Kara Namo ese Badu Ia Koua

NETHERLANDS ai, Witnes taudia rua, George bona ena adavana Manon, be hahine burukana ta ladana Rie idia haroro henia neganai, ia be mai badu ida idia ia hereva henia. Gabeai, Rie ese ia hamaorodia iena adavana ginigunana, iharuana bona natuna mero be idia mase vadaeni. Danu, ia be roki gorere ia abia. Ena be edia hereva ia kamonai, to ia hereva henidia namonamo lasi.

Toana be Rie be sibona ia noho dainai ia lalohisihisi. Unai dainai George be Manon ia hamaoroa idia giroa lou neganai, ia totona flaoaflaoa idia abia lao be namo. Flaoaflaoa idia laohaia neganai, Rie ia moale bada. To, unai be nega namona lasi dainai, nega ma ta idia makaia idia giroa lou totona. George bona Manon idia giroa neganai, Rie idia davaria lasi. Ena be idia giroa loulou, to ia noho lasi, bona idia laloa reana ia ura lasi idia ia hereva henia.

Nega ta, George ese Rie be ruma ai ia davaria. Rie ia sori bona ia gwau idia makaia dinana ai ia noho lasi, badina ia be hospital ai ia noho. Ia gwau: “Oi diba dahaka? Lau umui rakatania neganai, lau be Baibel lau duahia matamaia!” Idia herevahereva murinai, Baibel stadi idia hamatamaia.

Guna Rie be badu momo hahinena, to Baibel ia stadilaia neganai, ena kara ia haidaua. Ena be ruma sibona ai ia noho, to ena vadivadi taudia ia haroro henidia. Danu, gorere dainai kongrigeisen heboudia dekenai ia lao lasi, to tadikaka taihu ese ia idia vadivadi henia neganai ia moale. Ena mauri lagani be 82 neganai, sekit hebouhebou ta dekenai bapatiso ia abia.

Rie ia mase bena hua haida murinai, ia torea ane ta idia davaria. Ena ane lalonai buruka taudia be sibodia idia noho ena lalohisihisi, bona idia dekenai kara namodia ita karaia ena namo ia herevalaia. Manon ia gwau: “Unai ane ese egu kudouna ia hamarerea, bona Iehova ese ai ia durua Rie dekenai kara namo ai hahedinaraia dainai, lau moale.”

Oibe, Iehova ena haheitalai ese ita ia durua ma haida dekenai lalokau, bona kara namo ita hahedinaraia totona. (Efe. 5:1, 2) Momokani, ‘ita be Dirava ena hesiai taudia’ dainai eda haroro gaukara ai ‘hebogahisi ita hahedinaraia’ neganai, unai ese anina namona ia havaraia diba.​—⁠2 Kor. 6:4, 6.