“Dirava Ena Hereva . . . be mai Ena Siahu”

“Dirava ena hereva be ia mauri noho, bona ia be mai ena siahu.”—⁠HEB. 4:12.

1. Dahaka dainai ita abia dae momokani Dirava ena Hereva be mai ena siahu? (Laulau ginigunana herevalaia.)

IEHOVA ena taunimanima be idia abia dae momokani iena hereva, unai be ena hereva taunimanima dekenai, be “ia mauri noho, bona ia be mai ena siahu.” (Heb. 4:12) Baibel be mai ena siahu dainai, ita momo ese iseda mauri ita haidaua. Iseda tadikaka taihu haida be guna idia henaohenao, drag idia abia, eiava matabodaga karadia idia karaia. Ma haida be ladana bada idia dogoatao o idia taga, to idia mamia edia mauri ai gau ta idia reaia. (Had. 2:3-11) Guna momo idia laloa edia mauri be anina lasi, to Baibel be mai ena siahu dainai, idia ese edia mauri idia haidaua bona mauri ena dala dekenai idia raka. Unai bamona ekspiriens namodia momo be Gima Kohorona ena kahana ladana “Baibel ese Mauri Ia Haidaua” dekenai oi duahia diba. Danu, Keristani taudia ai idia lao murinai, namona be Baibel ena heduru amo edia hetura karana Iehova ida idia hagoadaia noho.

2. Aposetolo edia negai, dahaka ia vara?

² Ita hoa lasi badina hari inai negai, momo be Dirava ena Hereva idia stadilaia dainai, edia mauri idia haidaua. Unai bamona ekspiriens ita duahia neganai, aposetolo edia negai, guba helarona idia abia tadikaka taihu ita lalodia. (1 Korinto 6:9-11 duahia.) Aposetolo Paulo ese Dirava ena Basileia do idia abia lasi taudia ia herevalaia murinai, ia gwau: “Guna umui haida be unai bamona.” To, Baibel bona lauma helaga ena heduru amo idia ese edia mauri idia haidaua. Idia haida be hereva momokani idia abia murinai, kerere badadia idia karaia bona unai ese edia hetura karana Iehova ida ia hadikaia. Hegeregere, Baibel ia gwau horoa Keristani tauna ta be orea amo idia atoa siri, to gabeai idia abia-vareai-lou. (1 Kor. 5:1-5; 2 Kor. 2:5-8) Ita moale badina Dirava ena Hereva ena heduru amo iseda tadikaka taihu be idia davaria hekwakwanai idia hanaidia diba.

3. Inai stadi ai dahaka do ita herevalaia?

³ Dirava ena Hereva ena siahu be bada, bona Iehova ese ita dekenai ia henia dainai, ita ura ita gaukaralaia namonamo. (2 Tim. 2:15) Inai stadi ai, do ita itaia edena bamona Dirava ena Hereva ena siahu be ita ia durua diba: (1) iseda mauri ai, (2) haroro gaukara ai, bona (3) platfom amo ita hadibaia neganai. Do ita dibaia gaudia ese ita do idia durua iseda guba Tamana dekenai iseda lalokau bona tanikiu karana ita hahedinaraia totona, badina ita dekenai iseda namo habadaia dalana ia hadibaia.—⁠Isa. 48:17.

ISEDA MAURI AI

4. (a) Dirava ena Hereva ese ita ia durua totona, dahaka ita karaia be namo? (b) Oi be edena nega ai emu Baibel duahiduahi oi karaia?

⁴ Bema ita ura Dirava ena Hereva ese ita ia durua, namona be nega ibounai ita duahia. Oibe, dina ta ta ai ita duahia be namo. (Ios. 1:8) Momokani, ita momo be ita bisi bada. To, namo lasi gau ta—⁠iseda maduna idauidau danu—⁠ese iseda Baibel duahiduahi karana ia koua. (Efeso 5:15, 16 duahia.) Iehova ena taunimanima be nega idauidau ai edia Baibel idia duahia, hegeregere daba momokani ai, dina tubua ai, eiava hanuaboi ai idia karaia. Edia hemami be salamo torea tauna ena bamona, ia gwau: “Oiemu taravatu lau ura henia. Dina ena hora ibounai lalonai, oiemu taravatu lau laloa noho.—⁠Sal. 119:97.

5, 6. (a) Dahaka dainai laloa dobu karana be mai anina bada? (b) Laloa dobu karana ena namo be dahaka? (c) Dirava ena Hereva oi duahia bona laloa dobu dainai, dahaka namo oi davaria?

⁵ To, Baibel ita duahia sibona be hegeregere lasi. Namona be ita duahia gaudia ita laloa dobu danu. (Sal. 1:1-3) Bema unai ita karaia, Baibel ai idia noho aonega herevadia be iseda mauri lalonai do ita badinaia. Unai dainai herevana Dirava ena Hereva be idia printaia gauna eiava mobael fon amo ita duahia, to ita ura unai Hereva ese iseda mauri ia haidaua.

Iehova ena Witnes tauna ta be Baibel ia duahia

⁶ Laloa dobu karana ena namo be dahaka? Momo be Baibel ena siri haida idia duahia murinai, sibona idia nanadaia: ‘Inai siri amo Iehova dekenai dahaka lau dibaia? Edena dala ai Dirava ena Hereva lalonai idia noho hakaua herevadia be egu mauri lalonai lau badinaia diba? Edena kara do lau haidaua?’ Mai guriguri ida Dirava ena Hereva ita laloa dobu neganai, do ita ura badinaia. Bena iseda mauri dekenai Baibel ena siahu ita mamia diba.—⁠2 Kor. 10:4, 5.

HARORO GAUKARA AI

7. Haroro gaukara ai, Dirava ena Hereva be edena dala ai ita gaukaralaia diba?

⁷ Haroro gaukara ai, Dirava ena Hereva ita gaukaralaia namonamo totona, dahaka ita karaia be namo? Gau ginigunana be haroro bona hadibaia gaukarana ai, nega ibounai Dirava ena Hereva ita gaukaralaia. Tadikaka ta ia gwau: “Bema oi be Iehova ida ruma-ta-ruma-ta haroro gaukara oi karaia, oi sibona ese hereva ibounai do oi gwauraia eiava nega do oi henia Iehova ia hereva totona?” Ena hereva ena anina be inai: Haroro gaukara ai Dirava ena Hereva ita duahia neganai, unai be hegeregere Iehova be unai ruma tauna ia hereva henia noho. Siri maorodia ita gaukaralaia karana be mai ena siahu. (1 Tes. 2:13) Unai dainai sibona oi nanadaia, ‘Ta dekenai sivarai namona lau gwauraia neganai, Dirava ena Hereva lau gaukaralaia, a?’

8. Dahaka dainai siri ita duahia sibona be hegeregere lasi?

⁸ To, ita haroro henia taudia dekenai Baibel siri sibona ita duahia be hegeregere lasi. Dahaka dainai? Badina momo be Baibel ena hereva idia diba sisina eiava idia lalopararalaia lasi. Iseda nega be aposetolo edia negai bamona. (Roma 10:2) Unai dainai namo lasi ita laloa ita duahia sirina be ibounai ese do idia laloparara. Ruma tauna durua totona, siri ena hereva badadia ita duahia lou diba, bona ena anina ita hahedinaraia. Bema unai ita karaia, Dirava ena Hereva ese taunimanima edia lalona bona kudouna ia hamarerea diba.—⁠Luka 24:32 duahia.

9. Taunimanima ese Baibel idia matauraia totona, dahaka ita karaia be namo? Haheitalai ta gwauraia.

⁹ Baibel siri ta ita do duahia lasi neganai, ita gwauraia herevana ese ruma tauna ia durua diba Baibel ia matauraia totona. Reana ita gwau: “Iseda Havaraia Tauna ena lalohadai mani ita itaia.” Keristani mauri dalana idia diba lasi taudia ita hereva henia neganai, reana ita gwau: “Toretore Helagadia mani ita itaia.” Eiava tomadiho ia laloa bada lasi tauna ita hereva henia neganai, reana ita henanadai: “Inai idaunegai aonega herevana be guna oi kamonai, a?” Oibe, namona be ta ena diba bona noho dalana hegeregerena ia ita haroro henia.—⁠1 Kor. 9:22, 23.

Iehvoa ena Witnes taudia be haroro gaukara ai Baibel idia gaukaralaia

10. (a) Tadikaka ta ena ekspiriens gwauraia. (b) Haroro gaukara ai Dirava ena Hereva ena siahu oi itaia, a?

¹⁰ Momo idia davaria haroro gaukara ai Dirava ena Hereva idia gaukaralaia neganai, momo idia kamonai. Inai haheitalai mani ita laloa. Tadikaka ta be lagani momo lalonai iseda magasin ia duahia tauna ta ia lou henia. Tadikaka ese unai tauna dekenai Gima Kohorona matamata ia henia sibona lasi, to unai magasin lalonai ia noho siri ta ia duahia danu. Ia ese 2 Korinto 1:3, 4 ia duahia, unai siri ia gwau: “Ia be hebogahisi Tamana bona lalogoada ibounai ia henia Diravana. Iseda hisihisi ibounai lalonai . . . ita dekenai lalogoada ia henia.” Unai siri ese ruma tauna ena kudouna ia hamarerea dainai, tadikaka ia noia siri do ia duahia lou. Unai tauna ia gwau ia bona ena adavana idia ura bada lalogoada idia abia, bona hari ia ura Baibel ena sivarai ia kamonai. Momokani, haroro gaukara ai, Dirava ena Hereva be mai ena siahu, ani?—⁠Kara 19:20.

PLATFOM AMO OI HADIBAIA NEGANAI

11. Platfom amo idia hadibaia tadikaka edia maduna be dahaka?

¹¹ Ita ibounai ita ura kongrigeisen heboudia, bona hebouhebou badadia bona maragidia dekenai ita lao. Unuseni ita lao badina ita ura Iehova ita tomadiho henia. Bona ita kamonai herevadia amo namo ita abia. Unai dainai, platfom amo ita idia hadibaia tadikaka dekenai unai be hahenamo badana. Bona ia be maduna badana danu. (Iam. 3:1) Oibe, edia hadibaia herevadia be Dirava ena Hereva amo idia abia be namo. Bema oi be unai hahenamo oi abia, edena bamona do oi hahedinaraia Baibel ena hereva be mai ena siahu?

Tadikaka be platfom ai ia hadibaia totona Baibel ia gaukara

12. Edena dala ai tok henia tauna ese Baibel ia gaukaralaia namonamo diba?

¹² Tok oi henia neganai, Baibel oi gaukaralaia be namo. (Ioa. 7:16) Laloatao, namo lasi oi gwauraia ekspiriens, haheitalai, eiava emu tok henia dalana dainai, kamonai taudia be oi gaukaralaia Baibel siridia idia laloa bada lasi. Danu laloaboio lasi, Baibel oi duahia bona Baibel amo oi hadibaia be gau idaudia rua. Momokani, bema siri momo oi gaukaralaia, kamonai taudia ese unai siri ibounai do idia laloatao lasi. Unai dainai oi ura gaukaralaia siri oi abia hidi namonamo, unai amo nega do ia noho siri oi duahia, ena anina oi hahedinaraia, oi haheitalaia, bona badinaia dalana oi hahedinaraia totona. (Neh. 8:8) Bema emu tok be autlain ta amo, namona be unai autlain bona idia noho siri oi stadilaia namonamo. Autlain ena hereva bona idia torea Baibel siri idia gaukara hebou dalana oi itaia. Bena siri haida oi abia hidi autlain ena point badana oi hahedinaraia totona. (Heduru ma haida abia totona, Tiokratik Haroro Sikuli amo Heduru Oi Abia bukana ena rau 21 ia lao 23 itaia.) Bona mai anina bada gauna be inai, Iehova ena heduru oi noia, unai amo iena Hereva lalonai idia noho lalohadai namodia oi hahedinaraia namonamo diba.—⁠Esera 7:10; Aonega Herevadia 3:13, 14 duahia.

13. (a) Kongrigeisen hebouna ai idia gaukaralaia siri ta ese edena dala ai taihu ta ia durua? (b) Kongrigeisen heboudia ai idia henia tok amo dahaka namo oi abia?

¹³ Australia ai, taihu ta be kongrigeisen hebouna ai ia kamonai sirina ese ia durua bada. Ena be ia maragi neganai dagedage bada ia davaria, to ia ese Baibel ena sivarai ia abia dae bona Iehova dekenai ena mauri ia gwauhamatalaia. Ena be unai ia vara, to ia abia dae momokani lasi Iehova be ia ia lalokau henia. To gabeai, unai ia abia dae. Dahaka ese ia durua? Ia ese kongrigeisen hebouna dekenai ia kamonai sirina ia laloa dobu bona Baibel siri ma haida ida unai ia hahegeregerea.a Kongrigeisen heboudia, bona hebouhebou badadia bona maragidia dekenai idia gaukaralaia siri ta ese unai dala ai oi ia durua, a?—⁠Neh. 8:12.

14. Edena bamona do ita hahedinaraia Iehova ena Hereva ita laloa bada?

¹⁴ Ita dekenai Baibel ia noho dainai, Iehova ita tanikiu henia, a? Ia gwauhamata ena Hereva be do ia noho ela bona hanaihanai, bona unai gwauhamata ia hagugurua. (1 Pet. 1:24, 25) Oibe, namona be nega ibounai Dirava ena Hereva ita duahia, iseda mauri lalonai ita badinaia, bona ita gaukaralaia ma haida ita durua totona. Unai amo ita hahedinaraia, unai dava bada gauna ita laloa bada, bona Baibel ia Havaraia Tauna, Iehova Dirava, ita lalokau henia.

a Maua ladana “Egu Lalohadai Lau Haidaua” itaia.

“Egu Lalohadai Lau Haidaua”

Ena be Victoria be lagani momo lalonai hereva momokani ia dibaia, to ia mamia Dirava be ia ia lalokau henia lasi. Dahaka ese ia ia durua? Victoria ia gwau:

“Lau bapatiso bona lagani 15 murinai, egu lalohadai lau haidaua. Kingdom Hall ai, tadikaka ta be tok ia henia noho lalonai, ia ese Iamesi 1:23, 24 ia herevalaia. Unai siri ese Dirava ena Hereva be hevarivari ta ida ia hahegeregerea, unai amo Iehova ese ita ia itaia hegeregerena, ita sibona ita itaia diba. Bena lau laloa, reana Iehova ese lau ia laloa dalana be egu lalohadai amo ia idau. Matamanai, unai lalohadai lau dadaraia. Bona lau abia dae Iehova be lau ia lalokau henia lasi.

“Dina haida murinai, lau duahia siri ta ese egu mauri ia haidaua. Unai siri be Isaia 1:18, Iehova ia gwau: ‘Harihari umui mai, ita hereva hebou. Momokani, umui emui dika be bada, rara ia kakakaka momokani bamona, to lau ese umui do lau huria, vadaeni do umui goeva, sinou ia kurokuro bamona.’ Lau mamia Iehova be lau ia hereva henia noho, ia gwau, ‘Vicky e, mani ita hereva hebou. Oi lau diba, emu kara dika lau diba, emu kudouna lau diba—⁠bona oi lau lalokau henia.’

“Unai hanuaboi ai lau mahuta lasi. Lau do abia dae lasi Iehova be lau ia lalokau henia, to Iesu ena mauri davalaia boubou lau lalohadailaia matamaia. Bena sibona dekenai lau gwau, Iehova be lagani momo lalonai ia haheauka bona dala idauidau ai ia hahedinaraia ia be lau ia lalokau henia. To unai be hegeregere lau be ia dekenai lau gwau: ‘Lau ese emu lalokau lau do mamia lasi. Emu Natuna ena boubou gauna ese egu dika ia huria oho diba lasi.’ Unai be hegeregere lau ese unai mauri davalaia boubouna be Iehova dekenai lau negea lou bamona. To hari, mauri davalaia boubouna lau laloa dobu dainai, Iehova ena lalokau lau mamia.”