Iehova—Namo Bada Ia Hahedinaraia Goevagoeva Diravana
“Siahu Ibounai Lohiabada do umui hanamoa, badina Lohiabada be namo”!—IEREMIA 33:11.
1. Dahaka dainai ita ura Dirava ena namo bada dainai ia ita hanamoa?
IEHOVA DIRAVA ena namo be hereadae. Peroveta tauna Nahumu ia gwau: “Lohiabada be ia namo.” (Nahumu 1:7) Oibe, Dirava ese tanobada ia hegaegaelaia do ita moalelaia totona, bona ia karaia karadia ibounai be iena namo idia hahedinaraia. (Genese 1:31) Dirava ese guba ia havaraia neganai ia haginia taravatudia idauidau ibounai do ita lalo-pararalaia diba lasi. (Hadibaia Tauna 3:11; 8:17) To ita diba vadaeni gaudia dainai, ita ura Dirava ena namo bada dainai ia ita hanamoa.
2. Namo bada ena anina be dahaka?
2 Namo bada ena anina be dahaka? Ia be kara maoromaoro. To ia be mai ena dika lasi gauna sibona lasi. Unai kara maoromaoro be lauma ena huahua ta, bona ia be namo ia havaraia. (Galatia 5:22, 23) Namo bada ita hahedinaraia bema ma haida ita kara namo henia, eiava idia do ia durua karana ta ita karaia. Hari inai tanobadana lalonai, haida idia gwau kara ta ia namo to reana ma haida idia gwau unai kara be dika. To, bema ita ura maino bona moale ita davaria, namona be ita ibounai ita badinaia kara namo taravatudia be idau lasi. To daika be mai maoro ida unai taravatu ia haginidia diba?
3. Genese 2:16, 17 ese kara namo taravatudia ia herevalaia neganai, dahaka ia hahedinaraia?
3 Dirava ese kara namo taravatudia ia haginia. Taunimanima edia matamaia negana ai, Iehova ese tau ginigunana dekenai inai oda ia henia: “Uma gabu dekenai gini au ibounai edia huahua oi ania diba, idia be taravatu lasi, to kara namo bona kara dika hadibaia au ena huahua oi ania lasi, badina be inai huahua oi ania dina dekenai do oi mase momokani.” (Genese 2:16, 17) Oibe, taunimanima ese edia Havaraia Tauna amo namo bona dika idia dibaia be maoro.
Mai Hariharibada ida Namo Bada Ia Hahedinaraia
4. Adamu ia kara dika murinai, Dirava ese dahaka ia karaia taunimanima ia durua totona?
4 Adamu ia kara dika bona ia ese Dirava ena maoro kara namo taravatudia haginia totona ia dadaraia neganai, taunimanima ibounai do idia goevadae bona idia moale ela bona hanaihanai dalana ia hadikaia. (Genese 3:1-6) Adamu ena natudia ese kara dika bona mase do idia abia, to natudia ia do havaraia lasi neganai, Dirava ia gwau Garana goevadaena do ia mai. Iehova ese idaunegai gaigaina, Satani Diabolo, ia hereva henia, ia gwau: “Lau ese badu oi bona hahine ihuanai do lau atoa bona oiemu garana bona iena garana ihuanai. Ia ese emu kwarana do ia haberoa bona oi ese iena aena geduna do oi haberoa.” (Apokalupo 12:9; Genese 3:15, NW ) Iehova ena ura be kara dika taudia do ia hoia lou. Iehova be mai hariharibada ida iena namo ia hahedinaraia, dala ia karaia iena lalokau Natuna ena mauri davalaia boubouna idia abidadama henia taudia ibounai do ia hamauria totona.—Mataio 20:28; Roma 5:8, 12.
5. Ena be kara dika dainai iseda kudouna be gau dikadia ia ura henia, to dahaka dainai kara namo haida ita karaia diba?
5 Momokani, Adamu ia henia kara dika dainai, iseda kudouna be gau dikadia ia ura henia. (Genese 8:21) To ita ia hamoalea gauna be, Iehova ese ita ia durua iseda namo haida ita hahedinaraia totona. Iena revareva helagadia namodia amo ita dibaia gaudia ita badinaia noho neganai, ‘aonega idia henia ela bona mauri ita davaria,’ bona ita ia durua “kara namodia ibounai” do ita karaia diba, bona iena matana dekenai idia namo gaudia do ita karaia diba danu. (2 Timoteo 3:14-17) Baibel ena hahediba herevadia edia namo abia bona kara namo ita hahedinaraia totona, salamo torea tauna ena lalohadai ita tohotohoa be namo, inai ane ia abia, ia gwau: “Oi [Iehova] be namo, bona oiemu kara danu be namo. Oiemu taravatu mani lau dekenai do oi hadibaia.”—Salamo 119:68.
Iehova Ena Namo Idia Gwauraia Hedinarai
6. King Davida ese Ierusalema dekenai taravatu mauana ia abia mai neganai, Levi taudia ese ane ta idia abia bona ena hereva haida be dahaka?
6 Idaunegai Israela tauna King Davida ia diba Dirava be namo bona Iena hakaua herevadia ia tahua. Davida ia gwau: “Lohiabada be namo bona maoromaoro. Unai dainai ia ese kara dika taudia dekenai, iena dala ia hadibaia noho.” (Salamo 25:8) Dirava ese Israela taudia ia hadibaia neganai, anina bada taravatudia—Taravatu Ten—be nadi palaka rua dekenai ia torea bona maua helagana, idia gwauraia taravatu mauana, lalonai idia atodia. Davida ese Israela taudia edia siti badana, Ierusalema dekenai, Maua ia abia lao, bena Levi taudia ese ane idia abia, ena hereva haida be inai: “Lohiabada do ita tanikiu henia! Lohiabada do ita hanamoa, badina iena kara be namo, bona iena lalokau be do ia noho hanaihanai, doko lasi.” (1 Sivarai 16:34, 37-41) Levi ane abia taudia edia uduna bibinadia amo idia halasia herevadia ese kamonai taudia idia hamoalea bada!
7. Helaga Herea gabuna lalonai Maua idia abia vareai bona Solomona ena hahelagaia gurigurina murinai, dahaka ia vara?
7 Davida ena natuna Solomona ese Iehova ena dubu ia haginia bona ia hahelagaia neganai, unai hanamoa herevadia idia hahedinaraia goevagoeva danu. Taravatu mauana be idia haginia dubu matamatana ena Helaga Herea gabuna lalonai idia atoa murinai, Levi taudia ese Iehova idia hanamoa, idia gwau: “Lohiabada do ita hanamoa bada, badina iena kara be namo herea ita dekenai, bona iena lalokau be ia noho hanaihanai.” Unai neganai ori ta ese dubu ia hahonua bona unai ese Iehova ena noho ena hairai ia laulaulaia. (2 Sivarai 5:13, 14) Solomona ena hahelagaia gurigurina murinai, “lahi be guba dekena amo ia diho, gabua bouboudia bona boubou gaudia idauidau ia gabua ore.” Unai idia itaia neganai, “Israela taudia . . . idia tui diho, edia vairadia be ariara tano dekenai idia atoa. . . . Idia gwau, ‘Ita ese Lohiabada do ita hanamoa, badina iena kara ita dekenai be namo herea, bona iena bogahisihisi be do ia noho hanaihanai.’ ” (2 Sivarai 7:1-3) Dina 14 ariana ia ore murinai, Israela taudia be edia ruma dekenai idia giroa, “mai edia moale bona mai edia lalona namo danu, badina be Lohiabada ese iena hanamoa be Davida bona Solomona bona iena bese Israela dekenai ia henia vadaeni.”—2 Sivarai 7:10.
8, 9. (a) Ena be Israela taudia ese Iehova idia hanamoa iena namo dainai, to gabeai dahaka idia karaia? (b) Ieremia ia gwau Ierusalema dekenai dahaka do ia vara, bona edena dala ai unai peroveta herevana ia guguru?
8 Madi, Israela taudia be Dirava hanamoa anedia hegeregerena idia mauri noho lasi. Gabeai, Iuda taudia be ‘edia bibinadia sibona dekena amo Iehova idia hanamoa.’ (Isaia 29:13) Dirava ena kara namo taravatudia idia badinaia lasi, to kara dika idia karaia matamaia. Edena bamona kara dika idia karaia? Idia ese kaivakuku idia tomadiho henia, idia sihari kava, ogogami taudia idia hahisia, bona kara dika badadia ma haida idia karaia! Unai dainai, lagani 607 B.C.E. ai, Ierusalema idia hadikaia bona Iuda lalonai idia noho taudia idia abia lao Babulonia dekenai.
9 Unai amo Dirava ese ena taunimanima ia panisia. To peroveta tauna Ieremia amo, Dirava ia gwau Ierusalema lalonai gado regedia do idia kamonai, do idia gwau: “Siahu Ibounai Lohiabada do umui hanamoa, badina Lohiabada be namo, bona iena lalokau be nega hanaihanai do ia noho.” (Ieremia 33:10, 11) Bona unai ia vara. Lagani 70 lalodiai tano ia noho kava murinai, lagani 537 B.C.E. ai, Iuda oredia idia giroa Ierusalema dekenai. (Ieremia 25:11; Daniela 9:1, 2) Moraia Ororona dekenai idia haginia dubu gunana ena gabu ai, boubou patana idia haginia lou bona boubou gaudia idia henia. Idia giroa lou laganina iharuana ai, dubu ena badina idia haginia. Unai be moale bada negana! Esera ia gwau: “Ruma haginia taudia ese Dubu Helaga ena badina nadidia idia haginia hamatamaia neganai, hahelagaia taudia ese edia dabua helagadia idia karaia, idia gini, mai edia kibi edia imana dekenai. Levi taudia danu idia gini, Asapa ena iduhu taudia danu unuseni idia gini, mai edia botaia auridia danu. Idia ese Lohiabada idia hanamoa henia, king Davida, Israela ena king ena hadibaia hereva hegeregerena. Bona ane idia abia hebou, idia gwau, ‘Lohiabada be ia namo bada, bona iena lalokau Israela dekenai be ia noho hanaihanai.’ ”—Esera 3:1-11.
10. Salamo 118 ena siri ginigunana bona ginigabena lalodiai, edena mai anina bada herevadia idia noho?
10 Iehova ena namo ia gwauraia hedinarai herevana ma ta be salamo haida dekenai. Idia ta be Salamo 118, Israela ruma besedia be unai ane idia abia Pasova idia hadokoa totona. Unai salamo ena siri ginigunana bona ginigabena lalodiai, inai bamona hereva idia noho: “Lohiabada do ita tanikiu henia, badina ita dekenai kara namo ia karaia. Iena lalokau bona bogahisihisi be do idia noho hanaihanai.” (Salamo 118:1, 29) Lagani 33 C.E. ai, Iesu Keriso ena hanuaboi ginigabena ai unai ane ia abia, reana unai be iena abidadama aposetolo taudia ida ia abia hanamoa hereva ginigabedia.—Mataio 26:30.
‘Oiemu Hairaina Ena Diaridiari Lau Dekenai Do Oi Hahedinaraia’
11, 12. Mose ese Dirava ena hairai sisina ia itaia neganai, edena hereva ia kamonai?
11 Esera ia do vara lasi neganai lagani handred momo gunanai, Iehova ena namo bona ena hebogahisi mai lalokauna idia hakapua herevana ta ia hedinarai. Israela taudia be taunimanima idia noho lasi gabuna dekenai golo boromakau natuna idia tomadiho henia bona Dirava ese kara dika taudia ia hamasea murinai, Mose ese Iehova ia noia: “Mani emu kara oiemu hairaina ena diaridiari lau dekenai do oi hedinaraia.” Iehova ia diba Mose be Iena vairanai ia itaia neganai do ia mase, unai dainai ia gwau: “Lauegu kara namona ibounai be oi dekenai do lau hedinaraia.”—Esodo 33:13-20.
12 Dina ta murinai, Sinai Ororona ai, Iehova ena namo be Mose vairanai ia hahedinaraia. Unai neganai, Mose ese Dirava ena hairai sisina ia itaia bona inai hereva ia kamonai: “Lau be Lohiabada. Lau Lohiabada be bogahisihisi bona hariharibada Diravana. Lau be badu dekenai lau haraga lasi, to bogahisihisi bona lalokau [“hebogahisi mai lalokauna bona momokani,” NW ] dekenai lau be haraga. Taunimanima momo herea dekenai lau bogahisihisi [“hebogahisi mai lalokauna lau,” NW ] henia noho, bona kara dika, bona kara kerere idauidau lau gwauatao noho. To kerere momokani taudia do lau panisia. Bona tamadia edia kara dika davana be edia natudia dekenai do lau henia, bona edia tubudia dekenai.” (Esodo 34:6, 7) Unai hereva ese idia hahedinaraia Iehova ena namo be mai anina ena lalokau bona hebogahisi bona iena kara oredia ibounai dekenai. Bema idia ita laloa, ita do ia durua namo ita hahedinaraia totona. Unai hereva lalonai Dirava ena namo ia herevalaia neganai, nega rua kara ma ta ia herevalaia, bona unai do ita laloa guna.
‘Hebogahisi mai Lalokauna Dekenai Lau be Haraga’
13. Dirava ena namo ia herevalaia neganai, edena kara be nega rua ia gwauraia, bona dahaka dainai unai be maoro?
13 ‘Lau Lohiabada be Lohiabada, hebogahisi mai lalokauna dekenai lau be haraga, taunimanima momo herea dekenai hebogahisi mai lalokauna lau henia noho.’ Heberu gado herevana, idia hahanaia “hebogahisi mai lalokauna,” be nega haida idia hahanaia “lalokau mai ena abidadama.” Dirava ese Mose ia hereva henia neganai, unai kara sibona be nega rua ia gwauraia. Unai be maoro, badina Iehova ena kara badana be lalokau! (1 Ioane 4:8) Iehova hanamoa herevana ta, momo idia diba herevana, ‘ia be namo, iena bogahisihisi bona lalokau do idia noho ela bona hanaihanai,’ be unai kara ia hahedinaraia bada.
14. Daidia ese Dirava ena namo bona hebogahisi mai lalokauna idia moalelaia?
14 Iehova ena namo ia hahedinaraia karana ta be “hebogahisi mai lalokauna” dekenai ia honu. Ita itaia ia be mai lalokau ida ena hesiai taudia, idia gwauhamata vadaeni abidadama taudia unai, ia naria. (1 Petero 5:6, 7) Iehova ena Witnes taudia idia gwau diba, Dirava ese ia idia lalokau henia bona hesiai henia taudia dekenai “hebogahisi mai lalokauna” ia henia noho. (Esodo 20:6) Israela besena korikorina ese Iehova ena hebogahisi mai lalokauna, eiava ena lalokau mai ena abidadama idia mamia noho lasi, badina ena Natuna idia dadaraia. To Dirava ena namo bona ena lalokau mai ena abidadama be bese idauidau abidadama Keristani taudia dekenai do ia henia noho ela bona hanaihanai.—Ioane 3:36.
Iehova—Hebogahisi Bona Hariharibada Diravana
15. (a) Sinai Ororona dekenai, Mose ia kamonai herevana ena hamatamaia herevana be dahaka? (b) Hebogahisi ena anina be dahaka?
15 Sinai Ororona dekenai, Mose ia kamonai herevana ena hamatamaia herevana be inai: “Lau be Lohiabada. Lau Lohiabada be bogahisihisi bona hariharibada Diravana.” Heberu herevana ta, idia hahanaia “bogahisihisi” ena anina be “bogana ena anina” bona ena anina be hereva ma ta, “beibi pusena,” bamona. Unai dainai hebogahisi be taunimanima edia lalona momokani ena hemami ta. To hebogahisi be hemami ta sibona lasi. Namona be ita ia doria kara ta ita karaia ma ta ena hisihisi koua totona. Hegeregere, lalokau Keristani elda taudia idia itaia namona be edia tadikaka idia hebogahisi henia, bona ia maoro neganai, ‘do idia bogahisihisi henia mai edia lalo-namo danu.’—Roma 12:8; Iamesi 2:13; Iuda 22, 23.
16. Dahaka dainai ita gwau diba Iehova be hariharibada Diravana?
16 Dirava ena namo be iena hariharibada amo ia hahedinaraia danu. Hariharibada tauna be taunimanima ma haida edia hemami ia laloa bada bona ia henunai idia noho taudia ia kara namo henia. Iehova be iena abidadama hesiai taudia ia kara henia neganai, ia be hariharibada ia haheitalaia tauna hereadaena. Hegeregere, Dirava ese iena aneru amo buruka peroveta tauna Daniela ia hagoadaia bona rami-hebou kekenina Maria ia hamaoroa hahenamo do ia abia, do ia rogorogo bona Iesu do ia havaraia. (Daniela 10:19; Luka 1:26-38) Ita be Iehova ena taunimanima dainai, Baibel ena hereva amo iseda lalona ia veria hariharibada dalana ita laloa bada. Iena namo ia hahedinaraia dainai, ita hanamoa bona ita ura ma haida dekenai hariharibada ita hahedinaraia. “Mai manau danu” lauma dalanai idia goada taudia ese ia kerere tadikaka idia sisiba henia neganai, idia kara namo henia mai lalo-namo ida.—Galatia 6:1.
Ia Badu Haraga Lasi Diravana
17. Dahaka dainai ita moale Iehova be ‘badu dekenai ia haraga lasi’?
17 “Badu dekenai lau haraga lasi.” Unai hereva ese Iehova ena namo ena kahana ma ta ia hahedinaraia. Iehova ese iseda kerere ia haheaukalaia bona nega ia henia manoka karadia badadia ita hanaia bona lauma dalanai do ita goada totona. (Heberu 5:12–6:3; Iamesi 5:14, 15) Dirava ena haheauka ese ia idia do tomadiho henia lasi taudia ia durua danu. Nega ia do noho Basileia ena sivarai idia abia dae bona idia helalo-kerehai totona. (Roma 2:4) Ena be Iehova ia haheauka, to ena namo dainai nega haida ena badu ia hahedinaraia, hegeregere Israela taudia be Sinai Ororona ai golo boromakau natuna idia tomadiho henia neganai ia hahedinaraia. Dirava ese Satani ena tanobada dikana ia haorea neganai, ena badu be dala badana ai do ia hahedinaraia.—Esekiela 38:19, 21-23.
18. Hereva momokani dekenai, Iehova bona taunimanima edia gunalaia taudia edia idau be dahaka?
18 ‘Lohiabada be momokani dekenai ia haraga.’ Iehova be taunimanima edia gunalaia taudia amo ia idau, badina idia be gwauhamata badadia idia karaia bena idia hagugurua lasi! To Iehova idia tomadiho henia taudia ese ena lauma amo ia havaraia Hereva ibounai idia abidadama henia diba. Dirava be momokani dekenai ia haraga dainai, iena gwauhamata ita abidadama henidia diba. Iseda guba Tamana ita noia lauma gaudia edia hereva momokani do ita dibaia, bona iena namo dainai ia haerelaia bona diba bada herea ia henia.—Salamo 43:3; 65:2.
19. Iehova ese helalo-kerehai kara dika taudia dekenai dahaka namo ia hahedinaraia?
19 “Lau Lohiabada be . . . kara dika, bona kara kerere idauidau lau gwauatao noho.” Iehova ena namo dainai, ia gini hegaegae idia helalo-kerehai taudia edia kara dika ia gwauatao totona. Iseda lalokau guba Tamana be Iesu ena boubou amo kara dika gwauatao dalana ia haginia dainai, ia ita tanikiu henia bada. (1 Ioane 2:1, 2) Ita moale momokani unai boubou idia abidadama henia taudia ibounai be Iehova idia tura henia diba, bona edia helaro be ia gwauhamatalaia tanobada matamatana lalonai mauri hanaihanai do idia abia. Iehova ese ena kara namo ia hahedinaraia taunimanima dekenai, bona unai badina namodia dainai ia ita hanamoa!—2 Petero 3:13.
20. Dahaka gaudia idia hamomokania Dirava ese kara dika ia abia dae lasi?
20 “Kerere momokani taudia do lau panisia.” Unai be badina namona ma ta Iehova ena namo dainai do ita hanamoa totona. Dahaka dainai? Badina be iena namo ena kahana badana ta be kara dika ta ia abia dae diba lasi. “Lohiabada Iesu bona iena aneru mai siahu bada danu guba dekena amo do idia mai neganai,” “Dirava ese ia idia ura lasi taudia, bona Lohiabada Iesu ena Sivarai Namona idia abia dae lasi taudia dekenai davana metau do ia henidia.” Dirava ese “idia do ia hadikaia ore momokani, bona inai bamona do idia noho hanaihanai.” (2 Tesalonika 1:6-9) Iehova idia tomadiho henia roho mauri taudia ese edia mauri do idia moalelaia bada, badina Dirava idia dadaraia bona ‘kara namodia idia ura henia lasi’ taudia ese edia mauri do idia hadikaia lasi.—2 Timoteo 3:1-3.
Iehova Ena Namo Tohotohoa
21. Dahaka dainai ita ese namo ita hahedinaraia be namo?
21 Ita daradara lasi, Iehova ena namo dainai ita tanikiu henia ena badina be momo. Ita be iena hesiai taudia dainai, do ita gaukara goadagoada unai kara ita hahedinaraia totona, ani? Oibe, badina aposetolo Paulo ese Keristani taudia ia hagoadaia: “Umui be Dirava ena natuna taudia, iena lalokau. Unai dainai, Dirava ena kara bamona do umui karaia be namo.” (Efeso 5:1) Iseda guba Tamana be hanaihanai iena namo ia hahedinaraia, unai dainai ita hahedinaraia danu be namo.
22. Hereva gabena lalonai, dahaka do ita laloa?
22 Bema mai iseda kudouna ibounai ida sibona ita henia Iehova dekenai, do ita ura iena namo ita tohotohoa. Ita be kara dika tauna Adamu amo dainai, nega haida namo bada ita hahedinaraia be auka. To, hereva gabena lalonai, do ita itaia namo bada ita hahedinaraia diba. Danu, Iehova—namo bada ia hahedinaraia goevagoeva Diravana—ita tohotohoa be namo bona ita karaia diba daladia idauidau do ita laloa.
Edena Bamona Do Oi Haere?
• Namo bada ena anina be dahaka?
• Baibel lalonai edena hanamoa herevana ese Dirava ena namo ia hahedinaraia namonamo?
• Iehova ena namo idia hahedinaraia karadia haida be dahaka?
• Dahaka dainai Iehova ena namo ita tohotohoa be namo?
[Picture on page 12]
Iehova ese ena idaunegai besena ia panisia badina edia hanamoa herevadia hegeregerena idia noho lasi
[Picture on page 12]
Abidadama taudia oredia be Ierusalema dekenai idia giroa lao
[Picture on page 13]
Mose be Dirava ena namo gwauraia hedinarai herevana ta ia kamonaia
[Picture on page 15]
Iehova ena namo ita itaia dalana be, Baibel ena hereva amo ita ia veria