“Momokani Dirava ese Hel Ena Lahi Dekenai Taunimanima Ia Gabua, A?”

“Umui ese tomadiho umui stadilaia, a?”

Unai henanadai dainai Joel bona Carl idia hoa. Unai tau matamata rua​—⁠Iehova ena Witnes taudia edia hedikwota ai, Brooklyn, New York dekenai, idia gaukara volantia taudia​—⁠be kahirakahira ia noho buka sitoa ta ai buka idia itadia noho. Joel ese Baibel konkodens ia tahudia lalonai, Carl ese haroro gaukara lalonai ia dekenai ia vara moale gauna ia herevalaia. Kahirakahira ia gini tauna ese edia herevahereva ena kahana haida ia kamonai dainai idia ia hereva henia.

To, ia be unai tau matamatadia ese tomadiho idia stadilaia eiava lasi be ia laloa bada lasi, to gau ma ta ia laloa. Ia gwau: “Lau be Iuda tauna, bona egu Keristani turadia haida ese lau idia hamaoroa, lau be hel ena lahi dekenai hisihisi do lau abia badina Iuda taudia ese Iesu idia dadaraia. Unai dainai lau lalo-hekwarahi bada. Lalokau Diravana ese unai dala ai panisi ia henia lau abia dae be auka. Momokani Dirava ese hel ena lahi dekenai taunimanima ia gabua, a?”

Joel bona Carl ese unai lalo-momokani tauna idia hadibaia idia be mai edia goada bada ida Baibel idia stadilaia stiuden taudia. Buka Helaga amo idia hahedinaraia mase taudia be gau ta idia diba lasi, mase dekenai idia mahuta, bona do idia toreisi lou. Unai dainai, idia ese hel ena lahi dekenai hisihisi idia abia lasi. (Salamo 146:​3, 4; Hadibaia Tauna 9:​5, 10; Daniela 12:13; Ioane 11:​11-14, 23-26) Miniti 45 lalonai idia herevahereva murinai, unai tau ese Joel bona Carl dekenai ena adres ia henia bona ia ura unai gauna dekenai ma hereva haida do ia diba.

Bema hel be lahi bona hisihisi gabuna, tau ta do ia noinoi unuseniai idia siaia totona, a? To, bese kwarana tauna Iobu ena hisihisi ia ore totona unai bamona ia noinoi, ia gwau: “Hel dekenai lau oi gimaia, bona lau oi hunia ela bona oiemu badu do ia ore?” (Iobu 14:​13, Douay Version) Ia hedinarai goevagoeva, Iobu ia laloa lasi hel be hisihisi gabuna ta. To ia ura unuseniai ia idia gimaia. Mase ena anina be ta ia noho lasi, bona Baibel ai hel ena anina be mase taudia guria gabuna.

Bema oi ura oi diba ita mase neganai dahaka ia vara bona unai murinai dahaka helaro ia noho, oi ai hagoadaia henunai ia noho herevana do oi badinaia.