Famili Ena Moale Havaraia Daladia

Ravana Kara Henia Dalana

Jennya ia gwau: Ryan ena sinana be ia hemarai lasi, lau dekenai ia moalelaia lasi gaudia ia gwauraia hedinarai totona. To egu tama sina ai vadivadi henia neganai, idia danu ese Ryan idia kara auka henia. Momokani, egu tama sina be nega ta lau itaia lasi ma ta idia kara auka henia! Unai dainai, emai tama sina ai vadivadi henia negadia ai moalelaia lasi.

Ryan ia gwau: Egu sinana ia laloa ta be hegeregere lasi iena natuna ia adavaia totona, unai dainai Jenny lau tura henia matamaia negana amo ia be Jenny dekenai ia moalelaia lasi gaudia ia gwauraia hedinarai. Jenny ena tama sina danu be lau dekenai unai bamona idia karaia​​—⁠hanaihanai lau idia gwau henia. To unai ia vara murinai, Jenny be ena tama sina edia maoro ia gwauraia bona lau be egu tama sina edia maoro lau gwauraia, unai amo ai ruaosi ai hepapahuahu.

HAIDA be edia ravana ida idia hepapahuahu neganai, reana taunimanima ese idia hevasehalaia, to dina ta ta maurina ai unai be hevaseha gauna lasi. India ai, headava hahine ta, Reena, ia gwau: “Lagani momo lalonai, egu ravana hahine ia ura emai headava lalonai idia vara gaudia ibounai ia diba. Nega momo, egu tau lau badu henia badina iena sinana dekenai unai bamona lau karaia lasi. Toana be egu adavana be abia hidi do ia karaia​—⁠ia be tau namona o natuna namona ai do ia lao.”

Dahaka dainai tama sina haida idia ura edia natudia edia headava lalonai idia vara gaudia ibounai idia diba? Matamanai ita herevalaia hahinena, Jenny, ese badina ta ia gwauraia: “Reana tama sina idia laloa edia natuna do ia adavaia mero o kekeni be ia do matamata bona ia hegeregere lasi headava maduna ia huaia totona.” Reena ena tau, Dilip, ese badina ma ta ia gwauraia: “Sibona edia ura idia dadaraia bona edia natuna idia naria tama sina momo idia laloa edia natuna ia headava murinai idia do ia laloaboio. Danu idia laloa momo badina edia natuna mero o kekeni ena diba be bada lasi ena headava ia moalelaia totona.”

To, nega haida natudia sibona ese edia headava lalonai idia vara gaudia be edia tama sina dekenai idia herevalaia. Hegeregere, Australia ai, Michael bona ena adavana Leanne ita laloa. Michael ia gwau: “Leanne ena ruma bese be gau ibounai idia herevalaia hebou. Unai dainai ai headava murinai, ai ura abia hidi gaudia dekenai ia be ena tamana ena lalohadai do ia tahua guna. Ena tamana ena diba be bada heduru ia henia totona, to lau lalohisihisi badina egu hahine be egu lalohadai ia tahua guna lasi!”

Ia hahedinaraia goevagoeva, ravana huanai idia vara hekwakwanai ese headava lalonai metau bada ia havaraia. Oi dekenai unai ia vara, a? Oi be emu adavana ena tama sina ida oi noho namonamo, a? Bona emu adavana be emu tama sina ida ia noho namonamo, a? Idia vara hekwakwanai rua mani oi laloa, bona dahaka do oi karaia unai oi hanaia totona.

HEKWAKWANAI 1: Toana be emu adavana be ena tama sina ia laloa bada. Spain dekenai, headava tauna ta, Luis, ia gwau: “Egu adavana ia laloa bema ena tama sina kahirakahira ai noho lasi, anina be idia ia laloa lasi. To danu, emai natuna mero ia vara neganai, egu tama sina be kahirakahira dina ta ta ibounai ai idia vadivadi henia, bona unai ese egu adavana ena lalona ia hahisia bada. Unai dainai nega momo ai hepapahuahu.”

Baibel ena hereva: Baibel ese headava ia herevalaia neganai, ia gwau: “Tau ese tamana sinana do ia rakatania, iena adavana dekenai do ia noho, ruaosi be tauanina tamona do idia lao.” (Genese 2:​24) Inai hereva “tauanina tamona” ena anina be tau bona hahine idia noho hebou sibona lasi. To, idia ruaosi be ruma bese matamata ta​—⁠edia natudia be sibona ese idia naria diba. (1 Korinto 1:⁠3) Momokani, tau bona hahine ese edia tama sina do idia matauraia noho be namo, anina be do idia lalodia bada bona durudia. (Efeso 6:⁠2) To emu adavana be nega bada ia henia ena tama sina ia durua neganai, reana do oi mamia oi ia laloa bada lasi.

Oi karaia diba gauna: Hekwakwanai ia vara ena badina oi laloa namonamo. Emu adavana be ena tama sina ia laloa momo eiava oi be emu tama sina oi laloa momo lasi, a? Bema unai bamona, reana emu ruma bese edia noho dalana dainai lalohadai kererena oi abia, a? Eiava oi mama, a?​​—⁠Aonega Herevadia 14:30; 1 Korinto 13:4; Galatia 5:​26.

Unai bamona henanadai idauidau haerelaia totona, sibona emu kara oi tahua namonamo be namo. Unai oi karaia be mai anina bada, badina bema emu ravana ese idia karaia gaudia dainai oi bona emu adavana umui hepapahuahu momo, anina be emu headava lalonai hekwakwanai ia noho​​—⁠emu ravana ese unai hekwakwanai idia havaraia lasi.

Headava lalonai hekwakwanai momo idia vara, badina tau bona hahine be gau momo dekenai idia lalotamona lasi. Oi be emu adavana ena lalohadai oi abia dae, a? (Filipi 2:4; 4:⁠5) Mexico ai, headava tauna ta, Adrián be unai bamona ia karaia. Ia gwau: “Egu adavana ia tubu daekau ruma besena be idia noho hebou namonamo lasi, unai dainai lau ura lasi egu ravana ida lau noho. Lagani momo lalonai idia danu lau herevahereva lasi. Unai ese emai headava lalonai hepapahuahu ia havaraia, badina egu adavana ia ura ia be ena sinana kahirakahira ia noho.”

Gabeai, Adrián be lalohadai maorona ia abia. Ia gwau: “Lau diba, ena be egu adavana be ena tama sina ia itaia momo neganai, unai ese ena lalona ia hahisia diba, to bema idia ia itaia lasi unai ese hekwakwanai momo ia havaraia danu. Unai dainai, dala lau tahua egu ravana ida emai hetura karana lau hagoadaia bona hanamoa totona.”b

INAI OI TOHOA: Oi bona emu adavana ese ta ta emui ravana dekenai umui laloa bada gauna ta be pepa dekenai umui torea. Reana inai bamona oi torea diba, “Lau laloa . . . ” Bena oi torea pepana be emu adavana oi henia bona emu adavana ese ia torea pepana be oi ia henia. Unai amo ruaosi do umui gaukara hebou bona dala umui tahua ta ta emui ravana dekenai umui laloa gaudia umui herevalaia totona.

HEKWAKWANAI 2: Nega momo emu ravana idia ura emu headava lalonai idia vara gaudia idia diba, to heduru hereva maorodia idia henia lasi. Kazakhstan ai, headava hahine ta ladana, Nelya ia gwau: “Lau headava bona lagani seven lalonai egu tau ena ruma bese ida ai noho. Emai natudia ai naria dalana, nanadu bona ruma hagoevaia karana dekenai nega momo ai hepapahuahu. Egu adavana bona ravana hahine dekenai unai lau herevalaia, to unai ese hepapahuahu ia habadaia sibona!”

Baibel ena hereva: Oi headava neganai, emu tama sina edia siahu henunai oi noho lasi. Baibel ia gwau: “Tatau ibounai edia kwarana be Keriso, hahine edia kwarana be edia tau.” (1 Korinto 11:⁠3) To, matamanai ita herevalaia bamona, tau bona hahine ese edia tama sina idia matauraia be namo. Momokani, Aonega Herevadia 23:22 ia gwau: “Oiemu tamana, ia ese oi ia havaraia tauna, do oi kamonai henia, bona oiemu sinana ia buruka neganai do oi matauraia.” To bema emu tama sina​​—⁠o emu adavana ena tama sina​​—⁠be Baibel ena hereva tau be iena ruma bese kwarana, idia dadaraia bona sibona edia lalohadai idia gwauraia be edena bamona?

Oi karaia diba gauna: Emu tama sina be emu headava lalonai idia vara gaudia idia ura diba ena badina oi lalopararalaia. Matamanai ita herevalaia tauna, Ryan, ia gwau: “Nega haida tama sina idia ura diba edia natudia edia mauri lalonai idia do idia laloa bada.” Reana tama sina idia laloparara lasi idia be natudia edia headava lalonai idia vara gaudia idia biagua, unai oi hamaoromaoroa diba bema Baibel ena sisiba oi badinaia, ia gwau: “Bema tau ta ese iena bamona tauna ia maumauraia, ia kara dika henia dainai, namona be unai dika do ia gwauatao.” (Kolose 3:​13) To bema emu ravana be hanaihanai idia ura emui headava lalonai idia vara gaudia idia diba, unai ese oi bona emu adavana huanai hepapahuahu ia havaraia be edena bamona?

Headava taudia haida ese edia tama sina kara henia dalana dekenai hetoa idia atoa. Unai ena anina be hemataurai lasi dalanai idia dekenai taravatu aukadia oi atoa, a? Lasi.c Nega momo, emu kara amo oi hahedinaraia emu mauri lalonai emu adavana oi laloa bada. Hegeregere, Japan ai, headava tauna ta ladana, Masayuki ia gwau: “Tama sina ese edia lalohadai idia gwauraia neganai, oi abia dae haraga lasi. Laloatao, oi be ruma bese matamatana ta oi havaraia. Unai dainai, tama sina edia hereva dekenai emu adavana ena lalohadai oi tahua guna be namo.”

INAI OI TOHOA: Oi bona emu adavana umui herevahereva, edena dala haida ai emu tama sina edia kara ese emu headava lalonai hepapahuahu ia havaraia. Umui ruaosi ese do umui karaia gaudia bona umui badinaia dalana be pepa dekenai umui torea, to emui tama sina umui matauraia noho be namo.

Emu ravana ida do oi hepapahuahu momo lasi, bema edia kara ena badina oi lalopararalaia bona unai hepapahuahu karana be oi bona emu adavana huanai ia vara lasi. Jenny ia gwau: “Nega haida lau bona egu adavana be emai tama sina ai herevalaia bona ai hepapahuahu, bona unai ese ia hahedinaraia ai be ta ta emai tama sina edia kerere ai herevalaia momo dainai lalohisihisi ia vara. To gabeai, emai ravana edia kerere herevalaia momo karana ai hadokoa bona ia vara hekwakwanai ai hamaoromaoroa. Unai dainai hari lau bona egu adavana be emai headava ai moalelaia.”

[Footnotes]

SIBONA OI NANADAIA . . .

▪ Egu ravana dekenai edena kara namodia lau moalelaia?

▪ Edena dala ai egu tama sina do lau matauraia bona egu adavana lau laloa bada?