Kara Namodia ese Dirava Idia Hanamoa
KERISTANI taudia momokanidia be edia kara bona haheitalai namodia amo Dirava idia hanamoa. (1 Petero 2:12) Vanegai laganidia lalonai, Italy ai ia vara karana ese unai ia hahedinaraia.
September 1997 ai, tano mareremarere badana ta ese Marche bona Umbria gabudia edia kahana idauidau ia hadikaia, kahirakahira ruma 90,000 ia hadikaia. Iehova ena Witnes taudia be karaharaga edia abidadama tamona taudia bona ma haida idia nanadaia bema heduru idia henia diba. Trailer, bilankesi, sitou, jenareita, bona heduru gaudia ma haida idia henia. Taunimanima ese unai heduru karana idia itaia.
Niuspepa Il Centro ia gwau: “Dika ia vara gabuna dekenai, heduru gaudia do idia henia totona idia ginidae taudia ginigunadia be Roseto [Teramo ena provinsi] amo idia mai Iehova ena Witnes taudia . . . Iehova idia abidadama henia taudia be guriguri totona nega ta ta sibona idia hebou lasi, to dala ma ta ai idia gaukara, hekwakwanai idia davaria taudia idia durua, herevana edia tomadiho be idau to unai idia laloa lasi.”
Nocera Umbra, dika bada ia davaria hanuadia ta, ena taoni naria tauna badana be Witnes taudia ia torea henidia, ia gwau: “Mai egu kudouna ibounai ida umui lau tanikiu henia, Nocera taudia dekenai umui henia heduru dainai. Lau diba momokani inai gabu taudia edia tanikiu herevana lau gwauraia danu.” Danu, Ministry of the Interior oreana ese Congregazione Cristiana dei Testimoni di Geova (Iehova ena Witnes taudia edia Keristani Kongregesen) dekenai hanamoa pepana bona medolo ta ia henia, unai be “Umbria bona Marche gabudia dekenai idia vara dika dainai, idia gaukara goadagoada karana ia hahedinaraia totona.”
October 2000 ai, abata badana ta ese Italy ena not kahana, Piedmont, ia hadikaia. Witnes taudia be karaharaga unai gabu taudia dekenai heduru idia henia danu. Taunimanima ese unai kara namodia idia itaia danu. Piedmont Region taudia be Witnes taudia dekenai herahera mai laloatao toretorena ta idia henia, ia gwau “abata ese Piedmont taudia ia hadikaia neganai, volantia gaukara namo hereana idia karaia idia durudia totona.”
Iesu Keriso ese ena hahediba taudia ia hadibaia ia gwau: “Emui diari taunimanima edia vairana dekenai unai bamona do umui hedinaraia, vadaeni umui emui kara namodia do idia itaia neganai, umui emui Tamana guba dekenai do idia hanamoa.” (Mataio 5:16) Iehova ena Witnes taudia be “kara namodia” amo edia dekena taudia idia durua lauma dalanai bona dala ma haida dekenai, bona idia sibona idia hanamoa lasi, to mai moale ida Dirava idia hanamoa.