Iehova Ena Mamoe Naria Taudia Badinaia
“Umui idia hakaua taudia do umui kamonai henia, bona idia henunai do umui noho, badina idia ese umui idia naria noho.”—HEB. 13:17.
1, 2. Dahaka dainai Iehova be sibona ia gwauraia mamoe naria tauna?
IEHOVA be sibona ia gwauraia mamoe naria tauna. (Ese. 34:11-14) Unai be mai anina bada, badina unai ese ita ia durua ita laloparara Iehova be edena bamona Diravana. Mamoe naria tauna namona be ena mamoe edia mauri ia laloa bada. Ia ese ena mamoe be, rei bona ranu gabuna namona dekenai ia hakaudia lao (Sal. 23:1, 2); dina bona hanuaboi ai ia naridia (Luka 2:8); dagedage animal amo ia gimadia (1 Sam. 17:34, 35); edia natudia ia rosia (Isa. 40:11); idia boio mamoe ia tahua bona idia bero mamoe edia bero ia kumia.—Ese. 34:16.
2 Idaunegai, Dirava ena taunimanima momo be mamoe naria bona biru taudia. Unai dainai Iehova be sibona ia gwauraia mamoe naria tauna neganai, ena hereva idia lalopararalaia. Idia diba, mamoe ia mauri noho bona ia gorere lasi totona, namona be ena naria tauna ese ia naria namonamo bona laloa bada. Unai hegerererena, Iehova ese taunimanima ia naria bona hakaua be mai anina bada. (Mar. 6:34) Iehova ese taunimanima ia naria bona hakaua lasi neganai, hisihisi idia davaria. Idia be maoro bona kerere idia diba lasi, bona ta ese idia ia gimaia diba lasi. Idia be “mamoe naria tauna ese ia naria lasi mamoe bamona.” (1 Kin. 22:17) To, Iehova be mai lalokau ida ena taunimanima edia dabu gaudia ia henia.
3. Inai stadi ai dahaka do ita herevalaia?
3 Ita danu ita laloparara, hari Iehova be mamoe naria tauna bamona. Ia ese ena taunimanima ia do naria noho. Inai stadi lalonai Iehova ese ena mamoe ia hakaua bona edia dabu gaudia ia henia dalana do ita itaia. Bona iena mamoe serina ese iena hakaua bona naria karana amo namo do idia davaria dalana do ita itaia danu.
IESU ENA HENUNAI IDIA GAUKARA MAMOE NARIA TAUDIA
4. Iesu ese Iehova ena mamoe totona dahaka ia karaia?
4 Iehova ese Iesu be Keristani Kongrigeisen ena Kwarana ai ia halaoa. (Efe. 1:22, 23) “Mamoe naria tauna namona” Iesu, be ena Tamana hegerererena. Ia ese ena mamoe serina ia lalokau henia bona naridia. Danu, ia ese ena mamoe totona, ena mauri ia atoa diho. (Ioa. 10:11, 15) Taunimanima ibounai dekenai Iesu ena mauri davalaia boubouna be harihari gauna hereadaena! (Mat. 20:28) Badina Iehova ia ura Iesu “idia abidadama henia taudia ibounai be do idia mase lasi, to mauri hanaihanai do idia abia.”—Ioa. 3:16.
5, 6. (a) Iesu be daidia ia abia hidi iena mamoe serina idia naria totona, bona mamoe serina ese dahaka idia karaia be namo? (b) Dahaka dainai, mai iseda ura ida elda taudia ita badinaia be namo?
5 Edena dala ai mamoe serina ese idia hahedinaraia Iesu Keriso be edia Mamoe Naria Tauna? Iesu ia gwau: “Lauegu mamoe ese egu gadona idia kamonai, bona idia lau diba bona idia be egu murinai idia raka.” (Ioa. 10:27) Mamoe Naria Tauna Namona ena gadona ita kamonai anina be, nega ibounai iena hakaua dalana ita badinaia. Danu, iena henunai idia gaukara mamoe naria taudia ida ita gaukara hebou. Iesu ese ia hahedinaraia, ia hamatamaia gaukarana be ena aposetolo bona hahediba taudia ese idia karaia noho be namo. Ia hamaorodia, iena “mamoe natudia” do idia hadibaia bona ubua. (Mat. 28:20; Ioane 21:15-17 duahia.) Sivarai namona be gabu ibounai idia harorolaia bona hahediba taudia edia namba ia bada ia lao dainai, Iesu ese lo Keristani taudia ia abia hidi kongrigeisen idia naria totona.—Efe. 4:11, 12.
6 Gabeai, Paulo ese Efeso kongrigeisen ena elda taudia ia tore henia, ia gwau: “Lauma helaga ese naria taudia umui ia abia hidi bona Dirava ena kongrigeisen do umui hakaua.” (Kara 20:28) Hari, elda taudia danu be lauma helaga ese ia abia hidi. Edena dala ai? Badina idia be lauma helaga ena siahu amo idia torea Baibel ena taravatu hegeregerena idia abidia hidi. Unai dainai idia ita badinaia neganai, ita hahedinaraia ita be Mamoe Naria Taudia Namodia, Iehova bona Iesu, ita matauraia. (Luka 10:16) Unai dainai, namona be mai iseda ura ida elda taudia ita badinaia. To, badina ma haida dainai unai bamona ita karaia.
7. Edena dala ai elda taudia ese oi idia durua, Iehova oi tura henia namonamo totona?
7 Elda taudia be hanaihanai Baibel amo tadikaka taihu idia hagoadaia bona hakaua. Idia ura lasi edia mauri dalana idia biagua, to idia ura tadikaka taihu dekenai Baibel ena hakaua herevadia idia hadibaia. (2 Kor. 1:24) Unai amo disisen maorodia do idia karaia bona kongrigeisen lalonai lalotamona bona maino do ia noho. (1 Kor. 14:33, 40) Baibel ia gwau, elda taudia be ‘ita idia naria noho.’ Anina be elda taudia idia ura kongrigeisen taudia ta ta idia durua, Iehova idia tura henia totona. Unai dainai, bema idia itaia ta be “dala kererena” ia abia hidi gwauraia o ia badinaia, karaharaga idia durua. (Gal. 6:1, 2; Iuda 22) Unai badina namodia dainai, ita ese ita “idia hakaua taudia do [ita] kamonai henia.”—Heberu 13:17 duahia.
8. Edena dala ai elda taudia ese Dirava ena mamoe idia gimaia?
8 Mamoe naria tauna namona ta, aposetolo Paulo, be Kolose tadikaka ia tore henidia, ia gwau: “Umui naria namonamo, dika tau ta ese inai tanobada ena aonega bona anina lasi hereva koikoidia amo umui ia tarapua. Unai gaudia be taunimanima edia sene herevadia amo, bona idia be inai tanobada ena lalohadai badadia hegeregerena, to Keriso ena hadibaia herevadia hegeregerena lasi.” (Kol. 2:8) Iena hereva ese elda taudia edia sisiba ita kamonai ena badina ma ta ia hahedinaraia. Elda taudia be tadikaka taihu idia gimaia, unai amo gau ta ese edia abidadama do ia hadikaia lasi. Aposetolo Petero ia gwau “peroveta koikoi taudia” bona “hadibaia koikoi taudia” idia ura “manoka taudia idia koia” kara dika idia karaia totona. (2 Pet. 2:1, 14) Hari, elda taudia ese nega maoronai, unai bamona sisiba idia henia be gau badana. Idia be lo Keristani taudia bona mauri idia lalopararalaia namonamo. Danu, elda taudia ai idia do lao lasi neganai, idia hahedinaraia idia be Baibel ena hereva idia lalopararalaia goevagoeva, bona idia be hegeregere ma haida dekenai hereva momokani idia hadibaia totona. (1 Tim. 3:2; Tito 1:9) Idia be lo taudia, idia laloa namonamo bona Baibel amo diba idia abia dainai, mamoe serina dekenai hakaua hereva namodia idia henia diba.
Mamoe naria tauna ese ena mamoe ia gimaia hegeregerena, elda taudia ese Iehova ena mamoe serina idia gimaia be namo (Paragraf 8 itaia)
MAMOE NARIA TAUNA NAMONA ESE MAMOE SERINA IA UBUA BONA GIMAIA
9. Edena dala ai hari, Iesu ese Keristani kongrigeisen ia ubua bona gimaia?
9 Iehova ese ena orea amo tanobada hegegemadai, tadikaka oreana ia hadibaia bona gunalaia noho. Iseda pablikeisen idauidau amo Baibel ena sisiba namodia momo ita abia. Danu, nega haida Iehova ena orea ese revareva o loaloa naria taudia amo hakaua herevadia be elda taudia dekenai ia henia. Unai dala idauidau amo mamoe oreana ese hakaua herevadia idia abia diba.
10. Elda taudia be dahaka do idia karaia, mamoe serina amo idia raka boio taudia idia durua totona?
10 Mamoe naria taudia edia maduna be mamoe serina do idia gimaia bona naria. Elda taudia be edia abidadama ia manoka o kerere badadia idia karaia taudia idia laloa bada danu. (Iamesi 5:14, 15 duahia.) Unai bamona taudia haida be mamoe serina amo idia raka boio bona Dirava hesiai henia karana idia hadokoa. Unai ia vara neganai, elda taudia be dahaka heduru idia henia diba? Do idia gaukara goada unai boio mamoedia idia tahua, bona idia hagoadaia kongrigeisen dekenai idia giroa lou totona. Iesu ia gwau: “Egu Tamana guba dekenai be ia ura lasi inai ladana maragi tauna ta ia boio.”—Mat. 18:12-14.
ELDA EDIA KERERE BE EDENA BAMONA ITA LALOA BE NAMO?
11. Dahaka dainai haida ese elda taudia edia hakaua dalana idia badinaia be auka?
11 Iehova bona Iesu sibodia be Mamoe Naria Taudia goevadaedia. To, kongrigeisen hakaua totona idia abia hidi mamoe naria taudia be goevadae lasi. Unai dainai, haida ese elda taudia edia hakaua dalana idia badinaia be auka. Unai bamona taudia be reana do idia gwau: ‘Elda taudia be ita hegeregerena, goevadae lasi taudia. Dahaka dainai edia sisiba ita kamonai be namo?’ Momokani, elda taudia be goevadae lasi taudia. To, namona be edia kerere o manoka gaudia dekenai lalohadai maorona ita abia.
12, 13. (a) Idaunegai, Iehova ena hesiai taudia haida be dahaka kerere idia karaia? (b) Dahaka dainai Iehova ese ia abia hidi gunalaia taudia edia kerere be Baibel lalonai idia torea?
12 Iehova ese ena taunimanima gunalaia totona ia gaukaralaia taudia haida edia kerere be Baibel lalonai idia torea. Hegeregere, Iehova ese Davida ia abia hidi Israela taudia edia king ai do ia lao. To, gabeai Davida be heudahanai bona ala-ala karana ena tarapu lalonai ia moru. (2 Sam. 12:7-9) Danu, aposetolo Petero mani ita laloa. Ena be Keristani kongrigeisen lalonai maduna badana ia abia, to ia danu be kerere badadia haida ia karaia. (Mat. 16:18, 19; Ioa. 13:38; 18:27; Gal. 2:11-14) Adamu bona Heva edia nega amo ema bona hari, taunimanima ta be ia goevadae lasi, to Iesu sibona.
13 Dahaka dainai Iehova ese Baibel torea taudia ia gaukaralaia, ia abia hidi gunalaia taudia haida edia kerere idia torea totona? Badina ta be, Dirava ia ura hahedinaraia, ia ese goevadae lasi taudia ia gaukaralaia diba ena taunimanima idia hakaua totona. Idaunegai amo ema bona hari, ia be unai bamona ia karaia. Namo lasi elda taudia edia kerere ita laloa dainai, idia ita matauraia lasi o maumauraia. Iehova ia ura idia ita matauraia bona edia hereva ita badinaia.—Esodo 16:2, 8 duahia.
14, 15. Idaunegai, Iehova ese ena taunimanima ia hereva henia dalana amo dahaka ita dibaia?
14 Hari, elda taudia edia hereva ita badinaia be mai anina bada. Idaunegai, nega aukadia lalonai Iehova ese ena taunimanima dekenai hadibaia hereva ia henia dalana mani ita laloa. Israela taudia be Aigupito idia rakatania neganai, Dirava be Mose bona Arona amo idia dekenai hadibaia hereva ia henia. Danu, Israela taudia be hisihisi namba 10 amo idia roho mauri totona, idia badinaia hadibaia hereva be inai: Aria ta do idia karaia, mamoe ta do idia alaia, bona ena rara be iduara ena au kahana kahana bona ataiai do idia dahua. Dirava be maoromaoro ena taunimanima ia hereva henia, a? Lasi. Israela taudia be Mose amo hadibaia hereva idia abia tatau badadia idia kamonai henia. (Eso. 12:1-7, 21-23, 29) Unai ese ia hahedinaraia Mose bona Israela ena tatau badadia be Iehova ena hadibaia hereva idia halasia taudia. Hari, Iehova ese elda taudia be unai dala ai ia gaukaralaidia danu.
15 Unai hegeregerena, reana oi be Baibel ena sivarai ta oi laloatao, unai sivarai lalonai Iehova ese taunimanima o aneru ia gaukaralaia iena hadibaia herevadia be ena taunimanima dekenai idia gwauraia totona. Nega momo Iena hadibaia herevadia ese unai taudia ia hamauridia. Hereva gwauraia taudia be Dirava ena ladanai idia hereva, bona ena taunimanima idia hadibaia dahaka idia karaia be namo dika idia hanaia totona. Reana Aramagedono ai Iehova be unai bamona do ia karaia danu. Unai dainai hari, namona be Iehova bona ena orea ladanai idia gaukara elda taudia idia naria namonamo, namo lasi edia maduna idia gaukaralaia kerere.
‘MAMOE SERINA TAMONA BONA NARIA TAUNA BE TAMONA’
16. Inai hereva “gadona” be dahaka ia herevalaia?
16 Iehova ena taunimanima be “mamoe serina tamona” bona edia “naria tauna be tamona,” ia be Iesu Keriso. (Ioa. 10:16) Iesu be ena hahediba taudia dekenai ia gwau: “Lau be dina iboudiai umui ida do lau noho ela bona inai nega oromana ena dokona.” (Mat. 28:20) Hari, Iesu be guba ai ia lohia noho, bona Satani ena tanobada ia hadikaia ore totona do idia vara gaudia ibounai be ia ese ia biagua. Edena dala ai Iehova ena orea lalonai mai lalotamona ida do ita noho namonamo? Baibel ia gwau: “Hadibaia Tauna ena gadona do umui kamonai, do ia gwau, ‘Dala be inai, ia dekenai do umui raka lao.’” Inai hereva “gadona” be Dirava ena lauma helaga ese Baibel amo ita ia hereva henia, bona Iehova bona Iesu ese elda taudia amo ita idia hereva henia karana ia herevalaia.—Isaia 30:21; Apokalupo 3:22 duahia.
Elda taudia ese tama eiava sina sibona ruma besedia idia gimaia, unai amo hebamo dikana idia dadaraia (Paragraf 17, 18 itaia)
17, 18. (a) Dirava ena taunimanima be dahaka hekwakwanai idia davaria diba? Dahaka gwauhamata namona ita naria noho? (b) Stadi gabena ai dahaka do ita herevalaia?
17 Baibel ia gwau, Satani “be ia boiboi bada laiona bamona ia raka loaloa, do ia ania ore tauna ia tahua noho.” (1 Pet. 5:8) Ia be dagedage animal ta bamona ia loaloa, bona nega maorona ia naria noho idia manoka o idia boio mamoe do ia hadikaia totona. Unai dainai, namona be kongrigeisen bona “mamoe naria tauna” bona eda “mauri ia naria tauna” kahirakahira ita noho. (1 Pet. 2:25) Apokalupo 7:17 be hisihisi badana amo do idia roho mauri taudia ia herevalaia, ia gwau: “Mamoe Natuna, terona badinai ia gini tauna ese idia do ia naria bona idia lohilohi mauri ranuna dekenai idia do ia hakaua lao. Bona Dirava ese edia matana amo mata ranu ibounai do ia dahua ore.” Unai be gwauhamata hereadaena!
18 Keristani elda taudia ese kongrigeisen idia hakaua ena maduna be mai anina bada. Edena dala ai idia hahedinaraia idia ese Iesu ena mamoe serina be dala maorona ai idia kara henidia? Stadi gabena ese inai henanadai do ia haerelaia.