena be Wednesday, March 7 ai ia gorere, to Iehova ena Witnes taudia edia Hakaua Oreana ena hebou ta dekenai ia lao, ia be unai orea tauna ta. Murina Tuesday ai ena gorere ia bada, bona March 14, daba 4:26 a.m. ai, iena doketa ia gwau ia mase vadaeni.

Lyman Swingle be April 5, 1930 ai Iehova ena Witnes taudia edia hedikwota Brooklyn, New York dekenai ia gaukara hamatamaia. Unuseniai ia gaukara negana ena lata be kahirakahira lagani 71. Lyman be buka karaia gabuna dekenai ia gaukara guna, murinai ia lao buka printaia gabuna dekenai, bona ink karaia gaukarana ia durua danu. Oibe, Tadikaka Swingle be lagani 25 bamona ink karaia dipatmen dekenai ia gaukara. Danu, hedikwota ena toretore dipatmen dekenai lagani 20 lalonai ia gaukara. Ena lagani ginigabedia 17 lalonai, ia be Akaun Naria Opesi dekenai ia gaukara.

Lyman be mai gari lasi ida Dirava ena Basileia ia harorolaia. Brooklyn dekenai ia noho laganidia ginigunadia lalonai, ia bona ia ida daiutu tamona dekenai ia noho tauna, Arthur Worsley, be Witnes tauna ta ena bouti amo Hudson Sinavaina dekenai idia loaloa. Idia ese saun gaudia idia gaukaralaia, bona Saturday bona Sunday momo ai sinavai badinai idia noho taudia dekenai Basileia ena sivarai idia halasia.

Tadikaka Swingle be November 6, 1910 ai, Lincoln, Nebraska dekenai, ia vara, to nega sisina murinai iena ruma bese be Salt Lake City ai, Utah dekenai, idia lao. Unuseniai, lagani 1913 dekenai, ena tama sina be Bible Student taudia ai idia lao, unai negai Iehova ena Witnes taudia be unai bamona idia gwauraia. Lagani momo lalodiai, Swingle ruma besena ese Brooklyn dekenai ia noho Witnes taudia edia hedikwota amo idia mai hereva henia taudia momo be idia abia dae, bona unai tatau ese Lyman dekenai haheitalai namona idia hahedinaraia. Lagani 1923 ai, iena mauri lagani be 12 neganai, Dirava dekenai ena mauri ia gwauhamatalaia karana ia hahedinaraia totona bapatiso ia abia.

Lyman ia do headava lasi negana ai lagani 26 mai kahana Brooklyn dekenai ia gaukara, bena June 8, 1956 ai, Crystal Zircher ia adavaia neganai, iena mauri lalonai moale bada ia davaria. Hanaihanai idia noho hebou, bona haroro gaukara idia karaia hebou ela bona lagani 1998 ai Crystal ia mase. Lagani toi gunanai, Crystal ena tauanina ena kahana ta ia mase bona murinai ia raka diba lasi. Dina ta ta iboudiai Lyman ese Crystal ia naria karana be badinaia karana ena haheitalai namona ia idia dibaia taudia ibounai dekenai. Bona Lyman ese mai ena lalokau ida kahirakahira idia noho taudia edia raka lao raka mai daladia dekenai Crystal ena uilisea ia doria bona Crystal ese raka hanai taudia dekenai Watchtower bona Awake! magasin ia hariharilaia karana idia itaia taudia ese unai idia laloaboio diba lasi.

Tadikaka Swingle be hereva gwauraia goevagoeva tauna bona ena kara namona dainai, ia idia dibaia taudia ese idia lalokau henia bada. Ena tama sina bamona, iena helaro be Baibel ena hereva hegeregerena guba Basileiana lalonai Iesu Keriso ida do ia noho, bona ita diba momokani hari ena helaro ia guguru vadaeni.​—⁠1 Tesalonika 4:​15-18; Apokalupo 14:⁠13.

[Footnote]

[Picture on page 31]

Tadikaka Swingle be lagani 25 bamona ink karaia dipatmen dekenai ia gaukara

[Picture on page 31]

Lyman bona Crystal be hanaihanai idia noho hebou