Keristani Taudia Momokanidia Ibounai be Evanelia Taudia

“Lohiabada dekenai ane do umui abia. Iena ladana do umui abia isi! Ia ese ita ia hamauria vadaeni! Dina ibounai lalonai inai sivarai namona, be taunimanima dekenai do ita gwauraia.”​—⁠SALAMO 96:⁠2.

1. Dahaka sivarai namona taunimanima ese idia kamonai be namo, bona dahaka dainai Iehova ena Witnes taudia ese unai bamona sivarai idia harorolaia lalonai haheitalai namona idia hahedinaraia?

DINA iboudiai dika idia vara tanobadana ai, Baibel ena hereva ese ita ia hagoadaia, ia gwauhamata tuari, taravatu utua karana, hitolo, bona dagedage be do idia ore. (Salamo 46:9; 72:​3, 7, 8, 12, 16) Unai sivarai namona be taunimanima iboudiai idia kamonai be namo, ani? Iehova ena Witnes taudia be unai bamona idia laloa. Gabu iboudiai taunimanima idia diba Witnes taudia ese “sivarai namona idia mailaia noho.” (Isaia 52:⁠7) Momokani, Witnes taudia ese sivarai namona idia harorolaia goadagoada noho dainai, idia momo ese dagedage idia davaria. To idia ese taunimanima edia namo idia laloa. Bona idia ese ura bada bona haheauka bada idia hahedinaraia!

2. Iehova ena Witnes taudia edia ura bada ena badina ta be dahaka?

² Iehova ena Witnes taudia ese hari idia hahedinaraia ura bada be Keristani taudia ginigunadia ese idia hahedinaraia bamona. Roman Katolik niuspepa L’Osservatore Romano ena hereva ia maoro, ia gwau: “Keristani taudia ginigunadia, maoromaoro idia bapatiso murinai, idia laloa edia maduna be Sivarai Namona idia harorolaia. Unai hesiai taudia ese edia hereva amo Evanelia Sivaraina idia harorolaia.” Dahaka dainai Iehova ena Witnes taudia ese ura bada idia hahedinaraia, Keristani taudia ginigunadia bamona? Badina ginigunana be idia harorolaia sivarai namona be Iehova Dirava ena amo. Unai be ura bada ena badina namona, ani? Salamo torea tauna ena hereva idia badinaia dainai idia haroro, ia gwau: “Lohiabada dekenai ane do umui abia. Iena ladana do umui abia isi! Ia ese ita ia hamauria vadaeni! Dina ibounai lalonai inai sivarai namona, be taunimanima dekenai do ita gwauraia.”​—⁠Salamo 96:⁠2.

3. (a) Iehova ena Witnes taudia edia ura bada ena badina iharuana be dahaka? (b) ‘Dirava ena hahemauri’ amo dahaka ia vara?

³ Salamo torea tauna ena hereva dainai Iehova ena Witnes taudia edia ura bada ena badina iharuana ita laloa. Idia harorolaia sivaraina be hahemauri sivaraina. Haida idia gaukara goada, medikol daladia, taunimanima edia noho daladia, moni abia daladia, bona dala ma haida idia hanamoa totona, bona idia ita hanamoa be namo. To taunimanima ta ese ma ta totona ia karaia namo be maragi sibona, to ‘Dirava ena hahemauri’ amo ia vara namo be bada. Iehova ese Iesu Keriso ia gaukaralaia, kara dika, gorere, bona mase amo manau taudia do ia hamauria totona. Unai hahemauri idia abia taudia be do idia mauri hanaihanai! (Ioane 3:​16, 36; Apokalupo 21:​3, 4) Unai hahemauri be Keristani taudia ese hari idia harorolaia “kara badadia” ta, unai idia karaia badina inai hereva idia badinaia: “Lohiabada ena hairaina be bese idauidau ibounai dekenai, do umui gwauraia hedinarai. Iena kara badadia be idia ibounai dekenai do umui hadibaia. Lohiabada . . . ita abia isi noho be namo. . . . Lohiabada sibona do ita gari henia bona matauraia.”​—⁠Salamo 96:​3, 4.

Biaguna Ena Haheitalai

4-6. (a) Iehova ena Witnes taudia edia ura bada ena badina ihatoina be dahaka? (b) Edena dala ai Iesu ese sivarai namona harorolaia gaukarana dekenai ura bada ia hahedinaraia?

⁴ Iehova ena Witnes taudia edia ura bada be mai ena badina ihatoina danu. Idia ese Iesu Keriso ena haheitalai idia badinaia. (1 Petero 2:21) Unai tau goevadaena ese manau ‘taudia dekenai sivarai namona harorolaia’ gaukarana ia abia dae mai ena kudouna ibounai ida. (Isaia 61:1; Luka 4:​17-21) Unai dala ai, ia be evanelia tauna eiava sivarai namona harorolaia tauna ai ia lao. Galilea bona Iudea ibounai dekenai “Basileia ena Sivarai Namona ia harorolaia.” (Mataio 4:23) Bona ia diba taunimanima momo ese unai sivarai namona do idia abia dae dainai, iena hahediba taudia ia hamaoroa: “Uiti ena anina abia negana ia ginidae vadaeni, to utua taudia be momo lasi. Uma ena biaguna dekenai umui noinoi, ia ese utua taudia ma haida do ia siaia, iena uiti do idia utua.”​—⁠Mataio 9:​37, 38.

⁵ Iesu ese ena guriguri hegeregerena ma haida ia hadibaia evanelia taudia ai idia lao totona. Gabeai, iena aposetolo taudia ia siaia bona ia hamaorodia: “Do umui haroro, umui gwau, ‘Guba Basileia be kahirakahira ia mai vadaeni.’ ” Unai negai taunimanima edia noho dalana idia hadikaia gaudia kokia daladia haida idia kehoa be namo, a? Eiava unai nega ena kara gageva tuari henia totona, politikol karadia lalonai idia vareai be namo, a? Lasi. To, Iesu ese Keristani evanelia taudia ibounai dekenai do idia badinaia dalana ia hahedinaraia, ia gwau: “Do umui haroro.”​—⁠Mataio 10:​5-7.

⁶ Gabeai, Iesu ese hahediba taudia ma haida ia siaia, do idia gwau: “Guba Basileia be kahirakahira ia mai vadaeni.” Edia evanelia gaukarana ese ia havaraia namo idia sivarailaia neganai, Iesu ia moale bada. Ia guriguri: “Egu Tamana e, guba bona tanobada ena lohia, lau hanamoa oi dekenai, badina be inai gaudia aonega taudia bona diba taudia dekena amo oi hunia vadaeni, to memero maragidia dekenai oi hedinaraia vadaeni.” (Luka 10:​1, 8, 9, 21) Iesu ena hahediba taudia, guna idia be gaukara goada haoda taudia, biru taudia, bona ma haida, be edukeisen badana idia abia tomadiho gunalaia taudia ida ita hahegeregerea neganai, idia be beibi bamona. To hahediba taudia ia hadibaia, sivarai namo hereana idia harorolaia totona.

7. Iesu be guba dekenai ia daekau murinai, ia murinai idia raka taudia be daidia dekenai sivarai namona idia harorolaia guna?

⁷ Iesu be guba dekenai ia daekau murinai, ia murinai idia raka taudia ese hahemauri ena sivarai namona idia harorolaia noho. (Kara 2:​21, 38-40) Daidia dekenai idia haroro guna? Dirava idia diba lasi besedia dekenai idia lao, a? Lasi, idia haroro henia taudia ginigunadia be Israela besena, lagani 1,500 mai kahana lalonai Iehova idia diba vadaeni besena. Iehova idia tomadiho henia vadaeni gabuna dekenai idia haroro be maoro, a? Oibe. Iesu ese idia ia hamaoroa: “Lauegu ladana do umui gwauraia hedinarai Ierusalema dekenai, Iudea ibounai, Samaria ena kahana ibounai, do ia lao bona tanobada ena kahana ibounai.” (Kara 1:⁠8) Bese ma haida hegeregerena Israela ese sivarai namona ia kamonai be namo.

8. Edena dala ai Iehova ena Witnes taudia ese Iesu murinai idia raka taudia ginigunadia idia tohotohoa?

⁸ Unai hegeregerena, Iehova ena Witnes taudia be tanobada ibounai lalonai idia haroro. Ioane ia itaia aneru ida idia gaukara hebou, “iena gaukara be, noho hanaihanai Sivarai Namona do ia gwauraia hedinarai. Taunimanima ibounai dekenai ia gwauraia, bese ibounai, iduhu ibounai, gado ibounai bona kopina idauidau ibounai taudia.” (Apokalupo 14:⁠6) Lagani 2001 ai, idia be tano bona gabu 235 dekenai idia haroro, idia gwauraia Keristani tanodia dekenai danu. Kerisendom ese ena dubu ia haginidia vadaeni gabudia dekenai Iehova ena Witnes taudia idia haroro be maoro, a? Haida idia gwau ia maoro lasi bona unai bamona evanelia gaukarana idia gwauraia “mamoe henaoa gaukarana.” To, Iehova ena Witnes taudia ese Iesu ena hemami ena negai idia manau Iuda taudia dekenai idia laloatao. Ena be edia hahelaga oreana ia noho, to Iesu ese idia dekenai sivarai namona ia harorolaia. “Ia bogahisihisi idia dekenai, badina be edia tauanina idia manokamanoka, bona idia lao idau gabu idau gabu dekenai, mamoe idia naria lasi bamona.” (Mataio 9:36) Iehova ena Witnes taudia ese Iehova bona ena Basileia idia diba lasi manau taudia idia davaria neganai, tomadiho ta ese ia biagua gabuna ai idia noho dainai, idia dekenai sivarai namona idia harorolaia lasi be maoro, a? Iesu ena aposetolo taudia edia haheitalai ita badinaia dainai, eda haere be lasi. Sivarai namona be “bese ibounai dekenai” idia harorolaia be namo, ta idia reaia lasi.​—⁠Mareko 13:⁠10.

Keristani Taudia Ginigunadia Ibounai ese Evanelia Gaukara Idia Karaia

9. Keristani kongregesen ginigunadia lalonai, daidia idia haroro?

⁹ Keristani taudia ginigunadia edia negai, daidia idia haroro? Gau momo idia hahedinaraia Keristani taudia ibounai be evanelia taudia. Toretore tauna W. S. Williams ia gwau: “Iboudiai idia diba Ekalesia ginigunana lalonai Keristani taudia ibounai . . . ese sivarai namona idia harorolaia.” Baibel ese Pentekoste 33 C.E. ai idia vara gaudia ia herevalaia, ia gwau: “Unai abidadama taudia ibounai [tatau bona hahine] be Lauma Helaga dekenai idia honu, bona gado idauidau dekenai idia hereva, Lauma Helaga ese idia dekenai ia henia hegeregere.” Evanelia taudia be tatau bona hahine, matamata bona buruka taudia, igui hesiai taudia bona ura-kwalimu taudia. (Kara 1:14; 2:​1, 4, 17, 18; Ioela 2:​28, 29; Galatia 3:28) Dagedage karadia dainai Keristani momo ese Ierusalema idia rakatania neganai, idia “lulua taudia be gabu idauidau dekenai idia lao, Sivarai Namona idia harorolaia.” (Kara 8:⁠4) Idia “lulua taudia” haida sibona lasi, to idia ibounai, ese evanelia gaukara idia karaia.

10. Roma taudia ese Iuda taudia edia mauri dalana idia do hadikaia lasi neganai, Keristani taudia ese dahaka hahegani ena kahana rua idia hagugurua?

¹⁰ Unai lagani ginigunadia ibounai lalonai unai ia vara. Iesu ia peroveta: “Basileia ena Sivarai Namona be tanobada ibounai dekenai do idia harorolaia. Vadaeni unai murinai, dokona be do ia ginidae.” (Mataio 24:14) Keristani taudia ginigunadia edia negai unai hereva ia guguru lalonai, Roma ena tuari taudia ese Iuda taudia edia tomadiho bona politikol dalana idia do hadikaia ore lasi neganai, gabu ibounai dekenai sivarai namona idia harorolaia. (Kolose 1:23) Danu, Iesu murinai idia raka taudia ibounai ese ena hahegani idia badinaia, ia gwau: “Unai dainai do umui lao, bese ibounai be diba tahua taudia do umui halaoa, bona Tamana, Natuna, bona Lauma Helaga ena ladanai do umui bapatiso henia idia dekenai. Bona idia dekenai do umui hadibaia, umui dekenai lau henia hereva ibounai be do idia badinaia.” (Mataio 28:​19, 20) Keristani taudia ginigunadia ese manau taudia idia hagoadaia Iesu idia abidadama henia totona bona idia hadibadia noho, idia rakatanidia lasi hari haroro taudia momo idia karaia bamona. Iesu ena hahediba taudia ai idia halaodia, kongregesen lalodiai idia haboudia, bona idia hadibadia sivarai namona do idia harorolaia bona hahediba taudia do idia halaoa totona. (Kara 14:​21-23) Hari inai negai Iehova ena Witnes taudia be unai haheitalai idia badinaia.

11. Daidia ese hari sivarai namo hereana idia harorolaia?

¹¹ Keristani taudia ginigunadia edia negai Paulo, Banaba, bona ma haida idia karaia bamona, Iehova ena Witnes taudia haida be idau tanodia dekenai misinari gaukara idia karaia. Edia gaukara ese namo ia havaraia, badina politikol karadia lalonai idia vareai lasi bona sivarai namona harorolaia gaukarana amo idia siri lasi. Idia ese Iesu ena hahegani idia badinaia, ia gwau: “Do umui haroro.” To, Iehova ena Witnes taudia momo be idau tanodia dekenai misinari gaukara idia karaia lasi. Idia momo ese moni gaukara idia karaia mauri durua gaudia abia totona, bona ma haida be idia do sikuli noho. Idia haida be natudia idia naria. To Witnes taudia ibounai ese ma haida dekenai idia dibaia sivarai namona idia harorolaia. Matamata bona buruka taudia, tatau bona hahine, be mai moale ida inai Baibel ena hagoadaia herevana idia badinaia: “Sivarai Namona do oi harorolaia goadagoada, nega namodia neganai, bona nega dikadia neganai danu.” (2 Timoteo 4:⁠2) Unai gaukara tamona idia karaia Keristani taudia ginigunadia bamona, “Iesu Keriso ena Sivarai Namona idia gwauraia noho. Inai gaukara idia hadokoa lasi.” (Kara 5:42) Taunimanima dekenai sivarai namo hereana idia harorolaia noho.

Tomadiho Orea Ena Memba ai Halaoa Toho Karana Eiava Sivarai Namona Harorolaia Karana?

12. Tomadiho orea ena memba ai halaoa toho karana ena anina be dahaka, bona hari momo ese edena bamona idia gwauraia?

¹² Hari, haida idia gwau tomadiho orea ena memba ai halaoa toho karana ese dika ia havaraia. Dubu idauidau edia kaunsolo badana (World Council of Churches) ia halasia pepana ese “tomadiho orea ena memba ai halaoa toho karana ena kara dika” ia herevalaia. Dahaka dainai? Magasin ta (Catholic World Report) ia gwau: “Otodoks Dubuna be ia maumau loulou dainai, hari momo ese ‘tomadiho orea ena memba ai halaoa toho karana’ idia gwauraia tomadiho orea ena memba ai doria karana.”

13. Dika idia havaraia tomadiho orea ena memba ai halaoa toho karadia haida be dahaka?

¹³ Tomadiho orea ena memba ai halaoa toho karana ese dika ia havaraia, a? Dika ia havaraia diba. Iesu ia gwau taravatu hadibaia taudia bona Farisea taudia ese unai idia karaia neganai, edia orea ena memba ai idia lao taudia ese dika idia davaria. (Mataio 23:15) Ia hedinarai goevagoeva, “tomadiho orea ena memba ai doria karana” be dika. Hegeregere, histori torea tauna Josephus ia gwau, Maccabee tauna John Hyrcanus ese Idumea taudia ia abia neganai, “gwaumaoro ia henia edia tano dekenai do idia noho bema kopina utua karana idia karaia bona Iuda taudia edia taravatu idia badinaia.” Bema Idumea taudia idia ura lasi idia mase to Iuda lohia siahuna henunai idia mauri, Iuda tomadihona do idia badinaia be namo. Histori torea taudia ese ita idia hadibaia, lagani 700 C.E. murinai, Charlemagne ese not Europe ena Keristani lasi Saxon taudia ia halusia bona mai dagedage bada ida ia doria Keristani taudia ai idia lao totona.a To, Saxon taudia bona Idumea taudia be mai momokani ida edia tomadiho idia haidaua, a? Hegeregere, Idumea tauna King Heroda​—⁠beibi Iesu ia hamasea toho tauna​—⁠be Dirava ese Mose amo ia henia Taravatu ia badinaia momokani, a?​—⁠Mataio 2:​1-18.

14. Edena dala ai Kerisendom ena misinari taudia haida ese taunimanima idia doria edia tomadiho oreana idia haidaua totona?

¹⁴ Hari inai negai, haida ese taunimanima idia doria edia tomadiho idia haidaua totona, a? Dala haida ai, haida ese unai bamona idia karaia. Sivarai haida idia gwau Kerisendom ena misinari taudia haida ese edia tomadiho orea do idia haidaua taudia dekenai skolasip idia henia, idau tano dekenai edukeisen idia abia totona. Eiava reana ena gabu ia heautania hitolo tauna dekenai idia gwau bema guriguri lalonai ia vareai, gabeai aniani do ia abia. Lagani 1992 ai, Otodoks bisop taudia (Orthodox Primates) edia hebouhebou dekenai idia halasia herevana hegeregerena, “nega haida kohu amo bona nega haida dagedage daladia idauidau amo ta be tomadiho orea ena memba ai idia halaoa toho.”

15. Iehova ena Witnes taudia ese hari momo idia laloa dalana ai tomadiho orea ena memba ai halaoa toho karana idia karaia, a? Oi gwauraia hedinarai.

¹⁵ Edia tomadiho idia haidaua totona taunimanima idia doria karana be dika. Iehova ena Witnes taudia be unai idia karaia lasi.b Unai dainai, hari momo idia laloa dalana ai tomadiho orea ena memba ai halaoa toho karana idia karaia lasi. To, Keristani taudia ginigunadia bamona, taunimanima iboudiai dekenai sivarai namona idia harorolaia. Diba idia ura abia taudia dekenai Baibel stadi amo diba idia henia. Unai bamona kamonai taudia ese Baibel ena diba maorona idia abia bona Dirava bona ena ura idia abidadama henia matamaia. Unai dainai, Dirava ena ladana, Iehova, idia noinoi henia, hahemauri idia abia totona. (Roma 10:​13, 14, 17) Sivarai namona do idia abia dae eiava lasi be idia sibona ese do idia abia hidi. Ta ese ia doria lasi. Bema ta ese ia doria, edia tomadiho idia haidaua be anina lasi. Dirava ese tomadiho karana ia abia dae totona ta be mai ena kudouna ibounai ida ia karaia be namo.​—⁠Deuteronomi 6:​4, 5; 10:⁠12.

Evanelia Gaukara Hari Inai Negai

16. Hari inai nega lalonai, edena dala ai Iehova ena Witnes taudia edia evanelia gaukarana ia bada ia lao?

¹⁶ Hari inai nega lalonai, Iehova ena Witnes taudia ese sivarai namona idia harorolaia neganai, Mataio 24:14 ena hereva idia hagugurua. Edia evanelia gaukarana lalonai idia gaukaralaia gauna badana be Gima Kohorona magasin.c Lagani 1879 ai, Gima Kohorona ginigunana idia halasia neganai, gado tamona ai magasin 6,000 bamona idia karaia. Lagani 2001 ai, lagani 122 bamona murinai, gado 141 ai magasin 23,042,000 idia karaia. Unai magasin edia namba ia bada ia lao hegeregerena Iehova ena Witnes taudia edia evanelia gaukarana ia bada ia lao danu. Lagani 1900 vairanai, lagani ta ta ai evanelia gaukara ai idia gaukaralaia horadia tausen haida be lagani 2001 ai haroro gaukara dekenai idia atoa horadia 1,169,082,225 ida oi hahegeregerea. Mani oi laloa danu, hua ta ta ai idia karaia Baibel stadi edia averes be 4,921,702. Gaukara namona bada herea idia karaia! Bona Basileia harorolaia taudia 6,117,666 ese unai gaukara idia karaia.

17. (a) Hari inai negai dahaka dirava koikoidia idia tomadiho henia? (b) Ta ena gado, bese, eiava mauri dalana be herevana, to dahaka ia diba be namo?

¹⁷ Salamo torea tauna ia gwau: “Tanobada bese idauidau edia dirava, be dirava koikoi gaudia sibona. To Lohiabada ese guba bona guba noho gaudia ia karaia.” (Salamo 96:⁠5) Hari inai tauanina gaudia idia laloa bada tanobadana ai, bese abia isi karana, bese edia toadia idauidau, ladana bada taudia, kohu, bona moni danu idia tomadiho henia. (Mataio 6:24; Efeso 5:5; Kolose 3:⁠5) Mohandas K. Gandhi be nega ta ia gwau: “Egu lalohadai goadana be . . . hari inai negai Europe be Keristani ena ladana sibona ia huaia. To ia ese Mammon [kohu] ia tomadiho henia.” Momokani, gabu iboudiai dekenai sivarai namona idia kamonai be gau badana. Taunimanima edia gado, bese, eiava mauri dalana be herevana to idia ibounai ese Iehova bona ena ura idia diba be namo. Emai ura be taunimanima iboudiai ese salamo torea tauna ena hereva idia abia dae, ia gwau: “Lohiabada do umui hanamoa. Iena hairaina bona iena goada badana do umui hanamoa. Lohiabada ena ladana badana do umui abia isi.” (Salamo 96:​7, 8) Iehova ena Witnes taudia ese ma haida idia durua, Iehova idia diba bona unai amo dala maorona ai ia idia hanamoa totona. Bona unai diba idia abia dae taudia ese namo bada idia abia. Dahaka namo idia moalelaia? Hereva gabena ese unai do ia herevalaia.

[Footnotes]

Anina Oi Gwauraia Diba, A?

• Dahaka dainai Iehova ena Witnes taudia be ura bada evanelia taudia?

• Dahaka dainai Iehova ena Witnes taudia be Kerisendom ese ena dubu ia haginidia gabudia dekenai idia haroro danu?

• Dahaka dainai Iehova ena Witnes taudia be hari momo idia laloa dalanai tomadiho orea ena memba ai halaoa gaukarana idia karaia lasi?

• Hari inai nega lalonai, Iehova ena Witnes taudia edia evanelia gaukarana be edena bamona ia bada ia lao?

[Picture on page 9]

Iesu be ura bada evanelia tauna bona ma haida ia hadibaia unai idia karaia totona

[Picture on page 10]

Keristani taudia ginigunadia ibounai ese evanelia gaukara idia karaia

[Picture on page 11]

Taunimanima ese edia tomadiho idia haidaua totona idia doria karana be dika