Nega be Kwadogi Dainai Haroro Goadalaia
“Dirava ena hereva do oi harorolaia goadagoada.”—2 TIM. 4:2.
ANINA OI GWAURAIA DIBA, A?
Dahaka dainai aposetolo edia negai Keristani taudia idia haroro goadagoada?
Edena dala ai ita haroro goadagoada diba?
Dahaka dainai hari haroro gaukara be mai anina bada?
1, 2. Edena henanadai do ita herevalaidia?
TAUNIMANIMA haida edia moni gaukara be dika idia davaria taudia idia durua bona hamauria. Hegeregere, ruma ta be lahi ese ia araia neganai, lahi habodoa taudia be taunimanima hamauria totona idia lao haraga.
2 Ita, Iehova ena Witnes taudia, ita ura taunimanima ita durua bona hamauria danu. Oibe, Basileia ena sivarai namona harorolaia gaukarana be mai anina bada, unai dainai ita karaia namonamo bona ita haraga be namo. Timoteo Iharuana 4:2 ai, aposetolo Paulo ia gwau: “Dirava ena hereva do oi harorolaia goadagoada.” Grik herevana idia hahanaia “harorolaia goadagoada” ena anina ma ta be nega ita haorea lasi, to ita gaukara haraga. Vadaeni, Paulo ena hereva anina be dahaka? Edena dala ai ita haroro goadagoada diba? Bona dahaka dainai unai gaukara ita karaia haraga be mai anina bada?
DAHAKA DAINAI HARORO GAUKARA ITA GOADALAIA?
3. Dahaka do ia vara bema taunimanima ese sivarai namona idia abia dae? Bona dahaka do ia vara bema idia dadaraia?
3 Sivarai namona harorolaia gaukarana amo taunimanima ita hamauria diba, unai dainai unai gaukara ita goadalaia be namo. (Roma 10:13, 14) Baibel ia gwau: “Sedira lau ese tau dikana do lau sisiba henia ia be do ia mase. To bema iena kara dika ia rakatania, bona kara maoromaoro ia karaia, ia be do ia mauri. . . . Lau ese iena kara dika, guna ia karaia gaudia do lau gwauatao.” (Ese. 33:14-16) Sivarai namona idia harorolaia taudia dekenai, Baibel ma ia gwau: “Oi sibona bona oi dekenai idia kamonai taudia do oi hamauria.”—1 Tim. 4:16; Ese. 3:17-21.
4. Dahaka dainai aposetolo edia negai haroro gaukara be mai anina bada?
4 Paulo ese Timoteo ia henia sisibana ita lalopararalaia totona, namona be inai stadi ena siri badana bona ena badina siridia ita duahia. Ia gwau: “Nega namodia bona nega dikadia ai, Dirava ena hereva do oi harorolaia goadagoada. Mai boga-auka ida bona hadibaia namonamo dalana ai, idia do oi sisiba henia, oi hereva auka henia, bona oi hagoadaia. Badina nega do ia mai bona idia ese hereva momokani do idia ura henia lasi. To sibodia edia ura hegeregerena, hadibaia taudia do idia abia, idia ura henia gaudia sibona idia kamonai totona. Bona idia ese hereva momokani do idia kamonai henia lasi.” (2 Tim. 4:2-4) Iesu ia gwau momo be hereva momokani do idia dadaraia. (Mat. 13:24, 25, 38) Unai dainai Timoteo ese kongrigeisen lalonai danu ‘Dirava ena hereva ia harorolaia goadagoada’ be namo, unai amo hahediba hereva koikoidia ese Keristani taudia do idia hakaua kerere lasi. Badina bema ia haroro lasi, momo ese edia mauri idia haboioa diba. Hari iseda nega be edena bamona?
5, 6. Taunimanima be edena bamona hahediba herevadia idia ura henia?
5 Hari inai negai, gabu momo dekenai aposteit karana be ia bada herea. (2 Tes. 2:3, 8) Edena hahediba herevadia ese taunimanima idia hakaua kerere noho? Tano momo ai taunimanima ese evolusen be tomadiho ena hahediba herevana ta bamona idia abia dae. Ena be saiens idia gaukaralaia evolusen idia hamomokania totona, to hari evolusen be tomadiho ta bamona idia halaoa bona Dirava idia dadaraia. Hahediba herevana ma ta be, Dirava be ita ia laloa lasi, unai dainai ia ita laloa bada be anina lasi. Dahaka dainai taunimanima milioni momo be unai hahediba herevadia idia abia dae? Unai hahediba hereva rua dainai, taunimanima idia laloa sibodia edia ura idia karaia diba, badina ta ese idia do ia hahemaoro henia lasi. Unai lalohadai ese taunimanima momo ia hakaua kerere noho.—Salamo 10:4 duahia.
6 Ma danu, dubu idia lao taudia haida idia ura edia pris o pasto ese inai hereva idia gwauraia: ‘Herevana dahaka oi karaia, Dirava be oi ia lalokau henia.’ Eiava ‘Tomadiho ena moale karadia bona aria idauidau o kaivakuku bona laulau oi tomadiho henia neganai, Dirava ese oi do ia hanamoa.’ To idia laloparara lasi unai gaudia ese idia do ia hamauria lasi. (Sal. 115:4-8) To bema ita durudia bona Baibel ena hereva idia lalopararalaia, Dirava ena Basileia ese do ia havaraia hahenamo idia abia diba danu.
HARORO GOADAGOADA ANINA BE DAHAKA?
7. Edena dala ai ita hahedinaraia taunimanima ita laloa bada?
7 Doketa namona be opereisen ia karaia neganai, ia karaia gauna do ia laloa bada badina bema unai ia karaia lasi, ia ivaia tauna ia mase diba. Unai hegeregerena, iseda Keristani haroro gaukara ita laloa bada be namo. Anina be taunimanima ese idia laloa bada gaudia, bona edia henanadai ita laloa namonamo be namo. Danu, kamonai taudia momo ita davaria totona, edia noho dalana hegeregerena eda sediual ita haidaua be namo.—Roma 1:15, 16; 1 Tim. 4:16.
8. Haroro goadagoada ena anina be dahaka?
8 Ita haroro goadagoada totona mai anina bada gaudia ita atoa guna be namo. (Genese 19:15 duahia.) Hegeregere, bema doketa ese oi ia sekea murinai, ia gwau: “Oiemu gorere be ia bada dainai, hua tamona lalonai heduru oi tahua be namo.” Dahaka do oi karaia? Maoromaoro doketa do oi rakatania bona emu gorere hanamoa daladia do oi tahua, a? Lasi, to doketa ena hereva do oi kamonai namonamo guna, bena ruma dekenai oi giroa neganai, emu gorere hanamoa dalana do oi abia hidi.
9. Dahaka dainai ita diba Paulo be Efeso dekenai ia haroro goadagoada?
9 Paulo be Efeso elda taudia ia tore henia neganai, Asia provinsi ai ia karaia haroro gaukarana ia herevalaia. Unai sivarai amo Paulo ena haroro goadagoada karana ita dibaia. (Kara 20:18-21 duahia.) Dina ginigunana Asia dekenai ia ginidae neganai, ia be ruma ta ruma ta ai sivarai namona ia harorolaia. Lagani rua lalonai, ia be “dina ta ta ai, Turano ena sikuli rumana ai hereva ia henia.” (Kara 19:1, 8-10) Oibe, Paulo be taunimanima ia laloa bada dainai haroro gaukara ia goadalaia. To, namo lasi ita laloa sivarai namona “harorolaia goadagoada” karana be gaukara metauna. Lasi, to namona be iseda mauri lalonai haroro gaukara ita atoa guna.
10. Bible Student taudia idia haroro goadagoada dainai, dahaka hahenamo ita abia?
10 Lagani 1914 do lasi neganai, Bible Student taudia haida sibona be sivarai namona idia harorolaia matamaia. Idia hahedinaraia idia be haroro goadagoada taudia. Danu, ena be idia be momo lasi, to idia diba idia be nega dokonai idia noho dainai Basileia ena sivarai idia harorolaia goadagoada. Niuspepa handred momo lalonai haroro herevana idia halasia bona slaid piksa bona muvini piksa ladana “Photo-Drama of Creation” idia hahedinaraia. Unai Bible Student taudia be haroro gaukara idia goadalaia dainai, taunimanima milioni momo idia kamonai, bona hari ita danu be Basileia ena sivarai namona ita diba.—Salamo 119:60 duahia.
HARORO GOADAGOADA NOHO
11. Dahaka dainai haida be haroro gaukara idia hesikulaia?
11 Gau idauidau ese iseda haroro gaukara idia hadikaia diba. Satani be inai tanobada ena lalona veria gaudia ia gaukaralaia eda hesiai gaukara ia hadikaia totona. (1 Pet. 5:8; 1 Ioa. 2:15-17) Haida be guna haroro gaukara idia laloa bada, to gabeai idia hesiku. Hegeregere, Keristani tauna ta ladana Dema be guna Paulo ida ia gaukara hebou, to tanobada gaudia ese ena lalona idia veria. Unai dainai, hekwakwanai ta ia vara neganai, Dema ese Paulo ia rakatania.— 2 Tim. 4:10; File. 23, 24.
12. Nega vaira ai dahaka hahenamo do ita abia? Bona hari edena gaukara be mai anina bada?
12 Bema ita ura haroro gaukara ita goadalaia, tanobada ena lalona veria gaudia ita dadaraia be namo. Bona ita hekwarahi ‘mauri korikorina ita dogoatao auka’ totona. (1 Tim. 6:18, 19) Ita diba Dirava ena Basileia henunai tanobada ai mauri hanaihanai do ita abia bona gau idauidau do ita moalelaia. To namona be hari taunimanima ita durua Aramagedono amo idia roho mauri totona, badina unai gaukara be gabeai do ita karaia lasi.
13. Dahaka ese ita do ia durua haroro gaukara ita goadalaia totona?
13 Tanobada taudia momo be Iehova idia diba lasi. Dahaka ese ita do ia durua haroro gaukara ita goadalaia totona? Laloatao, guna ita danu be Dirava ita diba lasi bona ita be helaro lasi. To gabeai, Iehova bona Iesu ita dibaia, bona hari ma haida ita hadibaia diba. (Efeso 5:14 duahia.) Paulo ia gwau: “Emui raka dalana do umui naria namonamo, kavakava taudia bamona do umui raka lasi, to aonega taudia bamona do umui raka. Emui nega do umui gaukaralaia namonamo, badina inai nega be nega dikana.” (Efe. 5:15, 16) Tanobada dikana ai ita noho dainai, namona be eda hesiai gaukara lalonai eda ‘nega ita gaukaralaia namonamo,’ unai amo Iehova kahirakahira ita noho.
MAI ANINA BADA NEGANA AI ITA NOHO
14-16. Dahaka dainai hari Basileia sivaraina harorolaia gaukarana be mai anina bada?
14 Idaunega amo ema bona hari haroro gaukara be mai anina bada. To hari ita haroro goadagoada be namo. Lagani 1914 amo ema bona hari, ita itaia Baibel ena peroveta herevadia idia guguru noho. (Mat. 24:3-51) Tanobada hegegemadai taunimanima be dika badadia idia davaria noho. Ena be bese goadadia ese maino idia karaia, to idia dekenai niuklia tuari kohudia 2,000 mai kahana idia noho. Gavamani ena ripoti haida ese idia hahedinaraia niuklia tuari kohudia haida be idia boio. Terorist taudia ese unai kohu idia henaoa, a? Haida idia gwau terorist taudia ese idia hamatamaia tuari ta amo taunimanima ibounai idia hamasea diba. To, taunimanima be tuari sibona amo idia mase lasi.
15 The Lancet bona University College London edia lagani 2009 ripoti ta ia gwau: “Keru bona siahu negadia idia idau dainai, taunimanima momo be gorere idauidau idia davaria noho.” Motumotu momo dekenai davara ia daekau, medu ia diho lasi, abata, gorere idauidau, lai badadia, bona aniani be lasi dainai tuari idia vara. Oibe, tuari bona dika badadia dainai taunimanima momo idia mase noho.
16 Haida idia laloa niuklia tuari ia vara neganai, Iesu ese dina gabedia totona ia perovetalaia gaudia do idia vara. To, taunimanima momo be Iesu ena peroveta herevana ena anina korikori idia lalopararalaia lasi. Lagani momo lalonai idia vara gaudia ese idia hamomokania, Keriso be ia “noho” vadaeni bona inai tanobada dikana ena dokona be kahirakahira. (Mat. 24:3) Iesu ena peroveta herevadia ibounai be hari idia guguru noho. Unai dainai, inai be nega namona taunimanima ese Dirava idia tura henia totona, bona iseda haroro gaukara amo idia ita durua diba.
17, 18. (a) Nega dokona ai ita noho dainai dahaka ita karaia be namo? (b) Dahaka dainai haida be Basileia ena sivarai idia abia dae?
17 Nega be kwadogi dainai, namona be ita hahedinaraia Iehova ita lalokau henia, bona ia henia gaukarana ita hagugurua. Paulo ese Roma Keristani taudia dekenai ia gwauraia herevana be mai anina bada ita dekenai, ia gwau: “Umui be hari ita noho negana umui diba. Hari be mahuta amo umui noga negana, badina iseda hahemauri be kahirakahira, guna abidadama taudia ai ita lao negana bamona lasi.”—Roma 13:11.
18 Dina gabedia edia peroveta herevadia idia guguru dainai, taunimanima idia laloparara Dirava idia tura henia be gau badana. Haida be Basileia ena sivarai idia abia dae badina idia itaia gavamani be idia ia durua lasi. Oibe, gavamani ese moni ena hekwakwanai, niuklia tuari, taravatu utua karadia, o tanobada hamiroa karana idia hanamoa diba lasi. Ma haida be Basileia ena sivarai idia abia dae badina edia ruma bese lalonai hekwakwanai momo idia vara, hegeregere idia gorere, edia headava ia dika, o edia lalokau tauna ta ia mase. Ita haroro neganai unai bamona taudia ita durua diba.
NEGA BE KWADOGI DAINAI HARORO GOADALAIA
19, 20. Dahaka dainai Keristani taudia momo be edia noho dalana idia haidaua?
19 Keristani taudia momo idia diba nega be kwadogi dainai edia haroro gaukara idia habadaia noho. Hegeregere, Ecuador ai headava matamata tau bona hahine ta be lagani 2006 ena dina tamona hebouhebou ladana “Vaira Kahana Sibona Raraia Noho” dekenai idia lao murinai, edia lalona idia hadaia kohu momo do idia tahua lasi. Edia kohu haida idia hoihoilaia, edia abitorehai davana idia haloua, bena hua toi lalonai edia ruma badana idia rakatania bona ruma maragina ta idia abia. Daudau lasi murinai heduru painia gaukara idia karaia, bona sekit tauna ena hereva hegeregerena pablisa momo lasi kongrigeisen ta idia bamoa.
20 United States ai tadikaka ta ia gwau: “Lagani 30 gunanai lau bona egu adavana ai bapatiso. Lagani 2006 ena hebouhebou ai lao murinai, kohu momo lasi maurina do ai noholaia dalana ai kikilaia hebou.” (Mat. 6:19-22) Edia ruma ibounai be toi, mai edia tano, motuka haida, bouti ta bona treila rumana ta. Edia nega bona goada bada be kohu momo tahua karana dekenai idia halusia dainai, idia laloparara namona be nega idia atoa ful-taim hesiai gaukara idia karaia totona. Lagani 2008 ai edia natuna kekeni ida regula painia gaukara idia matamaia. Idia itaia taunimanima be mai moale ida Dirava ena Hereva idia kamonai bona lalopararalaia neganai, idia danu idia moale. Tadikaka ma ia gwau: “Tadikaka ida ai gaukara hebou karana ai moalelaia! Danu, ai be pablisa momo lasi gabuna ta dekenai ai haroro diba. Oibe, Iehova hesiai henia karana ese ai ia durua ia kahirakahira ai lao totona.”
21. Dahaka dainai hari iseda haroro gaukara be mai anina bada?
21 Ita diba kahirakahira “hahemaoro negana” ai “Dirava idia badinaia lasi taudia be do idia ore momokani.” (2 Pet. 3:7) Dirava ena Hereva ita diba dainai, ia mai noho hisihisi badana bona nega vaira ena helaro ita harorolaia goadagoada be namo. Unai bamona ita karaia neganai, ita hahedinaraia Dirava bona taunimanima ita lalokau henia.