Duahia Taudia Edia Henanadai
Esekiela 18:20 ena hereva, “natuna be do ia hisihisi lasi iena tamana ena kara dika dainai” ese Esodo 20:5 ai Iehova ena hereva ‘kara dika ena davana, be do ia henia edia natuna bona tubuna dekenai,’ ia hakoikoia, a?
Lasi. Esekiela 18:20 ese ia hahedinaraia ta ta be ena kara dika hegeregerena davana do ia abia, bona Esodo 20:5 ese ia hahedinaraia bema tau ta ia kara dika, gabeai iena kara dika ena davana be ena bese taudia ese do idia abia danu.
Esekiela karoa 18 ena siri ma haida ese idia hahedinaraia, tau ta be sibona ena kara dika hegeregerena davana do ia abia. Siri 4 ia gwau: “Bema tau ta ia kara dika neganai, unai tau sibona be do ia mase.” To “iena kara be maoromaoro momokani” tauna be edena bamona? Ia be “mauri do ia davaria.” (Ese. 18:5, 9) Unai dainai, bema natuna ta be ia bada vadaeni bona ia sibona be abia hidi ia karaia diba, vadaeni Dirava be iena kara hegeregerena ia do ia kota henia.—Ese. 18:30.
Levi tauna, Kora ena sivarai ese unai ia hahedinaraia. Israela taudia be taunimanima idia noho lasi gabuna ai idia loaloa neganai, Kora be Iehova ese ia henia hesiai gaukaradia ia moalelaia lasi. Ia ura bada hahelaga gaukara ia karaia, unai dainai ia bona ma haida be Iehova ese ia abia hidi taudia, Mose bona Arona idia gwau-edeede henia. Kora bona ia ida idia gwau-edeede taudia be idia hekokoroku bona idia ura Iehova ese idia dekenai ia henia lasi gaukarana idia karaia dainai Iehova ese ia hamasedia. (Num. 16:8-11, 31-33) To, Kora ena natudia be idia gwau-edeede lasi. Dirava ese idia be edia tamana ena kara dika dainai ia kota henidia lasi. Idia be Iehova idia badinaia dainai idia mauri.—Num. 26:10, 11.
To Esodo 20:5 ai ia noho sisibana, Taravatu Ten ena kahana ta unai, be edena bamona? Esodo karoa 20 ena siri ma haida mani oi laloa. Iehova be Israela besena ida Taravatu gwauhamatana ia karaia. Israela taudia be unai Taravatu gwauhamatana idia kamonai neganai, idia gwau: “Ai be Lohiabada ena hereva ibounai do ai karaia.” (Eso. 19:5-8) Oibe, unai bese ibounai be Iehova ena turana ai idia lao. Unai dainai Esodo 20:5 ena hereva be unai bese ibounai ia herevalaia.
Israela taudia be Iehova idia badinaia neganai, hahenamo momo idia abia. (Lev. 26:3-8) To, Iehova idia dadaraia bona dirava koikoidia idia tomadiho henia neganai, Iehova ese ena hahenamo be idia amo ia kokia bona idia ia gimaia lasi; Israela besena be dika bada idia davaria. (Gun. 2:11-18) Momokani, ena be Israela besena be kaivakuku idia tomadiho henia, to idia haida be Dirava bona iena taravatu idia badinaia noho. (1 Kin. 19:14, 18) Israela besena edia kara dika dainai, Dirava idia badinaia taudia haida be dika idia davaria, to Iehova ese idia dekenai hebogahisi-mai-lalokauna ia hahedinaraia.
Israela taudia be Iehova ena hakaua herevadia idia badinaia lasi neganai, bese ma haida ese Iena ladana idia hadikaia, unai dainai Iehova be iena taunimanima ia panisia totona, Babulonia taudia ese idia abia lao neganai, Ia koudia lasi. Oibe, unai ese ia hahedinaraia Iehova be ena taunimanima ibounai bona idia ta ta edia kara dika hegeregerena davana ia henia. (Ier. 52:3-11, 27) Momokani, Baibel ese ia hahedinaraia Israela taudia edia kara dika be bada dainai, edia natuna bona tubuna dekenai ia lao bona uru toi, hani o ma haida be edia sene taudia edia kara dika ena davana idia abia, Esodo 20:5 ena hereva hegeregerena.
Danu, Baibel ena sivarai haida ese idia hahedinaraia ruma bese taudia ta ta be edia tama sina edia kara dika dainai, hisihisi idia abia danu. Hahelaga Tauna Badana Eli be ena “lebulebu” natuna memero rua edia hahelaga gaukara ia koua lasi dainai, Iehova ia badu. (1 Sam. 2:12-16, 22-25) Eli be ena natuna memero rua ia matauraia to Iehova ia matauraia lasi dainai, ena ruma bese amo Dirava ese hahelaga gaukara ena maduna ia kokia, bona unai be Eli ena tubuna Abiatara ena amo ia matamaia. (1 Sam. 2:29-36; 1 Kin. 2:27) Gehasi ena sivarai ese Esodo 20:5 ena hakaua herevana ia hamomokania danu. Gehasi be Elisaia ena hesiai tauna, to ena dagi ia gaukaralaia kerere badina ia ura Suria ena tuari biaguna Namana amo moni bona kohu ia abia. Iehova ese Elisaia amo Gehasi ia hahemaoro henia, ia gwau: “Namana ena lepera gorere be oi dekenai do ia kamokau, bona oiemu natuna bona tubudia danu dekenai do ia kamokau, ela bona hanaihanai.” (2 Kin. 5:20-27) Unai dainai, Gehasi ena kara dika ena hisihisi be iena bese taudia ese idia abia danu.
Iehova be Havaraia Tauna bona Mauri Henia Tauna dainai, ia be mai ena maoro edena bamona panisi amo ena taunimanima ia hahemaoro henia. Ita herevalaia vadaeni gaudia ese idia hahedinaraia natudia o tubudia be edia sene taudia edia kara dika ena hisihisi idia abia diba. To, Iehova ese “hisihisi taudia edia taitai ia kamonai,” bona idia ta ta ese Ia idia badinaia neganai, idia do ia lalonamo henia bona edia lalometau ia hamaragia diba.—Iobu 34:28, BHğ.
[Picture on page 29]
Kora bona ia ida idia gwau-edeede taudia be edia kara dika ena davana idia abia