Edena Dala ai Egu Natudia Lau Durua​​—Aonega Momokani Idia Abia Totona?

NATUNA hadibaia karana be laolao ta bamona, mai ena moale bona mai ena hekwarahi danu. Oi bona emu natudia ese unai laolao do umui karaia hebou. Idia oi hagoadaia bona mai lalokau ida oi hakaudia, bona oi durudia mauri ena dala dekenai idia raka totona. Natudia ese gau momo idia dibaia be namo!

Natudia be edia mauri lalonai idia moale bona idia kwalimu totona, namona be kara maoromaoro idia badinaia bona edia hetura karana Dirava ida idia hagoadaia. Unai amo maoro bona kerere edia toana do idia diba. Bema Iehova idia dibaia bona idia lalokau henia, idia ese anina namona do idia havaraia bona idia abia dibana be do ia noho hanaihanai. Tama sina e, umui be mai emui maduna badana emui natudia ese idia dibaia gaudia edia anina idia lalopararalaia bona idia abia dae karana dekenai.

Inai laolao lalonai, tama bona sina ese hekwakwanai do idia davaria danu. Ma haida ese natudia edia lalona idia veria haraga diba, bona taunimanima ma haida amo kara dikadia idia dibaia diba. Ita be Satani Diabolo ese ia gunalaia tanobadana ai ita noho. (1 Ioane 5:​19) Ia be iseda natudia hadibaia karana ia laloa danu, to ena ura be idau. Satani be mai ena diba momo tisa tauna ta​​—to ia be tisa dikana. Ena be “diari aneruna” ta bamona ia hedinarai, to ena hadibaia daladia be koikoi bona Iehova ena Hereva bona ura hegeregerena lasi. (2 Korinto 4:4; 11:14; Ieremia 8:9) Diabolo bona ena demoni be sibona laloa bada, koikoi, bona matabodaga karadia idia diba momo taudia.​​—1 Timoteo 4:1.

Emu natudia be Satani ena amo oi gimadia totona, dahaka do oi karaia be namo? Edena bamona oi hadibadia mai anina bada gaudia idia dogoatao auka totona? Gau badana be, sibona emu kara oi tahua namonamo. Haheitalai namona oi hahedinaraia be namo. Danu, natudia hadibaia maduna oi huaia namonamo bona nega oi atoa unai oi karaia totona. Unai ita do herevalaia lasi neganai, namona be aonega momokani ena badina ita tahua guna.

Aonega Momokani Ena Badina

King Solomona, Israela ena aonega bada tauna amo gau haida ita dibaia. Baibel ese ita ia hamaoroa: “Dirava ese aonega bona diba bada herea Solomona dekenai ia henia, bona laloa dobu ena diba momo danu ia henia, kone ena miri idia momo bamona. Unai dainai, Solomona ena aonega ese dina daekau kahana taudia ibounai edia aonega bona Aigupito ena aonega ibounai ia hereaia.” Danu, “Solomona ese aonega hereva kwadogidia ibounai 3000 ia torea, bona ane ibounai 1000 mai kahana ia karaia.” Ia ese tubutubu gaudia bona animal edia mauri dalana ia diba momo. (1 King Taudia 4:​29-​34) King Solomona ese Israela dekenai ruma idauidau ia haginia, bona danu Ierusalema dekenai Iehova ena dubu helagana ia haginia.

Solomona ena toretore, hegeregere Hadibaia Tauna bukana lalonai, ia hahedinaraia ia be taunimanima edia kara ia lalopararalaia namonamo. Dirava ena siahu ia abia dainai, ia ese aonega momokani ena badina ia gwauraia hedinarai diba. Solomona ia gwau Iehova gari henia karana be aonega dalana. Ia gwau: “Lohiabada gari henia kara be aonega ena hamatamaia dalana, bona bema Helaga Dirava oi diba neganai, laloa kehoa oi davaria vadaeni inai.”​​—Aonega Herevadia 1:7; 9:​10.

Bema Dirava ita gari henia, anina be Ia ita matauraia bona ita ura lasi Ia ita habadua. Ita laloparara Iehova be Atai Momokani Diravana bona ita be Ia henunai ita noho. Taunimanima idia laloa ita ia naria tauna ita dadaraia be aonega karana, to “inai tanobada ena aonega be kavakava, Dirava ena vairana dekenai.” (1 Korinto 3:​19) ‘Dirava dekena amo ia mai aonega’ be emu natudia dekenai oi hadibaia be namo.​​—Iamesi 3:​15, 17.

Iehova habadua garina ita gari bona Ia ita lalokau henia karana be nega tamona ita hakapua hebou be namo. Iehova ia ura ena hesiai taudia ese Ia idia lalokau henia bona gari henia. Mose ia gwau: “Israela taudia e, kamonai namonamo! Lohiabada, iseda Dirava ena oda hereva umui dekenai, do umui kamonai henia. Gauna be inai: Lohiabada emui Dirava do umui gari henia, bona iena dala ibounai do umui raka. Lohiabada emui Dirava do umui lalokau henia, bona iena hesiai gaukara do umui karaia, mai emui lalona ibounai, bona mai emui lauma ibounai. Ma Lohiabada ena oda bona ena Taravatu ibounai, lau ese umui hanamoa totona hari dina lau gwauraia gaudia, do umui badinaia.”​​—Deuteronomi 10:​12, 13.

Iehova gari henia karana be iseda natudia dekenai ita hadibaia loulou neganai, ita ese idia dekenai diba namona ita henia aonega momokani idia abia totona. Natudia ese Dirava gari henia karana idia habadaia noho neganai, edia Havaraia Tauna, diba momokani ena Badina do idia laloa bada. Unai ese do ia durudia idia dibaia gaudia edia anina do idia diba namonamo, unai amo lalohadai kereredia do idia abia lasi. Bona “maoro bona kerere edia toana idia diba namonamo.” (Heberu 5:​14) Danu, Dirava gari henia karana ese idia do ia durua idia manau bona dika idia dadaraia totona.​​—Aonega Herevadia 8:​13; 16:6.

Emu Natudia be Oi Idia Itaia Noho!

To, edena dala ai iseda natudia ita durua Iehova idia lalokau henia bona idia gari henia totona? Unai henanadai ena haere be, Iehova ese Israela taudia totona Mose dekenai ia henia Taravatuna lalonai do ita davaria. Iehova ese tama sina ia hamaorodia: “Lohiabada oiemu Dirava do oi lalokau henia, mai oiemu kudouna ibounai, mai oiemu lauma ibounai, bona mai oiemu goada ibounai danu. Inai Taravatu, hari dina umui dekenai lau henia gaudia do umui laloaboio lasi. Umui emui natudia dekenai inai Taravatu do umui hadibaia goada, ruma dekenai umui noho neganai, bona dala dekenai umui raka neganai. Bona umui hekure noho, o umui gaukara noho neganai, inai Taravatudia do umui herevalaia.”​​—Deuteronomi 6:​5-7.

Unai siri ese tama sina dekenai mai anina bada gaudia haida ia hadibaia. Ta be inai: Oi be tama o sina ta dainai, haheitalai namona oi hahedinaraia be gau badana. Emu natudia dekenai Iehova lalokau henia karana oi hadibaia totona, namona be oi ese Dirava oi lalokau henia bona iena hereva oi laloa bada. Dahaka dainai unai be mai anina bada? Badina natudia hadibaia karana be oiemu maduna badana. Oiemu haheitalai amo idia dibaia gaudia ese idia do ia durua bada. Natudia edia mauri lalonai, tama sina edia haheitalai be mai anina bada.

Oiemu ura gaudia, oiemu lalohadai, bona oi laloa bada gaudia be emu hereva sibona amo lasi, to emu kara amo idia hedinarai danu. (Roma 2:​21, 22) Natudia idia maragi neganai, edia tama sina edia kara idia itaia bona unai amo diba idia abia. Natudia be tama sina ese idia laloa bada gaudia idia itaia, bona idia danu be unai gaudia idia laloa bada. Bema oi be Iehova oi lalokau henia momokani, emu natudia ese unai do idia itaia. Hegeregere, do idia itaia Baibel duahiduahi bona stadi karana be mai anina bada oi dekenai. Bona danu do idia itaia, oiemu mauri lalonai Basileia gaudia oi atoa guna. (Mataio 6:​33) Keristani hebou oi lao henidia bona Basileia harorolaia gaukarana oi karaia hanaihanai dainai, emu natudia ese do idia itaia Iehova ena gaukara helagana be mai anina bada oi dekenai.​​—Mataio 28:​19, 20; Heberu 10:​24, 25.

Emui Maduna Umui Huaia

Tama sina ese Deuteronomi 6:​5-7 dekenai idia dibaia gauna ma ta be inai: Oi be mai emu maduna emu natudia oi hadibaia totona. Idaunegai, Israela tama sina ese natudia idia hadibaia. Keristani taudia ginigunadia edia negai, tama sina ese natudia idia hadibaia. (2 Timoteo 1:5; 3:​14, 15) Aposetolo Paulo ese Keristani taudia ia tore henidia neganai, tama ia herevalaia, namona be ‘Lohiabada ena hadibaia hereva [edia natudia] dekenai do idia hadibaia.’​​—Efeso 6:4.

Hari inai negai, moni gaukara, bona gau idauidau ma haida ese tama sina edia nega idia abia dainai, natudia hadibaia maduna be sikuli tisa ese idia huaia. To, ta ese lalokau tama o sina ena gabu ia abia diba lasi. Tama o sina be mai anina bada edia natudia edia mauri lalonai. Bema heduru oi ura, namona be abia hidi namona oi karaia, to emu maduna be ma haida dekenai oi henia lasi.

Emu Natudia Oi Hadibaia Totona Nega Oi Atoa

Tama sina ese Deuteronomi 6:​5-7 dekenai idia dibaia gauna ma ta be inai: Natudia idia hadibaia totona nega do idia atoa bona do idia hekwarahi. Israela tama sina ese natudia dekenai Dirava ena hereva momokani idia “hadibaia” be namo. Heberu gado ai inai hereva “hadibaia” ena anina be “gwauraia loulou.” Oibe, Israela tama sina be unai bamona do idia karaia, daba ela bona adorahi, ‘ruma dekenai idia noho neganai’ bona ‘dala dekenai idia raka neganai.’ Namona be nega oi atoa bona oi hekwarahi emu natudia oi hadibaia totona, unai amo edia lalohadai bona kara amo Dirava do idia hamoalea.

Unai dainai, dahaka oi karaia diba emu natudia oi durua idia aonega momokani totona? Gau momo do oi karaia. Oi hadibadia Iehova idia lalokau henia bona gari henia totona. Haheitalai namona oi hahedinaraia. Natudia hadibaia ena maduna oi huaia, bona oi hadibadia totona nega oi atoa. Oi be goevadae lasi, bona unai laolao lalonai kerere haida do oi karaia danu. To, bema mai emu kudouna ibounai ida Dirava ena ura oi karaia, emu natudia ese emu hekwarahi do idia abia dae bona namo do idia davaria. Aonega Herevadia 22:6 ia gwau: “Mero dekenai mauri dala maorona do oi hadibaia, vadaeni ia buruka neganai, unai dala do ia rakatania lasi.” Kekeni dekenai unai hakaua herevana be mai anina bada danu.

Diba abia karana be iseda mauri ibounai lalonai ita karaia gauna. Bema oi bona emu natudia ese Dirava umui lalokau henia, inai laolao do umui moalelaia ela bona hanaihanai. Unai be momokani, badina Iehova ita dibaia bona ena ura ita karaia dalana dekenai diba ma haida ita abia karana be do ia ore diba lasi.​​—Hadibaia Tauna 3:​10, 11.

[Picture on page 15]

Emu natuna dekenai Baibel oi duahia, a?

[Picture on page 16]

Nega oi atoa emu natuna dekenai Havaraia Tauna ena sivarai oi hadibaia totona