Iesu Ia Gwauhamata Kara Dika Tauna Be Guba Maurina Do Ia Abia, A?

Unai henanadai ia vara badina Iesu ese ia badinai idia tauadae kara dika tauna dekenai ia gwauhamata, vaira negana ai Paradaiso lalonai mauri do ia abia. Iesu ia gwau: “Hari dina oi lau hamaoroa momokani, oi be lau ida Paradaiso ai do ita noho.” (Luka 23:43) Unai siri ai Iesu ese Paradaiso do ia noho gabuna ia gwauraia lasi. Vadaeni, Iesu ena hereva anina be unai kara dika tauna be ia ida guba ai do idia noho, a?

Do ita tahua gauna ginigunana be, unai kara dika tauna ia hegeregere guba maurina do ia abia eiava lasi. Guba maurina do idia abia taudia be ranu lalonai idia bapatiso bona lauma helaga idia abia, anina be Iesu ena hahediba taudia ai idia lao bona Dirava ese ena natudia ai ia halaodia. (Ioane 3:3, 5) Danu, namona be Dirava ena kara maoromaoro taravatudia idia badinaia bona kara namodia, hegeregere kara momokani, Dirava badinaia karana, bona hebogahisi idia hahedinaraia. (1 Korinto 6:9-11) Danu, namona be Dirava bona Keriso idia badinaia noho ela bona mase. (Luka 22:28-30; 2 Timoteo 2:12) Bema unai gaudia idia karaia, vadaeni Dirava ese idia do ia hatorea isi lou bona idia hegeregere guba dekenai gaukara badana idia karaia totona, anina be, Keriso ida lagani 1,000 lalonai king bona hahelaga gaukara do idia karaia bona taunimanima do idia lohiaia.​—Apokalupo 20:6.

To, Iesu badinai idia tauadae kara dika tauna be ena mauri lalonai taravatu utua karadia ia karaia ela bona ia mase. (Luka 23:32, 39-41) Momokani, ia be mai hemataurai ida Iesu dekenai ia gwau: “Iesu e, emu Basileia lalonai oi vareai neganai lau oi laloa.” (Luka 23:42) To ia be ia bapatiso lasi, Iesu ena hahediba tauna ai ia lao lasi bona Dirava ese ena natuna ai ia halaoa lasi, danu ena mauri lalonai kara maoromaoro bona abidadama ia hahedinaraia lasi. Unai dainai, oi laloa ia maoro Iesu ese unai tauna ia gwauhamata henia, ena hahediba taudia​—⁠Dirava idia badinaia ela bona idia mase taudia​—⁠ida guba ai do ia lohia, a?​—Roma 2:6, 7.

Inai haheitalai oi laloa: Bema tau ta be emu moni ia henaoa dainai oi ia noia ena dika oi gwauatao, reana kota dekenai ia do oi abia lao lasi. To ia do oi abidadama henia emu bisinesi o famili ia naria totona, a? Lasi, ani? Unai bamona maduna be oi abidadama henia diba tauna ta dekenai do oi henia. Unai hegeregerena, namona be guba maurina idia abia taudia ese idia hamomokania, taunimanima do idia lohiaia neganai, Dirava ena kara maoromaoro taravatudia do idia badinaia. (Apokalupo 2:10) To, unai kara dika tauna be unai bamona ia karaia lasi, ena be mai momokani ida Iesu ia noia ia do ia laloatao.

To Iesu ese unai kara dika tauna ia hamaoroa unai dina ai ia ida guba dekenai do idia noho, a? Lasi. Badina Iesu be unai dina ai guba dekenai ia daekau lasi. To, ia be “tano lalonai”​—guria gabunai​—dina toi ia noho. (Mataio 12:40; Mareko 10:34) Danu, Iesu be ia toreisi lou murinai, tanobada ai dina 40 ia noho bena guba dekenai ia daekau. (Kara 1:3, 9) Unai dainai, unai kara dika tauna be unai dina ai Iesu ida guba dekenai ia noho diba lasi.

Vadaeni, unai kara dika tauna be edena Paradaiso lalonai do ia noho? Do ia toreisi lou murinai, ia be Iesu ese do ia lohiaia tanobada Paradaisona ai do ia noho. (Kara 24:15; Apokalupo 21:3, 4) Bema oi ura unai Paradaiso bona Dirava ena ura dekenai diba ma haida oi abia, vadaeni Iehova ena Witnes tauna ta oi hereva henia.