Emui Natudia Hadibaia
Iosaia be Kara Maoromaoro Ia Badinaia
OI LALOA kara maoromaoro oi karaia be auka, a?a— Bema oi gwau oibe, taunimanima momo be unai bamona idia laloa danu. Taunimanima badadia danu ese kara maoromaoro idia karaia be auka. Iosaia ese abia hidi maorona ia karaia be auka ena badina mani ita itaia. Ia be edena bamona tauna?—
Iosaia be Amona, Iuda ena king ta ena natuna. Amona ena mauri lagani be 16 neganai, Iosaia ia vara. Amona be ena tamana, King Manase bamona, kara dika bada ia karaia. Momokani, unai lohia tauna dikana Manase, be lagani momo lalonai ia lohia. To, daudau lasi murinai Asuria ena tuari taudia ese idia dogoatao bona dibura tauna bamona Babulonia dekenai idia abia lao. Dibura ruma ai ia noho neganai, Iehova ia noia ena dika ia gwauatao totona, bona Iehova ese ena dika ia gwauatao.
Manase idia ruhaia neganai, Ierusalema dekenai ia giroa lou bona king dagina ia abia lou. Maoromaoro ena kara kerere gunadia ia hamaoromaoroa bona taunimanima ia durudia Iehova idia hesiai henia totona. Manase ena natuna Amona be iena haheitalai namona ia tohotohoa lasi neganai, reana ia lalohisihisi bada. Unai neganai Iosaia ia vara vadaeni. Manase be ena tubuna Iosaia danu ia noho ena daudau be Baibel ese ia gwauraia lasi. To oi laloa Manase ia gaukara goada Iosaia ia durua Iehova ia hesiai henia totona, a?—
Iosaia ena mauri lagani be 6 neganai, Manase ia mase, bona ena tamana, Amona be king ai ia lao. Amona be lagani rua sibona ia lohia, bena ena hesiai taudia ese idia hamasea. Unai dainai Iosaia ena mauri lagani be 8 neganai, Iuda ena king ai ia lao. (2 Sivarai, karoa 33) Unai negai dahaka ia vara? Iosaia be ena tamana Amona ena haheitalai dikana ia tohotohoa, a? Eiava ena tubuna Manase ena haheitalai namona ia tohotohoa, a?—
Ena be Iosaia be mero matamata, to ia ura dikadika Iehova ia hesiai henia. Unai dainai, Iehova idia lalokau henia taudia ia kamonai henia, to ena tamana ena turadia edia hereva ia kamonai henia lasi. Ena be Iosaia ena mauri lagani be 8, to ia diba Dirava idia lalokau henia taudia ia kamonai henia be maoro. (2 Sivarai 34:1, 2) Oi ura Iosaia idia hadibaia bona ia dekenai haheitalai namona idia hahedinaraia taudia haida oi diba, a?—
Peroveta tauna Sepanaia be Iosaia dekenai haheitalai namona ia hahedinaraia tauna ta. Sepanaia be Iosaia ena varavara ta, reana Manase ena tamana, King Hesekaia ena tubuna ta. Iosaia ia lohia matamaia negana ai, Sepanaia ese Baibel bukana Sepanaia ia torea. Unai buka lalonai ia ese kara maoromaoro idia badinaia lasi taudia dekenai do ia vara dika ia gwauraia, bona Iosaia be unai sisiba ia badinaia.
Haheitalai namona ia hahedinaraia tauna ma ta be Ieremia, reana iena sivarai oi kamonai vadaeni. Ieremia bona Iosaia be mero matamatadia bona gabu tamona dekenai idia tubu daekau. Iehova ese ena lauma helaga amo Ieremia ia hasiahua dainai, Baibel buka Ieremia ia torea. Iosaia be tuari lalonai ia mase neganai, Ieremia ia lalohisihisi bada bona unai lalohisihisi herevadia be ane ta dekenai ia torea. (2 Sivarai 35:25) Mani ita laloa, idia ruaosi be idia hagoadaia heheni Iehova idia hesiai henia noho totona!
Iosaia ena sivarai oi stadilaia neganai, dahaka oi dibaia?— Bema Iosaia bamona, oi emu tamana be Iehova ia hesiai henia lasi, oi laloa ma ta ese oi ia durua diba Dirava oi dibaia totona, a? Reana unai be emu sinana, emu tubuna o varavara ta. Reana ia be Iehova ia hesiai henia tauna ma ta, bona emu sinana ese gwaumaoro ia henia oi ida Baibel ia stadilaia totona.
Herevana Iosaia be mero maragi sibona, to ia laloparara Iehova idia hesiai henia taudia ia tura henidia be gau badana. Namona be Iosaia bamona oi karaia, bona kara maoromaoro oi karaia!
[Footnote]
a Bema natuna ta ida inai kahana umui duahia hebou, des maka (–) be oi ia hadibaia oi laga-ani eiava nega oi henia natuna ia haere totona.
Henanadai:
○ Iosaia ena tamana bona tubuna edia ladadia be daika, bona idia be edena bamona taudia?
○ Iosaia ena tubuna ena mauri lalonai dahaka gaudia ia haidaua?
○ Iosaia dekenai haheitalai namona idia hahedinaraia peroveta taudia rua be daidia, bona dahaka dainai unai bamona taudia ita tura henidia be mai anina bada?
[Pictures on page 25]
Edena dala ai Sepanaia bona Ieremia ese Iosaia idia durua kara maoromaoro ia karaia totona?