Revareva ta Papua New Guinea Amo

Korol Rif Ena Ororo Gabudia

INAI be Tuesday 5 o klok dabai, Lae, PNG dekenai. Lau bona egu adavana ai hegaegae Lengbati hanua dekenai ai lao totona, ia be Rawlinson Ororo, Morobe Provinsi dekenai, unuseniai Iehova ena Witnes taudia haida do ai vadivadi henia.

Ai be peleini maragina ta dekenai ai guia bona miniti 30 bamona ai roho ela bona Lengbati dekenai do ai ginidae. Nega momo lau be peleini taria tauna ena badinai lau helai, bona ena be ensini ena regena be bada, to ai ruaosi be ai herevahereva diba. Peleini taria tauna be lau dekenai peleini taria gaudia ia herevalaia, bona ia hevaseha ia gwau, “Bema gau ta ia vara lau dekenai, peleini do oi taria.” Maoromaoro, lau ese PNG ai ia loaloa Iehova ena Witnes tauna ta ena sivarai lau laloa lou. Peleini amo idia roho lao neganai, taria tauna be ia maserea, to peleini be autopilot dekenai ia atoa dainai sibona ia giroagiroa. Gabeai peleini taria tauna ia noga bona ia itaia namonamo dainai peleini ia abia diho tano dekenai. To ai moale badina unai bamona hekwakwanai ta be ai dekenai ia vara lasi.

Peleini be ori lalona amo ia hanaia neganai, ororo dorina ai itaia diba, ena daudau be mita 100 o ma haida bamona. Ai be Lengbati ai itaia, edia ruma be biri amo idia karaia. Peleini taria tauna be peleini ena diho gabuna ia itaia, bona ia sekea natudia idia gadara eiava lasi. Danu ia itaia boroma be guri idia geia eiava lasi. Peleini taria tauna be koura kahana amo ia giroa neganai, ia gwau: “Gabu ena toana ia namo dainai, peleini ita abia diho diba.” Peleini amo ai giroa bona taria tauna be dala ta dekenai peleini ia abia diho. Unai dala be hanua taudia ese ororo ena huanai idia karaia bona korol ena nadi be ororo amo idia makohia maragimaragi bena dala dekenai idia atoa, peleini idia diho totona.

Emai laolao ginigunadia ai, idia makohia korol nadi lau itadia bona lau laloa reana unai ororo be lagani momo idia noho vadaeni. Mani oi laloa, guna unai ororo be korol rif bamona davara ai idia noho, ena lata be kilomita 100 momo bamona, to reana gau haida ese unai rif be davara amo idia doria daekau bona ororo ai idia lao, ena lata be kilomita 4 bamona. Peleini amo ai raka-lasi neganai, korol rif ena ororo gabudia ai lau gini.

Hanua taudia be nega momo peleini ia diho neganai, idia heau lao peleini itaia totona. Peleini taria tauna ese ensini ia hadokoa neganai, lau be tau ta lau itaia peleini kahirakahira ia raka mai. Iena ladana be Zung. Unuseniai ia be Iehova ena Witnes taudia edia hadibaia program ia naria. Hanua taudia idia diba ia be mauri dala goevana ia badinaia bona ia be kara momokani tauna. Ia gwau iena mauri dalana be unai bamona badina Baibel ena hakaua herevadia ia badinaia. Zung bona Witnes taudia ma haida ida ai hedavari murinai, ororo amo ai diho. Maragidia momo be ai murinai idia raka, bona ta ta idia ura emai kohu idia huaia.

Unai hanua ai idia noho Witnes taudia be ruma ta idia karaia. Witnes tauna ta be hua siks murinai idia ia vadivadi henia neganai, unai ruma ai ia noho diba. Ena be PNG be siahu gabuna, to Lengbati hanua be keru gabuna badina ororo ai ia noho. Hanuaboi ai emai kerosini lamepa ai gabua neganai, lau be nega momo ori lau itaia​​—⁠adorahi ai metairametaira koura amo idia daekau ororo ataiai⁠​—⁠ruma lalonai ia vareai. Keru dabua bona jins lau karaia neganai, lau daradara sisina, badina hora haida murinai ai siahu bada.

Lagani 1985 ai, Lae dekenai Lengbati tauna ta be Iehova ena Witnes taudia ese Baibel amo idia durua. Unai tauna be ena hanua dekenai ia giroa lou neganai, ia bona ma haida be hebou ruma maragina ta idia haginia, bona idia moalelaia. To Luteran dubu ena pasto bona ena taunimanima be unai hebou rumana idia gabua. Idia gwau unai be Luteran taudia edia gabu. Ena be unai nega amo ema bona hari hekwakwanai idia davaria noho, to Witnes taudia be hebou rumana ma ta idia haginia, bona edia namba ia bada daekau 50 bamona, bona mai moale ida sivarai namona idia harorolaia. Guna Witnes taudia edia gaukara idia koua taudia haida be hari haroro gaukara idia karaia goadagoada.

Hari, unai hanua taudia be Iehova ena Witnes taudia idia vadivadi bona Baibel idia herevalaia neganai idia abia dae. Ena be hanua taudia haida sibona be duahiduahi idia diba, to unuseni idia noho Witnes taudia momo be duahiduahi karana idia dibaia unai amo ma haida dekenai Baibel ena sivarai idia herevalaia diba. Wiki ta ta lalonai, edia Kingdom Hall ai idia hebou taudia be 200 mai kahana.

Paua be lasi. Adorahi ai, ai ibounai be aniani nadua totona idia karaia lahi ena badinai ai helai. Ai aniani, herevahereva bona kiri hebou. Lahi ena diari dekenai, ai itaia emai turadia edia vairana toana ese idia hahedinaraia idia be Iehova idia hesiai henia dainai idia moale. Gabu ia dibura neganai, haida be pama ena rau idia gabua, unai amo edia raka dalana ia hadiaria ela bona ruma dekenai idia ginidae.

Ruma ai lao henia noho lalonai, regerege ta be lasi. Manu edia tai regena sibona ai kamonai. Ai do mahuta lasi neganai, guba ai itaia bona ai moale bada badina hisiu momo herea idia noho.

Wiki ta ia ore haraga murinai, kerukeru do ai giroa lou totona peleini ai naria. Hari be hanuaboi ginigabena Lengbati ororona ena keru gabuna dekenai ai mahuta, bona kerukeru kone ena siahu gabuna dekenai do ai giroa lou.