Baibel ese Taunimanima Edia Mauri Ia Haidaua

Dahaka ese guna hehuni dalana ai daimon ia hoihoilaia, bona ena gaukara biaguna amo ia henaohenao hahinena ta ia durua mai momokani ida ia gaukara totona? Nega rua ia ura sibona ia hamasea toho hahinena ta be dahaka ese ia durua, mauri ena badina korikori ia lalopararalaia totona? Edena dala ai inuinu kekero bona drag ania momo tauna ta be ena mauri ia haidaua? Mani edia hereva oi laloa.

INAI HAHINE

LADANA: MARGARET DEBRUYN

MAURI LAGANI: 45

TANO: BOTSWANA

GUNA: HEHUNI DALANA AMO KOHU IA HOIHOILAIA BONA IA HENAOHENAO

EGU MAURI GUNANA: Egu tamana be Germany tauna, to South-West Africa (hari idia gwauraia Namibia) dekenai ia noho. Egu sinana be Botswana hahinena, Mangologa iduhuna amo ia mai. Lau be Namibia ena taoni, Gobabis dekenai lau vara.

Lagani 1970 murinai, South Africa ena gavamani ese Namibia ia biagua bona taoni bona hanua lalonai idia noho taudia ibounai dekenai taravatu idia atoa, bese idauidau taudia do idia adavaia lasi totona. Egu tamana bona sinana be bese idaudia rua amo idia mai dainai, gavamani ese idia ia doria edia headava idia utua totona. Unai dainai, egu sinana be lau, egu kakadia bona tadidia ia abia bona Ghansi, Botswana dekenai ai giroa lou.

Lagani 1979 ai, lau be Botswana ena taoni, Lobatse dekenai lau lao bona unuseniai egu ubua tama sina ida lau noho, egu sikuli lau haorea totona. Gabeai, motuka hanamoa gabuna ta ena opesi dekenai lau gaukara. Egu mauri lalonai lau abia dae Dirava ese taunimanima ia durua lasi, unai dainai gau ibounai​​—⁠herevana unai be maoro o kerere​​—⁠lau karaia lau sibona bona egu ruma bese naria totona.

Dagi bada gaukarana lau karaia dainai, egu gaukara gabuna dekenai motuka kohudia lau henaoa. Hanuaboi ai trein ta be taoni dekenai ia mai neganai, lau bona egu turadia be unai trein dekenai ai guia bona ai davaria gaudia ai henaoa sibona. Danu, lau be hehuni dalana amo daimon, golo bona kopa lau hoihoilaia. Lau be drag lau ania matamaia, lau dagedage, bona lau tura henidia memero be momo.

Lagani 1993 ai, egu henaohenao karana dainai, gaukara amo lau idia hadokoa. Egu turadia ese lau idia rakatania, badina idia laloa gaukara biaguna ese gaukara amo idia do ia hadokoa danu. Edia kara dainai lau lalohisihisi bona lau laloa ta do lau tura henia lou lasi.

BAIBEL ESE EGU MAURI IA HAIDAUA DALANA: Lagani 1994 ai, Iehova ena Witnes taudia edia misinari rua, Tim bona Virginia lau hedavari henia. Egu gaukara gabuna matamatana dekenai lau idia hereva henia bona egu dina tubua aniani negadia ai, lau idia durua Baibel lau dibaia totona. Gabeai, lau diba idia be tura namodia neganai, idia lau boiria egu ruma dekenai Baibel ai herevalaia totona.

Lau laloparara bema lau ura Dirava lau hamoalea, namona be egu mauri lalonai gau haida lau haidaua. Hegeregere, 1 Korinto 6:​9, 10 ena hereva amo lau diba “lebulebu taudia, . . . o henaoa taudia, o mataganigani taudia, o kekero taudia, o edia hereva dekenai haida idia hadikaia taudia, o haida edia gau idia dadia taudia. Inai bamona taudia ta lasi be Dirava ena Basileia do ia davaria diba.” Metairametaira egu kara dikadia lau rakatania. Henaohenao karana lau hadokoa. Lau maragi negana amo lau bamoa raskol taudia lau bamoa lou lasi. Bona Iehova ese lau ia durua dainai lau tura henia memero lau rakatanidia.

NAMO LAU DAVARIA DALANA: Lau hekwarahi kerere ta ia vara neganai, lau badu haraga lasi bona egu natudia dekenai mai badu ida lau boiboi lasi totona. (Efeso 4:​31) Lau hekwarahi maino dalanai lau hereva totona. Unai bamona herevahereva hebou karana ese anina namona ia havaraia, bona emai ruma bese ia hatamonaia.

Egu tura gunadia bona dekena taudia be lau idia abidadama henia diba. Hari, lau be lau henaohenao lasi bona mai momokani ida kohu lau naridia namonamo bona moni lau gaukaralaia namonamo. Danu, moni dalanai lau hegeregere dainai tauanina durua gaudia lau abia diba bona nega bada lau gaukaralaia ma haida lau durua Baibel idia dibaia totona. Mai egu kudouna ibounai ida Aonega Herevadia 10:22 ena hereva lau abia dae, ia gwau: “Lohiabada ena hanamoa sibona ese, kohu momo oi dekenai ia henia noho, bona unai kohu danu, ese lalohisihisi sisina oi dekenai do ia henia lasi.”

INAI HAHINE

LADANA: GLORIA ELIZARRARÁS DE CHOPERENA

MAURI LAGANI: 37

TANO: MEXICO

GUNA: SIBONA IA HAMASEA TOHO

EGU MAURI GUNANA: Lau be Naucalpan, Mexico ena taga bada gabuna ta dekenai lau tubu daekau. Lau maragi neganai lau gwau-edeede momo bona lau ura dikadika pati gabudia dekenai lau lao. Egu mauri lagani be 12 neganai kuku lau ania matamaia, mauri lagani 14 neganai kekero muramura lau inua matamaia, bona mauri lagani be 16 neganai drag lau ania matamaia. Lagani haida murinai egu ruma bese lau rakatania. Egu turadia momo be edia tama sina ese idia botaia eiava idia hereva dika henia dainai, edia ruma bese maurina be namo lasi. Lau mamia egu mauri be anina lasi dainai nega rua sibona lau hamasea toho.

Egu mauri lagani be 19 neganai, dabua idauidau edia toana haheitalaia gaukarana (model) lau karaia. Unai dainai, lau be politikol bona moale karadia idia karaia bisinesi taudia lau bamoa. Gabeai lau headava bona natudia lau havaraia, to ruma bese lalonai abia hidi ibounai be lau ese lau karaia. Kuku lau ania, lau inuinu kekero bona pati gabudia dekenai lau lao momo. Lau hereva neganai hereva mirodia bona hevaseha hereva mirodia momo lau gwauraia. Bona danu lau badu momo.

Lau tura henia taudia momo be unai bamona. Egu turadia vairanai, toana be egu mauri lau moalelaia. To, lau moale lasi bona lau mamia egu mauri be anina lasi.

BAIBEL ESE EGU MAURI IA HAIDAUA DALANA: Lagani 1998 ai, Iehova ena Witnes taudia ida Baibel ai herevalaia matamaia. Baibel amo lau diba mauri be mai ena badina korikori. Lau dibaia gauna be, Dirava ese tanobada be Paradaiso ai do ia halaoa, mase taudia do ia hatorea isi lou, bona unai nega ai mauri namona lau moalelaia diba.

Lau dibaia gauna ma ta be, Dirava lau lalokau henia totona, namona be ena taravatu lau badinaia. (1 Ioane 5:⁠3) Unai lau karaia be auka badina guna lau ura lasi ta ena hereva lau badinaia. To, gabeai lau abia dae lau sibona ese egu mauri lau biagua diba lasi. (Ieremia 10:23) Iehova lau guriguri henia lau do ia hakaua totona. Ia lau noia lau do ia durua iena hakaua herevadia lau badinaia bona egu natudia do lau hadibaia egu mauri gunana idia badinaia lasi totona.

Egu mauri lalonai gau haida lau haidaua be auka, to Efeso 4:​22-​24 ai ia noho hakaua herevana lau badinaia, ia gwau, ‘Mauri gunana be dabua gunana bamona do oi kokia. . . . Mauri matamata do oi atoa, dabua matamata oi atoa bamona. Inai mauri matamata dainai, emu toana be Dirava ena toana bamona, ia ese ia karaia gauna. Inai mauri matamata ena kara be maoromaoro, helaga bona momokani.’ Unai mauri matamata lau badinaia totona, kuku ania karana lau hadokoa bona hereva mirodia gwauraia lasi karana lau manadalaia be namo. Lagani toi bamona lalonai egu mauri lau haidaua, unai amo bapatiso lau abia bona Iehova ena Witnes hahinena ta ai lau lao.

Bona danu, lau be sinana bona headava hahinena dainai, egu maduna ruma bese lalonai lau laloa bada. Petero Ginigunana 3:​1, 2 ai ia noho hakaua herevana lau badinaia, ia gwau: “Hahine taudia e, emui adavana do umui kamonai henia. Badina be idia haida ese Dirava ena hereva idia badinaia lasi, to bema kara namodia umui karaia, bona umui emui hereva be momo lasi neganai, sedira do idia laloa namonamo. Vadaeni sedira edia lalona do idia giroa, bona Dirava do idia abidadama henia. Unai bamona do idia karaia, badina be emui kara goevagoeva, bona emui mataurai kara do idia itaia dainai.”

NAMO LAU DAVARIA DALANA: Iehova lau tanikiu henia badina hari lau diba mauri be mai ena anina. Lau mamia lau be hahine namona ai lau lao bona egu natudia be dala maorona ai lau hadibaia. Nega haida egu kara gunadia dainai egu kudouna ese lau ia kota henia bamona, to Iehova be egu kudouna ia diba. (1 Ioane 3:​19, 20) Momokani, egu mauri lalonai Baibel ena hakaua herevadia lau badinaia dainai, lau idia hadikaia diba gaudia amo lau idia gimaia bona lau dekenai lalomaino ia henia.

INAI TAU

LADANA: JAILSON CORREA DE OLIVEIRA

MAURI LAGANI: 33

TANO: BRAZIL

GUNA: INUINU KEKERO BONA DRAG IA ANIA MOMO

EGU MAURI GUNANA: Lau be Brazil ena taoni ta, Bagé dekenai lau vara, unai taoni be Brazil bona Uruguay edia tano hetoana kahirakahira ai ia noho bona taunimanima 100,000 mai kahana idia noho. Unai gabu taudia edia gaukara badadia be uma idia karaia bona boromakau idia naria. Lau be ogogami bona dagedage momo gabuna dekenai lau tubu daekau, bona unai gabu dekenai matamata taudia momo be idia inuinu kekero bona drag idia ania momo.

Sikuli lau haorea murinai, lau inuinu matamaia, mariuana lau ania, bona rok miusiki dikadia lau kamonai momo. Lau laloa Dirava ia noho lasi. Lau laloa tanobada dekenai idia vara hisihisi bona hekwakwanai ese idia hamomokania Dirava ia noho lasi.

Lau be gita lau gadaralaia bona ane lau torea tauna bona nega momo Apokalupo bukana ena hereva lau duahia. Egu miusiki gadaralaia oreana ia namo lasi dainai, drag dikadia lau ania matamaia. Lau laloa lasi bema unai drag ania karana amo do lau mase. Lau ura henia ane abia taudia momo be unai dala amo idia mase.

Drag lau hoia totona, egu tubuna, lau ia naria hahinena amo moni lau abiatorehai. Egu tubuna hahine ese moni lau abiatorehai ena badina ia henanadailaia neganai, hereva koikoidia lau gwauraia. Unai dika ia habadaia gauna be, meamea karadia lalonai lau vareai. Bona lau laloa unai kara ese egu ane torea dalana do ia hanamoa.

BAIBEL ESE EGU MAURI IA HAIDAUA DALANA: Iehova ena Witnes taudia ida Baibel ai herevalaia bona hebou lau lao henia matamaia neganai, egu kara bona lalohadai lau haidaua matamaia. Gabeai, lau ura egu mauri lau moalelaia. Unai bamona lau laloa dainai, egu huina latana lau utua kwadogi. Lau moale lasi bona lau gwau-edeede dainai, egu huina lau halataia. Gabeai lau laloparara Dirava ese lau ia lalonamo henia totona, kekero muramura lau rakatania, drag ania karana bona kuku ania karana lau hadokoa be namo. Danu, lau itaia lau ura henidia miusiki lau haidaua be namo.

Nega ginigunana Iehova ena Witnes taudia edia hebou ta dekenai lau lao neganai, haba dekenai Baibel ena hereva ta lau itaia. Unai be Aonega Herevadia 3:​5, 6, ia gwau: “Lohiabada do oi abidadama henia, mai emu kudouna ibounai. Oi sibona oiemu diba do oi abidadama henia lasi. Oi karaia gaudia ibounai lalonai, Lohiabada do oi laloa, vadaeni ia ese dala maorona, be oi dekenai do ia hadibaia.” Unai siri lau laloa neganai, lau laloparara bema Iehova lau abidadama henia, lau do ia durua egu mauri lau haidaua totona.

Kekero muramura, drag bona kuku ania karana lau hadokoa be auka, ia be egu imana lau utua oho bamona. (Mataio 18:​8, 9) Lau diba metairametaira unai gaudia lau haidaua be auka. Unai dainai egu kara dikadia ibounai lau haidaua. Danu, egu mauri dikana lau badinaia lou lasi totona, guna lau lao henia gabudia lau lao lasi bona lau tura henia taudia lau bamoa lou lasi.

Dina ta ta ai lau karaia gaukaradia lau haorea dainai, lau moale bona lau lalometau momo lasi. Lau mamia bema tauanina dalanai bona kara ai lau goeva, unai ese lau do ia durua Iehova ida lau hetura namonamo totona. Iehova lau guriguri henia lau do ia durua egu kara gunadia lau laloa lasi, to vaira negana lau laloa noho totona. Nega haida egu kara gunadia lau karaia lou. Herevana nega haida lau inuinu kekero, to lau ura egu hadibaia tauna ida Baibel ai herevalaia.

Baibel ena hereva momokani​​—⁠Dirava ese ita ta ta ia laloa bada, tomadiho koikoi do ia haorea, bona hari tanobada hegegemadai haroro gaukarana ia durua karana⁠​—⁠lau diba neganai lau laloparara unai be hereva momokani. (Mataio 7:​21-​23; 24:14; 1 Petero 5:​6, 7) Unai dainai, Iehova dekenai egu mauri lau gwauhamatalaia. Lau totona ia karaia gau namodia ibounai dainai lau ura Ia lau tanikiu henia bada.

NAMO LAU DAVARIA DALANA: Hari lau mamia egu mauri be mai ena anina. (Hadibaia Tauna 12:13) Bona egu ruma bese lau durua bona idia lau hametaua lasi. Baibel amo lau dibaia gaudia be egu tubuna dekenai lau herevalaia, bona ia danu Iehova dekenai ena mauri ia gwauhamatalaia. Egu ruma bese taudia haida bona egu miusiki gadaralaia orea gunana tauna ta be Iehova dekenai edia mauri idia gwauhamatalaia.

Hari lau headava vadaeni, bona lau bona egu adavana be nega bada ai gaukaralaia ma haida ai durua Baibel idia dibaia totona. Lau mamia lau be hahenamo momo lau davaria badina lau diba, ‘Iehova lau abidadama henia mai egu kudouna ibounai ida’ be gau badana.

[Blurb on page 29]

“Lau ura egu mauri lau moalelaia”