“Eureka Drama” ese Momo Ia Durua

“EUREKA!” Inai hereva ena anina be “Lau davaria vadaeni!” Lagani 1800 lalodiai, California, U.S.A., ai golo tahua taudia be golo idia davaria neganai unai hereva idia boiboilaia. To, tadikaka Charles Taze Russell bona Bible Student taudia ma haida be golo ia hereaia gauna ta idia davaria​—⁠Baibel ena hereva momokani unai. Bona idia ura dikadika ma haida dekenai do idia harorolaia.

Lagani 1914 ai, siti badadia ai taunimanima milioni momo idia lao International Bible Students Association (I.B.S.A.) ese hora eit lalonai idia halasia piksa ladana, “Photo-Drama of Creation” idia itaia totona. Unai piksa be mai ena kala slaid, tau ta ena gado regena, bona miusiki. Unai piksa ese hisiu edia vara negana amo ia lao bona Keriso ena Lagani 1,000 Lohia Negana ena dokona ia hahedinaraia.​—⁠Apok. 20:4.a

To, taoni maragidia bona gunika hanuadia be edena bamona? Hereva momokani idia tahua noho taudia ese unai piksa idia itaia lasi dainai, August 1914 ai I.B.S.A. ese “Eureka Drama” idia halasia. Ia be “Photo-Drama” bamona, to ia lalonai muvini piksa be lasi. Unai “Eureka Drama” be toi idia karaia bona gado idauidau ai idia halasia. Ginigunana be “Eureka X.” Unai drama lalonai idia rekodia tok bona miusiki ibounai idia kamonai. Iharuana be “Eureka Y.” Unai drama lalonai idia rekodia tok bona miusiki idia kamonai, bona slaid idia itaia danu. Ihatoina be “Eureka Family Drama.” Unai drama be ruma bese totona idia karaia. Ia lalonai idia rekodia tok bona ane haida sibona idia kamonai. Unai nega ai davana maragi rekodi masini bona slaid halasia kohudia idia gaukaralaia.

Bible Student taudia be “Eureka Drama” hahedinaraia totona film projector eiava screen badadia idia gaukaralaia lasi. Unai dainai, idia ese Basileia ena sivarai be gunika gabudia bona teritori matamatadia dekenai idia harorolaia diba. “Eureka X” be dina eiava hanuaboi ai idia gadaralaia diba. “Eureka Y” ena slaid projector idia haheaua totona, carbide lamepa (kandolo bamona) idia gaukaralaia. Finnish gado Watch Tower ia gwau: “Ai ese unai piksa be gabu idauidau dekenai ai hahedinaraia diba.” Unai be momokani!

Bible Student taudia be piksa itaia ruma badadia idia rentaia lasi, to nega momo klasrum, kota rumadia, trein steiseni, bona kamonai taudia edia ruma idia gaukaralaia. Nega momo slaid piksa be ariara dekenai idia hahedinaraia. Hegeregere, dabua kurokuro badana ta be animal idia noho rumadia ena haba dekenai idia kapaia bena slaid piksa idia halasia. Anthony Hambuch ia gwau: “Biru taudia ese edia au huahua umadia lalonai idia utua au haida idia atoa bona taunimanima idia helai bona program idia kamonai.” “Eureka Drama” idia hahedinaraia tadikaka ese “Drama wagon” ta lalonai drama ena kohu, idia ta ta edia kohu, kamepa gaudia bona aniani idia udaia.

“Eureka Drama” be grup maragidia bona hutuma ese idia itaia. United States ai, taunimanima 150 idia noho taoni ta ena sikuli ta dekenai “Eureka drama” idia hahedinaraia neganai, taunimanima 400 ese idia itaia. Gabu ma haida ai, taunimanima be kilomita eit bamona idia raka, “Eureka Drama” idia itaia, bena ma kilomita eit idia raka giroa lou. Sweden ai, Charlotte Ahlberg ena neiba taudia be iena ruma maragina dekenai idia hebou bona “Eureka Drama” ena rekodi idia kamonai neganai, edia “kudouna ia hamarerea.” Australia ena gunika ai ia noho maini gabuna ta dekenai, taunimanima 1,500 be “Eureka Drama” idia itaia. Watch Tower ia gwau, haisikuli bona koledi ai “profesa bona stiuden momo be unai drama edia slaid bona idia rekodia tok idia ura henia bada.” Ena be gabu haida dekenai piksa itaia rumadia idia noho, to momo idia ura “Eureka Drama” idia itaia.

HEREVA MOMOKANI UHEDIA IDIA HADOA

“Eureka Drama” be tulu namona. Bible Student taudia ese Baibel stadi grup matamata ta idia hamatamaia totona, tok henia tadikaka ese “Eureka Drama” idia gaukaralaia. Ita diba lasi taunimanima hida ese “Eureka Drama” idia itaia. “Eureka Drama” ena kohu be idia gaukaralaia momo. To, lagani 1915 ai, “Eureka Drama” idia halasia oreadia ibounai 86 amo 14 sibona be edia ripoti idia siaia. Ena be tadikaka ese unai ripoti ibounai idia abia lasi dainai idia lalohisihisi, to unai lagani dokona ena ripoti ese ia hahedinaraia taunimanima 1 milioni mai kahana ese “Eureka Drama” itaia. Taunimanima 30,000 bamona be Baibel bukadia totona idia noinoi.

Taunimanima momo be “Eureka Drama” ena sivarai idia diba lasi, to Australia ia lao Argentina, South Africa ia lao British Isles, India, bona Caribbean ai, taunimanima milioni momo ese unai drama idia itaia. Idia huanai momo be Baibel ena hereva momokani idia davaria​—⁠unai ese golo ia hereaia​—⁠bona idia boiboi “Eureka!”