Iehova be Iseda Heau Mauri Gabuna
“Bema emu naria Tauna, Siahu Ibounai Diravana, be emu gima Tauna . . . dika ta ese oi dekenai do ia kamokau lasi.”—SALAMO 91:9, 10.
1. Dahaka dainai ita gwau diba Iehova be iseda heau mauri gabuna?
IEHOVA be ena taunimanima edia heau mauri gabuna korikorina. Bema ia ita badinaia momokani, ita ese ‘kahana ibounai metau ita abia, to ita idia hadikaia momokani lasi, ita laloa daradara, to gaukara ita hadokoa lasi, ita idia dagedage henia, to Dirava ese ita ia rakatania lasi, ita idia botaia, to ita mase lasi.’ Dahaka dainai? Badina Iehova ese ita dekenai “siahu badana” ia henia. (2 Korinto 4:7-9) Oibe, iseda guba Tamana ese ita do ia durua, ia ura henia mauri dalana ita badinaia totona, bona salamo torea tauna ena hereva ita laloa bada, ia gwau: “Bema egu naria Tauna, Siahu Ibounai Diravana, be oiemu gima Tauna, oiemu kohoro oi halaoa. Unai neganai dika ta ese oi dekenai do ia kamokau lasi.”—Salamo 91:9, 10.
2. Salamo 91 be edena bamona ita gwauraia diba bona dahaka ia gwauhamatalaia?
2 Salamo 91 ena hereva be reana Mose ese ia torea. Heberu gado ai, Salamo 90 ena kwara herevana ese Mose ia gwauraia unai buka ia torea tauna, bona Salamo 91 be iena murinai ia noho bona torea tauna ma ta ia gwauraia lasi. Salamo 91 be reana idia anelaia hebou lasi; reana ta ese ane ia abia guna (91:1, 2), bona murinai ane abia oreana ta ese ane idia abia (91:3-8). Bena reana tamona sibona ena ane idia kamonai (91:9a) bona murinai orea ta ese idia abia hebou (91:9b-13). Bena ane ena hereva dokodia be reana tau tamona ese ia anelaia (91:14-16). Herevana edena dala ai unai ane idia abia, Salamo 91 ese horoa Keristani taudia oreana dekenai lauma dalanai noho namo ia gwauhamatalaia bona edia turadia, Dirava dekenai idia gwauhamata taudia, dekenai unai bamona hagoadaia herevadia ia henia danu.a Unai ane ena anina Iehova ena hesiai taudia ibounai dekenai ita tahua be namo.
“Lohiabada Ena Hehuni Gabuna” Dekenai Do Oi Noho Namo
3. (a) “Ataiai Momokani Lohiabada ena hehuni gabuna” be dahaka? (b) ‘Siahu Ibounai Dirava kahirakahira ita noho neganai,’ dahaka hemami ita abia?
3 Salamo torea tauna ese ane ia abia: “Bema tau ta ese Ataiai Momokani Lohiabada [“ena hehuni gabuna,” “NW”] dekenai ia lao, . . . bona bema unai tau be, Siahu Ibounai Dirava kahirakahira ia noho neganai. Dirava ese do ia naria bona durua. . . . Dirava dekenai do ia hereva, do ia gwau, ‘Lohiabada e, oi be egu gima Tauna bona egu naria Tauna, Oi be egu Dirava, oi dekenai lau abidadama noho.’ ” (Salamo 91:1, 2) Laulau dalanai “Ataiai Momokani Lohiabada ena hehuni gabuna” be ita ia gimaia gabuna, bona horoa taudia totona unai be mai anina bada, badina Diabolo ese idia ia dagedage henia bada. (Apokalupo 12:15-17) Ia ese ita ibounai do ia hadikaia ore, bema Dirava kahirakahira ai ita noho lasi bona lauma dalanai ena vadivadi taudia bamona ita ia naria lasi. ‘Siahu Ibounai Dirava kahirakahira ita noho neganai,’ hemami ita abia Dirava ese ita ia gimaia. (Salamo 15:1, 2; 121:5) Heau mauri gabuna namona eiava kohoro aukana ma ta ia noho lasi, to iseda Siahu Ibounai Lohiabadana, Iehova, sibona.—Aonega Herevadia 18:10.
4. “Labana tauna,” Satani, ese dahaka gaudia ia gaukaralaia, bona edena bamona ita heau mauri?
4 Salamo torea tauna ma ia gwau: “Momokani Dirava ese oi do ia durua, bona [“labana tauna ena tarapu amo do ia hamauria,” “NW”] hunia dekenai idia noho dika gaudia, be hegeregere lasi oi do idia hadikaia, bona gorere dikadia . . . be hegeregere lasi oiemu mauri do idia abia.” (Salamo 91:3) Idaunegai Israela dekenai labana tauna be nega momo tarapu ia gaukaralaia manu ia abidia totona. “Labana tauna,” Satani, ena tarapu haida be ena orea dikana bona ena “koikoi karadia.” (Efeso 6:11) Tarapu hehunidia be iseda dala dekenai ia atoa, kara dikadia do ita karaia totona bona lauma dalana ita ia hadikaia totona. (Salamo 142:3) To, kara dika ita dadaraia dainai, “ita heau mauri, manu ese labana tauna ena tarapu dekena amo ia heau mauri bamona.” (Salamo 124:7, 8) Ita moale bada badina Iehova ese “labana tauna” dikana amo ita ia hamauria!—Mataio 6:13.
5, 6. Dahaka ‘gorere dikana’ ese hisihisi ia havaraia, to dahaka dainai Iehova ena taunimanima be unai gorere dainai idia mase lasi?
5 Salamo torea tauna ese “gorere dikadia” ia herevalaia. Daihanai “gorere dikadia” bamona, gau ta ese tanobada taudia bona Iehova ena lohia siahuna idia abia isi taudia ia hahisia noho. Unai gauna dekenai histori torea tauna, Arnold Toynbee, ia gwau: “Tanobada Tuarina Iharuana ia doko negana amo ema bona hari, bese abia isi karana ese sibodia idia lohiaia tanodia edia namba be nega rua amo ia habadaia . . . Taunimanima edia kara hari inai negai be idia lalo-tamona lasi.”
6 Lagani handred momo lalodiai, lohia taudia haida ese tanobada hegegemadai heiriheiri amo lalo-tamona lasi karana idia habadaia. Danu, idia ura taunimanima ese idia eiava kaivakuku o laulau haida do idia matauraia. To Iehova ese ena kamonai taudia ia naria dainai, unai ‘gorere dikana’ dainai idia mase lasi. (Daniela 3:1, 2, 20-27; 6:7-10, 16-22) Tanobada ibounai tadikaka oreana lalonai ita noho dainai, Iehova sibona ita badinaia, Baibel ena taravatu Keristani gini siri karana dekenai ita badinaia, bona ta ita lalo-dika henia lasi to ita abia dae “bese ibounai lalonai, Dirava dekenai idia gari, bona kara maoromaoro idia karaia taudia, be Dirava ese do ia abia dae.” (Kara 10:34, 35; Esodo 20:4-6; Ioane 13:34, 35; 17:16; 1 Petero 5:8, 9) Ena be dagedage karadia be “gorere dikadia” bamona ita hisihisilaia badina ita be Keristani taudia, to “Ataiai Momokani Lohiabada ena hehuni gabuna” dekenai ita moale bona lauma dalanai ita noho namo.
7. Edena dala ai Iehova ese “iena hanina” amo ita ia gimaia?
7 Iehova be iseda heau mauri gabuna dainai, inai hereva ese ita ia hagoadaia: “Lohiabada ese iena hanina dekena amo oi do ia koua, vadaeni iena naria dainai oi be do oi mauri. Iena kara be maoromaoro bona momokani dainai, iena gima kara bona naria kara be momokani.” (Salamo 91:4) Manu ta be ena natudia ataiai ia roho bona ia naridia hegeregerena, Dirava ese ita ia gimaia. (Isaia 31:5) ‘Lohiabada ese iena hanina dekena amo ita ia koua.’ Manu ta be ena hanina amo ena natudia ia koua, unai dala ai dagedage animal amo ia gimadia. Iehova ena Keristani orea momokanina lalonai heau mauri gabuna ita tahua dainai, manu maragidia bamona laulau dalanai ita be Iehova ena hanina henunai ita noho namo.—Ruta 2:12; Salamo 5:1, 11.
8. Edena dala ai Iehova ena “momokani” karana be kesi badana bona kohoro aukana bamona?
8 Iena “momokani” karana eiava kara maoromaoro ita abidadama henia. Unai kara be idaunegai idia gaukaralaia kesi badana bamona, nega momo ena toana be iduara ta bamona bona ena bada be ia hegeregere ta ena tauanina ibounai ia koua totona. (Salamo 5:12) Unai bamona gima karana ita abidadama henia dainai ita gari lasi. (Genese 15:1; Salamo 84:11) Iseda abidadama bamona, Dirava ena “momokani” karana be ita ia gimaia kesi badana, bona ia ese Satani ena tuari gaudia bona inai henia karadia ia koua. (Efeso 6:16) Danu, ia be kohoro aukana bamona ia murinai ita gini goada diba.
‘Do Ita Gari Lasi’
9. Dahaka dainai hanuaboi be gari bada negana ai ia lao diba, to dahaka dainai ita gari lasi?
9 Salamo torea tauna ese Dirava ena gima karana ia herevalaia, ia gwau: “Hanuaboi neganai idia mai dika gaudia, be do oi gari henia lasi, bona dina neganai karaharaga idia ginidae gau dikadia danu, be do oi gari henidia lasi. Dibura neganai idia vara gorere dikadia danu, be hegeregere lasi oi do idia hagaria. Dina [“dina tubua,” “NW”] neganai idia toreisi haraga dika badadia dekenai danu, be do oi gari lasi.” (Salamo 91:5, 6) Kara dika momo be dibura negana ai idia karaia dainai, hanuaboi be gari negana ai ia lao diba. Hari lauma dalanai ia dibura tanobadana ai, iseda inai taudia be nega momo koikoi karadia idia karaia, lauma dalanai ita idia hadikaia bona iseda haroro gaukara idia koua totona. To Iehova ese ita ia naria dainai, ‘hanuaboi neganai idia mai dika gaudia do ita gari henia lasi.’—Salamo 64:1, 2; 121:4; Isaia 60:2.
10. (a) “Dina neganai karaharaga idia ginidae gau dikadia” ese dahaka idia laulaulaia, bona unai dainai edena bamona ita kara? (b) “Dibura neganai idia vara gorere dikadia” be dahaka, bona dahaka dainai ita gari henidia lasi?
10 Toana be “dina neganai karaharaga idia ginidae gau dikadia” ese taunimanima edia badu herevadia ita dekenai idia laulaulaia. (Salamo 64:3-5; 94:20) Hereva momokani ita harorolaia noho neganai, unai bamona dagedage karana iseda hesiai gaukara helagana dekenai be anina lasi. Danu, ita ese “dibura neganai idia vara gorere dikadia” ita gari henia lasi. Unai gorere dikadia be Satani ena siahu henunai ia noho tanobadana ena tomadiho bona kara dikadia ese idia havaraia lalohadai idia laulaulaia. (1 Ioane 5:19) Ia havaraia lalohadai ese lalona bona kudouna ia hamasea dainai, taunimanima ese Iehova, iena ura, bona mai lalokau ida ia karaia daladia idia diba lasi. (1 Timoteo 6:4) Inai dibura lalonai, ita gari lasi, badina lauma dalanai diari bada ita moalelaia.—Salamo 43:3.
11. ‘Dina tubua ai idia toreisi dika badadia’ idia davaria taudia dekenai dahaka ia vara?
11 “Dina tubua neganai idia toreisi haraga dika badadia dekenai” ita gari lasi. “Dina tubua” be reana tanobada ena diba bona aonega ia laulaulaia. Ena kohu momo laloa bada lalohadaina idia abia dae taudia ese lauma dalanai dika idia davaria. (1 Timoteo 6:20, 21) Mai gari lasi ida Basileia sivaraina ita harorolaia neganai, iseda inai taudia ita gari henia lasi, badina Iehova be iseda Gima Tauna.—Salamo 64:1; Aonega Herevadia 3:25, 26.
12. Taunimanima tausen momo be daidia edia kahana dekenai idia moru, bona edena dala ai?
12 Salamo torea tauna ma ia gwau: “Sedira oi kahirakahira be taunimanima 1000 idia mase, bona oiemu imana idibana kahana dekenai, sedira taunimanima 10,000 idia mase, to unai dika be do oi davaria lasi. Oi ese Dirava ena kara do oi itaia: Ia ese tau dikadia edia kerere davana do ia henia momokani, be do oi itaia.” (Salamo 91:7, 8) Taunimanima momo ese Iehova be edia heau mauri gabuna ai idia halaoa lasi dainai, lauma dalanai ita “kahirakahira” idia “mase.” Momokani, hari lauma Israela taudia edia “imana idibana kahana” ai “taunimanima 10,000” idia moru vadaeni. (Galatia 6:16) To herevana ita be horoa Keristani taudia eiava edia gwauhamata turadia, ita be Dirava ena “hehuni gabuna” dekenai ita noho namo. Bisinesi dalanai, tomadiho dalanai, bona ma dala haida ai hekwakwanai idia davaria kara dika taudia ese “edia kerere davana” idia abia be ita itaia noho.—Galatia 6:7.
‘Dika ta be Ita Dekenai Do Ia Kamokau Lasi’
13. Dahaka dika ita davaridia lasi, bona dahaka dainai?
13 Ena be inai tanobada ena noho namo ia dika ia lao noho, to Dirava ita atoa guna bona salamo torea tauna ena hereva dainai ita lalo-goada, ia gwau: “Bema egu naria Tauna, Siahu Ibounai Diravana, be oiemu gima Tauna, oiemu kohoro oi halaoa, unai neganai dika ta ese oi dekenai do ia kamokau lasi. Oi do ia hadikaia gauna ta, be oiemu ruma dekenai do ia ginidae lasi.” (Salamo 91:9, 10) Oibe, Iehova be iseda heau mauri gabuna. To, Ataiai Momokani Diravana be iseda “kohoro” ai ita halaoa danu, unuseniai noho namo ita davaria. Iehova ita hanamoa badina ia be Guba bona Tanobada edia Lohia Badana, ia dekenai do ita noho badina ia be iseda noho namo ena Badina, bona iena Basileia ena sivarai namona ita harorolaia. (Mataio 24:14) Unai dainai, ‘dika ta be ita dekenai do ia kamokau lasi’—anina be inai ane lalonai idia gwauraia gau dikadia ta do ita davaria lasi. Ena be taunimanima ma haida ida dika idauidau, hegeregere tano mareremarere, lai badadia, abata, hitolo badadia, bona tuari ese idia havaraia dika idauidau, ita davaria, to inai gaudia ese iseda abidadama eiava iseda namo lauma dalanai do idia hadikaia lasi.
14. Dahaka dainai mase idia havaraia goreredia ese ita Iehova ena hesiai taudia idia hadikaia lasi?
14 Horoa Keristani taudia be idau bese taudia bamona palai rumadia dekenai idia noho, inai tanobada amo idia idau. (1 Petero 2:11) ‘Hadikaia gauna ta be edia palai ruma dekenai do ia ginidae lasi.’ Herevana iseda helaro be guba gauna eiava tanobada gauna, ita be tanobada ena lasi, bona lauma dalanai mase idia havaraia diba gorere dikadia, hegeregere matabodaga karadia, kohu tahua karana, tomadiho koikoi, bona “dagedage gauna” bona iena “laulau,” United Nations, tomadiho henia karana, ese ita idia hadikaia lasi.—Apokalupo 9:20, 21; 13:1-18; Ioane 17:16.
15. Edena dala ai aneru edia heduru ita moalelaia?
15 Salamo torea tauna ese ita moalelaia gima karana ia herevalaia neganai, ia gwau: “Dirava ese iena aneru oi dekenai do ia siaia, idia ese oi do idia naria, oiemu loaloa gabudia ibounai dekenai. Idia ese edia imana dekena amo oi do idia dogoatao, vadaeni oiemu aena be nadi dekenai bero do idia davaria lasi.” (Salamo 91:11, 12) Aneru be siahu idia abia, ita idia gimaia totona. (2 King Taudia 6:17; Salamo 34:7-9; 104:4; Mataio 26:53; Luka 1:19) Iseda “loaloa gabudia ibounai dekenai” ita idia naria. (Mataio 18:10) Ita be Basileia harorolaia taudia dainai aneru ese ita idia hakaua bona idia naria bena lauma dalanai do ita moru lasi. (Apokalupo 14:6, 7) “Nadi” bamona gaudia danu, iseda gaukara idia taravatua karadia unai, ese ita do idia hamorua lasi bona Dirava ena lalo-namo ita haboioa lasi.
16. Edena dala ai “laiona” bona “gaigai” edia dagedage dalana be idau, bona idia dainai dahaka ita karaia?
16 Salamo torea tauna ma ia gwau: “Oi ese laiona bona gaigai, bona laiona dagedagedia, bona gaigai badadia danu, do oi moia diho.” (Salamo 91:13) Laiona be ia hunia lasi to ia dagedage, unai hegeregerena iseda inai taudia haida ese taunimanima vairanai ita idia dagedage henia bona taravatu idia atoa iseda haroro gaukara idia koua totona. To danu, gaigai be hehuni gabuna amo ta ia koria bamona, haida ese hehuni dalana amo ita idia dagedage henia toho. Dubu gunalaia taudia be nega haida hehuni dalana ai taravatu karaia taudia, hahemaoro taudia, bona taunimanima ma haida idia gaukaralaia, ita idia dagedage henia totona. To Iehova ena heduru dainai, maino dalanai kota dekenai unai hisihisi koua daladia ita tahua, unai dala ai ‘sivarai namona ena momokani ita gwauraia.’—Filipi 1:7; Salamo 94:14, 20-22.
17. Edena dala ai “laiona dagedagedia” ita moia diho diba?
17 Salamo torea tauna ese “laiona dagedagedia, bona gaigai badadia” moia diho karana ia herevalaia. Laiona haida idia dagedage bada diba, bona gaigai haida edia bada be ia bada herea diba. (Isaia 31:4) To, ena be unai bamona laiona be ta ia hadikaia gwauraia neganai ia dagedage bada herea, to laulau dalanai ita moia diho diba bema Dirava ita kamonai henia bona laiona bamona tatau eiava oreadia ita kamonai henia lasi. (Kara 5:29) Unai dainai unai dagedage “laiona” ese lauma dalanai ita ia hadikaia lasi.
18. “Gaigai badana” dainai dahaka ita laloa, bona ita ia tarapua toho neganai dahaka ita karaia be namo?
18 Greek Septuagint Baibel ai, “gaigai badana” idia gwauraia “huala badana.” Unai hereva dainai reana ita ese “huala badana, . . . unai idaunegai gaigaina, bona iena ladana be Diabolo bona Satani” ita laloa. (Apokalupo 12:7-9; Genese 3:15) Ia be gaigai bada hereana ta bamona, ia hadikaia gauna ia hamanokaia bona ia hadonoa diba. (Ieremia 51:34) Satani ese ita ia tarapua, inai tanobada ena metau gaudia amo ita ia hamanokaia bona ia hadonoa toho neganai, namona be ena tarapu amo ita heau siri bona inai “gaigai badana” ita moia diho. (1 Petero 5:8) Horoa orena taudia ese unai bamona idia karaia be namo, bema idia ura Roma 16:20 ena peroveta herevana idia hagugurua.
Iehova—Iseda Hahemauri Ena Badina
19. Dahaka dainai Iehova be iseda heau mauri gabuna ai ita halaoa?
19 Salamo torea tauna ese Dirava ena hereva, tomadiho momokani taudia dekenai ia gwauraia neganai, ia gwau: “Lau idia lalokau henia taudia, be lau ese do lau hamauria. Bona lau idia diba, bona edia Lohiabada dekenai lau idia abia dae taudia, be do lau naridia namonamo.” (Salamo 91:14) Inai hereva “do lau naridia namonamo” ena anina be “do lau atoa ataiai,” hegeregere ta ese ia davaria diba lasi. Ita be Iehova ita tomadiho henia taudia bona ‘ia ita lalokau henia’ dainai, ia be iseda heau mauri gabuna ai ita halaoa. (Mareko 12:29, 30; 1 Ioane 4:19) Unai dainai, Dirava ese iseda inai taudia amo ita ia “hamauria.” Ita be inai tanobada amo do idia hadikaia ore lasi. To, hahemauri do ita abia, badina Dirava ena ladana ita diba bona mai abidadama ida ita boiboi henia dainai. (Roma 10:11-13) Bona eda lalona ita hadaia Iehova ena ladana dekenai do ita raka “ela bona hanaihanai.”—Mika 4:5; Isaia 43:10-12.
20. Salamo 91 ena hereva dokona ai, Iehova ese ena kamonai hesiai taudia dekenai dahaka ia gwauhamatalaia?
20 Salamo 91 ena hereva dokona ai, Iehova ese ena kamonai hesiai taudia be inai bamona ia gwauraia: “Bema idia ese lau idia boiboi henia neganai, lau ese idia dekenai do lau haere. Hisihisi idia davaria neganai, lau ese idia dekenai do lau noho. Lau ese idia do lau hamauria, bona taunimanima edia mataurai idia dekenai do lau henia. Lau ese mauri daudau idia dekenai do lau henia. . . . Lau ese idia do lau hamauria momokani.” (Salamo 91:15, 16) Dirava ena ura hegeregerena ia ita guriguri henia neganai, iseda guriguri do ia kamonai. (1 Ioane 5:13-15) Satani ese ia havaraia inai henia karadia dainai hisihisi bada ita davaria vadaeni. To inai hereva “hisihisi idia davaria neganai, lau ese idia dekenai do lau noho” ese ita ia durua dainai vaira negana ena hahetoho totona ita hegaegae bona ita ia hagoadaia dainai ita diba momokani Dirava ese inai tanobada dikana ia haorea neganai, ita do ia durua.
21. Horoa taudia be edena dala ai hairai idia abia vadaeni?
21 Ena be Satani ia dagedage bada, to ita huanai idia noho horoa taudia ibounai be Dirava ena nega korikori ai guba dekenai hairai do idia abia—tanobada dekenai idia “mauri daudau” murinai. To Dirava ena hahemauri karadia amo horoa taudia be lauma dalanai hairai idia abia vadaeni. Bona inai dina gabedia lalonai idia be Iehova ena Witnes taudia edia gaukara idia gunalaia noho be hahenamo badana ta! (Isaia 43:10-12) Iehova ese ena taunimanima do ia hamauria karana badana be iena tuari badana, Aramagedono ai, do ia vara, unai nega ai ena lohia siahuna ena maoro do ia hamomokania bona ena ladana helagana do ia hahelagaia.—Salamo 83:18; Esekiela 38:23; Apokalupo 16:14, 16.
22. Daidia be Iehova ese do ia “hamauria”?
22 Herevana ita be horoa Keristani taudia eiava ita be edia gwauhamata turadia, to Dirava amo hahemauri ita tahua. Iehova ena “gari bada herea” dinana ai, mai abidadama ida ia idia hesiai henia taudia do ia hamauria. (Ioela 2:30-32) Ita be hahemauri do ita abia, Dirava ena tanobada matamatana lalonai do ita vareai, bona hahetoho ginigabena dekenai do ita gini goada ‘hutuma bada herea’ taudia dekenai ‘mauri daudauna’—mauri hanaihanai unai—do ia henia. Taunimanima momo herea do ia hatoredia isi lou danu. (Apokalupo 7:9; 20:7-15) Iehova be Iesu amo ita do ia “hamauria” dainai ia moale bada. (Salamo 3:8) Unai bamona gaudia namo hereadia be ita vairanai idia noho dainai, namona be Dirava amo heduru ita tahua noho, ia ita hanamoa dalanai iseda mauri dinadia ita duahia totona. Namona be iseda hereva bona kara amo ita hahedinaraia Iehova be iseda heau mauri gabuna.
[Footnote]
a Keristani Greek Revarevadia idia torea taudia be idia gwau lasi Salamo 91 be Mesia ena mauri lalonai ia guguru. To momokani, Iehova be Iesu Keriso ena heau mauri gabuna bona ena kohoro aukana danu, inai “dokona negana” ai ia be Iesu murinai idia raka horoa taudia bona edia gwauhamata turadia edia heau mauri gabuna bona edia kohoro aukana hegeregerena.—Daniela 12:4.
Edena Bamona Do Oi Haere?
• “Ataiai Herea Lohiabada ena hehuni gabuna” be dahaka?
• Dahaka dainai ita gari lasi?
• Edena dala ai ‘dika ta ese ita dekenai do ia kamokau lasi’?
• Dahaka dainai ita gwau diba Iehova be iseda hahemauri ena badina?
[Picture on page 17]
Oi diba edena dala ai Iehova ena momokani karana be iseda kesi badana, a?
[Pictures on page 18]
Ena be haida ese taunimanima vairadiai eiava hehuni dalana ai Iehova ena hesiai taudia idia dagedage henia, to Iehova ese idia ia durua, edia hesiai gaukara idia karaia noho totona
[Credit Line]
Cobra: A. N. Jagannatha Rao, Trustee, Madras Snake Park Trust