‘Dirava Ena Hereva be mai Ena Siahu’ — Gima Kohorona INTANET LAIBRI

Basileia Haroro Ripoti

‘Dirava Ena Hereva be mai Ena Siahu’

DINA ia siahu gabuna, Caribbean ena motumotu ladana Jamaica ai, taunimanima momo be Baibel idia diba. King James Version Baibel be kahirakahira ruma ibounai dekenai oi davaria diba, bona taunimanima haida idia mamia “Dirava ena hereva be ia mauri noho, bona ia be mai ena siahu.” (Heberu 4:12) Unai siahu ese taunimanima edia mauri ia haidaua diba, henunai ia noho ekspiriens ese ia hahedinaraia bamona.

Tau ta ladana Cleveland be gaukara amo ena ruma dekenai ia giroa lou neganai, Iehova ena Witnes tauna ta ese ia vadivadi henia. Baibel amo hereva haida be ia ida ia kikilaia murinai, Witnes tauna ese ia dekenai Baibel stadi bukana, Diba ese Mauri Dekenai Ita Ia Hakaua Lao ia henia. Cleveland ia diba lasi iena mauri lalonai Dirava ena Hereva be mai ena siahu.

Cleveland be guna dina tamona lalonai nega toi ia guriguri, Dirava ia noia ia do ia durua, Ia tomadiho henia dalana maorona ia davaria totona. Cleveland ia diba ena tama sina be dala maorona ai idia tomadiho lasi, to tomadiho ma haida ia tahua murinai, ia moale lasi. Ena be Iehova ena Witnes taudia ia diba, to idia dekenai hereva momokani ia noho eiava lasi be ia daradaralaia. Herevana ia dekenai unai lalohadai ia noho, to Cleveland ena lalona ia hadaia ena ruma dekenai ia vadivadi Witnes tauna ida Baibel stadi do ia abia. Dahaka dainai? Badina ia ura ia hamomokania Witnes taudia be kerere!

Daudau lasi murinai, Cleveland ia diba hahine idaudia rua ida ia sihari kava karana be Dirava ese ia moalelaia lasi. (1 Korinto 6:9, 10) Nega rua sibona ia stadi murinai, mai gari lasi ida ena hetura karana unai hahine rua ida ia hadokoa. Danu, Kingdom Hall dekenai Keristani heboudia ia lao henia matamaia. To unai ese hahetoho ma ta ia havaraia.

Cleveland be ena gabu dekenai ia noho soka tim ta lalonai ia gadara goadagoada, bona unai ese ena hebou lao henia dalana ia koua. Dahaka do ia karaia? Ena be ia ida idia gadara hebou taudia, gadara hadibaia tauna, bona turadia ese ia idia koua, to Cleveland ese ena lalona ia hadaia unai soka tim ia rakatania. Oibe, Dirava ena Hereva be Cleveland ena mauri lalonai ia gaukara matamaia, bona ia dekenai namo ia havaraia!

Cleveland ese Baibel amo ia abia dibana be ma haida ida ia herevalaia matamaia neganai, Dirava ena Hereva ena siahu ia hedinarai lou. (Kara 1:8) Unai dainai, ia ida guna idia gadara hebou taudia rua be Iehova ena Witnes taudia edia hebou idia lao henia matamaia. Cleveland be sivarai namona harorolaia pablisa ta ai ia lao murinai, haroro gaukara lalonai Dirava ena Hereva be ma haida durua totona ia gaukaralaia karana amo, moale bada ia davaria.

Dirava ena Hereva ena siahu ese ia hagoadaia noho dainai, Cleveland be ranu bapatisona amo ena gwauhamata Iehova dekenai ia hahedinaraia bona ful-taim hesiai gaukara ia karaia bona kongregesen lalonai ia be hesiai tauna ta, be hahenamo badana.

Jamaica bona tanobada hegegemadai ai, taunimanima tausen momo idia diba, momokani, Dirava ena Hereva “ia mauri noho, bona ia be mai ena siahu.”

[Map/Picture on page 20]

(For fully formatted text, see publication)

JAMAICA

[Credit Line]