Idia Laloatao Noho Gaudia

LAGANI ta ta ai, Iehova ena Witnes taudia be idia noholaia tanodia ai idia karaia Keristani hebouhebou maragidia bona badadia dekenai idia hebou. Unai bamona idia karaia lauma dalanai hagoadaia sisiba namodia bona hebamo namona idia moalelaia totona. To danu edia hebouhebou dekenai idia karaia gaudia ma haida be vadivadi taudia ese idia laloatao noho diba.

Hegeregere, July 1999 lalonai, Mozambique dekenai, Witnes taudia tausen momo be dina toi lalonai idia ia hagoadaia “Dirava Ena Peroveta Herevana” Distrik Hebouheboudia dekenai idia lao. Idia hebou taudia momo dekenai unai be edia nega ginigunana hebouhebou ta idia lao henia. Platfom amo idia kamonai herevadia sibona lasi, to idia itaia gaudia danu idia laloatao noho.

Maputo Assembly Hall dekenai, hahine ta ena hereva be: “Egu mauri negana ibounai lalonai inai bamona gabu ta mai ena hairai lau itaia lasi! Digu ruma dekenai sopu bona hevarivari idia noho, bona edia bonana be namo herea. Regerege be lasi, bona natudia idia heatu lasi. Bona taunimanima idia doria lasi! Lau itaia matamata taudia be mai edia moale ida hagoadaia herevadia idia gwauraia. Danu, lau dekenai hoa gauna ma ta be taunimanima ibounai ese edia dabua namona idia atoa. Gabeai, egu natudia do lau mailaia bona egu adavana ena lalona do lau veria unai hebouhebou dekenai do ai lao be namo.”

Oibe, Iehova ena Witnes taudia edia kara momokani, kara maoromaoro, bona tauanina ena goeva toana be taunimanima ese idia itaia. Dahaka dainai Witnes taudia idia idau? Badina be Baibel amo idia dibaia gauna idia badinaia toho. Namona be inai lagani lalonai edia hebouhebou badadia eiava pura ta ta lalonai Kingdom Hall dekenai idia karaia heboudia oi lao henia bona oi sibona ese do oi itaia, ani?

[Picture on page 32]

ZAMBIA

[Picture on page 32]

KENYA

[Picture on page 32]

MOZAMBIQUE