Iesu Ia Mase Ena Badina
“Taunimanima ena Natuna ia mai . . . ena mauri ia henia, taunimanima momo edia mauri davana karaia totona.”—MAREKO 10:45.
IESU ia diba dahaka do idia vara. Ia diba iena mauri lalonai hisihisi do ia davaria. To ia diba ena mauri lagani be 30 bamona neganai do ia mase, bona ia hegaegae unai bamona ia mase totona.
Baibel ese ia hahedinaraia Iesu ena mase be mai anina bada. Buka ta ia gwau Keristani Greek Revarevadia, o Taravatu Matamatana ai Iesu ena mase be nega 175 bamona ia hedinarai. To, dahaka dainai Iesu be hisihisi do ia abia bona ia mase? Unai ita diba be namo, badina iseda mauri lalonai Iesu ena mase be mai anina bada.
▪ Iesu be do idia vara gaudia ia diba Iesu ena mase negana ia kahirakahira neganai, nega momo ena hahediba taudia dekenai hisihisi bona mase do ia davaria dalana ia herevalaia. Pasova ginigabena ai Ierusalema idia lao henia noho lalonai, Iesu be ena aposetolo taudia 12 ia hamaoroa: “Taunimanima ena Natuna be dubu biagudia bona taravatu hadibaia taudia dekenai do idia henia. Bona idia ese ia hamasea herevana do idia gwauraia bona idau bese taudia dekenai ia do idia henia, bona idia ese ia do idia kirikirilaia, do idia kanudia, do idia dadabaia bona hamasea.”a (Mareko 10:33, 34) Dahaka dainai ia dekenai do idia vara gaudia ia diba?
Iesu be Heberu Revarevadia ai ena mase dalana idia perovetalaia herevadia momo ia diba. (Luka 18:31-33) Unai peroveta herevadia haida bona idia guguru daladia idia herevalaia Baibel siridia oi laloa.
Mesia be . . .
▪ Do idia samania siliva moni 30 abia totona.—SEKARAIA 11:12; MATAIO 26:14-16.
▪ Do idia botaia bona kanudia.—ISAIA 50:6; MATAIO 26:67; 27:26, 30.
▪ Au dekenai idia kokoa kau.—SALAMO 22:16; MAREKO 15:24, 25.
▪ Au dekenai ia noho neganai idia kirikirilaia.—SALAMO 22:7, 8; MATAIO 27:39-43.
▪ Idia hamasea to ena turia ta idia makohia lasi.—SALAMO 34:20; IOANE 19:33, 36.
Iesu be unai peroveta herevadia bona ma haida ia hagugurua. Ia be sibona ena goada dekenai ia tabekau lasi. Momokani, Iesu ese unai peroveta herevadia ia hagugurua karana amo ia hahedinaraia, ia be Dirava ese ia siaia.b
To, dahaka dainai Iesu be hisihisi ia abia bona ia mase?
▪ Iesu ia mase unai amo hepapahuahu badadia ia hamaoromaoroa Iesu be Eden umana ai ia vara hepapahuahu ia diba. Gwau-edeede aneruna ta ese Adamu bona Heva ia koia dainai Dirava idia kamonai henia lasi. Edia gwau-edeede karana dainai Iehova ena lohia siahuna ena maoro idia hepapahuahulaia. Danu, edia kara dika dainai ia vara hepapahuahu be inai: Hahetoho lalonai taunimanima be Dirava do idia badinaia noho eiava lasi.—Genese 3:1-6; Iobu 2:1-5.
Iesu be Satani ena hereva ia hakoikoia. Ia hahedinaraia Iehova ia lohia be maoro bona taunimanima ese Iehova idia badinaia diba. Iesu be Dirava ia kamonai henia “ela bona . . . hisihisi auna dekenai ia mase” neganai, Dirava ena lohia siahuna ia abia isi. (Filipi 2:8) Danu Iesu ia hamomokania hahetoho lalonai goevadae tauna be Iehova ia badinaia noho diba.
▪ Iesu ia mase unai amo taunimanima ia hamauria Peroveta tauna Isaia ia gwau, gwauhamata Mesiana ena hisihisi bona mase ese taunimanima edia kara dika ena davana ia karaia. (Isaia 53:5, 10) Iesu be unai ia lalopararalaia, bona mai ena ura ida “ena mauri ia henia, taunimanima momo edia mauri davana karaia totona.” (Mataio 20:28) Iena mase ese dala ia kehoa goevadae lasi taudia be Iehova idia tura henia namonamo totona, danu kara dika bona mase amo idia ia hamauria. Iena mase ese ita dekenai dala ia kehoa, Adamu bona Heva ese idia haboioa mauri hanaihanai tanobada ai ita abia lou totona.c—Apokalupo 21:3, 4.
▪ Oi karaia diba gauna Inai atikol lalonai, ai be Baibel ese Iesu ia herevalaia karana—ia be edeseni amo, ena mauri dalana, bona ia mase ena badina—ai herevalaia. Iesu ena sivarai momokanidia ita diba neganai, lalohadai kereredia ita hamaoromaoroa diba. Danu Iesu ena hereva ita badinaia neganai, hahenamo ita abia diba—hari mauri namona bona vaira negana ai mauri hanaihanai do ita abia. Unai hahenamo ita abia totona, Baibel be ita ia hadibaia dahaka ita karaia be namo.
▪ Iesu Keriso bona iena gaukara Iehova ena ura lalonai ita dibaia.—IOANE 17:3.
▪ Iesu ita abidadama henia bona eda mauri lalonai ita abia dae, ia be iseda Hahemauri Tauna.—IOANE 3:36; KARA 5:31.
Iehova ena Witnes taudia be mai moale ida oi do idia durua, Iesu Keriso oi dibaia totona, ia be Dirava “ena Natuna korikorina,” bona ia amo “mauri hanaihanai” ita abia diba.—Ioane 3:16.
[Footnotes]
a Iesu be nega momo sibona ia gwauraia “taunimanima ena Natuna.” (Mataio 8:20) Unai ese ia hahedinaraia ia be taunimanima ta sibona lasi, to danu Baibel ena peroveta herevana bamona, ia be “taunimanima natuna.”—Daniela 7:13, 14, BHğ.
b Iesu dekenai idia guguru peroveta herevadia ma haida oi diba totona, Baibel be Dahaka Ia Hadibaia? bukana ena apendiks ai ia noho kahana “Iesu Keriso be Idia Gwauhamatalaia Mesiana,” itaia. Iehova ena Witnes taudia ese idia karaia.
c Iesu be boubou gauna ta bamona ia mase karana dekenai diba ma haida oi abia totona, Baibel be Dahaka Ia Hadibaia? bukana ena karoa 5, “Mauri Davana—Dirava Ena Harihari Gauna Hereadaena,” itaia.