Dahaka Dainai “Keriso” Ita Badinaia be Namo?
“Tau ta bema ia ura lauegu murina dekenai do ia mai, ia ese sibona dekenai do ia laloa lasi . . . lauegu murina dekenai do ia raka.”—LUKA 9:23.
1, 2. Dahaka dainai “Keriso” ita badinaia ena badina ita laloa be gau badana?
IEHOVA be ia idia tomadiho henia taudia huanai idia noho kamonai taudia matamata bona memero kekeni ia itaia neganai, ia moale bada! Baibel oi stadilaia, hanaihanai Keristani hebou dekenai oi lao, bona emu diba Baibel ena hereva momokani dekenai oi habadaia neganai, oi ese Iesu ena hereva oi abia dae: “Tau ta bema ia ura lauegu murina dekenai do ia mai, ia ese sibona dekenai do ia laloa lasi, dina ibounai iena satauro do ia abia isi, lauegu murina dekenai do ia raka.” (Luka 9:23) Iesu ia gwau sibona emu ura oi dadaraia bona ia murinai oi raka be namo. Vadaeni, “Keriso” ita badinaia ena badina ita laloa be gau badana.—Mat. 16:13-16.
2 Iesu Keriso ena aena gabudia dekenai ita raka vadaeni taudia be edena bamona? Baibel ese ita ia hagoadaia unai kara ita habadaia noho totona. (1 Tes. 4:1, 2) Herevana ita be vanegai sibona hereva momokani ita abia dae eiava lagani momo lalonai hereva momokani ai ita noho, to Keriso ita badinaia ena badina idauidau ita laloa neganai, iseda mauri lalonai Paulo ena sisiba do ita abia dae bona Iesu do ita badinaia noho. Namona be Keriso ita badinaia ena badina faiv ita herevalaia.
Iseda Hetura Karana Iehova Ida
3. Edena dala rua ai Iehova ita dibaia?
3 Paulo be Areo Ororo dekenai Atena taudia ia hereva henia neganai, ia gwau: “[Dirava] sibona ese edia nega, bona edia tano hetoa maka ia gwauraia guna. Inai bamona ia karaia, Dirava do idia tahua totona, bona sedira idia tahua noho neganai do idia davaria. To momokani, Dirava be daudau lasi ita ta ta dekenai.” (Kara 17:22, 26, 27) Dirava ita tahua noho neganai, Ia do ita dibaia namonamo. Hegeregere, Dirava ese ia havaraia gaudia ita itaia bona laloa dobu neganai, Dirava ena kara badadia do ita dibaia. (Roma 1:20) Danu Baibel lalonai Iehova be ena kara ia hahedinaraia. (2 Tim. 3:16, 17) Bema ‘iena gaukara ita laloa dobu’ bona ‘iena siahu karadia ita laloa,’ Iehova do ita dibaia namonamo.—Sal. 77:12.
4. Edena dala ai Keriso badinaia karana ese ita ia durua Dirava ita tura henia namonamo totona?
4 Iehova ida ita hetura dalana namona ta be Keriso ita badinaia. “Tanobada ia do noho lasi neganai,” Iesu be iena Tamana ida ia noho! (Ioa. 17:5, NW ) “Ia be Dirava ia karaia gaudia ena badina momokani.” (Apok. 3:14) “Dirava ia havaraia gaudia ibounai amo ia be ginigunana” dainai, lagani momo lalonai ena Tamana, Iehova ida guba ai ia noho. Iesu be tanobada dekenai ia do mai lasi neganai, ena Tamana ida gau momo idia karaia hebou. Ia be Siahu Ibounai Diravana ena turana namona, mai moale ida idia gaukara hebou, bona iena Tamana ia lalokau henia bada. Iesu be iena Tamana ena hemami, kara bona ia karaia gaudia ia itaia sibona lasi, to iena Tamana amo ia dibaia gaudia ia abia dae bona ia badinaia. Unai kamonai Natuna be iena Tamana bamona—unai dainai Baibel ia gwau ia be “Dirava ena toana hegeregerena.” (Kol. 1:15, NW ) Keriso ita badinaia neganai, Iehova ita tura henia namonamo diba.
Iehova Ita Tohotohoa
5. Dahaka ese ita do ia durua Iehova ita tohotohoa totona, bona dahaka dainai?
5 Dirava ese ‘ita ia karaia iena toana bona laulau hegeregerena,’ unai dainai Dirava ena kara namodia ita hahedinaraia diba. (Gen. 1:26) Aposetolo Paulo be Keristani taudia ia hagoadaia: “Dirava ena kara bamona do umui karaia be namo.” (Efe. 5:1) Keriso ita badinaia karana ese ita ia durua iseda guba Tamana ita tohotohoa totona. Badina Iesu ese Dirava ena lalohadai, hemami bona kara ia hahedinaraia goevagoeva, bona ia ese Iehova ia herevalaia namo herea. Iesu be tanobada ai ia noho neganai, ia be Iehova ena ladana ia hadibaia sibona lasi. To, Iehova ena kara ia hahedinaraia danu. (Mataio 11:27 duahia.) Iesu be ena hereva bona kara, hahediba herevadia bona haheitalai amo Iehova ia hahedinaraia.
6. Edena dala ai Iesu ena hahediba herevadia ese Iehova ena lalohadai ia hahedinaraia?
6 Iesu be ena hadibaia herevadia amo ia hahedinaraia, Dirava ia ura dahaka ita karaia bona Iehova be ia idia tomadiho henia taudia dekenai dahaka ia laloa. (Mat. 22:36-40; Luka 12:6, 7; 15:4-7) Hegeregere, Iesu be Taravatu 10 amo taravatu ta—“umui heudahanai lasi”—ia gwauraia murinai, ia hahedinaraia Iehova ena lalohadai be dahaka, bema ta be kara dika ta ia do karaia lasi to ena lalona dekenai unai kara ia laloa noho. Ia gwau: “Bema tau ta ese hahine ta do ia itaia noho matana dekenai, ela bona iena lalona dekenai do ia ura dikadika, iena kudouna dekenai unai tau be ia heudahanai vadaeni.” (Eso. 20:14; Mat. 5:27, 28) Farisea taudia ese Taravatu ta be inai bamona idia gwauraia—“emui turadia dekenai umui lalokau henia, to badu henia taudia dekenai do umui badu henia”—to Iesu be Iehova ena lalohadai ia hahedinaraia, ia gwau: “Umui dekenai idia badu henia taudia do umui lalokau henia, bona umui dekenai idia dagedage henia taudia dainai do umui guriguri.” (Mat. 5:43, 44; Eso. 23:4; Lev. 19:18) Dirava ena lalohadai, hemami bona Iena ura ita diba neganai, ita ura Iehova ita tohotohoa.
7, 8. Iesu ena haheitalai amo Iehova dekenai dahaka ita dibaia?
7 Iesu be ena kara amo iena Tamana ena kara ia hahedinaraia. Ia ese dabu taudia bona hisihisi idia davaria taudia ia hebogahisi henia, bona iena hahediba taudia ese natudia idia koua dainai ia gwau henidia edia sivarai be Evanelia bukadia ai ita duahia neganai, ita itaia Iesu be ena kara amo Iehova ena hemami ia hahedinaraia. (Mar. 1:40-42; 10:13, 14; Ioa. 11:32-35) Iesu ese ena kara amo Dirava ena kara badadia ia hahedinaraia dalana mani oi laloa. Keriso ese ia karaia hoa karadia ese idia hahedinaraia ia be mai ena siahu bada, a? To, unai siahu ia gaukaralaia lasi sibona ena namo totona o haida ia hadikaia totona. (Luka 4:1-4) Hoihoi taudia be dubu amo ia luludia karana ese iena hahemaoro karana ia hahedinaraia! (Mar. 11:15-17; Ioa. 2:13-16) Iesu ena hahediba herevadia bona hereva namodia ese taunimanima edia lalona ia veria, unai ese idia hahedinaraia iena aonega be “Solomona ia hereaia.” (Mat. 12:42) Ma haida totona Iesu ena mauri ia atoa diho dainai, “lalokau karana hereadaena” ia hahedinaraia, ani?—Ioa. 15:13, NW.
8 Dirava ena Natuna be ena hereva bona kara ibounai lalonai, ena Tamana ia tohotohoa goevagoeva, unai dainai Iesu ia gwau diba: “Lau ia itaia tauna ese egu Tamana danu ia itaia.” (Ioane 14:9-11 duahia.) Keriso ita tohotohoa neganai ita ese Iehova ita tohotohoa unai.
Iesu be Iehova ese Ia Horoa Tauna
9. Edena negai bona edena dala ai Iesu be Dirava ena Horoa Tauna ai ia lao?
9 Lagani 29 C.E. ai, Iesu ena mauri lagani be 30 bona Ioane Bapatiso dekenai ia lao neganai, ia vara gauna mani oi laloa. “Iesu ia bapatisoa, vadaeni maoromaoro, ranu dekena amo ia daekau neganai, guba be ia kehoa vadaeni, bona Iesu ese Dirava ena Lauma ia itaia, pune manu bamona ia diho, ia dekenai ia helai.” Unai nega ai ia be Keriso, o Mesia ai ia lao. Bona Iehova ese ia gwauraia hedinarai Iesu be iena Horoa Tauna, ia gwau: “Inai be lauegu Natuna, egu lalokau, lau moale bada ia dekenai.” (Mat. 3:13-17) Unai be badina namona Keriso ita badinaia totona!
10, 11. (a) Edena dala ai inai ladana “Keriso” be Iesu ia herevalaia? (b) Dahaka dainai Iesu Keriso ita badinaia noho be gau badana?
10 Baibel ai, inai dagi ladana “Keriso” be dala idauidau ai idia gaukaralaia, hegeregere Iesu Keriso, Keriso Iesu, bona Keriso. Iesu ese inai ladana “Iesu Keriso” ia gwauraia guna—Iesu ena ladana murinai Keriso idia torea. Iena Tamana ia guriguri henia neganai, ia gwau: “Mauri hanaihanai be inai: Idia ese oi Dirava momokani tamona do idia diba, bona Iesu Keriso, oi ese oi siaia tauna danu do idia diba.” (Ioa. 17:3) Unai ese ia hahedinaraia ia be Dirava ese ia siaia bona Dirava ena Horoa Tauna. Bema dagi ladana “Keriso” be ladana vairanai ia noho, hegeregere “Keriso Iesu,” unai be Iesu ena dagi ia hahedinaraia. (2 Kor. 4:5) Bema inai dagi ladana, “Keriso,” idia gaukaralaia, unai ese Iesu ia abia dagina—Mesia dagina unai—ia hahedinaraia.—Kara 2:31.
11 Herevana inai dagi ladana “Keriso” be Iesu dekenai edena bamona idia gaukaralaia, to inai mai anina bada gauna ia hahedinaraia: Ena be Dirava ena Natuna be taunimanima bamona tanobada dekenai ia mai bona iena Tamana ena ura ia karaia, to ia be tau ta o peroveta tauna ta sibona lasi; ia be Iehova ena Horoa Tauna. Namona be unai Tauna ita badinaia.
Iesu be Hahemauri Ena Dala Tamona
12. Iesu ese edena hereva be aposetolo Toma dekenai ia gwauraia bona ita dekenai be mai anina bada?
12 Iesu ena mase ia kahirakahira neganai, iena aposetolo taudia dekenai Mesia badinaia noho karana ena badina ta ia gwauraia. Iesu ia gwau ia be do ia lao bona gabu ta do ia hegaegaelaia, Toma be unai ia henanadailaia neganai, Iesu ia gwau: “Dala be lau, hereva momokani be lau, mauri danu lau. Tamana dekenai do idia lao taudia ibounai edia dala ta be lasi, lau sibona.” (Ioa. 14:1-6) Unai negai, Iesu be iena kamonai aposetolo taudia 11 ia hereva henia noho. Ia gwauhamata guba dekenai gabu ta ia karaia hegaegae idia totona, to unai hereva be mai anina bada tanobada ai mauri hanaihanai do idia abia taudia dekenai danu. (Apok. 7:9, 10; 21:1-4) Edena dala ai?
13. Iesu be “dala,” ena anina be dahaka?
13 Iesu Keriso be “dala.” Anina be, ia sibona amo Dirava ita hereva henia diba. Guriguri karana dekenai unai be mai anina bada, badina Iesu sibona amo ita guriguri neganai, ita diba momokani iseda Tamana ese iena ura hegeregerena ita noia gaudia do ia henia. (Ioa. 15:16) To, Iesu be “dala” ena badina ma ta ia noho. Kara dika dainai taunimanima be Dirava amo idia daudau. (Isa. 59:2) Iesu be ‘iena mauri ia atoa diho, taunimanima momo edia dika davana karaia totona.’ (Mat. 20:28) Unai dainai Baibel ia gwau: “Iesu ena rarana ese kara dika dekena amo ita ia huria.” (1 Ioa. 1:7) Natuna ese dala ia kehoa Dirava ida ita turana karaia totona. (Roma 5:8-10) Iesu ita abidadama henia bona ita badinaia neganai, Dirava ida ita hetura diba.—Ioa. 3:36.
14. Dahaka dainai Iesu be “hereva momokani”?
14 Iesu be “hereva momokani,” badina ia ese ia herevalaia bona karaia gaudia be momokani, to unai sibona lasi, Mesia idia perovetalaia herevadia momo be ia dekenai idia guguru. Paulo ia gwau: “Keriso be Dirava ena gwauhamata ibounai edia ‘oibe.’ ” (2 Kor. 1:20) Mose ena Taravatu lalonai “idia vara gau namodia edia laulau” be Keriso Iesu dekenai idia momokani. (Heb. 10:1; Kol. 2:17) Peroveta herevadia ibounai be Iesu idia herevalaia, bona idia hahedinaraia Iesu be Iehova ena ura lalonai dahaka do ia karaia. (Apok. 19:10) Dirava ese do ia hagugurua gaudia amo namo ita davaria totona, Mesia ita badinaia noho be namo.
15. Dahaka dainai Iesu be “mauri” ena dala?
15 Iesu be “mauri” ena dala, badina ena rara amo taunimanima ia hoidia lou bona mauri hanaihanai be harihari gauna bamona Dirava ese “Iesu Keriso iseda Lohiabada” amo ia henia. (Roma 6:23) Danu idia mase vadaeni taudia dekenai Iesu be “mauri.” (Ioa. 5:28, 29) Ma danu, ia be Hahelaga Tauna Badana dainai, lagani 1,000 lalonai do ia karaia gauna mani oi laloa. Ia ese iena Basileia henunai do idia noho taudia be kara dika bona mase amo do ia hamauridia!—Heb. 9:11, 12, 28.
16. Dahaka dainai Iesu ita badinaia noho?
16 Iesu ese Toma dekenai ia gwauraia herevana be mai anina bada ita dekenai. Iesu be dala, hereva momokani bona mauri. Ia be Dirava ese tanobada dekenai ia siaia mai, taunimanima be mauri idia abia totona. (Ioa. 3:17) Bona ta be ia amo Tamana dekenai ia lao diba. Baibel ia gwau: “Hamauria be Iesu sibona ese ia henia diba taunimanima dekenai. Badina be tanobada ibounai lalonai, ladana idauna ta Dirava ese ia henia lasi, ita do ia hamauria totona.” (Kara 4:12) Unai dainai herevana iseda mauri be edena bamona, aonega karana be Iesu ita abidadama henia, ita badinaia, bona mauri hanaihanai do ita abia.—Ioa. 20:31.
Keriso Ita Kamonai Henia Ena Hahegani
17. Dahaka dainai Dirava ena Natuna ita kamonai henia be mai anina bada?
17 Petero, Ioane, bona Iamesi be Iesu ena toana ia idau karana idia itaia. Unai nega ai, guba amo gado ta idia kamonai: “Inai be lauegu Natuna, lau abia hidi tauna, iena hereva do umui kamonai.” (Luka 9:28, 29, 35) Mesia kamonai henia ena hahegani ita badinaia be mai anina bada.—Kara 3:22, 23 duahia.
18. Edena dala ai Iesu Keriso ita kamonai henia diba?
18 Iesu ita kamonai henia dalana ta be, ‘iseda matana be ia dekenai ita negea lao’ bona iena kara ita laloa namonamo. (Heb. 12:2, 3) Unai dainai, Baibel bona “hesiai tauna mai ena kamonai, bona mai ena kara maoromaoro” ese ia halasia buka ai iena sivarai ita duahia neganai, “do ita dogoatao bona badinaia.” (Heb. 2:1; Mat. 24:45) Ita be Iesu ena mamoe dainai, namona be ia ita kamonai henia bona ena murinai ita raka.—Ioa. 10:27.
19. Dahaka ese ita do ia durua Keriso ita badinaia noho totona?
19 Herevana ita dekenai dahaka ia vara, to Keriso do ita badinaia noho, a? Oibe, bema Keriso Iesu danu ita hakapua tamona, iena abidadama bona lalokau lalonai ita noho bona ita dibaia gaudia ita badinaia, hereva momokani do ita dogoatao noho.—2 Tim. 1:13.
Dahaka Oi Dibaia?
• Dahaka dainai “Keriso” badinaia karana amo Iehova ita tura henia namonamo diba?
• Dahaka dainai ita be Iesu ita tohotohoa neganai, Iehova ita tohotohoa unai?
• Edena dala ai Iesu be ‘dala, hereva momokani, bona mauri’?
• Dahaka dainai Iehova ena Horoa Tauna ita kamonai henia be gau badana?
[Picture on page 29]
Iesu ena hadibaia herevadia ese Iehova ena lalohadai ia hahedinaraia
[Picture on page 30]
Mai kamonai ida Iehova ena Horoa Tauna ita badinaia be namo
[Picture on page 32]
Iehova ia gwau: “Egu Natuna be inai . . . iena hereva do umui kamonai”