Inai Oi Diba, A?
Nega daudau lalonai Israela ai medu ia diho lasi dainai, unuseniai idia noho taudia be dahaka idia karaia ranu idia abia totona?
▪ October bona April huanai, Israela ai medu ia diho, bona nega haida medu ranuna be koura gabudia dekenai idia aru lao. To siahu negana ai, unai koura gabudia idia kaukau, bona reana hua haida lalonai medu ia diho lasi. Baibel negadiai idia noho taudia be edena dala ai ranu idia abia?
Idia ese ororo edia kahana dekenai guri idia geia, bona keru negana ai ia diho medu ranuna be ororo amo ia aru lao bona unai guri ia hahonua. Danu, ruma idia karaia neganai, guhi ena kahana idia hadihoa sisina, unai amo medu ranuna be guhi amo ia aru diho bona ranu guridia ia hahonua. Ruma bese momo be mai edia ranu guri, unuseni amo ranu idia abia diba.—2 King Taudia 18:31; Ieremia 6:7.
Danu, Israela taudia be tano amo ia daekau ranuna idia abia. Ororo gabudiai, keru negana ai ia diho medu ranuna be tano lalonai ia aru lao bona nadi gabudiai ia vareai, bena tano amo ia daekau lou. Nega momo unai ranu gabudia (Heberu gado ai, en) edia badinai hanua idia karaia, unai hanua edia ladana be, Ene Semese, Ene Rogele, bona Ene Gedi. (Iosua 15:7, 62) Ierusalema ai, tano henunai idia noho nadi gabudia idia geia, ranu be siti lalonai ia aru vareai totona.—2 King Taudia 20:20.
Ranu lasi gabudiai ranu guri idia geia (Heberu gado ai, beʼerʹ), hegeregere, Bere Sieba ai ranu guridia idia geia, tano henunai ranu idia abia totona. (Genese 26:32, 33) Buka torea tauna ta, André Chouraqui ia gwau: “Hari danu Israela taudia edia ranu abia dalana ita laloa neganai ita hoa.”
Abram (Aberahamo) be edena bamona ruma ai ia noho?
▪ Abram bona ena adavana be Kaldea ena taga bada hanuana, Uru dekenai, idia noho. To Dirava ena hereva dainai, unai hanua idia rakatania bona palai rumadia ai idia noho. (Genese 11:31; 13:12) Unai bamona idia karaia totona, idia dadaraia gaudia mani oi laloa.
Lagani 1922 ia lao 1934 huanai, Leonard Woolley be Uru hanuana—hari idia gwauraia Iraq—dekenai tano ia geia bona gau haida ia davaria. Ia davaria gaudia huanai be biriki rumadia ibounai 73. Unai ruma momo edia daiutu be ariara idia hagegea, unai ariara ena foloa be nadi amo idia karaia. Ariara ena huana kahana be ia diho sisina, unai amo ranu dikana be drein dekenai ia diho. Ruma badadia lalonai, vadivadi taudia edia daiutu mai edia toileti idia noho. Henunai idia noho daiutu haida be kisini mai ena lahi karaia gabudia, bona hesiai taudia edia mahuta gabudia idia noho. Atai daiutudia ai ruma bese idia noho, bona unuseni idia lao totona vadavada ta ia noho. Unai vadavada amo idia daekau lao, au amo idia karaia dehe ta—ariara ia hagegea dehe—dekenai, bona atai daiutudia edia iduara ai idia raka vareai.
Woolley ia gwau: “Ruma ta . . . , ena ariara be nadi amo idia karaia bona ena haba be peni kurokurona amo idia penia, bona ranu dikana kokia totona drein idia karaia, . . . daiutu 12 o ma haida idia noho danu, unai ese ia hahedinaraia edia noho dalana be namo herea. Bona unai bamona rumadia ai taga taudia, sitoa biagudia, hoihoi taudia, taravatu hadibaia taudia, bona unai bamona taudia ma haida idia noho.”
[Picture on page 13]
Ranu Guri, Horvot Mezada, Israel
[Credit Line]
© Masada National Park, Israel Nature and Parks Authority
[Picture on page 13]
Ruma ta ena laulau, Aberahamo ena negai
[Credit Line]
© Drawing: A. S. Whitburn