Iehova ese Oi Totona Ia Karaia Gaudia Laloa Noho
IESU ena toreisi lou murinai, iena hahediba taudia rua be Ierusalema amo Emausa dekenai idia raka lao. Luka ena Evanelia Bukana ia gwau: “Idia herevahereva noho lalonai, Iesu be idia dekenai ia mai bona idia ida ia raka hebou matamaia, to ena toana idia reaia.” Iesu be idia dekenai ia gwau: “ ‘Umui raka noho lalonai dahaka gaudia umui herevalaia?’ Bona mai lalohisihisi danu idia gini.” Dahaka dainai idia lalohisihisi? Badina idia laloa Iesu ese unai negai Israela taudia be Idau Bese taudia edia lohia dalana amo do ia hamauria. To, Iesu idia hamasea dainai, unai ia vara lasi bona ena hahediba taudia idia lalohisihisi.—Luka 24:15-21, NW; Kara 1:6.
Vadaeni, Iesu ese unai hahediba taudia rua ia hereva henidia. Baibel ia gwau Iesu ese “Mose bona Peroveta Taudia ibounai edia toretore amo ia matamaia, bona ia dainai Toretore Helagadia lalonai idia torea hereva edia anina be idia dekenai ia gwauraia.” Momokani, Iesu be tanobada ai ia noho neganai, mai anina bada gaudia haida idia vara! Iesu be unai gaudia ia herevalaia neganai, hahediba taudia edia lalohisihisi mamina ia ore bona idia moale. Unai adorahi ai, idia gwau: “Dala dekenai ita ia hereva henia bona Toretore Helagadia edia anina ia herevalaia goevagoeva neganai, iseda kudouna ia hamarerea momokani, ani?” (Luka 24:27, 32, NW ) Iesu ena hahediba taudia edia kara amo dahaka ita dibaia?
Gau ta Ia Guguru Lasi Neganai, Eda Hemami be Edena Bamona?
Emausa dalana ai idia raka hahediba taudia rua idia lalohisihisi badina idia laloa do ia vara gauna be ia guguru lasi. Edia hemami be Aonega Herevadia 13:12 ai ia noho herevana hegeregerena: “Bema tau ta ia laloa gau namona ta do ia abia, to unai gau totona nega daudau ia naria kava, unai be lalohisihisi ia davaria noho.” Unai hegeregerena, lagani momo lalonai Iehova ita hesiai henia taudia haida be guna ita laloa “hisihisi badana” be ia vara, bona hari ia ore vadaeni. To, ia do vara lasi dainai, ita lalohisihisi. (Mat. 24:21, NW; Apok. 7:14) Vaia, ita naria noho gauna ia guguru lasi neganai, nega haida ita lalohisihisi.
To, namona be ita laloatao, unai hahediba taudia rua be idia moale, badina Iesu ese ia durudia bona edia negai idia guguru peroveta herevadia idia laloa lou. Ena be ita ura do ia vara gauna ia guguru lasi, to namona be ita gaukara goada ita moale noho totona. Elda ta ladana Michael ia gwau: “Iehova ese ia do karaia lasi gaudia oi laloa momo lasi. To, ia karaia vadaeni gaudia oi laloa noho be namo.” Unai be sisiba namona!
Iehova ese Ia Karaia Vadaeni Gaudia
Iehova ese ia karaia vadaeni gaudia haida mani oi laloa. Iesu ia gwau: “Lau ia abidadama henia tauna be lau karaia gaukaradia do ia karaia danu, bona ia karaia gaukaradia ese lau karaia gaukaradia do idia hereaia.” (Ioa. 14:12, NW ) Hari inai negai, Dirava ena hesiai taudia be haroro gaukara badana idia karaia noho. Taunimanima 7 milioni mai kahana be hisihisi badana amo do idia roho mauri negana idia naria noho. Mani oi laloa, guna Iehova ena hesiai taudia be momo lasi, to hari tanobada hegegemadai Iehova ena Witnes taudia milioni momo be haroro gaukara idia karaia noho! Oibe, Iesu ena hereva, “ia karaia gaukaradia ese lau karaia gaukaradia do idia hereaia,” be hari Iehova ese ia hagugurua noho.
Iehova be dahaka gau ma haida ia karaia? Ia ese kudou maoro taudia ia durua tanobada dikana idia rakatania, bona mai maino bona lalotamona ai ia idia tomadiho henia taudia idia bamoa. (2 Kor. 12:1-4) Iehova tomadiho henia totona ita karaia diba gaudia mani oi laloa. Hegeregere, sibona emu laiberi o Kingdom Hall ai ia noho laiberi ai buka haida oi itaia. Eiava Watch Tower Publications Index, o kompiuta dekenai Watchtower Library CD-ROM oi gaukaralaia diba. Idia rekodia vadaeni Baibel drama ta oi kamonai henia. Vanegai lagani ena hebouhebou ta dekenai oi kamonai o itaia gaudia oi laloa lou. Unai sibona lasi, to iseda Keristani tadikaka taihu huanai ita moalelaia hebamo namona oi laloa. Iehova be ita dekenai Baibel ena hereva momokanidia ia hadibaia bona iena orea lalonai tadikaka taihu edia hebamo karana ita moalelaia diba dainai, maino bona lalotamona ai Iehova ita tomadiho henia!
Salamo torea tauna Davida ia gwau: “Lohiabada e, lauegu Dirava, oiemu durua karadia ai dekenai be momo herea. Tau ta be oiemu kara bamona ia karaia diba lasi.” (Sal. 40:5) Oibe, Iehova ese ia karaia vadaeni gaudia ita laloa noho, bona ita diba ia ese ita ia laloa bada dainai, unai ese ita ia hagoadaia, ita haheauka bona mai iseda kudouna ibounai ida iseda guba Tamana ita hesiai henia totona.—Mat. 24:13.
[Picture on page 31]
Iesu ese ena hahediba taudia ia durua Iehova ese ia hagugurua gaudia idia laloa totona
[Pictures on page 32]
Hebouhebou ta dekenai oi kamonai o itaia gaudia oi laloa lou