Matamata Taudia E Edena Dala ai Bapatiso Totona Do Umui Hegaegae?

1, 2. (a) Dahaka dainai bapatiso be mai anina bada abia hidi ta? (b) Ta ia do bapatiso lasi neganai, dahaka ia laloa be namo, bona dahaka dainai?

MATAMATA tauna e, oi be bapatiso oi lalohadailaia noho, a? Bema oibe, oi ura karaia gauna be hahenamo namo hereana. Vanegai stadi amo ita diba, bapatiso be mai anina bada abia hidi ta. Ta ia bapatiso neganai, ia hahedinaraia Iehova dekenai ia gwauhamata ena mauri ibounai lalonai iena ura do ia atoa guna bona ia do ia hesiai henia ela bona hanaihanai. Bema oi hegeregere unai abia hidi oi karaia, unai be sibona emu abia hidi, bona oi karaia gwauhamata ena anina oi lalopararalaia, bapatiso oi abia diba.

² To bema oi daradara be edena bamona? Eiava oi ura bapatiso, to emu tama sina ese oi idia koua, badina idia ura Keristani maurina oi manadalaia guna be edena bamona? Herevana dahaka, oi lalomanoka lasi. To emu hetura karana Iehova ida oi hagoadaia noho, unai amo gabeai oi bapatiso diba. Vadaeni edena dala ai inai kahana dekenai tahua gaudia oi atoa diba? (1) Oi abia dae gaudia, (2) emu kara, bona (3) oi moalelaia gaudia.

OI ABIA DAE GAUDIA

3, 4. Timoteo ena haheitalai amo matamata taudia be dahaka idia dibaia?

³ Inai henanadai edia haere mani oi laloa: Dahaka dainai lau abia dae Dirava be ia noho? Edena bamona lau diba Baibel be Dirava ena Hereva? Dahaka dainai lau abia dae Dirava ena kara maoromaoro taravatu lau badinaia be namo, to inai tanobada ena mauri dalana lau badinaia be dika? Unai henanadai dainai oi daradara lasi. To oi do idia durua aposetolo Paulo ena sisiba oi badinaia totona. Ia gwau: “Umui sibona dekenai do umui hamomokania Dirava ena ura be ia namo, ia ese ia abia dae bona ia goevadae.” (Roma 12:2) Dahaka dainai unai oi karaia be namo?

⁴ Baibel lalonai ia noho sivarai ta mani ita laloa. Timoteo be Toretore Helagadia ia diba namonamo. Ia “beibi negana amo,” iena sinana bona ena tubuna hahine ese ia idia hadibaia. To, Paulo ese Timoteo ia hamaoroa: “Oi dibaia gaudia do oi badinaia noho, bona oi abia dae unai gaudia be momokani.” (2 Tim. 3:14, 15) Timoteo be hereva momokani ia abia dae momokani. Iena sinana bona tubuna hahine ese ia idia hamaoroa dainai lasi, to ia sibona ese unai ia abia dae.—Roma 12:1 duahia.

5, 6. Dahaka dainai matamata negana ai emu “darana” oi gaukaralaia be namo?

⁵ Oi be edena bamona? Reana nega daudau lalonai Baibel ena hereva momokani oi dibaia. Bema oi be unai bamona, namona be sibona oi nanadaia, dahaka dainai lau abia dae inai be hereva momokani? Unai ese oi do ia durua turadia edia laloani karadia, tanobada ena lalohadai koikoidia, o oi sibona emu hemami oi dadaraia totona.

⁶ Matamata negana ai emu “darana” oi gaukaralaia neganai, emu turadia edia henanadai oi haerelaidia diba. Hegeregere: ‘Edena bamona oi diba Dirava ia noho? Dahaka dainai lalokau Diravana ese hisihisi ia koua lasi? Dahaka dainai oi abia dae Dirava be idaunega amo ema bona hari ia noho bona do ia noho hanaihanai?’ Bema oi hegaegae namonamo, unai bamona henanadai ese emu abidadama do idia hamanokaia lasi, to oi do idia hagoadaia sibona emu stadi karana oi goadalaia totona.

7-9. Inai kahana ladana “What Does tha Bible Really Teach?” ena namo herevalaia.

⁷ Bema sibona emu stadi oi karaia, henanadai idauidau oi haerelaia diba, do oi daradara lasi, bona Baibel amo oi dibaia gaudia do oi abia dae momokani. (Kara 17:11) Ita idia durua tulu be momo herea. Oibe, iseda buka bona magasin ese iseda Havaraia Tauna Badana bona ia havaraia gaudia idia herevalaia, bona unai ese momo ia durua. Ma danu, matamata taudia momo be iseda websait ai ia noho kahana ladana “What Does the Bible Really Teach?” idia moalelaia. Bema hegeregere, jw.org oi gaukaralaia diba. BIBLE TEACHINGS ena kahana itaia. Unuseni idia noho herevadia ese oi do ia durua Baibel ena hereva oi abia dae totona.

⁸ Oi be Baibel oi diba namonamo dainai, reana unai kahana ai idia noho henanadai haida oi haerelaia diba. To dahaka dainai oi abia dae emu haere be maoro? Unai kahana ese oi ia hagoadaia Baibel siri haida oi duahia bona emu lalohadai oi torea totona. Unai amo ma haida dekenai Baibel ena hahediba herevadia oi hahedinaraia namonamo diba. Inai kahana ladana “What Does the Bible Really Teach?” ese matamata taudia momo ia durua. Bema oi hegeregere, inai kahana be sibona emu stadi ai oi gaukaralaia diba?

⁹ Baibel ena hereva oi abia dae neganai, oi hahedinaraia oi hegeregere bapatiso totona. Taihu matamata ta ia gwau: “Lau do bapatiso lasi neganai, Baibel lau stadilaia bona lau abia dae inai be tomadiho momokani. Bona egu mauri dinadia ta ta ai unai lau badinaia.”

EMU KARA

10. Dahaka dainai ia bapatiso Keristani tauna ena abidadama be ena kara amo do ia hedinarai?

¹⁰ Baibel ia gwau: “Bema abidadama be mai ena kara lasi, ia be mase gauna.” (Iam. 2:17) Bema emu abidadama be ia goada, emu kara amo unai do ia hedinarai. Edena bamona kara? Baibel ia gwau: “Namona be emui kara idia helaga bona Dirava badinaia karadia umui hahedinaraia.”—2 Petero 3:11 duahia.

11. “Emui kara idia helaga” ena anina be dahaka?

¹¹ “Emui kara idia helaga,” ena anina be emu kara ia goeva be namo. Emu kara be edena bamona? Hegeregere, idia hanaia hua 6 mani oi laloa. Edena bamona oi hahedinaraia emu “darana” oi hadibaia dainai, maoro bona kerere edia idau oi gwauraia diba? (Heb. 5:14) Hahetoho eiava turadia edia laloani herevadia oi dadaraia negana ta oi laloatao diba, a? Sikuli ai emu kara ese emu abidadama ia hahedinaraia, a? Oi be emu abidadama oi gwauraia hedinarai, eiava oi ura lasi emu sikuli turadia ese oi idia hevasehalaia dainai, idia ida oi lalotamona, a? (1 Pet. 4:3, 4) Momokani, ita ibounai be goevadae lasi. Iehova idia hesiai henia taudia haida danu be reana gari dainai, taunimanima vairanai edia abidadama idia gwauraia lasi. To, Iehova dekenai ia gwauhamata tauna be do ia moale, badina ia be Dirava ena ladana ia abia, bona ena kara amo unai ia hahedinaraia.

12. “Dirava badinaia karadia” be dahaka, bona unai karadia be edena bamona oi laloa be namo?

¹² “Dirava badinaia karadia” be dahaka? Idia be kongrigeisen ai oi karaia gaukara idauidau, hegeregere hebou lao henia karana bona haroro gaukara. Bona ma haida ese idia itaia lasi hesiai gaukara ma haida, hegeregere lalona ai oi gwauraia guriguridia bona sibona emu stadi. Iehova dekenai ena mauri ia gwauhamatalaia tauna ese unai do ia laloa bada. Ia ese King Davida ena kara do ia tohotohoa, ia gwau: “Lauegu Dirava e, lau ura dikadika oiemu ura do lau karaia. Oiemu taravatu be lauegu kudouna lalonai ia noho.”—Sal. 40:8.

13, 14. Dahaka ese oi do ia durua, “Dirava badinaia karadia” oi hahedinaraia totona, bona dahaka ese matamata taudia haida ia durua?

¹³ “Dirava badinaia karadia” oi hahedinaraia totona, inai henanadai mani oi lalodia. Hegeregere: “Emu guriguri herevadia ese edena dala ai emu lalokau Iehova dekenai idia hahedinaraia?” “Sibona emu stadi ai dahaka oi karaia?” “Ena be emu tama sina idia haroro lasi, to oi lao, a?”^[1] Unai bamona henanadai edia haere oi torea. Unai ese oi do ia durua, sibona emu guriguri, stadi, bona haroro gaukara dekenai tahua gaudia oi atoa totona.

¹⁴ Bapatiso idia lalohadailaia matamata taudia be unai henanadai edia haere idia torea bona unai ese idia ia durua. Taihu ta ladana Tilda ia gwau, unai henanadai edia haere ia torea neganai, unai ese ia ia durua tahua gaudia ia atoa totona. Bona metairametaira unai tahua gaudia ia hagugurua, bena lagani ta murinai ia bapatiso. Tadikaka matamata, Patrick, ia gwau: “Lauegu tahua gaudia lau diba. To lau toredia karana ese lau ia hagoadaia lau hagugurudia totona.”

15. Dahaka dainai ta sibona ese abia hidi do ia karaia ena mauri ia gwauhamata totona?

¹⁵ Mai anina bada henanadai ta be inai: “Bema emu tama sina bona turadia ese Iehova hesiai henia karana idia hadokoa, oi be Ia do oi hesiai henia noho a?” Laloatao, idia gwauhamata bona bapatiso taudia ta ta be Iehova vairanai do idia gini. Namo lasi ma haida o emu tama sina dainai ia oi hesiai henia. Bema emu kara idia helaga bona Dirava badinaia karadia oi karaia, oi hahedinaraia oi be hereva momokani oi abia dae bona oi ura bapatiso.

OI MOALELAIA GAUDIA

16, 17. (a) Dahaka dainai ta be Keristani tauna ai ia lao be namo? (b) Mauri davalaia boubou be edena dala ai ita haheitalaia diba?

¹⁶ Mose ena Taravatu ia diba momo tauna ta be Iesu ia nanadaia: “Edena taravatu be hereadae?” Iesu ia gwau: “Namona be Iehova emu Dirava oi lalokau henia mai emu kudouna ibounai, mai emu mauri ibounai, bona mai emu darana ibounai ida.” (Mat. 22:35-37) Keristani kara namodia ita hahedinaraia bona ita bapatiso ena badina badana be dahaka? Mai kudouna ibounai ida Iehova ita lalokau henia. Unai lalokau oi habadadia totona, namona be Iehova ese ia henia harihari gauna hereadaena oi laloa dobu, iena Natuna ena mauri davalaia boubouna unai. (2 Korinto 5:14, 15; 1 Ioane 4:9, 19 duahia.) Mauri davalaia boubouna bona oi ia durua dalana oi laloa neganai, unai ese oi do ia durua kara ta oi karaia totona.

¹⁷ Mani oi laloa, oi be kahirakahira oi maloa bona ta ese oi ia hamauria. Mai moale ida do oi lao ruma, emu tauanina oi hakaukaua, bena ia vara gauna do oi laloaboio, a? Lasi! Do oi mamia oi ia hamauria tauna dekenai oi be mai emu abitorehai. Badina oi be ia dainai oi mauri! Iehova Dirava bona Iesu Keriso dekenai ita be mai iseda abitorehai badana. Bema Iesu ese mauri davalaia boubouna ia henia lasi, ita ibounai be kara dika bona mase lalonai do ita maloa bamona. To, unai lalokau bada karana dainai, vaira nega ai tanobada paradaiso ai ita mauri hanaihanai diba!

18, 19. (a) Dahaka dainai Iehova dekenai emu mauri oi gwauhamatalaia be namo? (b) Edena dala ai Iehova hesiai henia karana ese emu mauri ia hanamoa?

¹⁸ Iehova ese oi dainai ia karaia karana oi laloa bada, a? Bema oibe, Iehova dekenai emu mauri oi gwauhamatalaia bona oi bapatiso diba. Laloatao, gwauhamata ena anina be oi be Iehova dekenai oi gwauhamata iena ura do oi karaia ela bona hanaihanai, herevana dahaka do ia vara. Oi gari unai abia hidi oi karaia totona, a? Lasi! Laloatao, Iehova be oi ia laloa bada, bona ia ese “mai momokani ida ia idia tahua taudia edia davana do ia henia.” (Heb. 11:6) Bema emu mauri be Iehova dekenai oi gwauhamatalaia bona oi bapatiso, do oi moale bona noho namonamo! Tadikaka ta be mauri lagani 10 ia do abia lasi neganai, ia bapatiso. Hari ena mauri lagani be 24, ia gwau: “Bema unai nega ai egu mauri lagani be bada, reana dobu gaudia do lau lalopararalaia, to Iehova dekenai lau gwauhamata dainai lau moale, badina unai ese tanobada karadia amo lau ia gimaia.”

¹⁹ Iehova be Satani amo ia idau momokani. Satani be sibona ena ura ia tahua bona ia idia durua taudia dekenai noho hanaihanai ahuna ia henia diba lasi. Oibe, unai ia karaia diba lasi, badina ia danu be helaro lasi. Vadaeni edena bamona ia ese oi dekenai gau namona ia henia diba? Bema ia oi badinaia, ia hegeregerena, emu vaira nega be do ia dika!—Apok. 20:10.

20. Dirava dekenai oi gwauhamata bona bapatiso totona, dahaka oi karaia be namo? (Maua ladana “Emu Hetura Karana Iehova ida Hagoadaia Dalana” itaia.)

²⁰ Emu mauri be Iehova dekenai oi gwauhamatalaia be abia hidi maorona. Oi hegeregere unai oi karaia totona, a? Bema oibe, oi naria lasi. Ma danu, bema oi ura naria sisina, inai stadi ai ita herevalaia gaudia oi karaia. Paulo be Filipi taudia ia tore henia, ia gwau: “To guna ita goada ita lao noho hegeregerena, unai dala tamona ai ita raka namonamo noho be namo.” (Fili. 3:16) Bema unai hereva oi badinaia, do oi ura Iehova dekenai emu mauri oi gwauhamatalaia bona oi bapatiso.