BAIBEL HENANADAI EDIA HAERE
Tomadiho ibounai ese Dirava idia hamoalea, a?
Reana nius haida amo oi itaia, taunimanima be dubu ladanai kara dikadia idia karaia. To, tomadiho haida be Dirava momokanina amo lasi. (Mataio 7:15) Bona Satani ese taunimanima ibounai ia hakaua kerere noho.—1 Ioane 5:19 duahia.
To, Dirava be kara maoromaoro idia ura henia kudou maoro taudia ia tahua noho. (Ioane 4:23) Ia ese idia ia boiria, Baibel amo hereva momokani idia dibaia totona.—1 Timoteo 2:3-5 duahia.
Edena dala ai tomadiho momokanina do oi dibaia?
Iehova Dirava be tomadiho idauidau taudia dekenai hereva momokani ia hadibaia sibona lasi, to idia ia hadibaia idia lalokau heheni totona. (Mika 4:2, 3) Unai dainai, oi itaia diba, tomadiho momokani idia badinaia taudia be ma haida edia namo idia laloa bada.—Ioane 13:35 duahia.
Iehova Dirava be tomadiho momokanina amo taunimanima ibounai ia haboua.—Salamo 133:1, NW.
Tomadiho momokani taudia idia gwau, Baibel ena heduru dainai Dirava idia abidadama henia bona edia noho dalana ia namo. (2 Timoteo 3:16) Danu, idia ese Dirava ena ladana idia abia isi. (Salamo 83:18) Bona idia haroro, idia gwau Dirava ena Basileia sibona ese taunimanima do ia durua. (Daniela 2:44) Idia ese edia ‘diari idia hahedinaraia,’ anina be edia neiba taudia idia kara namo henidia, unai amo Iesu idia tohotohoa. (Mataio 5:16) Unai dainai, ita gwau diba Keristani taudia momokanidia be taunimanima edia ruma idia lao, Dirava ena Basileia ena sivarai namona idia harorolaia totona.—Mataio 24:14; Kara 5:42; 20:20 duahia.