Iehova ese mai Ura Bada ida Ia Henia Tauna Ia Hanamoa

ISEDA Havaraia Tauna ese taunimanima dekenai dava bada harihari gauna ia henia, unai be ura kwalimu. Danu, unai ura kwalimu amo tomadiho momokani idia habadaia, Dirava ena ladana helagana idia abia isi bona ena palani idia hagugurua taudia ia hanamoa. Iehova ia ura lasi ita ia doria o gari dainai ia ita badinaia. To, ia ura ia ita lalokau henia bona laloa bada dainai, mai eda ura bada ida ia ita badinaia.

Hegeregere, Israela taudia be Sinai ena tano gagaena ai idia noho neganai, Iehova ese ia hadibadia tomadiho rumana ta do idia haginia. Ia gwau: “Lau Lohiabada dekenai harihari gauna do umui henia. Harihari gaudia idia ura idia henia taudia ibounai ese . . . do idia mailaia.” (Eso. 35:5) Israela taudia ta ta be ena ura hegeregerena harihari gauna—herevana dahaka o hida—ia henia Dirava ena ura hagugurua totona. Dahaka idia karaia?

“Harihari gaudia idia ura idia henia taudia ibounai” be mai edia “ura” ida idia henia. Tatau bona hahine be gau idauidau idia henia Iehova ena gaukara durua totona: Pini, taiana herahera, rini, golo, siliva, auri laboralabora, dabua kala bulu, kakakaka sisina, kakakaka momokani, o kurokuro, nani huina, mamoe edia kopina, seal kopina, akasia audia, onuku nadi, oela, bona dehoro. Gabeai, “idia henia gaudia be hegeregere momokani, unai gaukara ibounai karaia totona, bona gau haida idia noho kava.”—Eso. 35:21-24, 27-29; 36:7.

Iehova ia moalelaia gauna be, idia henia kohudia lasi, to mai edia ura ida tomadiho goevana idia durua karana. Danu, edia nega bona goada idia gaukaralaia. Baibel ia gwau: “Dabua gaukara idia diba hahine ibounai ese danu dabua idia hatua . . . nani edia huina idia mogea bona idia hatua.” Ma danu, Iehova ese Besalele dekenai “laloparara bona aonega, [BHḡ]” bona “herahera karaia gaukara idauidau ena diba” ia henia. Dirava ese Besalele bona Oholiaba dekenai diba ia henia, unai amo gaukara ibounai idia hagugurua.—Eso. 35:25, 26, 30-35.

Iehova ese Israela taudia ia noia harihari gaudia idia henia neganai, ia diba mai edia “ura” ida do idia henia tomadiho momokanina durua totona. Dirava ese mai edia kudouna ibounai ida harihari gaudia idia henia taudia ia hakaua bona idia moale bada. Iehova ese ia hahedinaraia mai edia ura ida ia idia hesiai henia taudia ia hanamoa neganai, gau ta dekenai idia dabu lasi, iena ura hagugurua totona. (Sal. 34:9) Bema mai ura bada ida Iehova oi hesiai henia, oi do ia hanamoa.

Tanobada Ibounai Gaukarana Durua Totona Kontribusen Henia Daladia

Aposetolo Paulo ena nega bamona, hari momo ese edia ‘moni sisina idia haboua,’ maua ladana “Tanobada Ibounai Gaukarana Durua Monina” lalonai idia udaia totona. (1 Kor. 16:2) Hua ta ta iboudiai, kongrigeisen ese unai moni be edia tano ai ia noho Iehova ena Witnes taudia edia brens ofesi dekenai idia siaia. Emu tano ai Iehova ena Witnes taudia ese idia gaukaralaia ofesi ta dekenai, emu moni oi siaia diba danu. Idia gaukaralaia ofesi ena ladana oi diba totona, emu tano ai ia noho Iehova ena Witnes taudia edia brens ofesi oi tore henia diba. Brens ofesi ena adres be www.jw.org/ho dekenai oi davaria diba. Inai harihari gaudia oi siaia diba:

KONTRIBUSEN MONINA MAI TARAVATUNA

Taunimanima ese moni idia henia diba, trust fund ai do ia noho totona. To bema nega ta, henia tauna ia dabu bona ia ura ena moni ia abia lou, do idia henia lou. Bema oi ura ma hereva haida oi diba, namona be ai gwauraia vadaeni adres dekenai revareva oi torea.

PALANILAIA HENIA GAUDIA

Kontribusen monina bona kontribusen monina mai taravatuna sibona lasi, to dala ma haida idia noho tanobada hegegemadai Basileia ena gaukara oi durua totona. Idia haida be inai:

Insurens: Bema ta ese life insurance ia hoia o moni be retirement fund ta ai ia atoa, IBSA ena ladana ia torea diba, bena ia mase neganai eiava ia buruka neganai unai moni do idia abia.

Banika Akaun: Ta ena banika ena taravatu hegeregerena, dala ia karaia diba, ia do mauri lalonai IBSA ese ena moni ia gaukaralaia totona, eiava ia mase neganai IBSA ese do ia abia totona.

Share Monina: Ta ese ena share monina be IBSA dekenai harihari gauna bamona ia henia diba.

Tano Bona Ruma: Bema ta be mai ena ruma o tano, ia hoihoilaia diba gauna, IBSA dekenai ia henia diba harihari gauna bamona, eiava do ia noholaia diba ela bona ia mase bena IBSA ese do ia abia. Bema ta ia ura unai bamona ia karaia, namona be iena tano ena brens ofesi ia hadibaia guna.

Will Bona Trust Gaudia: Bema ta ena ura be ia mase neganai IBSA ese tano, ruma, kohu, o moni do ia abia, loea dekenai ia lao be namo, will pepana, mase murinai kohu haria gwaumaoro pepana, dekenai ena ura do ia torea totona. Eiava bema ena moni be trust fund ai ia noho, ia ese IBSA ena ladana be trust agreement pepana ai ia torea diba, unai moni do idia abia totona.

Bema oi ura ataiai ia noho dala ta dekenai ma diba haida oi abia, namona be IBSA dekenai revareva oi siaia. Adres be International Bible Students Association of Papua New Guinea Inc., PO Box 636, Boroko, NCD 111. Telefon 302 0100.