Tama Sina Edia Hereva
Natudia idia bada daekau neganai, tama sina ese hekwakwanai idauidau idia davaria matamaia. Oi bona emu natuna dekenai unai be daradara negana, to edena bamona ia oi durua ia kwalimu totona? Tanobada hegegemadai lalonai, tama sina haida edia hereva mani ita itaia.
GAU HAIDA IDIA IDAU
“Egu natuna mero ia maragi neganai, egu sisiba ia abia dae sibona. To ena mauri lagani be 13 ia lao 19 neganai, egu siahu ia matauraia lasi. Lau herevalaia gaudia bona lau gwauraia dalana ia henanadailaia.”—Frank, Canada.
“Egu natuna mero be guna ia herevahereva momo, to hari be lasi. Lau naria lasi lau dekenai ena lalohadai ia gwauraia totona, to ia lau nanadaia. Bona lau hekwarahi ena lalohadai lau dibaia totona, badina egu henanadai ia haerelaia haraga lasi.”—Francis, Australia.
“Haheauka karana be mai anina bada. Nega haida ai ura emai natudia ai gwau henia, to dala namona be, ai naria ela bona emai badu ia ore bena idia ai hereva henia!”—Felicia, United States.
HEREVAHEREVA KARANA
“Nega haida egu mauri lagani 17 kekenina be ena maoro totona ia hereva bona nega haida ia laloa lau be ena kara lau maumauraia. To, ia lau hamaoroa ia lau lalokau henia bona lau ura mauri lalonai ia kwalimu!”—Lisa, United States.
“Egu natudia idia maragi neganai, lau dekenai gau ibounai idia gwauraia. Ia auka lasi edia lalohadai lau diba totona. Hari, namona be edia kara do lau lalopararalaia bona idia ta ta lau matauraidia danu. Unai dala sibona amo lau dekenai edia lalohadai idia gwauraia diba.”—Nan-hi, Korea.
“Natudia ita koua gau haida idia karaia lasi totona, to unai sibona be hegeregere lasi. Namona be idia dekenai unai ena badina ita herevalaia bona eda hereva amo edia kudouna ita hamarerea. Bema ita hagoadaia edia lalohadai idia gwauraia totona, namona be ita kamonai namonamo, ena be idia gwauraia gaudia haida ita moalelaia lasi.”—Dalila, Brazil.
“Bema egu natuna kekeni ena kara lau hamaoromaoro, ia sibona ida unai lau karaia, to ma haida edia vairanai lasi.”—Edna, Nigeria.
“Nega haida egu natuna mero ida ai hereva neganai, ruma lalonai idia vara gaudia ese egu kamonai karana ia hadikaia bona ena hereva lau kamonai namonamo lasi. Unai ia itaia dainai, lau dekenai gau momo ia herevalaia lasi. Gau badana be ia lau kamonai henia namonamo, unai amo ena lalohadai ibounai ia gwauraia diba.”—Miriam, Mexico.
SIBODIA EDIA URA IDIA KARAIA DIBA
“Nega momo lau ura lasi egu natudia dekenai maoro lau henia sibodia edia ura idia karaia totona, unai dainai nega haida ai lalotamona lasi. Bona idia ida unai gauna ai herevalaia hebou. Lau gari dainai idia lau koua ena badina lau gwauraia, unai murinai idia ese sibona edia ura idia karaia ena badina idia gwauraia danu. Unai amo ai lalotamona bona maoro lau henia edia ura idia karaia totona, to lau atoa taravatu ena hetoana idia hanaia lasi.”—Edwin, Ghana.
“Lauegu natuna mero be motabaik ta ia ura. To ena lalohadai lau abia dae lasi dainai, ia lau gwau henia bona motabaik ia abia ena dika ibounai lau gwauraia, to nega lau henia lasi ena lalohadai ia gwauraia totona. Unai ese ia habadua bona ena lalona ia hadaia ta do ia abia! To dala ma ta lau tohoa. Egu natuna lau hagoadaia tahua gaukara haida ia karaia, unai amo do ia diba motabaik ta hoia be mai ena dika, bona ena kahana haida bona laiseni hoia totona moni bada do ia halusia. Bona danu ia lau hamaoroa kongrigeisen lalonai lo Keristani taudia edia heduru do ia tahua. To gabeai lau laloparara, namo lasi lau badu bona ia lau gwau henia, to namona be lau hagoadaia ena lalohadai ia gwauraia totona. Unai amo ena kudouna lau veria diba.”—Hye-young, Korea.
“Emai natudia ai koua lasi edia ura idia karaia totona, to ai hamaoroa ai atoa taravatu ena hetoana idia hanaia lasi. Bona unai bamona idia karaia dainai, maoro ai henia edia ura gaudia ma haida idia karaia totona. Ai ura idia diba idia do ai koua lasi edia ura idia karaia totona, to gau badana be ai atoa taravatu idia badinaia, bema lasi, panisi do idia abia.”—Dorothée, France.
“Lauegu taravatu lau haidaua lasi. Bema egu natudia idia kamonai, idia dekenai maoro lau henia edia ura idia karaia totona. Hegeregere, ruma dekenai idia giroa lou ena nega ai halataia sisina. To bema gwaumaoro idia abia lasi bona ruma dekenai idia mai leiti, panisi do idia abia.”—Il-hyun, Korea.
“Bema gaukara tauna ia kamonai bona maduna ia huaia namonamo, ena bosi ese ia dekenai maduna ma haida do ia henia. Unai hegeregerena, egu natuna mero ia diba, bema ai atoa taravatu hegeregerena ia kamonai bona maduna ia huaia namonamo, maoro ai henia ena ura gaudia ma haida ia karaia totona. Egu natuna ia diba, bema gaukara tauna be ena maduna ia hagugurua lasi, panisi do ia abia, bona ena bosi ese maoro do ia henia lasi gaukara ma haida ia karaia totona.”—Ramón, Mexico.
[Blurb on page 30]
‘Mero dekenai mauri dala maorona oi hadibaia, ia buruka neganai, unai dala do ia rakatania lasi.’—Aonega Herevadia 22:6
[Box/Pictures on page 31]
FAMILI SIVARAINA
“Natudia Naria Karana be Hahenamo Ta”
Joseph: Egu natuna kekeni rua, mauri lagani 17 bona 13 edia lalohadai lau kamonai be gau badana. Mai momokani ida egu kerere lau gwauraia hedinarai bona mai hemataurai ida idia lau hereva henia, unai ese emai herevahereva karana ia hanamoa. Unai dainai lau mamia matamata taudia naria karana be hahenamo ta, bona Dirava lau tanikiu henia badina Baibel amo hakaua hereva namodia ai abia.
Lisa: Egu natuna kekeni ena mauri lagani be 13 neganai, lau mamia nega bada ia ida lau noho be namo. Lau laloatao nega bada lau atoa ia lau kamonai henia, hereva henia, bona hagoadaia totona. Lau bona egu adavana ese emai natudia kekeni ai hagoadaia edia hemami idia gwauraia hedinarai bona unai ai matauraia. Lau hekwarahi Iamesi 1:19 ena hereva lau badinaia totona, namona be lau ‘kamonai haraga, to lau hereva haraga lasi.’
Victoria: Egu sinana be egu turana namona. Ia be hebogahisi bona haida ia laloa bada hahinena, taunimanima ibounai be unai bamona ia kara henia. Lau mamia egu sinana be mai momokani ida unai ia karaia. Ma ta ese ena gabu ia abia diba lasi.
Olivia: Egu tamana be hebogahisi bona kara namo tauna. Ena be ai dekenai gau momo idia noho lasi, to egu tamana ese tauanina dalanai ma haida ia durua. Ena be nega haida ia kara auka, to nega namona ai moalelaia hebou danu. Ia be tamana namo hereana ta bona lau moale ia be lauegu tamana!
“Nega be Lasi Ai Hesiku Totona!”
Sonny: Bema emai natudia kekeni be mai edia hekwakwanai, ai helai bona unai ai herevalaia. Mai momokani ida emai lalohadai ai gwauraia bona Baibel ena hakaua hereva hegeregerena abia hidi ai karaia. Danu, lau bona Ynez ai ura emai natudia kekeni be Keristani taudia goadadia idia bamoa. Emai turadia be idia edia turadia bona edia turadia be emai turadia danu.
Ynez: Ai be gau ibounai ai karaia hebou. Bona ai be Iehova ena Witnes taudia dainai, hesiai gaukara, sibona emai stadi bona ruma bese Baibel stadi dekenai ai bisi bada, bona dika idia vara neganai heduru ai henia bona Kingdom Hall haginia gaukara ai durua. Unai gaudia sibona ai karaia lasi, to moale karadia ai karaia danu. Nega be lasi ai hesiku totona!
Kellsie: Egu tamana be kamonai namonamo tauna, bona nega ibounai abia hidi badana ta ia do karaia lasi neganai, emai lalohadai ia kamonai guna. Hanaihanai egu sinana ia noho, lau ia durua bona egu hereva ia kamonai totona.
Samantha: Egu sinana ena kara dainai lau mamia lau be mai anina bada, lau ia lalokau henia bona ia laloa bada, ena be unai ia diba lasi. Bona egu hereva ia kamonai. Unai dainai inai hetura karana be gau ta ida lau senisia diba lasi.
[Pictures]
Camera ruma besena: Joseph, Lisa, Victoria, Olivia bona Isabella
Zapata ruma besena: Kellsie, Ynez, Sonny, bona Samantha
[Picture on page 30]
Tama sina ese natudia dekenai maoro idia henia edia ura idia karaia totona, to taravatu danu idia atoa be namo