Duahia Taudia Edia Henanadai

Dahaka ese ia hamomokania Ieriko hanuana be nega kwadogina lalonai idia koua hagegea?

Iosua 6:10-15, 20 ia gwau, Israela ena tuari taudia be nega tamona Ieriko hanua idia hagegea, bona dina 6 lalonai unai bamona idia karaia. To dina namba 7 ai, nega 7 hanua idia hagegea murinai, Dirava ese Ieriko ena magu goadadia ia hamorua. Bena Israela taudia idia vareai bona unai hanua idia halusia. To akioleji taudia ese idia davaria gaudia be Baibel ena sivarai ida ia hegeregere, a?

Baibel negadiai, tuari taudia be vaia hanua goadadia idia koua hagegea. Ena be hanua ta idia koua hagegea ena daudau ita diba lasi, to idia kwalimu taudia ese hanua ena kohu, moni, bona gau ma haida idia abia. To akioleji taudia ese Ieriko hanuana ai aniani momo herea idia davaria. Unai hegeregerena, buka ta ladana Biblical Archaeology Review ia gwau: “Idia ese uro idia davaridia bona witi momo herea danu. . . . Palestine ena akioleji taudia be idia hoa, badina nega momo idia ese witi hodu ta eiava rua sibona idia davaria.”

Baibel ia gwau, Iehova ese Israela taudia ia oda henia, Ieriko ena witi do idia abia lasi. (Ios. 6:17, 18) Israela taudia ese siahu matamaia negana ai Ieriko idia tuari henia. Unai be witi gogoa negana dainai, witi be momo herea. (Ios. 3:15-17; 5:10) Ieriko ai witi momo ia noho karana ese ia hahedinaraia Israela taudia be nega kwadogi lalonai Ieriko hanuana idia koua hagegea, Baibel ena hereva hegeregerena.