Dirava Ena “Kara Maoromaoro” Tahua Guna
“To umui ese Dirava ena Basileia bona iena kara maoromaoro do umui tahua guna, vadaeni unai gau ibounai danu umui dekenai dohore ia henia.”—MAT. 6:33.
1, 2. Dirava ena kara maoromaoro be dahaka, bona edena kara ma haida ida ia gaukara hebou?
“BASILEIA . . . do umui tahua guna.” (Mat. 6:33) Unai sisiba herevana be Iesu ese Ororo Harorona dekenai ia henia, bona hari inai negai Iehova ena Witnes taudia be unai idia diba. Iseda mauri lalonai ita hahedinaraia, ita be unai Basileia ita ura henia bada bona ita badinaia. To namona be unai siri ena kahana iharuana, “iena kara maoromaoro” ita laloa danu.
2 Iehova be Havaraia Tauna dainai, ia be mai ena maoro dahaka be namo bona dahaka be dika, o dahaka be maoro bona dahaka be kerere edia taravatu ia atoa. (Apok. 4:11) To, Dirava ena kara maoromaoro ese ia hahedinaraia ia be taravatu aukadia ia atoa lasi. Unai kara maoromaoro be Iehova ena kara ta bona ena kara badadia haida, kota maoromaoro, lalokau, aonega, bona siahu ida ia gaukara hebou. Dirava ena kara maoromaoro be iena ura bona palani ida ia gaukara hebou. Idia ura Ia idia hesiai henia taudia be ena kara maoromaoro idia badinaia.
3. (a) Dirava ena kara maoromaoro ita tahua guna ena anina be dahaka? (b) Dahaka dainai Iehova ena taravatu maorodia ita badinaia?
3 Dirava ena kara maoromaoro ita tahua guna ena anina be dahaka? Ita gwau diba, unai ena anina be Dirava ena ura ita karaia, unai amo Ia do ita hamoalea. Iena kara maoromaoro ita tahua ena anina ma ta be ena taravatu maorodia ita badinaia, iseda lasi. (Roma 12:2 duahia.) Unai dala amo ita be Iehova ita tura henia namonamo diba. Iehova ese ita ia panisia garina ita gari dainai iena taravatu ita badinaia be maoro lasi. To, Dirava ita lalokau henia dainai ita ura ia ita hamoalea bona ena taravatu ita badinaia, sibona eda taravatu lasi. Ita diba unai be kara maorona, badina Dirava ese ita ia karaia iena taravatu ita badinaia totona. Dirava ena Basileia ena King, Iesu Keriso bamona, kara maoromaoro ita ura henia be namo.—Heb. 1:8, 9.
4. Dahaka dainai Dirava ena kara maoromaoro ita tahua be mai anina bada?
4 Dahaka dainai Iehova ena kara maoromaoro ita tahua be mai anina bada? Mani inai oi laloa: Eden umana ai ia vara hahetoho amo Adamu bona Heva ese do idia abia dae Iehova be mai ena maoro taravatu ia atoa o lasi. (Gen. 2:17; 3:5) Iehova ena taravatu idia badinaia lasi dainai, edia natudia dekenai hisihisi bona mase idia mailaia. (Roma 5:12) Danu, Baibel ia gwau: “Kara maoromaoro bona bogahisihisi kara do oi karaia neganai, oiemu mauri dinadia be do idia momo, bona taunimanima ese noho namo, kara maoromaoro bona matauraia oi dekenai do idia henia.” (Aon. 21:21) Oibe, Dirava ena kara maoromaoro ita tahua guna neganai, iseda hetura karana Iehova ida do ia namo bona hahemauri do ita abia.—Roma 3:23, 24.
Sibona Idia Gwauraia Kara Maoromaoro Taudia Ena Dika
5. Dahaka dika ita dadaraia be namo?
5 Bema ita be Dirava ena kara maoromaoro ita tahua guna, do ita dadaraia dika ta be aposetolo Paulo ese Roma ai idia noho Keristani taudia dekenai ia torea revarevana ai ia hahedinaraia. Paulo be Iuda taudia ia herevalaia neganai, ia gwau: “Idia dekenai lau gwauraia hedinarai, idia be idia ura dikadika Dirava idia hesiai henia, to diba maoromaoro hegeregerena idia karaia lasi. Badina idia be Dirava ena kara maoromaoro idia badinaia lasi, to sibodia edia kara maoromaoro idia haginia toho dainai, idia be Dirava ena kara maoromaoro idia badinaia lasi.” (Roma 10:2, 3, NW ) Paulo ena hereva hegeregerena, momo be Dirava ena kara maoromaoro idia lalopararalaia lasi badina sibona edia kara maoromaoro idia haginia.
6. Edena kara ita dadaraia, bona dahaka dainai?
6 Ita ia hamorua karana ta be inai: Bema iseda hesiai gaukara be ma haida ida ita hahegeregerea, ita be sibona eda kara maoromaoro ita haginia. Unai kara ese ita ia hakaua kerere diba bona sibona eda aonega dekenai ita tabekau. To, unai bamona ita karaia neganai, ita be Iehova ena kara maoromaoro ita laloaboio. (Gal. 6:3, 4) Iehova ita lalokau henia dainai kara maorona ita karaia. Bema sibona ita gwauraia ita be kara maoromaoro taudia, vadaeni ita hahedinaraia ita be Iehova ita lalokau henia lasi.—Luka 16:15 duahia.
7. Sibona idia gwauraia kara maoromaoro taudia edia hekwakwanai be Iesu ese edena bamona ia gwauraia?
7 Iesu ia laloa momo, badina “haida idia laloa idia be kara maoromaoro taudia momokani, bona idau taudia dekenai idia ura henia lasi.” Ia ese sibona idia gwauraia kara maoromaoro taudia edia hekwakwanai be inai haheitalai amo ia hahedinaraia: “Tatau rua Dubu Helaga dekenai idia raka vareai, idia guriguri totona. Ta be Farisea tauna, ta be takisi gogoa tauna. Farisea tauna ia gini siri, sibona dekenai ia guriguri, ia gwau, ‘Dirava e, tanikiu, lau be haida bamona lasi, henaoa taudia, kara gagevagageva taudia, heudahanai taudia. Oibe, lau be inai takisi gogoa tauna bamona lasi. Lau be pura ta lalonai nega rua aniani ania lasi ena taravatu lau badinaia, kohu lau davaria gaudia ibounai, karoa be 10 lau karaia, karoa ta be harihari gauna dekenai lau halaoa.’ To takisi gogoa tauna be idau gabu dekenai ia gini, iena kwarana ia atoa diho, iena kemena ia botaia, ia gwau, ‘Dirava e, lau be dika tauna, oi bogahisihisi lau dekenai.’ ” Iesu ena hereva dokonai ia gwau: “Lau hamaoroa umui dekenai, unai tau be iena ruma dekenai ia giroa lou, mai ena lalona maoro Dirava ena vairana dekenai, to inai Farisea tauna be lasi. Badina be sibona ia hekokoroku tauna be henunai do ia noho, to sibona ia manau tauna be do idia hanamoa.”—Luka 18:9-14.
“Kara Maoromaoro Auka Herea” Ena Dika
8, 9. Ita “kara maoromaoro auka herea” neganai, dahaka do ia vara?
8 Ita dadaraia dika ma ta be Hadibaia Tauna 7:16 ese ia gwauraia: “Do oi kara maoromaoro auka herea lasi, bona aonega do oi tahua auka herea lasi, oi sibona do oi alaia garina. Oi sibona do oi alaia ena namo be dahaka?” Unai kara ita dadaraia ena badina be Hadibaia Tauna 7:20 ai ia gwauraia: “Kara maoromaoro tauna ta tanobada dekenai, be kara namo sibona ia karaia noho, a? Lasi momokani, ibounai ese nega haida kara dika do idia karaia diba.” Ia “kara maoromaoro auka herea” tauna be sibona ena taravatu ia haginia bona unai taravatu amo ma haida ia hahemaoro henia. To, ia laloparara lasi unai bamona ia karaia neganai, ia be sibona ena taravatu amo Dirava ena taravatu ia hanaia bona Dirava ena matanai ia be kara maoromaoro tauna lasi.
9 Ita “kara maoromaoro auka herea” neganai, ita be Iehova ena gaukara dalana ita daradaralaia. To ita laloatao, bema Iehova ese ia karaia abia hidi dekenai ita daradara, ita be Iehova ena taravatu edia latanai sibona eda taravatu ita haginia matamaia. Unai be hegeregere Iehova ita hahemaoro henia bona ita sibona ese dahaka be maoro bona dahaka be kerere edia taravatu ita atoa. To Iehova sibona be mai ena maoro kara maoromaoro taravatudia ia atoa totona, ita be maoro lasi!—Roma 14:10.
10. Iobu bamona, dahaka gauna dainai Dirava ita hahemaoro henia?
10 Ena be ita ta ta ita ura lasi Dirava ita hahemaoro henia, to ita be goevadae lasi taudia dainai unai bamona ita karaia diba. Gau ta ita itaia bona ita laloa unai be maoro lasi eiava hisihisi ta ita davaria neganai, Dirava ita hahemaoro henia. Abidadama tauna Iobu be unai bamona ia karaia danu. Iobu ia laloa “ia be kerere ta lasi, bona kara maoromaoro tauna. Ia ese Dirava dekenai ia gari, bona kara dika dekena amo ia siri.” (Iobu 1:1) To Iobu be dika badadia haida ia davaria, bona ia laloa unai be maoro lasi. Unai dainai ia be “sibona maoromaoro ia gwauraia, to ia ese Dirava be maoromaoro ia gwauraia lasi.” (Iobu 32:1, 2) Ta ese Iobu ena lalohadai ia hamaoromaoroa be namo. Unai dainai ita hoa lasi, nega haida ta ese iseda lalohadai ia hamaoromaoroa diba. Bema unai ia vara, dahaka ese ita do ia durua eda lalohadai ita haidaua totona?
Nega Haida Ita be Gau Ibounai Ita Diba Namonamo Lasi
11, 12. (a) Bema ita laloa gau ta be ia maoro lasi, dahaka ita laloatao be namo? (b) Iesu ese ia gwauraia uma gabu ai idia gaukara taudia ena parabole ai, dahaka dainai haida be lalohadai kererena idia abia?
11 Ita laloatao gauna ginigunana be, nega haida ita be gau ibounai ita diba namonamo lasi. Iobu dekenai unai bamona ia vara. Ia diba lasi guba dekenai Dirava ena aneru edia hebou lalonai Satani be ia ia samania koikoi. (Iobu 1:7-12; 2:1-6) Iobu ia diba lasi ia davaria hekwakwanai ibounai be Satani ese ia havaraia. Oibe, ita diba lasi Iobu be Satani ia diba namonamo eiava lasi! Unai dainai ia hereva kerere ia gwau Dirava ese iena hisihisi ia havaraia. Oibe, ita be gau ibounai ita diba namonamo lasi dainai, lalohadai kererena ita abia haraga diba.
12 Iesu ese ia gwauraia vain uma gabu ai idia gaukara taudia ena parabole mani ita laloa. (Mataio 20:8-16 duahia.) Iesu ia gwau uma ena biaguna ese iena gaukara taudia ibounai edia davana ia henia hegeregere, herevana idia be dina ibounai o hora tamona sibona idia gaukara. Unai kara be edena bamona oi laloa? Oi laloa unai be maoro lasi, a? Reana gaukara taudia be dina ibounai lalonai dina ena siahu ai idia gaukara dainai, karaharaga do oi hebogahisi henidia. Reana do oi laloa, ‘Edia pei idia habadaia be namo!’ Unai bamona lalohadai dainai, reana do ita laloa uma biaguna be hebogahisi lasi tauna bona ena kara be maoro lasi. Danu, gaukara taudia idia maumau neganai idia ia haere henia dalana amo ia hahedinaraia ia be ena siahu ia gaukaralaia kerere. To ita be gau ibounai ita diba namonamo, a?
13. Iesu ese ia gwauraia uma gabu ai idia gaukara taudia ena parabole be edena dala ma ta ai ita laloa?
13 Mani dala ma ta ai unai parabole ita laloa. Ita gwau diba, unai parabole ai uma biaguna ia laloparara ena gaukara taudia be edia ruma bese idia naria danu. Iesu ena negai, uma gabu ai idia gaukara taudia be dina ta ta ena gaukara davana idia abia. Unai gaukara taudia be dina ta ta ai idia abia monina amo edia ruma bese idia naria. Unai ita laloa totona, gaukara taudia edia noho dalana ita laloa be namo—idia be uma biaguna ese adorahi kahanai gaukara ia henia bona unai gaukara be hora tamona lalonai idia karaia. Reana hora tamona ai idia abia pei amo edia ruma bese idia naria be hegeregere lasi; to idia ura dikadika gaukara idia karaia bona idia be dina ibounai idia naria gaukara abia totona. (Mat. 20:1-7) Dina ibounai idia gaukara lasi be idia edia kerere lasi. Baibel ia gwau lasi idia hesiku dainai idia ura lasi gaukara ta idia karaia. Mani oi laloa, oi be dina ibounai oi naria badina oi diba emu ruma bese be unai dina dekenai do oi abia pei amo heduru idia abia diba. Gaukara haida oi karaia dainai do oi moale, bona emu ruma bese naria totona emu gaukara davana oi abia neganai do oi hoa!
14. Vain uma ena parabole amo dahaka ita dibaia?
14 Uma biaguna ena kara mani ita laloa lou. Ia ese gaukara taudia ibounai edia gaukara ena davana ia henia. Ia laloa unai gaukara taudia be mai edia maoro moni idia abia idia bona edia ruma bese naria totona. Ena be gaukara taudia be momo dainai, uma biaguna ia laloa edia davana ia hamaragia diba, to ia be unai bamona ia karaia lasi. Gaukara taudia ibounai be edia ruma dekenai idia giroa lou bona idia abia moni be ia hegeregere edia ruma bese naria totona. Unai gau idauidau ita laloa neganai, reana unai ese iseda lalohadai unai uma biaguna ena kara dekenai do ia haidaua. Ia be mai lalokau ida abia hidi ia karaia bona iena siahu ia gaukaralaia kerere lasi. Unai amo dahaka ita dibaia? Ita be idia vara gaudia haida sibona ita diba dainai lalohadai kererena ita abia. Momokani, inai parabole ese ia hahedinaraia Dirava ena kara maoromaoro ese taunimanima edia taravatu ia hereaia.
Iseda Lalohadai be Kerere O mai Ena Hetoana
15. Dahaka dainai iseda lalohadai be kerere o mai ena hetoana?
15 Bema gau ta ia vara bona ita laloa unai be maoro lasi, do ita laloatao gauna iharuana be inai: Reana iseda lalohadai be kerere o mai ena hetoana. Iseda lalohadai be kerere badina ita be goevadae lasi taudia, ma haida ita inai henia kava, o eda kastom be idau. Danu, eda lalohadai be mai ena hetoana dainai ma haida edia lalona ai idia noho gaudia ita diba lasi. To, Iehova bona Iesu be unai bamona lasi.—Aon. 24:12; Mat. 9:4; Luka 5:22.
16, 17. Davida be Bataseba ida ia heudahanai neganai, dahaka dainai Iehova be ia atoa taravatu amo taunimanima ia doria lasi idia ia hamasea totona?
16 Davida be Bataseba ida ia heudahanai ena sivarai ita laloa. (2 Sam. 11:2-5) Mose ena Taravatu hegeregerena, idia ruaosi do idia hamasea. (Lev. 20:10; Deu. 22:22) Ena be Iehova ese idia ia panisia, to ia atoa taravatu amo taunimanima ia doria lasi idia ia hamasea totona. Iehova be unai bamona ia karaia be maoro lasi, a? Iehova be Davida sibona ia kara namo henia dainai Iena taravatu maorodia ia badinaia lasi, a? Baibel duahia taudia haida be unai bamona lalohadai idia abia.
17 To, Iehova ese heudahanai karana ena taravatu be goevadae lasi hahemaoro taudia dekenai ia henia, idia be taunimanima edia kudouna ai idia noho gaudia idia itaia lasi. Ena be taunimanima edia kudouna ai idia noho gaudia idia itaia lasi, to unai taravatu ese idia ia durua edia hahemaoro gaukara idia karaia namonamo totona. To, Iehova be taunimanima edia kudouna ai idia noho gaudia ia itaia diba. (Gen. 18:25; 1 Siv. 29:17) Unai dainai, ita gwau lasi Iehova ese unai goevadae lasi hahemaoro taudia dekenai taravatu aukana ia henia. Bema Iehova be unai bamona ia karaia, unai be hegeregere tau ta ese matana ia namo tauna ta ia doria mata galasi do ia karaia totona. Iehova be Davida bona Bataseba edia kudouna ai idia noho gaudia ia itaia bona ia diba idia helalo-kerehai momokani. Unai dainai, mai ena hebogahisi bona lalokau ida idia ia hahemaoro henia.
Iehova Ena Kara Maoromaoro Tahua Noho
18, 19. Dahaka ese ita do ia durua sibona ita atoa taravatu amo Iehova ita hahemaoro henia lasi totona?
18 Bema nega haida gau ta ita itaia bona ita laloa Iehova ia karaia karana be maoro lasi—hegeregere Baibel ai ita duahia sivaraina ta o iseda mauri lalonai ia vara gauna ta—namo lasi ita sibona eda taravatu amo Dirava ita hahemaoro henia. Namona be ita laloatao, ita be gau ibounai ita diba namonamo lasi bona iseda lalohadai be kerere o mai ena hetoana. Ita laloaboio lasi, “taunimanima edia badu ese Dirava ena kara maoromaoro ia havaraia diba lasi.” (Iam. 1:19, 20) Unai amo, iseda kudouna dekenai Iehova ita “badu henia noho” lasi.—Aon. 19:3.
19 Iesu bamona, namona be ita diba Iehova sibona be hegeregere dahaka kara be maoro bona namo gaudia edia taravatu ia atoa totona. (Mar. 10:17, 18) Ita hekwarahi Iehova ena taravatu dekenai “diba maoromaoro” ita abia. (Roma 10:2, NW; 2 Tim. 3:7, NW ) Unai gaudia ita abia dae bona iseda mauri lalonai Iehova ena ura ita badinaia amo ita hahedinaraia ita be “iena kara maoromaoro” ita tahua guna.—Mat. 6:33.
Oi Laloatao, A?
• Dahaka dainai Iehova ena kara maoromaoro ita tahua be mai anina bada?
• Edena dika rua ita dadaraia be namo?
• Edena dala ai Dirava ena kara maoromaoro ita tahua guna?
[Picture on page 9]
Iesu ese tatau rua be dubu dekenai idia guriguri ena parabole ia gwauraia amo dahaka ita dibaia?
[Picture on page 10]
Dina ibounai idia gaukara taudia bona hora tamona lalonai idia gaukara taudia ibounai edia davana ia henia hegeregere be maoro, a?