Buka ta ese Memero Kekeni Ia Durua Idia Ia Karaia Diravana Do Idia Laloa

LAGANI 3,000 mai kahana gunanai, aonega tauna Solomona ia gwau: “Oi be eregabe neganai, ia ese oi ia karaia Dirava do oi laloa.” (Had. 12:⁠1) Unai bamona idia karaia totona Keristani memero kekeni be buka matamatana ta idia abia. May 2008 ela bona January 2009 ai, tanobada hegegemadai, Iehova ena Witnes taudia be “Lauma Helaga ese Ita Ia Hakaua” Distrik Hebouhebouna dekenai unai buka matamata idia abia, ena ladana be Questions Young People Ask​​—⁠Answers That Work, Volume 2.

Unai buka lalonai Hakaua Oreana ese matamata taudia totona revareva ta idia torea. Ena kahana ta ia gwau: “Ai guriguri inai buka ese umui do ia durua, matamata taudia ibounai ese idia davaria hahetoho idauidau umui hanaia totona, bona do ia hahedinaraia edena dala ai Dirava ena ura hegeregerena ai abia hidi umui karaia totona.”

Tama sina idia ura “Iehova ena matahakani bona sisiba” be edia natudia dekenai idia hadibaia. (Efe. 6:​4, NW ) To natudia be idia bada neganai, idia daradara bona heduru idia tahua. Tama sina e, edena dala ai emu natudia oi durua diba unai buka idia gaukaralaia namonamo totona? Henunai be heduru herevadia haida idia noho.

▪ Unai buka matamata ta oi abia, oi duahia bona ena kahadia oi manadalaia. Oi duahia sibona be hegeregere lasi. To, lalohadai idia torea daladia idauidau oi stadilaia danu be namo. Inai buka idia torea dalana be matamata taudia dekenai dahaka be maoro bona dahaka be kerere ia hahedinaraia sibona lasi, to danu ‘edia lalona ia hadibaia.’ (Heb. 5:​14) Danu, inai buka ese edena dala ai matamata taudia idia gini goada bona kara maoromaoro idia karaia diba daladia ia hahedinaraia. Hegeregere, Karoa 15 “How Can I Resist Peer Pressure?” be matamata taudia ia hadibaia “lasi” sibona do idia gwauraia be hegeregere lasi. To, edena dala ai Baibel ena hakaua herevadia idia gaukaralaia hahetoho idia hanaia totona bona edena dala ai ‘ta idia haere henia’ daladia ia hahedinaraia danu.​​—⁠Kol. 4:⁠6.

▪ Herevahereva hebou totona henanadai gaukaralaidia. Tama sina e, ena be henanadai momo be matamata taudia totona, to emu buka ai haere oi torea diba danu.a Hegeregere, rau 16 ai memero kekeni idia loa hebou karana ena henanadai rua umui herevalaia neganai, namona be oi be emu natuna ena mauri lagani bamona neganai, emu hemami be edena bamona do oi laloa lou. Oi haere neganai oi be emu natuna ena mauri lagani bamona neganai emu hemami be dahaka oi torea hedinarai. Bena oi sibona oi nanadaia: ‘Lau matamata negana amo, egu lalohadai unai gauna dekenai be edena bamona ia idau ia lao? Lau matamata negana amo ema bona hari lau abia aonega be edena bamona egu natuna dekenai lau hadibaia diba?’

▪ Emu natuna ese ena buka ai ia torea gaudia oi matauraia. Idia torea henanadai ese emu natuna ena lalona do idia veria umui stadilaia gauna ia laloa namonamo totona eiava ena haere be buka ai ia torea totona. Emu tahua gauna be emu natuna ena kudouna ai idia noho gaudia do oi dibaia, to iena buka ai ia torea gaudia do oi itaia lasi. Rau 3 ena kahana ta ladana “A Note to Parents,” ia gwau: “Emu natudia oi hagoadaia mai momokani ida edia lalohadai be edia buka ai idia torea totona, namona be idia oi matauraia bona idia torea gaudia oi duahia lasi. Reana gabeai unai gaudia be oi dekenai do idia hadibaia.

Ruma Bese Ena Tomadiho Lalonai Gaukaralaia

Young People Ask, Volume 2, be buka namona, bona Ruma Bese Ena Tomadiho ai umui gaukaralaia diba.b To, paragraf ta ta totona henanadai be lasi dainai, edena dala ai unai umui gaukaralaia diba? Namona be emu natudia do ia durua dalanai stadi oi karaia.

Hegeregere, ruma bese haida be rau 132 bona 133 ai ia noho “Peer-Pressure Planner” idia stadilaia neganai, haheitalai idia karaia diba. Unai maua lalonai ia noho henanadai ginigunana ese emu natuna do ia durua ia davaria hahetoho badana ia torea totona. Henanadai iharuana ena haere amo natuna ese do ia hahedinaraia edena gabu ai unai hahetoho ia davaria momo. Emu natuna be turadia edia laloani herevadia ia abia dae o ia dadaraia neganai dahaka do ia vara umui herevalaia murinai, emu natuna ia durua palani ia karaia dala toi amo ena turana ia haere henia totona. Emu natuna oi durua haere idauidau ia laloa eiava hegaegaelaia totona​—⁠namona be unai haere be do idia auka lasi bona mai gari lasi ida ia gwauraia diba.​​—⁠Sal. 119:⁠46.

Buka ese Herevahereva Dalana Ia Kehoa

Young People Ask, Volume 2 be matamata taudia ia durudia edia tama sina ida idia herevahereva totona. Hegeregere, maua ladana “How Can I Talk to Dad or Mom About Sex?” (rau 63-64) bona “Talk to Your Parents!” (rau 189) be natudia ia durua idia ura lasi edia tama sina ida idia herevalaia gaudia haida idia kikilaia totona. Ena mauri lagani be 13 kekeni ta ia gwau, “Inai buka matamatana ese lau ia hagoadaia egu tama sina dekenai egu lalona ai ia noho gaudia​​—⁠lau karaia vadaeni gaudia danu​​—⁠be idia ida lau herevalaia hebou totona.”

Inai buka be matamata taudia ia durua edia tama sina ida gau ma haida idia kikilaia hebou totona. Karoa ta ta edia dokonai maua ta ladana “What Do You Think?” ia noho. Unai be riviu gauna sibona lasi, to tama sina ese idia gaukaralaia diba edia natudia ida idia herevahereva hebou totona. Karoa ta ta edia dokonai be maua ma ta ladana “Action Plan!” ia noho. Unai maua ese matamata taudia do ia durua unai karoa amo idia dibaia gaudia be edia mauri lalonai idia badinaia diba daladia idia torea totona. Unai maua ena dokonai be inai henanadai ia noho: “What I would like to ask my parent(s) about this subject is . . . ” Unai henanadai ese matamata taudia ia durua edia tama sina amo heduru idia tahua totona.

Edia Kudouna Oi Hamarerea!

Tama sina e, namona be emu tahua gauna be emu natuna ena kudouna do oi hamarerea. Young People Ask, Volume 2, ese oi do ia durua unai bamona oi karaia totona. Tama ta ese ena natuna kekeni ida herevahereva hebou karana ia hanamoa totona, unai buka ia gaukaralaia dalana mani oi laloa, ia gwau:

“Lau bona Rebekah be gabu namodia haida ai ura henia bona unuseniai ai raka loaloa, basikele amo ai loaloa, o motuka amo ai lao. Unai gabu ai, egu natuna be ia ura ena kudouna ai ia laloa gaudia ia herevalaia.

“Buka ena matamana kahanai idia noho Hakaua Oreana ena revareva bona ‘A Note to Parents’ kahana ai duahia guna. Rau 3 ena hereva hegeregerena, ia lau hamaoroa mai gari lasi ida ena lalohadai be ena buka ai ia torea diba. To, lau ese ia torea gaudia do lau itaia lasi.

“Rebekah lau hamaoroa ia ura do ai stadilaia karoa ta ta do ia abia hidi. Ia makaia karoa ginigunana ta be ‘Should I Play Electronic Games?’ Lau laloa unai karoa do ia abia hidi lasi! To badina ta dainai unai ia abia hidi. Ena turadia haida be vidio gadara dikana ta idia gadaralaia. Unai vidio gadara lalonai dagedage bada karadia bona hereva mirodia momo idia hahedinaraia! To, unai lau diba lasi ela bona rau 251 “Action Plan!” ai kikilaia neganai, Rebekah ese unai ia hahedinaraia. Danu, unai maua ena heduru amo Rebekah ese gabeai unai hahetoho ia koua totona, haere haida ia hegaegaelaia.

“Hari, nega momo Rebekah ese ena buka ai ia torea gaudia be mai gari lasi ida lau dekenai ia gwauraia hedinarai. Ai stadi neganai, emai herevahereva karana be namo herea. Paragraf ta ta ai duahia murinai, ia ura gau ibounai, laulau bona maua danu, ai herevalaia. Unai ese dala ia kehoa lau be iena mauri lagani bamona neganai lau karaia gaudia be ia dekenai lau herevalaia totona, bena ia ese hari matamata taudia idia karaia gaudia be lau dekenai ia herevalaia. Ia ura ia dekenai idia vara gaudia ibounai ia herevalaia!”

Questions Young People Ask​​—⁠Answers That Work, Volume 2 bukana idia halasia neganai, tama sina momo idia moale bada. Hakaua Oreana ia ura unai buka ese tanobada hegegemadai idia noho ruma besedia ia durua. Gau badana be unai buka ese iseda matamata taudia ibounai ia durua ‘lauma helaga ena dala hegeregerena idia raka noho’ totona.​​—⁠Gal. 5:​16, NW.

[Footnotes]

[Box on page 30]

Matamata Taudia Haida Edia Hereva

“Inai buka oi duahia neganai, oi helai, pensolo oi abia, hereva haida oi makaia bona oi laloa dobu. Inai buka idia hegaegaelaia dalana ese matamata taudia ia durua idia torea gaudia be gabeai idia itaia lou bona idia laloa dobu totona, unai amo idia ese mauri dalana hereadaena idia badinaia diba.”​​—⁠Nicola.

“Haida ese lau idia doria mero ta ida lau turana karaia totona​—⁠toana be idia ura lau idia durua. Inai buka ena kahana ginigunana amo lau laloparara, herevana ta be dahaka ia hereva, to lau be lau do hegeregere lasi mero ta ida lau turana karaia totona.”​​—⁠Katrina.

“Maua ladana ‘Are You Thinking of Getting Baptized?’ ese lau ia durua egu bapatiso karana lau laloa bada totona. Unai ese lau ia doria egu stadi bona guriguri karana lau hanamoa totona.”​​—⁠Ashley.

“Ena be egu Keristani tama sina ese lau maragi negana amo lau idia hadibaia, to inai buka ese lau ia durua lau sibona ese egu mauri dalana lau laloa namonamo totona. Danu, lau ia durua egu tama sina ida lau herevahereva hebou totona.”​​—⁠Zamira.

[Picture on page 31]

Tama sina e, namona be inai buka umui duahia bona manadalaia

[Picture on page 32]

Oiemu tahua gauna be emu natuna ena kudouna do oi hamarerea