Ta be Eda Guriguri Ia Kamonai, A?

“Guna lau daradara Dirava ia noho o lasi. Nega haida lau guriguri sibona, herevana ta ia kamonai o lasi. To reana ta ia kamonai. Lau moale lasi bona lau laloa egu mauri be anina lasi. Lau ura lasi lau abia dae Dirava ia noho, badina lau laloa manoka taudia sibona ese Dirava idia abidadama henia.”​—⁠PATRICIA,a IRELAND.

OI DANU be Patricia bamona oi laloa, a? Ena be oi daradara Dirava ia noho o lasi, to oi guriguri, a? Taunimanima momo danu be unai bamona idia laloa. Mani inai oi laloa.

◼ Ripoti ta ia gwau, Britain taudia 2,200 amo taunimanima 22 pesen idia abia dae tanobada ia karaia Diravana ia noho bona eda guriguri ia kamonai. To, taunimanima 55 pesen be nega ta ta ai idia guriguri.

◼ Ripoti ma ta ia gwau, tano badadia foa ai idia noho taudia 10,000 amo taunimanima 30 pesen be idia abia dae lasi Dirava ia noho, to idia guriguri sibona.

Dahaka Dainai Idia Daradara?

England tauna ladana Allan, ia gwau: “Guna lau abia dae lasi Dirava ia noho, badina lau laloa taunimanima ese dubu idia haginia, taunimanima idia biagua bona moni idia abia totona. Danu, bema Dirava ta ia noho, vadaeni tanobada ai hisihisi momo do idia vara lasi. To, nega haida lau helai bona lau herevahereva, toana be gau ta lau hereva henia. Danu sibona lau nanadaia, ‘Edena bamona lau vara?’”

Unai bamona taudia be badina idauidau dainai idia daradara Dirava ese edia guriguri ia haerelaia o lasi. Nega momo, idia daradara badina inai henanadai edia haere idia davaria lasi:

◼ Havaraia Tauna ta ia noho, a?

◼ Dahaka dainai dubu taudia ese dika idia havaraia?

◼ Dahaka dainai Dirava ese hisihisi ia koua lasi?

Bema unai henanadai edia haere oi diba, Dirava do oi guriguri henia, a?

[Footnote]