Dirava Kahirakahira Oi Lao

“Kara Gunadia be Do Idia Laloa Lou Lasi”

MEMORI haida ese eda lalona idia hanamoa diba, hegeregere eda lalokau taudia ida ita abia nega namodia ita laloa lou neganai, ita moale. To, memori haida ese eda lalona idia hahisia. Guna oi dekenai idia vara gau dikadia oi laloa lou neganai, oi lalohisihisi, a? Bema oibe, reana do oi laloa, ‘Inai memori dikadia do lau laloaboio, a?’ Unai henanadai ena haere be peroveta tauna Isaia ese ia hahedinaraia, bona unai ese ita do ia hagoadaia.​—⁠Isaia 65:17 duahia.

Iehova ese memori dikadia idia havaraia gaudia do ia haorea. Edena dala ai? Inai tanobada dikana mai ena hisihisi ibounai do ia kokia bona tanobada be gabu namona ai do ia halaoa. Isaia amo Iehova ia gwauhamata: “Lau ese tanobada matamata bona guba matamata lau karaia noho.” Unai gwauhamata ita lalopararalaia neganai eda helaro ia hagoadaia.

Guba matamata be dahaka? Baibel ese ia herevalaia gaudia rua amo haere do ita dibaia. (1) Baibel torea taudia ma rua ese guba matamata idia herevalaia bona unai be tanobada ai do idia vara gau namodia ida idia gwauraia hebou. (2 Petero 3:13; Apokalupo 21:1-4) (2) Baibel ai inai hereva “guba” ese lohia siahuna o gavamani ia laulaulaia. (Isaia 14:4, 12; Daniela 4:25, 26) Unai dainai, guba matamata be gavamani matamata, bona ia sibona be hegeregere tanobada ai kara maoromaoro ia havaraia totona. Gavamani tamona sibona ese unai ibounai do ia hagugurua, ia be Dirava ena Basileia, guba gavamanina unai, Iesu ese ita ia hadibaia do ita gurigurilaia. Unai Basileia ese Dirava ena ura tanobada ibounai lalonai do ia karaia.​—⁠Mataio 6:9, 10.

Tanobada matamata be dahaka? Haere maorona dibaia totona, Baibel ese gau rua ia herevalaia. (1) Baibel ai nega momo inai hereva “tanobada” ese taunimanima ia laulaulaia, to tanobada korikorina lasi. (Salamo 96:1) (2) Baibel ia peroveta Dirava ena lohia henunai, tanobada ibounai dekenai abidadama taudia be kara maoromaoro ena anina do idia dibaia. (Isaia 26:9) Unai dainai tanobada matamata ese Dirava ena lohia siahuna bona ena kara maoromaoro taravatudia idia badinaia taudia ia laulaulaia.

Iehova ese memori dikadia idia havaraia gaudia do ia haorea dalana oi lalopararalaia, a? Kahirakahira Iehova ese ia gwauhamatalaia guba matamata bona tanobada matamata do ia havaraia.a Unai nega ai, memori dikadia idia havaraia gaudia​—⁠tauanina, lalona, bona hemami dekenai ita abia hisihisidia​—⁠do idia ore. Abidadama taudia ese mauri do idia moalelaia, bona dina ta ta ai gau namodia do idia laloa.

To, hari eda lalona idia hahisia gaudia be edena bamona? Isaia amo Iehova ma ia gwauhamata: “Kara gunadia be do idia laloa lou lasi, do idia laloaboio momokani.” Ita davaria hisihisi ibounai be metairametaira do ita laloaboio. Oi ura unai do ia vara, a? Bema oibe, namona be vaira nega namona ia gwauhamatalaia Diravana kahirakahira oi lao dalana oi dibaia.

[Footnote]

[Blurb on page 15]

Iehova ese memori dikadia idia havaraia gaudia do ia haorea.